ᱢᱚᱱᱮᱨ ᱢᱚᱛᱚᱱ ᱨᱩᱯᱮᱢ ᱡᱚᱛᱚᱱ
ᱞᱚᱵᱷᱟᱣ ᱢᱚᱱᱮ ᱵᱟᱭ ᱵᱷᱟᱹᱨᱛᱤᱜ
ᱪᱮᱛᱟᱱ ᱨᱮᱢᱟ ᱞᱤᱞ ᱥᱮᱨᱢᱮ
ᱞᱟᱛᱟᱨ ᱦᱟᱹᱨᱭᱟᱹᱲ ᱫᱷᱟᱹᱨᱛᱤ ᱾
ᱦᱤᱥᱤᱫ ᱦᱚᱭ ᱛᱮ ᱥᱟᱠᱟᱢ ᱮ ᱛᱷᱟᱭᱚᱭ
ᱨᱟᱹᱥᱠᱟᱹ ᱛᱮ ᱦᱤᱞᱟᱹᱣᱜ ᱵᱟᱦᱟ ᱢᱚᱱᱮ ᱟᱭᱳ
ᱛᱮᱨᱫᱮᱡ ᱢᱟᱨᱥᱟᱞ ᱨᱮ ᱰᱤᱜᱽ ᱰᱤᱜᱽ ᱠᱩᱱᱟᱹᱢᱤ
ᱪᱟᱸᱫᱚᱭ ᱡᱩᱞᱩᱜ ᱧᱩᱛᱟᱹᱛ ᱰᱟᱦᱟᱨ ᱦᱚᱨ ᱛᱮ
ᱵᱚᱸᱜᱟ ᱢᱟᱹᱭ ᱥᱟᱶᱮ ᱯᱷᱩᱞᱩᱜ ᱾
ᱥᱚᱛ ᱢᱟᱱᱟᱣ ᱵᱟᱛᱟᱣ ᱞᱟᱹᱜᱤᱫ ᱛᱮ
ᱚᱵᱩᱡᱽ ᱮᱠᱟ ᱵᱚᱠᱟ
ᱱᱚᱶᱟ ᱯᱩᱨᱤ ᱨᱮ ᱢᱮᱱᱟᱢ ᱨᱮᱦᱚᱸ
ᱥᱮᱭᱟᱱ ᱚᱡᱷᱟ ᱥᱚᱠᱷᱟ ᱾
ᱡᱩᱞ ᱢᱟᱨᱥᱟᱞ ᱮᱱᱟ
ᱫᱷᱟᱹᱨᱛᱚ ᱨᱮ ᱫᱷᱚᱨᱚᱢ ᱢᱟᱨᱥᱟᱞ ᱵᱟᱹᱛᱤ
ᱜᱮᱭᱟᱱ ᱨᱮᱱᱟᱜ ᱯᱚᱴᱠᱚᱡ ᱡᱟᱝ
ᱥᱟᱜᱮᱱ ᱮᱱᱟ ᱩᱴᱤ ᱩᱴᱤ ᱾
ᱱᱚᱶᱟ ᱥᱚᱝᱥᱟᱨ ᱥᱟᱨᱟ
ᱟᱢ ᱜᱮᱢ ᱡᱚᱛᱚᱱ ᱦᱟᱨᱟᱭ
ᱢᱚᱱᱮ ᱫᱤᱥᱟᱹᱦᱟᱨᱟ
ᱦᱚᱭ ᱦᱤᱥᱤᱫ ᱜᱮ ᱟᱨᱟ ᱵᱟᱨᱟ ᱾
ᱟᱢᱟᱜ ᱢᱟᱭᱟ ᱢᱟᱦᱬᱟ
ᱚᱠᱚᱭ ᱦᱚᱸ ᱵᱟᱠᱚ ᱵᱩᱡᱷᱟᱹᱣ
ᱱᱚᱡᱚᱨ ᱨᱮᱱᱟᱜ ᱦᱟᱦᱟᱲᱟ
ᱢᱚᱱᱮ ᱡᱤᱣᱤ ᱜᱮ ᱜᱷᱟᱱᱮᱢ ᱨᱤᱡᱷᱟᱹᱣ ᱾
ᱥᱤᱠᱷᱤᱛ ᱠᱚ ᱥᱮᱪᱮᱫᱚᱜ ᱠᱟᱱ
ᱟᱢ ᱠᱷᱚᱱ ᱢᱟᱭᱟ ᱡᱩᱜᱤ
ᱟᱢᱟᱜ ᱢᱟᱭᱟ ᱢᱟᱦᱬᱟ ᱠᱷᱚᱱ
ᱥᱮᱪᱮᱫᱚᱜ ᱟᱠᱚ ᱡᱤᱵᱚᱱ ᱡᱩᱜᱤ ᱾
ᱢᱚᱱᱮ ᱡᱤᱣᱤ ᱚᱱᱛᱚᱨ ᱠᱷᱚᱱ
ᱟᱞᱟᱝ ᱜᱮ ᱞᱟᱝ ᱠᱟᱛᱷᱟᱜ
ᱟᱞᱟᱝ ᱟᱜ ᱠᱟᱛᱷᱟ ᱜᱟᱛᱷᱟᱣ ᱛᱮ
ᱱᱚᱶᱟ ᱡᱤᱵᱚᱱ ᱜᱮ ᱵᱮᱱᱟᱣᱜ ᱠᱷᱟᱛᱟ ᱾
***
