ᱚᱛ ᱦᱚᱸ ᱟᱢᱟᱜ ᱜᱮ
ᱥᱮᱨᱢᱟ ᱦᱚᱸ ᱟᱢᱟᱜ ᱜᱮ
ᱤᱧ ᱦᱚᱸ ᱟᱢᱼᱥᱟᱶ ᱡᱩᱜᱮ ᱡᱚᱱᱚᱢ ᱢᱤᱱᱟᱹᱧ ᱜᱮ ᱿
ᱚᱛ ᱫᱟᱥᱟᱣᱜ ᱨᱮ
ᱥᱮᱨᱢᱟ ᱥᱟᱦᱟᱜ ᱨᱮ
ᱫᱩᱞᱟᱹᱲᱤᱧ ᱛᱟᱦᱮᱸᱱᱟ ᱫᱤᱱᱟᱹᱢ ᱫᱤᱱ ᱟᱢ ᱥᱟᱶᱼᱨᱮ ᱿
ᱥᱤᱥᱤᱨ ᱡᱟᱹᱞᱤ ᱠᱟᱹᱨᱤ
ᱠᱟᱹᱨᱫᱷᱟᱹᱱᱤ ᱥᱟᱹᱨᱤ
ᱟᱢᱟᱜ ᱨᱩᱯ ᱜᱮ ᱥᱟᱨᱦᱟᱣ ᱟᱠᱟᱧ ᱛᱟᱦᱮᱱ ᱤᱧ ᱯᱟᱹᱨᱤ ᱿
ᱵᱟᱰᱚᱦᱤᱭᱟᱜ ᱜᱩᱱ
ᱵᱤᱨᱫᱟᱹ ᱧᱮᱞ ᱥᱟᱹᱜᱩᱱ
ᱤᱧ ᱥᱩᱨᱼᱨᱮ ᱢᱮᱱᱟᱢ ᱠᱷᱟᱱ ᱫᱤᱱᱟᱹᱢ ᱜᱮ ᱯᱷᱟᱹᱜᱩᱱ ᱿
ᱜᱚᱴᱟᱧ ᱠᱚᱭᱚᱜ ᱟᱹᱪᱩᱨ
ᱟᱢ ᱥᱮᱱ ᱜᱮ ᱢᱮᱫ ᱞᱩᱛᱩᱨ
ᱵᱟᱹᱱᱩᱜ ᱟᱫᱚ ᱢᱩᱴᱷᱟᱹᱱ ᱟᱢ ᱞᱮᱠᱟ ᱥᱩᱨᱼᱥᱩᱯᱩᱨ ᱿
ᱱᱤᱛ ᱩᱛᱟᱹᱨ ᱱᱤᱛ
ᱚᱠᱛᱚ ᱱᱟᱹᱯᱤᱛ
ᱨᱤᱯᱤᱫ ᱡᱟᱹᱯᱤᱫ ᱨᱮᱦᱚᱸ ᱢᱚᱦᱚᱨ ᱟᱢᱟᱜ ᱤᱧ ᱪᱟᱹᱨᱤᱛ ᱿
ᱥᱤᱝᱜᱟᱹᱲ ᱥᱮᱛᱟᱜ ᱥᱤᱧ
ᱩᱭᱦᱟᱹᱨᱮᱫ ᱢᱤᱭᱟᱹᱧ ᱤᱧ
ᱟᱢᱤᱧ ᱧᱮᱞ ᱢᱮᱠᱷᱟᱱ ᱜᱮ ᱢᱚᱱᱮ ᱞᱚᱵᱷᱟᱣᱜ ᱠᱟᱱ ᱛᱤᱧ ᱿
ᱵᱟᱝ ᱫᱩᱧ ᱞᱤᱰᱩᱨ ᱰᱟᱹᱨ
ᱵᱟᱝ ᱫᱚ ᱨᱩᱠᱩ ᱧᱩᱨᱟᱜ ᱤᱧ ᱦᱟᱹᱨ
ᱵᱟᱰᱟᱭ ᱥᱟᱹᱱᱟᱹᱧ ᱟᱴᱮᱱ ᱵᱟᱦᱟ ᱧᱩᱛᱩᱢ ᱚᱠᱚᱭᱟᱜ ᱪᱷᱟᱹᱴᱭᱟᱹᱨ ᱿
ᱟᱢ ᱫᱚ ᱫᱩᱞᱟᱹᱲ ᱵᱟᱦᱟ ᱥᱟᱠᱟᱢ ᱛᱮ ᱥᱟᱡᱟᱣ
ᱵᱚᱸᱜᱟ ᱵᱳᱨᱳ ᱠᱚᱭᱤᱡ ᱥᱟᱨᱦᱟᱣ
ᱠᱤᱸᱴᱟᱫ ᱯᱟᱸᱴᱮᱫ ᱱᱟᱹᱬᱤ ᱨᱮ ᱵᱟᱦᱟ ᱯᱮᱨᱮᱡ ᱡᱷᱟᱵᱽᱨᱟᱣ ᱿
ᱚᱠᱟ ᱟᱹᱨᱤ ᱪᱚᱭ ᱛᱚᱞᱻᱟᱠᱟᱫᱤᱧ
ᱪᱮᱫ ᱚᱨᱥᱚᱝ ᱪᱚᱭ ᱚᱨᱻᱟᱠᱟᱫᱤᱧ
ᱪᱷᱟᱱ ᱫᱟᱲᱮ ᱜᱮ ᱫᱩᱞᱟᱹᱲ ᱟᱢ ᱥᱮᱱᱮ ᱴᱟᱱᱟᱣᱼᱤᱧ ᱿
ᱥᱮᱨᱢᱟ ᱥᱮᱱ ᱜᱮ ᱟᱹᱛᱤᱧ ᱱᱟᱹᱬᱤ
ᱵᱚᱸᱜᱟ ᱠᱚᱣᱟᱜ ᱡᱷᱚᱢᱚᱨ ᱯᱟᱹᱭᱬᱤ
ᱫᱩᱞᱟᱹᱲ ᱛᱮ ᱛᱚᱞ ᱟᱠᱟᱱ ᱟᱢ ᱥᱟᱶ ᱤᱧᱟᱜ ᱢᱟᱭᱟ ᱱᱟᱹᱬᱤ ᱿
ᱫᱷᱟᱹᱨᱛᱤ ᱨᱤᱧ ᱛᱟᱦᱮᱸ ᱞᱮᱱ ᱦᱮᱥᱮᱡ ᱥᱮᱠᱮᱡ ᱡᱟᱣ
ᱥᱮᱨᱢᱟ ᱨᱮ ᱟᱢ ᱥᱟᱶ ᱱᱤᱛᱚᱜ ᱥᱚᱨᱚᱜᱤᱧ ᱥᱟᱡᱟᱣ
ᱫᱮᱭᱟ ᱜᱤᱰᱤ ᱠᱟᱜ ᱟᱹᱧ ᱥᱟᱱᱟᱢ ᱵᱚᱨᱼᱵᱚᱛᱚᱨ ᱞᱟᱡᱟᱣ ᱿
ᱢᱚᱱᱮ ᱛᱤᱧᱮᱢ ᱡᱤᱛᱠᱟᱹᱨ ᱠᱮᱫ
ᱮᱢᱟᱫᱤᱧᱟᱢ ᱫᱩᱞᱟᱹᱲ ᱜᱟᱵᱮ ᱛᱮᱫ
ᱪᱟᱠᱷᱟ ᱟᱹᱱᱟᱹᱧ ᱨᱤᱦᱤᱴ ᱚᱛᱮᱛ ᱨᱮᱱᱟᱜ ᱞᱟᱹᱵᱤᱫ ᱛᱮᱫ ᱿
ᱢᱩᱴᱷᱟᱹᱱ ᱟᱢᱟᱜ ᱜᱮᱡᱮᱨ ᱛᱟᱵᱮᱱ
ᱦᱚᱲᱢᱚ ᱠᱮᱴᱮᱡ ᱡᱮᱞᱮᱠ ᱴᱟᱜᱷᱮᱱ
ᱫᱟᱲᱮ ᱛᱟᱢ ᱫᱚ ᱟᱴᱮᱱ ᱞᱟᱲ ᱵᱤᱨ ᱵᱤᱨᱟᱹᱫᱟᱹᱞᱤ ᱛᱟᱨᱮᱱ ᱿
ᱡᱷᱩᱲ ᱱᱟᱹᱬᱤ ᱜᱚᱢᱦᱮᱲ ᱩᱢᱩᱞ ᱛᱟᱢ
ᱟᱢ ᱴᱷᱮᱱ ᱠᱷᱚᱱ ᱫᱩᱞᱟᱹᱲᱤᱧ ᱧᱟᱢ
ᱟᱢ ᱦᱚᱸ ᱫᱩᱞᱟᱹᱲ ᱱᱚᱛᱮ ᱜᱮᱢ ᱠᱚᱭᱚᱜ ᱫᱟᱨᱟᱢ ᱿
ᱫᱩᱞᱟᱹᱲ ᱨᱮ ᱵᱟᱹᱱᱩᱜ ᱤᱧᱟᱜ ᱦᱤᱫᱤᱡ
ᱢᱚᱱᱮ ᱟᱢ ᱥᱮᱱ ᱯᱤᱰᱜᱟᱹᱣ ᱯᱤᱫᱤᱡ
ᱥᱟᱡᱟᱣ ᱟᱠᱟᱜ ᱟᱹᱧ ᱪᱤᱛᱟᱹᱨ ᱪᱤᱛᱨᱤᱡ ᱵᱤᱛᱨᱤᱡ ᱿
ᱢᱚᱱᱮ ᱡᱤᱣᱤ ᱛᱟᱞᱟᱝ ᱥᱟᱶ ᱥᱟᱶᱨᱮ
ᱫᱩᱯᱩᱞᱟᱹᱲ ᱛᱟᱞᱟᱝ ᱟᱹᱰᱤ ᱞᱟᱯᱷᱟᱝ ᱨᱮ
ᱧᱟᱯᱟᱢ ᱜᱮᱭᱟᱞᱟᱝ ᱫᱩᱞᱟᱹᱲ ᱥᱟᱹᱜᱩᱱ ᱚᱠᱛᱚ ᱨᱮ ᱿
ᱦᱟᱹᱞᱤ ᱜᱮ ᱦᱟᱹᱨᱭᱟᱹᱲ ᱞᱮᱜᱮᱡ ᱟᱠᱟᱱ
ᱫᱷᱟᱹᱨᱛᱤ ᱨᱮ ᱡᱤᱭᱟᱹᱲ ᱥᱟᱨᱮᱲᱚᱜ ᱠᱟᱱ
ᱟᱢ ᱧᱮᱞ ᱛᱮ ᱤᱧᱟᱜ ᱢᱚᱱᱮ ᱪᱮᱦᱮᱞ ᱪᱮᱯᱮᱞᱚᱜ ᱠᱟᱱ ᱿
ᱥᱟᱜᱮᱱᱚᱜ ᱠᱟᱹᱱᱟᱹᱧ ᱟᱢ ᱥᱟᱶ ᱛᱮ
ᱪᱮᱛᱟᱱᱤᱧ ᱴᱩᱰᱟᱹᱝ ᱟᱢ ᱧᱮᱞ ᱛᱮ
ᱢᱚᱱᱮ ᱛᱤᱧ ᱵᱷᱮᱫᱟᱣ ᱟᱠᱟᱱ
ᱫᱩᱞᱟᱹᱲ ᱟᱢᱟᱜ ᱢᱟᱭᱟ ᱱᱟᱹᱬᱤ ᱛᱮ ᱾
ᱡᱤᱣᱤᱧ ᱡᱚᱲᱟᱣ ᱫᱩᱞᱟᱹᱲ ᱟᱢ ᱛᱩᱞᱩᱡ
ᱥᱟᱹᱜᱩᱱ ᱚᱠᱛᱚ ᱵᱟᱝᱜᱮᱧ ᱯᱩᱪᱩᱡᱽ
ᱞᱟᱸᱫᱟ ᱡᱚᱝ ᱟᱞᱟᱝ ᱫᱩᱞᱟᱹᱲ
ᱱᱚᱶᱟ ᱚᱶᱟᱣ ᱨᱮ ᱢᱩᱞᱩᱡ ᱢᱩᱞᱩᱡ ᱾
***
