ᱛᱤᱨᱞᱟᱹ ᱠᱚᱣᱟᱜ ᱟᱯᱱᱟᱨ ᱚᱲᱟᱜ
ᱛᱟᱸᱦᱮᱱ ᱫᱚ ᱟᱹᱰᱤ ᱞᱟᱹᱠᱛᱤ ᱠᱟᱱᱟ,
ᱪᱷᱟᱰᱟ ᱠᱟᱛᱮ ᱛᱤᱨᱞᱟᱹ ᱠᱚ
ᱚᱠᱟ ᱚᱲᱟᱜ ᱦᱚᱸ ᱵᱟᱝ ᱥᱚᱵᱷᱟᱜ,
ᱠᱟᱛᱷᱟ ᱫᱚ ᱟᱸᱡᱚᱢ ᱡᱚᱝᱛᱮ
ᱥᱟᱹᱨᱤ ᱵᱩᱡᱷᱟᱹᱜ ᱠᱟᱱ ᱨᱮᱦᱚᱸ
ᱢᱮᱱᱠᱷᱟᱱ,ᱛᱤᱨᱞᱟᱹ ᱠᱚᱣᱟᱜ
ᱟᱯᱱᱟᱨᱟᱜ ᱚᱲᱟᱜ ᱞᱟᱹᱭᱛᱮ
ᱵᱟᱝ ᱛᱟᱸᱦᱮᱱ ᱜᱮᱭᱟ ᱟᱹᱰᱤ ᱚᱠᱛᱮ,
ᱟᱯᱱᱟᱨᱟᱜ ᱚᱲᱟᱜ ᱨᱮᱦᱚᱸ ᱡᱟᱱᱟᱢ ᱠᱟᱛᱮ
ᱟᱸᱡᱚᱢ ᱦᱩᱭᱩᱜ ᱜᱮᱭᱟ,
“ᱠᱩᱲᱤ ᱜᱤᱫᱽᱲᱟᱹ ᱫᱚ ᱮᱴᱟᱜ ᱚᱲᱟᱜ ᱨᱮᱱᱮ ᱦᱩᱭᱩᱜᱼᱟ
ᱱᱚᱣᱟ ᱫᱚ ᱟᱢᱟᱜ ᱴᱷᱟᱶ ᱫᱚ ᱵᱟᱝ
ᱡᱟᱶᱟᱭ ᱚᱲᱟᱜ ᱜᱮ ᱟᱯᱱᱟᱨ ᱛᱟᱢ”
ᱚᱱᱟᱜᱮ ᱜᱷᱟᱱᱮ ᱜᱷᱟᱱᱮ ᱟᱸᱡᱚᱢ ᱦᱩᱭᱩᱜ ᱛᱟᱢ,
ᱡᱟᱶᱟᱭ ᱚᱲᱟᱜ ᱮᱢ ᱪᱟᱞᱟᱜ ᱚᱸᱵᱮ ᱦᱚᱸ ᱚᱱᱟ ᱠᱟᱛᱷᱟ
ᱟᱸᱡᱚᱢ ᱛᱮᱜᱮ ᱦᱩᱭᱩᱜ ᱛᱟᱢ,
“ᱛᱤᱨᱞᱟᱹ ᱫᱚ ᱪᱮᱫᱟᱜ ᱱᱚᱝᱠᱟ ᱜᱮ
ᱦᱟᱸᱰᱮ ᱱᱟᱸᱰᱮ ᱦᱟᱞᱮ ᱰᱟᱞᱮ,
ᱚᱠᱟ ᱨᱮᱦᱚᱸ ᱠᱤ ᱚᱲᱟᱜ ᱫᱚ ᱵᱟᱹᱱᱩᱜ ᱛᱟᱞᱮ ?”
ᱛᱤᱨᱞᱟᱹ ᱠᱚ ᱵᱟᱧᱪᱟᱣ ᱞᱟᱹᱜᱤᱫ ᱛᱮ
ᱟᱯᱱᱟᱨᱟᱜ ᱚᱲᱟᱜ ᱫᱚ ᱟᱹᱰᱤ ᱞᱟᱹᱠᱛᱤ ᱜᱮ ᱿
ᱡᱟᱸᱜᱟ ᱞᱟᱛᱟᱨ ᱨᱮ ᱦᱟᱥᱟ ᱢᱮᱱᱟᱜ
ᱵᱚᱦᱚᱜ ᱪᱮᱛᱟᱱ ᱨᱮ ᱪᱷᱟᱛ,
ᱟᱹᱰᱤ ᱢᱟᱨᱟᱝ ᱛᱟᱸᱦᱮᱱ ᱴᱷᱟᱶ ᱦᱮᱱᱟᱜ
ᱛᱤᱨᱞᱟᱹ ᱠᱚᱣᱟᱜ ᱟᱯᱱᱟᱨᱟᱜ ᱚᱲᱟᱜ ᱞᱟᱹᱜᱤᱫ
ᱱᱚᱣᱟ ᱜᱮ ᱟᱹᱰᱤ ᱢᱚᱱᱮ ᱫᱟᱲᱮ ᱠᱟᱱᱟ,
ᱡᱟᱦᱟᱸ ᱛᱤᱱᱟᱹᱜ ᱮ ᱥᱟᱥᱮᱛᱚᱜ ᱨᱮᱦᱚᱸ
ᱫᱩᱠᱷ ᱵᱷᱩᱸᱡᱟᱹᱣ ᱞᱟᱹᱜᱤᱫ ᱛᱮᱦᱚᱸ
ᱟᱯᱱᱟᱨᱟᱜ ᱢᱤᱫᱴᱟᱝ ᱚᱲᱟᱜ ᱞᱟᱹᱠᱛᱤ,
ᱡᱟᱦᱟᱸ ᱨᱮ ᱢᱮᱢᱮᱱ ᱦᱚᱲ ᱵᱟᱠᱚ ᱛᱟᱸᱦᱮᱱ ᱡᱟᱹᱥᱛᱤ
ᱥᱚᱛ ᱞᱮᱠᱟᱛᱮ ᱛᱟᱸᱦᱮᱱ ᱞᱟᱹᱜᱤᱫ ᱛᱮ
ᱠᱷᱟᱹᱞᱤ ᱢᱤᱫᱴᱟᱝ ᱟᱯᱱᱟᱨᱟᱜ ᱚᱲᱟᱜ ᱞᱟᱹᱠᱛᱤ,
ᱟᱭᱳ ᱵᱟᱵᱟ ᱚᱲᱟᱜ, ᱡᱟᱶᱟᱭ ᱚᱲᱟᱜ
ᱵᱟᱠᱚ ᱟᱯᱱᱟᱨ ᱫᱟᱲᱮ ᱟᱭ ᱨᱮᱦᱚᱸ,
ᱥᱩᱠᱷ ᱛᱮ ᱥᱟᱸᱦᱮᱫ ᱮ ᱦᱟᱛᱟᱣ ᱫᱟᱲᱮᱭᱟᱜ ᱢᱟ
ᱚᱱᱟ ᱞᱟᱹᱜᱤᱫ ᱛᱮᱦᱚᱸ ᱢᱤᱫᱴᱟᱝ ᱚᱲᱟᱜ ᱞᱟᱹᱠᱛᱤ,
ᱪᱮᱫᱟᱜ ᱥᱮ, ᱵᱮᱲᱟ ᱢᱩᱪᱟᱹᱫ ᱨᱮ ᱟᱞᱚᱭ ᱢᱚᱱᱮᱭ ᱢᱟ
ᱟᱡ ᱫᱚ ᱫᱚᱨᱭᱟ ᱫᱟᱜ ᱠᱷᱚᱱᱮ ᱵᱷᱟᱥᱟᱣ ᱦᱮᱡ ᱟᱠᱟᱱᱟ,
ᱡᱟᱦᱟᱸ ᱠᱷᱟᱹᱛᱤᱨ ᱛᱮ ᱛᱤᱨᱞᱟᱹ ᱠᱚᱣᱟᱜ
ᱟᱯᱱᱟᱨᱟᱜ ᱦᱚᱸ ᱢᱤᱫᱴᱟᱝ ᱚᱲᱟᱜ ᱞᱟᱹᱠᱛᱤ,
ᱢᱟᱹᱱᱢᱤ ᱠᱚᱣᱟᱜ ᱵᱤᱥ ᱟᱱ ᱨᱚᱲ
ᱥᱚᱢᱟᱡᱽ ᱨᱮᱭᱟᱜ ᱵᱟᱹᱲᱤᱡ ᱦᱚᱨ,
ᱢᱤᱫ ᱡᱟᱱᱟᱞᱟ ᱥᱮᱫ ᱠᱷᱚᱱᱟᱜ
ᱢᱚᱱᱮ ᱛᱟᱞᱟ ᱠᱷᱚᱱ ᱥᱟᱱᱟᱢᱟᱜ,
ᱳᱰᱳᱠ ᱠᱟᱛᱮ ᱪᱟᱯᱟᱫ ᱜᱤᱰᱤ ᱞᱟᱹᱜᱤᱫ ᱛᱮᱦᱚᱸ
ᱛᱤᱨᱞᱟᱹ ᱠᱚᱣᱟᱜ ᱟᱯᱱᱟᱨᱟᱜ ᱚᱲᱟᱜ ᱞᱟᱹᱠᱛᱤ,
ᱡᱟᱦᱟᱸ ᱨᱮᱫᱚ ᱟᱡ ᱮᱠᱞᱟ ᱥᱩᱢᱩᱝ
ᱚᱱᱟ ᱨᱟᱡᱽ ᱵᱟᱠᱷᱳᱞ ᱨᱮᱱ ᱨᱟᱹᱱᱤᱭ ᱦᱩᱭᱩᱜ ᱿
***
