ᱚᱠᱛᱚ ᱨᱮᱭᱟᱜ ᱱᱚᱣᱟ ᱫᱷᱟᱹᱨᱛᱤ ᱨᱮ
ᱤᱧ ᱜᱮ ᱱᱟᱪᱟᱨ ᱦᱚᱯᱚᱱ,
ᱦᱟᱡᱟᱨ ᱜᱚᱴᱟᱝ ᱫᱩᱠ ᱟᱛᱮ
ᱤᱧᱟᱜ ᱱᱚᱣᱟ ᱡᱤᱭᱚᱱ,
ᱚᱠᱟᱧ ᱞᱟᱹᱭᱟ ᱪᱤᱠᱟᱹᱧ ᱥᱚᱫᱚᱨ
ᱤᱧᱟᱜ ᱫᱩᱠ ᱠᱟᱛᱷᱟ,
ᱧᱮᱞ ᱠᱟᱛᱮ ᱨᱮᱦᱚᱸ ᱤᱧᱟᱜ ᱫᱩᱠ
ᱵᱟᱹᱱᱩᱜ ᱢᱟᱛᱷᱟ ᱵᱮᱛᱷᱟ,
ᱥᱚᱨᱠᱟᱨ ᱵᱚᱞᱮ ᱢᱟᱹᱱᱢᱤ ᱵᱚᱞᱮ
ᱪᱮᱫ ᱦᱚᱸ ᱵᱟᱝᱠᱚ ᱪᱤᱠᱟᱹᱭ,
ᱤᱧᱟᱜ ᱫᱩᱠ ᱨᱮ ᱞᱟᱸᱫᱟᱭ ᱟᱠᱚ
ᱥᱩᱥᱟᱹᱨ ᱵᱟᱝᱠᱚ ᱨᱤᱠᱟᱹᱭ,
ᱚᱠᱟᱧ ᱪᱟᱞᱟᱜ ᱪᱮᱫ ᱤᱧ ᱪᱤᱠᱟᱹᱭ
ᱤᱧ ᱜᱮ ᱵᱟᱹᱧ ᱵᱟᱰᱟᱭ,
ᱦᱚᱯᱚᱱ ᱠᱤᱢᱤᱱ ᱫᱩᱞᱟᱹᱲ ᱵᱟᱝᱛᱮ
ᱢᱚᱱᱮ ᱛᱤᱧᱮ ᱨᱟᱜᱟᱭ,
ᱦᱚᱯᱚᱱ ᱠᱤᱢᱤᱱ ᱨᱮᱛᱮ ᱠᱚᱛᱮ
ᱵᱟᱝᱠᱚ ᱥᱚᱢᱟᱱ ᱛᱤᱧᱟ,
ᱟᱠᱚ ᱛᱟᱞᱟ ᱨᱮ ᱮᱯᱮᱨ ᱦᱮᱸᱰᱮᱡ ᱛᱮ
ᱤᱧ ᱠᱚ ᱦᱤᱲᱤᱧ ᱠᱟᱹᱧᱟ,
ᱥᱚᱨᱠᱟᱨ ᱢᱟᱹᱱᱢᱤ ᱫᱳᱥ ᱠᱟᱛᱮ
ᱪᱮᱫ ᱫᱚ ᱦᱩᱭᱩᱜ ᱛᱤᱧᱟ,
ᱡᱷᱚᱛᱚ ᱟᱱᱟᱴ ᱮᱛᱚᱢ ᱠᱟᱛᱮ
ᱛᱤᱸᱜᱩ ᱦᱩᱭᱩᱜ ᱛᱤᱧᱟ,
ᱥᱮᱫᱟᱭ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮ
ᱫᱩᱠ ᱥᱟᱨᱥᱟᱣᱜ ᱠᱟᱱᱟ,
ᱤᱧᱟᱜ ᱩᱯᱨᱩᱢ ᱞᱟᱹᱭ ᱠᱟᱛᱮ
ᱢᱚᱱᱮᱧ ᱜᱳᱴᱟᱭ ᱮ ᱠᱟᱱᱟ,
ᱨᱮᱸᱜᱮᱡ ᱱᱟᱪᱟᱨ ᱥᱟᱱᱟᱢ ᱞᱮᱠᱟᱱ
ᱦᱚᱯᱚᱱ ᱤᱧᱟᱜ ᱟᱶᱛᱟ,
ᱤᱧᱟᱜ ᱥᱩᱠ ᱨᱮᱠᱚ ᱫᱩᱲᱩᱵ ᱛᱤᱸᱜᱩᱱ
ᱤᱧ ᱜᱮ ᱥᱟᱱᱛᱟᱲ ᱥᱟᱶᱛᱟ ᱿
***
