ᱚᱱᱚᱞᱤᱭᱟᱹ ᱢᱮᱛᱟᱢ ᱠᱟᱱᱟᱹᱧ ᱟᱢ ᱜᱮ
ᱟᱸᱡᱚᱢᱮᱫ ᱠᱷᱟᱱᱮᱢ ᱮᱢᱟᱹᱧ ᱢᱮ ᱛᱮᱞᱟ
ᱦᱟᱱᱮ ᱡᱩᱜᱽ ᱠᱷᱚᱱᱮᱢ ᱚᱞ ᱟᱹᱜᱩᱭᱮᱫ ᱢᱟᱱᱣᱟ ᱠᱚᱣᱟᱜ ᱠᱟᱛᱷᱟ
ᱚᱱᱚᱬᱦᱮ ᱨᱮᱢ ᱜᱟᱵᱟᱱ ᱟᱠᱟᱫ ᱟᱨᱦᱚᱸ ᱥᱮᱨᱮᱧ ᱜᱚᱲᱦᱚᱱ ᱚᱠᱚᱭ ᱞᱟᱹᱜᱤᱫ ᱛᱮ ?
ᱜᱟᱢᱟᱢ ᱨᱮᱱᱟᱜ ᱥᱟᱠᱟᱢ ᱥᱟᱠᱟᱢ ᱨᱮ
ᱨᱟᱲᱟᱝ ᱟᱠᱟᱫ ᱟᱢ ᱪᱤᱨᱜᱟᱹᱞ ᱟᱲᱟᱝ
ᱛᱮᱦᱮᱧ ᱟᱢᱟᱜ ᱚᱞ ᱚᱱᱬᱦᱮ ᱚᱱᱚᱬᱦᱮᱫ
ᱪᱮᱫᱟᱜ ᱢᱮᱱᱟᱜ ᱛᱷᱤᱨ ᱛᱷᱟᱨ ᱪᱤᱠᱟᱹᱛᱮ ?
ᱢᱟᱹᱱᱢᱤᱭᱟᱜ ᱩᱭᱦᱟᱹᱨ ᱟᱹᱪᱩᱨ ᱟᱠᱟᱱ ᱱᱟᱦᱟᱜ ᱨᱮᱱᱟᱜ ᱜᱚᱭᱚᱨ ᱛᱮ,
ᱟᱵ ᱯᱷᱩᱨᱪᱟᱹ ᱵᱮᱸᱜᱮᱫ ᱢᱟᱨᱥᱟᱞ ᱠᱚᱭᱚᱜᱽ ᱢᱮ
ᱥᱟᱶᱛᱟ ᱥᱮᱨᱢᱟ ᱨᱤᱢᱤᱞ ᱨᱮ ᱧᱮᱞᱚᱜ ᱠᱟᱱ
ᱚᱴᱟᱝ ᱚᱜ ᱠᱟᱱ ᱫᱷᱩᱲᱤ ᱦᱚᱭ ᱨᱮ ᱢᱮᱥᱟ ᱠᱟᱛᱮ ᱾
ᱱᱟᱥᱮ ᱱᱟᱥᱮ ᱠᱮᱨᱢᱮ ᱠᱮᱨᱢᱮ ᱛᱮ
ᱟᱫ ᱞᱚᱴᱚᱢᱜ ᱠᱟᱱ ᱟᱢᱟᱜ ᱪᱤᱨᱜᱟᱹᱞ ᱟᱲᱟᱝ !
ᱪᱮᱫ ᱩᱭᱦᱟᱹᱨ ᱛᱮ ᱪᱚᱠᱚ ᱜᱟᱹᱱᱤ ᱥᱟᱹᱱᱤᱭᱮᱱ ᱢᱟᱹᱱᱢᱤ ᱥᱟᱱᱟᱢ ?
ᱥᱟᱶᱛᱟ ᱞᱟᱹᱜᱤᱫ ᱩᱭᱦᱟᱹᱨ ᱵᱟᱝ ᱠᱚ ᱜᱟᱱ ᱮᱫ ᱪᱮᱫ ᱞᱮᱠᱟᱛᱮ ?
ᱱᱚᱱᱚᱞ ᱠᱟᱹᱞᱤᱢ ᱤᱨᱪᱤ ᱟᱸᱡᱮᱫ ᱠᱮᱫ ᱞᱟᱪᱷᱟ ᱨᱮ
ᱪᱮᱸᱜᱷᱟ ᱢᱟᱱᱛᱟᱨ ᱛᱮ ᱥᱟᱦᱟᱭ ᱞᱟᱹᱜᱤᱫ ᱵᱟᱹᱲᱤᱡ
ᱥᱟᱦᱟᱭ ᱞᱟᱹᱜᱤᱫ ᱚᱸᱡᱽᱨᱟ ᱡᱚᱵᱽᱨᱟ ᱛᱤᱱᱟᱹᱜ !
ᱥᱟᱶᱛᱟ ᱞᱟᱹᱜᱤᱫ ᱥᱟᱵ ᱞᱮᱫ ᱟᱢ ᱱᱚᱱᱚᱞ ᱛᱤ ᱛᱮ ᱾
ᱵᱮᱸᱡᱟᱜ ᱢᱟᱧᱟᱜ ᱵᱮᱸᱡᱟᱜ ᱢᱮᱫ ᱛᱮ
ᱵᱟᱝ ᱧᱮᱞ ᱞᱮᱱ ᱟᱢᱟᱜ ᱯᱩᱥᱴᱟᱹᱣ ᱚᱞ
ᱛᱤᱸᱜᱤᱫ ᱛᱮᱯᱮᱫ ᱴᱷᱩᱱᱤ ᱞᱩᱛᱩᱨ ᱨᱮ
ᱪᱤᱨᱜᱟᱹᱞ ᱟᱲᱟᱝ ᱨᱟᱲᱟᱝ ᱨᱟᱸᱣᱟᱜᱼᱟ ᱪᱤᱠᱟᱹᱛᱮ ?
ᱟᱞᱚᱢ ᱛᱟᱸᱦᱮᱱ ᱦᱟᱹᱯᱤ ᱠᱟᱛᱮ
ᱵᱷᱟᱵᱽᱱᱟ ᱟᱨ ᱵᱷᱟᱹᱵᱤᱛ, ᱩᱭᱦᱟᱹᱨ ᱟᱨ ᱦᱩᱫᱤᱥ,
ᱱᱚᱱᱚᱞ ᱛᱮᱜᱮ ᱚᱞ ᱫᱚ ᱥᱮᱴᱮᱨ ᱢᱮ ᱫᱤᱥᱚᱢ ᱫᱤᱥᱩᱣᱟᱹ ᱛᱟᱞᱟ ᱨᱮ
ᱥᱟᱢᱟᱝ ᱥᱚᱫᱚᱨ ᱢᱮ ᱛᱟᱨᱠᱚ ᱨᱟᱠᱟᱵᱽ ᱢᱮ ᱟᱢᱚᱜ ᱟᱲᱟᱝ ᱱᱚᱱᱚᱞ ᱛᱮ ᱾
ᱢᱩᱪᱟᱹᱫ ᱠᱩᱠᱞᱤ ᱛᱟᱸᱦᱮᱭᱮᱱ ᱛᱤᱧᱟ
ᱚᱠᱚᱭ ᱞᱟᱹᱜᱤᱫ ᱚᱱᱚᱞᱤᱭᱟᱹ ᱱᱚᱱᱚᱞ ᱮ ᱥᱟᱵ ᱠᱮᱫ ?
ᱯᱟᱞᱮᱱ ᱥᱟᱶᱛᱟ ᱞᱟᱹᱜᱤᱫ ?
ᱯᱟᱞᱮᱱ ᱡᱟᱹᱛᱤ ᱠᱷᱟᱹᱛᱤᱨ ᱡᱤᱣᱤ ᱛᱟᱢᱮ ᱨᱟᱜᱮᱫ ᱛᱮ ????
***
