ᱧᱩᱛᱩᱢ ᱛᱟᱢ ᱫᱚ ‘ᱵᱟᱦᱟ’, ᱟᱰᱤ ᱪᱚᱨᱚᱠ
ᱨᱩᱯ ᱛᱟᱢ ᱫᱚ ‘ᱵᱟᱦᱟ’, ᱟᱰᱤ ᱪᱮᱦᱨᱟ ᱾
ᱡᱟᱱᱟᱢ ᱛᱟᱢ ᱫᱚ ᱫᱷᱟᱹᱨᱛᱤ ᱟᱭᱳ ᱠᱚᱞᱮ ᱨᱮ
ᱞᱤᱠᱤᱫ ᱞᱤᱠᱤᱫ ᱫᱟᱨᱮ ᱰᱟᱹᱨ ᱨᱮ ᱾
ᱫᱟᱨᱮ ᱯᱮᱨᱮᱡ, ᱡᱮᱸᱜᱮᱫ ᱡᱮᱸᱜᱮᱫ ᱮᱢ ᱵᱟᱦᱟ ᱠᱚᱜᱼᱟ
ᱵᱮᱲᱟ ᱨᱟᱠᱟᱵ ᱠᱷᱚᱱ ᱦᱟᱹᱥᱩᱨ ᱫᱷᱟᱹᱵᱤᱡ
ᱟᱢ ᱫᱚᱢ ᱞᱟᱸᱫᱟ ᱵᱟᱲᱟᱭᱼᱟ ᱾
ᱵᱟᱦᱟ ᱜᱟᱫᱮᱞ ᱠᱷᱚᱱᱟᱜ, ᱚᱠᱚᱭ ᱴᱤᱡ ᱵᱟᱦᱟ ᱪᱚᱧ ᱪᱤᱭᱟᱹ ᱮ
ᱵᱟᱝ ᱫᱚ ᱜᱷᱩᱴᱩ ᱨᱤᱱᱤᱡ, ᱵᱟᱝ ᱫᱚ ᱫᱟᱜ ᱫᱟᱨᱦᱟ ᱨᱤᱱᱤᱡ,
ᱟᱢ ᱫᱚᱧ ᱜᱚᱪᱷᱟ ᱯᱮᱨᱮᱡ ᱢᱮ ᱾
ᱥᱟᱱᱟᱢ ᱜᱮ ᱠᱚ ‘ᱵᱟᱦᱟ’, ᱟᱢ ᱫᱚ ᱠᱚ ᱡᱚᱛᱚᱱ ᱢᱮᱭᱟ
ᱥᱟᱱᱟᱢ ᱜᱮ ᱠᱚ ‘ᱵᱟᱦᱟ’, ᱟᱢ ᱢᱟ ᱠᱚ ᱫᱩᱞᱟᱹᱲ ᱢᱮᱭᱟ ᱾
‘ᱵᱟᱦᱟ’, ᱟᱢ ᱫᱚᱢ ᱦᱟᱢᱮᱴ ᱟᱠᱟᱫᱟ
ᱛᱤᱱᱟᱹᱜ ᱜᱚᱴᱟᱝ ᱪᱚ ᱴᱷᱟᱶ
ᱵᱚᱸᱜᱟ ᱼ ᱵᱳᱨᱳ ᱠᱷᱚᱱ ᱮᱦᱚᱵ ᱠᱟᱛᱮ
ᱜᱚᱡᱼᱜᱩᱨ ᱫᱷᱟᱹᱵᱤᱡ ᱥᱟᱡᱟᱣ ᱾
ᱟᱢ ᱢᱟ ‘ᱵᱟᱦᱟ’, ᱥᱩᱫ ᱯᱮᱨᱮᱡ ᱠᱚ ᱵᱟᱦᱟ ᱢᱮ
ᱟᱢ ᱢᱟ ‘ᱵᱟᱦᱟ’, ᱜᱟᱞᱟᱝ ᱟᱛᱮ ᱠᱚ ᱢᱟᱞᱟ ᱢᱮ ᱾
ᱟᱢᱟᱜ ᱞᱳᱵᱽ ᱛᱮ ᱢᱟ, ᱞᱩᱛᱤ ᱼ ᱛᱮᱨᱚᱢ ᱼ
ᱵᱷᱟᱶᱟᱨ ᱠᱚ ᱠᱚ ᱩᱰᱟᱹᱣ ᱵᱟᱲᱟᱭ ᱠᱟᱱ
ᱟᱢ ᱠᱷᱟᱹᱛᱤᱨ ᱛᱮ ᱢᱟ, ᱦᱟᱹᱨᱭᱟᱹᱲ ᱫᱷᱟᱹᱨᱛᱤ ᱥᱟᱡᱟᱣ ᱯᱮᱨᱮᱡ ᱠᱟᱱ ᱾
ᱰᱚᱸᱵᱮ ᱠᱷᱚᱱᱟᱜ, ᱨᱟᱥᱟ ᱯᱮᱨᱮᱡ ᱵᱷᱩᱥᱟᱹᱲ ᱫᱷᱟᱹᱵᱤᱡ
ᱟᱢ ᱢᱟ ᱠᱚ ᱱᱚᱡᱚᱨ ᱠᱮᱫ ᱢᱮ
ᱡᱟᱹᱱᱩᱢ ᱡᱷᱟᱹᱱᱴᱤ ᱫᱮᱭᱟ ᱠᱟᱛᱮ
ᱢᱚᱱ ᱠᱩᱥᱤ ᱟᱢ ᱢᱟ ᱠᱚ ᱥᱤᱫ ᱠᱮᱫ ᱢᱮ ᱾
ᱦᱤᱸᱥᱤᱫ ᱦᱤᱸᱥᱤᱫ ᱦᱚᱭᱛᱮ ᱟᱢ ᱢᱟ ‘ᱵᱟᱦᱟ’
ᱞᱮᱣᱮᱨ ᱠᱚᱫᱚᱨ ᱮᱢ ᱦᱤᱞᱟᱹᱜᱼᱟ
ᱡᱷᱤᱯᱤᱨ ᱼᱡᱟᱹᱲᱤ ᱫᱟᱜ ᱛᱮ
ᱯᱚᱦᱟᱞ ᱦᱚᱲᱢᱚ ᱛᱟᱢ ᱞᱚᱦᱚᱫᱚᱜᱼᱟ ᱾
ᱥᱟᱝ ᱼ ᱵᱟᱸᱫᱚ ᱱᱟᱲᱤ ᱞᱮᱠᱟ
ᱫᱟᱨᱮ ᱥᱟᱶ ᱮᱢ ᱛᱚᱯᱚᱞ ᱢᱤᱫ ᱟᱠᱟᱱᱟ
ᱫᱩᱞᱟᱹᱲ ᱛᱟᱞᱟ ᱨᱮ ᱟᱢ ᱫᱚ ᱥᱚᱱᱮᱜᱚᱲ ᱥᱤᱠᱲᱤᱢ
ᱛᱮᱭᱟᱨ ᱟᱠᱟᱱᱟ ᱾
ᱵᱟᱨᱥᱤᱧ ᱞᱟᱹᱜᱤᱫ ᱟᱢ ᱢᱟ ‘ᱵᱟᱦᱟ’, ᱢᱩᱦᱱᱤ ᱠᱮᱫ ᱠᱚ
ᱚᱱᱟ ᱯᱚᱨᱮ ᱨᱮ ᱢᱟ ᱢᱟᱭᱟ ᱛᱚᱯᱟᱜ ᱠᱟᱛᱮ
ᱵᱤᱫᱟᱹᱭ ᱮᱢ ᱦᱟᱛᱟᱣ ᱠᱮᱫ ᱫᱚ ᱿
***
