ᱦᱟᱨᱟ ᱮᱱᱟ ᱞᱟᱝ, ᱵᱩᱨᱩ ᱮᱱᱟ ᱞᱟᱝ,
ᱠᱩᱞᱦᱤ ᱫᱷᱩᱲᱤ ᱠᱷᱤᱞᱰᱩ ᱮᱱᱮᱡ ᱛᱮ ᱾
ᱜᱤᱫᱽᱨᱟᱹ ᱠᱷᱚᱱ ᱞᱟᱝ ᱡᱩᱣᱟᱹᱱ ᱮᱱ,
ᱜᱟᱛᱮ ᱥᱟᱹᱜᱟᱹᱭ ᱛᱟᱞᱟ ᱛᱮ ᱾
ᱨᱩᱴᱷᱤ ᱥᱤᱛᱩᱝ ᱨᱮᱦᱚᱸ, ᱜᱩᱴᱤ ᱞᱚᱠᱟ ᱞᱚᱠᱟ ᱛᱮ,
ᱵᱤᱨᱫᱟᱹᱜᱟᱲ ᱞᱟᱝ ᱥᱮᱱ ᱞᱮᱱ ᱾
ᱫᱟᱜ ᱼ ᱡᱟᱹᱯᱩᱫ ᱨᱮᱦᱚᱸ, ᱪᱟᱛᱚᱢ ᱩᱢᱩᱞ ᱩᱢᱩᱞ ᱛᱮ,
ᱵᱟᱹᱫᱽ ᱟᱲᱮ ᱨᱮ ᱦᱟᱠᱳ ᱥᱟᱵ ᱞᱟᱝ ᱥᱮᱱ ᱞᱮᱱ ᱾
ᱚᱞᱚᱜ ᱠᱷᱚᱱ ᱨᱩᱣᱟᱹᱲ ᱚᱠᱛᱚ,
ᱪᱮᱸᱬᱮ ᱴᱩᱴᱤ ᱴᱩᱴᱤ ᱛᱮ ᱞᱟᱝ ᱨᱩᱣᱟᱹᱲ ᱛᱟᱸᱦᱮᱫ ᱾
ᱛᱮᱨᱮᱞ ᱵᱮᱞᱮ ᱡᱚᱢ ᱚᱠᱛᱚ,
ᱠᱷᱟᱞᱤ ᱞᱟᱝ ᱨᱮᱯᱮᱡ ᱛᱟᱸᱦᱮᱫ ᱾
ᱚᱞᱚᱜ ᱯᱟᱲᱦᱟᱣ ᱠᱷᱟᱛᱤᱨ ᱛᱮ ᱞᱟᱝ,
ᱥᱟᱦᱟ ᱥᱟᱺᱜᱤᱧ ᱮᱱᱟ ᱾
ᱛᱟᱲᱟᱢ ᱰᱟᱦᱟᱨ ᱪᱤᱭᱟᱹ ᱞᱟᱹᱜᱤᱫ,
ᱫᱤᱥᱚᱢ ᱞᱟᱝ ᱵᱚᱫᱚᱞ ᱠᱮᱫᱼᱟ ᱾
ᱜᱟᱛᱮ ᱵᱮᱜᱚᱨ ᱮᱠᱞᱟ ᱵᱩᱡᱷᱟᱹᱜ, ᱜᱟᱛᱮ ᱵᱮᱜᱚᱨ ᱱᱤᱥᱩᱱ ᱵᱩᱡᱷᱟᱹᱜ,
ᱜᱟᱛᱮ ᱜᱟᱛᱮ ᱜᱮ ᱪᱚ ᱛᱚᱯᱚᱞ ᱢᱤᱫᱩᱜ ᱾
ᱪᱟᱠᱨᱤ ᱡᱩᱫᱤᱢ ᱧᱟᱢ ᱠᱷᱟᱱ, ᱠᱚᱭᱚᱜ ᱨᱩᱣᱟᱹᱲ ᱢᱮ,
ᱵᱮᱱᱟᱣ ᱟᱞᱟᱝ ᱥᱟᱨᱤ ᱥᱟᱹᱜᱟᱹᱭ, ᱛᱤ ᱫᱚ ᱞᱟᱦᱟᱭ ᱢᱮ ᱾
ᱜᱟᱛᱮ ᱥᱟᱹᱜᱟᱹᱭ ᱦᱩᱭᱩᱜ ᱠᱟᱱ,
ᱥᱩᱠ ᱼ ᱫᱩᱠ ᱨᱮ ᱥᱟᱶᱛᱮ ᱛᱟᱸᱦᱮᱱ ᱢᱮ ᱾
ᱜᱟᱛᱮ ᱥᱟᱹᱜᱟᱹᱭ ᱦᱩᱭᱩᱜ ᱠᱟᱱ,
ᱥᱩᱞᱩᱠ ᱥᱟᱹᱜᱟᱹᱭ ᱜᱮ ᱾
ᱜᱟᱛᱮ ᱥᱟᱹᱜᱟᱹᱭ ᱟᱫ ᱞᱮᱱᱠᱷᱟᱱ,
ᱦᱟᱞᱮ ᱼ ᱰᱟᱞᱮ ᱜᱮ ᱿
***
