ᱵᱟᱹᱫᱽ ᱵᱟᱹᱭᱦᱟᱹᱲ ᱥᱟᱱᱟᱢ ᱯᱟᱲᱟ
ᱧᱮᱞᱚᱜ ᱟᱹᱰᱤ ᱨᱟᱹᱥᱠᱟᱹ ᱦᱟᱦᱟᱲᱟ
ᱫᱷᱤᱨᱤ ᱫᱟᱨᱮ ᱱᱟᱹᱬᱤ ᱪᱮᱬᱮ ᱪᱤᱯᱨᱩ
ᱥᱟᱯᱲᱟᱣ ᱮᱱ ᱠᱚ ᱥᱟᱨᱚ ᱢᱤᱨᱩ ᱾
ᱛᱩᱲᱤ ᱵᱟᱦᱟ ᱛᱮ ᱫᱷᱟᱹᱨᱛᱤ ᱨᱟᱹᱱᱤ
ᱵᱟᱸᱫᱮ ᱮᱱᱟᱭ ᱥᱟᱥᱟᱝ ᱥᱟᱹᱲᱤ
ᱥᱩᱨ ᱨᱮ ᱰᱤᱸᱜᱚᱨ ᱪᱷᱚᱞᱟ ᱢᱮᱱᱟᱭ
ᱥᱟᱡᱟᱣ ᱠᱟᱛᱮ ᱱᱟᱶᱟ ᱡᱟᱶᱟᱭ ᱾
ᱵᱚᱦᱚᱜ ᱨᱮ ᱢᱤᱞᱪᱷᱟᱹ ᱥᱟᱥᱟᱝ ᱫᱟᱹᱦᱲᱤ
ᱥᱟᱥᱟᱝ ᱦᱟᱹᱨᱭᱟᱹᱲ ᱥᱟᱠᱟᱢ ᱫᱷᱩᱛᱤ
ᱱᱟᱶᱟ ᱡᱟᱶᱟᱭᱮ ᱥᱟᱡᱟᱣᱮᱱ ᱪᱷᱚᱞᱟ
ᱟᱨ ᱦᱚᱸ ᱥᱟᱶᱛᱮ ᱵᱟᱹᱨᱭᱟᱹᱛ ᱠᱚᱲᱟ ᱾
ᱢᱮᱱᱟᱭ ᱥᱟᱢᱟᱝ ᱨᱮ ᱴᱤᱥᱤ ᱵᱤᱴᱤ
ᱦᱟᱣ ᱰᱟᱸᱰᱟ ᱮᱛᱟᱝ ᱞᱩᱴᱤ
ᱞᱤᱞ ᱥᱮᱨᱢᱟ ᱵᱚᱦᱚᱜ ᱴᱩᱴᱩᱨᱤ
ᱨᱟᱹᱱᱤ ᱮᱱᱟᱭ ᱵᱤᱫᱟᱹᱭᱚᱜ ᱵᱟᱯᱞᱟᱨᱤ ᱾
ᱢᱮᱢᱮᱱ ᱠᱟᱱᱮ ᱡᱚᱴᱮᱫ ᱤᱧ ᱚᱠᱚᱭ
ᱮᱢᱟᱭᱟᱹᱧ ᱨᱤᱫᱟᱹᱭ ᱫᱟᱱ ᱩᱱ ᱥᱚᱢᱚᱭ
ᱛᱤᱸᱜᱩᱱᱟᱭ ᱢᱩᱛᱩᱞ ᱠᱷᱩᱱᱴᱤ ᱡᱟᱦᱟᱸᱭ
ᱥᱟᱶᱛᱮᱧ ᱥᱮᱱᱚᱜ ᱩᱱᱤ ᱜᱮ ᱡᱟᱶᱟᱭ ᱾
ᱫᱚᱝ ᱮᱱᱮᱡ ᱟᱛᱮ ᱵᱷᱟᱶᱟᱨ
ᱦᱮᱡ ᱮᱱᱟᱭ ᱵᱟᱯᱞᱟ ᱥᱟᱶᱟᱨ
ᱛᱩᱲᱤ ᱡᱚ ᱫᱚ ᱚᱨᱚᱝ ᱛᱤᱨᱤᱭᱚ
ᱦᱤᱥᱤᱫ ᱦᱚᱭ ᱥᱟᱶ ᱞᱤᱭᱚᱨ ᱠᱚᱫᱚᱨᱭᱚ ᱾
ᱥᱟᱨᱚ ᱢᱤᱨᱩ ᱥᱮᱨᱮᱧ ᱨᱟᱦᱟ ᱛᱮ
ᱟᱸᱫᱚᱲ ᱟᱠᱟᱱ ᱫᱷᱟᱹᱨᱛᱤ ᱥᱟᱶᱛᱮ
ᱵᱟᱯᱞᱟ ᱵᱮᱣᱨᱟᱭ ᱞᱟᱹᱭ ᱯᱟᱥᱱᱟᱣ
ᱥᱩᱨ ᱥᱟᱺᱜᱤᱧ ᱵᱟᱦᱟ ᱠᱚ ᱥᱟᱨᱦᱟᱣ ᱾
ᱥᱮᱴᱮᱨ ᱮᱱ ᱠᱚ ᱯᱮᱲᱟ ᱯᱩᱨᱵᱷᱩ ᱥᱟᱱᱟᱢ
ᱩᱨᱩ ᱵᱷᱟᱶᱟᱨ ᱯᱤᱯᱤᱲᱤᱭᱟᱹᱝ ᱥᱟᱱᱟᱢ
ᱯᱮᱲᱟ ᱫᱟᱨᱟᱢ ᱥᱩᱨ ᱥᱟᱺᱜᱤᱧ ᱵᱟᱦᱟ
ᱟᱹᱬᱛᱤ ᱮᱫ ᱠᱚ ᱛᱷᱩᱯᱱᱟᱹᱜ ᱵᱟᱦᱟ ᱨᱟᱥᱟ ᱾
***
