ᱫᱷᱟᱲ ᱫᱤᱥᱚᱢ ᱥᱤᱞᱤᱜᱩᱰᱤ ᱟᱹᱛᱩ ᱛᱟᱞᱮ ᱫᱚ ᱟᱹᱰᱤ ᱜᱮ ᱥᱚᱨᱮᱥ ᱴᱷᱟᱶ ᱨᱮ ᱢᱮᱱᱟᱜ ᱟᱠᱟᱫᱼᱟ ᱾ ᱥᱟᱢᱟᱝ ᱨᱮ ᱛᱤᱸᱜᱩ ᱠᱮᱴᱮᱡ ᱠᱟᱛᱮ ᱞᱤᱸᱜᱤ ᱯᱟᱨᱚᱢ ᱟᱠᱟᱱᱟ ᱢᱩᱨᱩᱢ ᱜᱟᱰᱟ᱾ ᱥᱟᱹᱨᱤ ᱜᱮ ᱡᱟᱱᱟᱢ ᱟᱹᱛᱩ ᱫᱤᱥᱚᱢ ᱫᱚ ᱵᱩᱨᱩ ᱜᱟᱰᱟ ᱵᱟᱡᱟᱨ ᱛᱮᱜᱮ ᱵᱮᱲᱦᱟᱭ ᱮᱥᱮᱫ ᱟᱠᱟᱱᱟ, ᱥᱤᱞᱤᱜᱩᱰᱤ ᱟᱹᱛᱩ ᱦᱚᱲᱟᱜ ᱡᱤᱭᱚᱱ ᱛᱟᱠᱚ ᱫᱚ ᱱᱟᱞᱦᱟ ᱛᱩᱢᱟᱹᱞ ᱟᱨ ᱪᱟᱥ ᱵᱟᱥ ᱫᱷᱚᱱ ᱛᱮᱜᱮ ᱠᱚ ᱠᱷᱟᱸᱰᱟᱣ ᱮᱫᱟ, ᱱᱤᱨᱚᱲ ᱯᱷᱩᱨᱪᱟᱹ ᱡᱷᱟᱨᱱᱟ ᱰᱟᱹᱰᱤ ᱫᱟᱜ ᱞᱮ ᱦᱮᱥᱮᱡ ᱥᱮᱠᱮᱡ ᱠᱩᱥᱤ ᱨᱟᱹᱥᱠᱟᱹ ᱨᱮᱜᱮ ᱠᱚ ᱛᱟᱦᱮᱸᱱᱟ ᱾ ᱟᱞᱮ ᱟᱹᱛᱩ ᱨᱮᱫᱚ ᱥᱩᱢᱩᱝ ᱥᱟᱱᱛᱟᱲ ᱦᱚᱯᱚᱱ ᱜᱮ ᱢᱮᱱᱟᱜ ᱟᱠᱟᱫ ᱠᱚᱣᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱵᱟᱦᱟ ᱥᱚᱦᱨᱟᱭ ᱡᱚᱛᱚ ᱯᱟᱨᱟᱵᱽ ᱜᱮ ᱟᱹᱰᱤ ᱡᱟᱠ ᱡᱚᱢᱚᱠ ᱠᱚ ᱢᱟᱱᱟᱣ ᱵᱟᱛᱟᱣᱟ, ᱪᱮᱛᱟᱱ ᱴᱚᱞᱟ ᱞᱟᱛᱟᱨ ᱴᱚᱞᱟ ᱡᱷᱚᱢᱚᱨ ᱡᱷᱚᱢᱚᱨ ᱛᱤᱨᱤᱭᱟᱹᱣ ᱵᱟᱱᱟᱢ, ᱛᱩᱢᱫᱟᱜ ᱴᱟᱢᱟᱠ ᱥᱟᱰᱮ ᱜᱮ ᱪᱚᱦᱚᱲ ᱠᱚᱜᱼᱟ ᱾ ᱥᱤᱞᱤᱜᱩᱰᱤ ᱟᱹᱛᱩ ᱨᱮ ᱯᱮᱭᱟ ᱴᱚᱞᱟ ᱢᱮᱱᱟᱜᱼᱟ ᱼ (᱑) ᱥᱟᱨᱡᱚᱢ ᱴᱚᱞᱟ, (᱒) ᱵᱤᱨᱰᱤ ᱴᱚᱞᱟ ᱟᱨ (᱓) ᱰᱩᱝᱜᱽᱨᱤ ᱴᱚᱞᱟ ᱾
ᱤᱧ ᱨᱤᱱ ᱜᱟᱛᱮ ᱠᱩᱲᱤ ᱛᱮᱠᱚ ᱚᱲᱟᱜ ᱫᱚ ᱥᱟᱨᱡᱚᱢ ᱴᱚᱞᱟ ᱨᱮ ᱧᱩᱛᱩᱢ ᱛᱟᱭ ᱫᱚ ᱠᱩᱸᱫᱤ ᱾
ᱠᱩᱸᱫᱤ ᱫᱚ ᱡᱟᱱᱟᱢ ᱛᱟᱨᱟ ᱠᱷᱚᱱ ᱜᱮ ᱵᱟᱭ ᱨᱚᱲ ᱫᱟᱲᱮᱭᱟᱜᱼᱟ ᱟᱨ ᱵᱟᱭ ᱟᱸᱡᱚᱢ ᱫᱟᱲᱮᱭᱟᱜᱼᱟ ᱾ ᱟᱹᱛᱩ ᱴᱚᱞᱟ ᱨᱤᱱ ᱠᱩᱸᱫᱤ ᱠᱩᱸᱫᱤ ᱦᱚᱦᱚ ᱦᱚᱦᱚ ᱛᱮ ᱠᱩᱸᱫᱤ ᱜᱮᱠᱚ ᱧᱩᱛᱩᱢ ᱩᱛᱟᱹᱨ ᱠᱮᱫᱮᱭᱟ, ᱢᱮᱱᱠᱷᱟᱱ ᱠᱩᱸᱫᱤ ᱫᱚ ᱟᱹᱰᱤ ᱜᱮ ᱱᱟᱯᱟᱭ ᱩᱥᱩᱞ ᱛᱮᱞᱥᱟᱶᱟᱨ ᱨᱚᱝ ᱛᱟᱭ ᱰᱟᱸᱰᱟ ᱡᱚᱠᱷᱟ ᱩᱵ ᱢᱮᱫ ᱢᱩᱴᱷᱟᱹᱱ ᱜᱚᱲᱦᱚᱱ ᱛᱟᱭ ᱫᱚ ᱩᱛᱤ ᱥᱩᱛᱤ ᱜᱮ ᱱᱟᱯᱟᱭᱟ, ᱩᱱᱤᱭᱟᱜ ᱢᱮᱫᱼᱦᱟᱸ ᱨᱮᱫᱚ ᱥᱟᱨᱟ ᱜᱷᱟᱹᱲᱤ ᱜᱮ ᱢᱩᱞᱩᱡ ᱞᱟᱸᱫᱟ ᱛᱟᱭ ᱛᱟᱦᱮᱸᱱᱟ ᱧᱮᱯᱮᱞ ᱥᱟᱶᱛᱮ ᱞᱟᱸᱫᱟ ᱫᱟᱨᱟᱢᱟᱭ ᱥᱟᱹᱨᱤ ᱜᱮ ᱪᱟᱸᱫᱚ ᱵᱚᱸᱜᱟ ᱠᱩᱸᱫᱤ ᱠᱟᱫᱮ ᱨᱮᱦᱚᱸᱭ ᱜᱩᱱ ᱵᱮᱵᱷᱟᱨ ᱛᱮᱫᱚ ᱟᱹᱰᱤ ᱜᱮ ᱱᱟᱯᱟᱭ ᱟᱨ ᱠᱩᱞᱦᱤ ᱫᱷᱩᱲᱤ ᱠᱷᱤᱞᱰᱩ ᱮᱱᱮᱡ ᱠᱷᱚᱱ ᱜᱮ ᱜᱟᱛᱮ ᱫᱚ ᱠᱩᱸᱫᱤ ᱥᱟᱶᱛᱮ ᱾
ᱯᱩᱭᱞᱩ ᱚᱞᱚᱜ ᱟᱠᱷᱲᱟ ᱨᱮ ᱢᱤᱫ ᱥᱟᱶᱛᱮ ᱞᱤᱧ ᱥᱮᱱ ᱞᱮᱱᱟ ᱢᱮᱱᱠᱷᱟᱱ ᱠᱩᱸᱫᱤ ᱫᱚ ᱵᱟᱝ ᱠᱚ ᱦᱟᱛᱟᱣ ᱞᱮᱫᱮᱭᱟ, ᱪᱮᱫᱟᱜ ᱥᱮ ᱩᱱᱤ ᱫᱚ ᱵᱟᱝᱮ ᱨᱚᱲ ᱫᱟᱲᱮᱭᱟᱜᱼᱟ ᱚᱱᱟ ᱞᱟᱹᱜᱤᱫ ᱥᱤᱞᱤᱜᱩᱰᱤ ᱚᱞᱚᱜ ᱟᱥᱲᱟ ᱨᱤᱱ ᱦᱚᱲ ᱢᱟᱥᱴᱚᱨ ᱢᱮᱱ ᱠᱮᱫᱟᱭ ᱠᱩᱸᱫᱤ ᱠᱚᱸᱫᱟ, ᱠᱟᱬᱟᱼᱠᱟᱹᱬᱤ ᱞᱟᱹᱜᱤᱫ ᱛᱮᱫᱚ ᱵᱷᱤᱱᱟᱹ ᱞᱮᱠᱟᱱ ᱚᱞᱚᱜ ᱟᱥᱲᱟ ᱢᱮᱱᱟᱜ ᱟᱠᱟᱫᱼᱟ ᱾ ᱚᱸᱰᱮ ᱜᱮ ᱵᱷᱩᱨᱛᱤ ᱮᱢ ᱠᱩᱸᱫᱤ ᱟᱡ ᱵᱟᱵᱟᱭ ᱢᱮᱛᱟᱫ ᱫᱮᱭᱟ᱾ ᱠᱩᱸᱫᱤ ᱟᱡ ᱵᱟᱵᱟ ᱫᱚ ᱚᱞᱚᱜ ᱯᱟᱲᱦᱟᱣ ᱦᱚᱲ ᱫᱚᱭ ᱵᱟᱝ ᱠᱟᱱᱟ ᱾ ᱛᱤᱱᱟᱹᱜ ᱞᱮᱠᱟᱱᱟᱜ ᱟᱥᱲᱟ ᱛᱟᱦᱮᱸᱱᱟ ᱚᱠᱟ ᱟᱥᱲᱟ ᱠᱩᱸᱫᱤ ᱚᱞᱚᱜ ᱯᱟᱲᱦᱟᱣ ᱮ ᱦᱩᱭᱩᱜᱼᱟ ᱵᱟᱝᱮ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱫᱤᱥᱟᱹᱦᱟᱨᱟ ᱜᱮᱭ ᱵᱩᱡᱷᱟᱹᱣ ᱠᱮᱫᱟ, ᱜᱚᱥᱚ ᱢᱮᱫᱼᱦᱟᱸ ᱵᱮᱱᱟᱣ ᱠᱟᱛᱮ ᱠᱩᱸᱫᱤ ᱵᱤᱴᱤ ᱥᱟᱶ ᱚᱸᱰᱮ ᱠᱷᱚᱱ ᱠᱤᱱ ᱨᱩᱣᱟᱹᱲ ᱮᱱᱟ ᱟᱨ ᱤᱧ ᱫᱚ ᱵᱟᱵᱟᱭ ᱵᱷᱩᱨᱛᱤ ᱠᱤᱫᱤᱧᱟ ᱾
ᱠᱩᱸᱫᱤ ᱟᱡ ᱟᱯᱟᱛ ᱧᱩᱛᱩᱢ ᱫᱚ ᱢᱚᱦᱚᱱ ᱟᱨ ᱮᱸᱜᱟᱛ ᱫᱚ ᱪᱟᱢᱯᱟ ᱾ ᱟᱭᱳ ᱵᱟᱵᱟ ᱠᱤᱱ ᱩᱭᱦᱟᱹᱨ ᱠᱮᱫᱟ ᱠᱩᱸᱫᱤ ᱵᱤᱴᱤ ᱫᱚ ᱚᱲᱟᱜ ᱠᱚᱨᱮ ᱜᱮ ᱛᱟᱦᱮᱸᱱᱟᱭ ᱾ ᱫᱤᱱ ᱫᱤᱱ ᱛᱮ ᱫᱤᱱ ᱥᱮᱨᱢᱟ ᱯᱟᱨᱚᱢ ᱤᱫᱤᱭᱮᱱᱟ ᱚᱠᱛᱚ ᱠᱚ ᱵᱟᱝ ᱧᱟᱢᱚᱜ ᱠᱟᱱ ᱛᱮ ᱱᱮᱛᱟᱨ ᱫᱚ ᱢᱟᱬᱟᱝ ᱞᱮᱠᱟ ᱵᱟᱝᱞᱤᱧ ᱜᱟᱛᱮᱜ ᱠᱟᱱᱟ, ᱤᱧ ᱫᱚ ᱚᱞᱚᱜ ᱯᱟᱲᱦᱟᱣ ᱨᱮᱜᱮᱧ ᱪᱷᱩᱴᱟᱹᱣ ᱮᱱᱟ ᱟᱨ ᱟᱡ ᱫᱚ ᱚᱲᱟᱜ ᱫᱩᱣᱟᱹᱨ ᱨᱮᱭᱟᱜ ᱥᱟᱱᱟᱢ ᱞᱮᱠᱟᱱ ᱠᱟᱹᱢᱤ ᱡᱚᱜᱼᱞᱩᱸᱰᱟᱹ, ᱤᱥᱤᱱ ᱟᱨ ᱜᱟᱥᱟᱣ ᱢᱟᱸᱡᱟᱣ ᱵᱟᱹᱫᱽ ᱵᱟᱹᱭᱦᱟᱹᱲ ᱠᱟᱹᱢᱤ ᱦᱚᱸ ᱫᱟᱜ ᱥᱩᱯᱟᱹᱲᱤ ᱠᱷᱚᱱ ᱜᱮ ᱟᱹᱰᱤ ᱠᱟᱹᱢᱤᱭᱟᱭ ᱥᱟᱶᱛᱮ ᱦᱩᱰᱤᱧ ᱵᱚᱠᱚ ᱵᱚᱭᱦᱟ ᱠᱚ ᱧᱮᱞ ᱥᱟᱢᱴᱟᱣ ᱠᱚᱣᱟᱭ ᱱᱚᱝᱠᱟ ᱜᱮ ᱫᱤᱱᱟᱹᱢ ᱦᱤᱞᱚᱜᱟᱜ ᱠᱟᱹᱢᱤ ᱛᱟᱭ ᱥᱮᱛᱟᱜ ᱠᱷᱚᱱ ᱛᱤ ᱨᱮ ᱟᱹᱭᱩᱵᱚᱜᱼᱟ ᱵᱟᱝ ᱮ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱠᱟᱹᱢᱤ ᱠᱟᱹᱢᱤ ᱛᱮ᱾ ᱟᱡ ᱨᱤᱱ ᱵᱚᱠᱚ ᱵᱚᱭᱦᱟ ᱞᱮᱠᱟ ᱟᱭᱳ ᱵᱟᱵᱟ ᱴᱷᱮᱱ ᱩᱱᱟᱹᱜ ᱫᱩᱞᱟᱹᱲ ᱫᱚ ᱵᱟᱝ ᱮ ᱧᱟᱢ ᱞᱮᱫᱟ ᱠᱟᱹᱴᱤᱡ ᱠᱟᱹᱴᱤᱡ ᱛᱮ ᱠᱩᱸᱫᱤ ᱫᱚ ᱫᱟᱜ ᱥᱩᱯᱟᱹᱲᱤ ᱵᱟᱲᱜᱮ ᱟᱲᱟᱜ ᱞᱮᱠᱟ ᱞᱤᱠᱤᱫ ᱞᱤᱠᱤᱫ ᱮ ᱦᱟᱨᱟ ᱮᱱᱟ ᱟᱹᱰᱤ ᱪᱚᱨᱚᱠ ᱟᱹᱰᱤ ᱴᱚᱥᱚᱠ ᱜᱮ ᱾
ᱟᱹᱰᱤ ᱥᱮᱨᱢᱟ ᱯᱚᱨᱮ ᱟᱪᱠᱟ ᱜᱮ ᱢᱤᱫ ᱫᱤᱱ ᱦᱚᱨ ᱨᱮᱞᱤᱧ ᱧᱟᱯᱟᱢ ᱮᱱᱟ, ᱤᱧ ᱫᱚ ᱠᱚᱞᱮᱡᱽ ᱠᱷᱚᱱᱤᱧ ᱨᱩᱣᱟᱹᱲ ᱠᱟᱱᱟ ᱟᱨ ᱟᱡ ᱫᱚ ᱵᱟᱹᱫᱽ ᱠᱷᱚᱱ ᱾ ᱤᱱᱟᱹ ᱦᱤᱞᱚᱜ ᱫᱚ ᱠᱩᱸᱫᱤ ᱵᱟᱭ ᱞᱟᱸᱫᱟ ᱞᱮᱫᱟ ᱜᱚᱥᱚ ᱢᱮᱫᱼᱦᱟ ᱜᱮᱭ ᱧᱮᱞᱚᱜ ᱠᱟᱱᱟ ᱠᱩᱞᱤ ᱠᱮᱫᱮᱭᱟᱹᱧ, ᱪᱤᱠᱟᱹ ᱮᱱᱟᱢ ᱟᱹᱰᱤ ᱜᱚᱥᱚ ᱢᱚᱥᱚ ᱜᱮᱢ ᱧᱮᱞᱚᱜ ᱠᱟᱱ ᱫᱚ ᱡᱟᱣ ᱢᱟ ᱟᱹᱰᱤ ᱞᱟᱸᱫᱟ ᱟᱛᱮ ᱜᱮᱢ ᱨᱚᱲᱟ, ᱠᱩᱸᱫᱤᱭᱟᱜ ᱢᱮᱫᱦᱟᱸ ᱧᱮᱞ ᱠᱟᱛᱮ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱹᱱᱟᱹᱧ ᱩᱱᱤᱭᱟᱜ ᱢᱚᱱᱮ ᱡᱤᱣᱤ ᱫᱚ ᱱᱟᱯᱟᱭ ᱵᱟᱹᱱᱩᱜᱼᱟ ᱾ ᱪᱮᱫ ᱠᱟᱛᱷᱟ ᱛᱮᱪᱚ ᱡᱤᱣᱤ ᱛᱟᱭ ᱞᱚᱜ ᱠᱟᱱᱟ, ᱠᱩᱸᱫᱤᱭᱟᱜ ᱠᱟᱛᱷᱟ ᱠᱚᱫᱚ ᱥᱟᱱᱟᱢᱟᱜ ᱜᱤᱧ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱾ ᱩ ᱩ ᱛᱤ ᱛᱮ ᱩᱫᱩᱜ ᱩᱫᱩᱜ ᱠᱟᱛᱮ ᱮ ᱨᱚᱲᱟ ᱟᱨ ᱮ ᱵᱩᱡᱷᱟᱹᱣᱟ ᱥᱩᱢᱩᱝ ᱚᱲᱟᱜ ᱦᱚᱲ ᱟᱨ ᱜᱟᱛᱮ ᱠᱩᱲᱤ ᱠᱚ ᱩᱱᱤᱭᱟᱜ ᱠᱟᱛᱷᱟ ᱦᱚᱸᱠᱚ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱾
ᱛᱟᱭᱚᱢ ᱨᱚᱲ ᱨᱚᱲ ᱛᱮ ᱢᱤᱫ ᱫᱟᱨᱮ ᱵᱩᱴᱟᱹ ᱞᱤᱧ ᱧᱟᱢ ᱠᱮᱫᱟ ᱚᱸᱰᱮᱭ ᱫᱩᱲᱩᱵ ᱮᱱᱟ ᱾ ᱫᱩᱲᱩᱵ ᱠᱟᱛᱮ ᱟᱹᱰᱤ ᱠᱤᱪᱷᱩ ᱞᱤᱧ ᱨᱚᱯᱚᱲ ᱮᱱᱟ ᱟᱡᱟᱜ ᱡᱤᱣᱤ ᱨᱮᱱᱟᱜ ᱫᱩᱠᱷ ᱫᱚᱭ ᱞᱟᱹᱭ ᱥᱚᱫᱚᱨ ᱠᱮᱫᱟ ᱥᱟᱱᱟᱢᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱫᱩᱠᱷ ᱤᱧ ᱟᱹᱭᱠᱟᱹᱣ ᱠᱮᱫᱟ ᱾ ᱠᱩᱸᱫᱤ ᱫᱚ ᱟᱠᱚ ᱚᱲᱟᱜ ᱛᱮ ᱨᱩᱣᱟᱹᱲ ᱮᱱᱟᱭ ᱤᱧ ᱦᱚᱸ ᱩᱭᱦᱟᱹᱨ ᱩᱭᱦᱟᱹᱨ ᱛᱮ ᱩᱱᱟᱹᱜ ᱢᱚᱱᱮ ᱡᱤᱣᱤ ᱨᱮ ᱵᱚᱛᱚᱨ ᱵᱷᱮᱫᱟᱣᱟᱫ ᱫᱤᱧᱟ ᱛᱟᱭᱚᱢ ᱚᱠᱛᱮ ᱡᱟᱸᱜᱟ ᱠᱚ ᱛᱟᱦᱟᱢ ᱛᱩᱠᱩᱡ ᱜᱤᱧ ᱟᱹᱭᱠᱟᱹᱣ ᱠᱮᱫᱟ ᱾ ᱪᱮᱫᱟᱜ ᱠᱩᱲᱤ ᱦᱚᱯᱚᱱ ᱥᱟᱶᱛᱮ ᱱᱚᱝᱠᱟ ᱵᱮ ᱵᱟᱹᱲᱤᱡ ᱦᱩᱭᱩᱜ ᱠᱟᱱᱟ ᱧᱤᱫᱟᱹ ᱢᱟ ᱧᱤᱫᱟᱹ ᱥᱤᱧ ᱢᱟᱨᱥᱟᱞ ᱦᱚᱸ ᱠᱩᱸᱫᱤᱭᱟᱜ ᱠᱟᱛᱷᱟ ᱜᱤᱧ ᱩᱭᱦᱟᱹᱨ ᱮᱫᱟ ᱦᱩᱰᱩᱜ ᱦᱩᱰᱩᱜ ᱠᱚᱲᱟᱢ ᱨᱮ ᱢᱮᱫ ᱥᱟᱢᱟᱝ ᱨᱮ ᱨᱚᱯᱚᱲ ᱟᱠᱟᱱ ᱪᱤᱛᱟᱹᱨ ᱠᱚᱜᱮ ᱩᱭᱦᱟᱹᱨ ᱵᱟᱲᱟᱭᱟ ᱥᱟᱹᱨᱤ ᱜᱮ ᱠᱩᱸᱫᱤᱭᱟᱜ ᱡᱤᱭᱚᱱ ᱨᱮᱫᱚ ᱥᱩᱠᱷ ᱜᱮ ᱵᱟᱹᱱᱩᱜᱼᱟᱱᱟ ᱢᱤᱫ ᱵᱮᱲᱟ ᱦᱚᱸ ᱾
ᱠᱩᱸᱫᱤ ᱞᱟᱹᱭ ᱠᱮᱫᱟᱭ ᱼ ᱛᱮᱦᱮᱧ ᱠᱷᱚᱱ ᱢᱤᱫ ᱪᱟᱸᱫᱚ ᱢᱟᱬᱟᱝ ᱵᱟᱹᱥᱭᱟᱹᱢ ᱵᱮᱲᱟ ᱜᱚᱰᱟ ᱜᱩᱨᱤᱡ ᱤᱫᱤ ᱵᱟᱹᱫᱽ ᱤᱧ ᱥᱮᱱ ᱞᱮᱱᱟ, ᱵᱟᱹᱫᱽ ᱥᱮᱫ ᱫᱚ ᱱᱤᱪᱚᱞ ᱜᱮ ᱛᱟᱦᱮᱸ ᱠᱟᱱᱟ, ᱥᱩᱱᱟᱹ ᱫᱚ ᱮᱠᱞᱟ ᱱᱤᱪᱚᱞ ᱧᱮᱞ ᱠᱟᱛᱮ ᱦᱟᱰᱜᱟᱨ ᱞᱮᱠᱟᱭ ᱛᱟᱬᱟᱜ ᱟᱹᱫᱤᱧ ᱛᱟᱦᱮᱸᱫ ᱠᱩᱸᱫᱤ ᱵᱮᱪᱟᱨᱤ ᱢᱚᱱᱮ ᱠᱟᱛᱮ ᱤᱧ ᱪᱮᱛᱟᱱ ᱨᱮ ᱱᱟᱦᱟᱪᱟᱨ ᱞᱟᱹᱜᱤᱫᱼᱮ ᱨᱤᱠᱟᱹᱭᱟ᱾ ᱜᱩᱨᱤᱡ ᱜᱤᱰᱤ ᱞᱟᱹᱜᱤᱫ ᱛᱟᱞᱟ ᱢᱟᱞᱟ ᱵᱟᱹᱫᱽ ᱤᱧ ᱵᱚᱞᱚ ᱜᱚᱫ ᱟᱠᱟᱱᱟ ᱤᱧ ᱫᱚ ᱱᱟᱥᱮ ᱦᱚᱸ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱛᱟᱦᱮᱸᱱᱟ ᱾ ᱛᱟᱭᱚᱢ ᱥᱮᱱ ᱠᱷᱚᱱ ᱟᱪᱠᱟ ᱜᱮ ᱥᱩᱱᱟᱹ ᱫᱚ ᱟᱧᱪᱟᱨ ᱨᱮ ᱥᱟᱵ ᱠᱤᱫᱤᱧᱟᱭ ᱾ ᱵᱚᱛᱚᱨ ᱛᱮ ᱡᱩᱨ ᱛᱮ ᱦᱟᱥᱟ ᱫᱩᱞᱠᱤ ᱨᱤᱧ ᱛᱚᱦᱚᱫ ᱮᱱᱛᱮ ᱜᱩᱨᱤᱡ ᱠᱷᱟᱺᱪᱤ ᱢᱮᱥᱟ ᱜᱤᱧ ᱵᱷᱤᱸᱫᱟᱹᱲ ᱮᱱᱟ ᱾ ᱠᱷᱟᱺᱪᱤ ᱜᱤᱰᱤ ᱯᱚᱨᱮ ᱵᱮᱨᱮᱫ ᱠᱟᱛᱮᱧ ᱫᱟᱹᱲ ᱞᱮᱫᱟ ᱢᱮᱱᱠᱷᱟᱱ ᱜᱤᱫᱤ ᱠᱩᱲᱤᱫ ᱞᱮᱠᱟ ᱜᱮ ᱦᱟᱞᱚ ᱠᱤᱫᱤᱧ ᱵᱟᱝ ᱤᱧ ᱫᱟᱲᱮ ᱞᱮᱱᱟ, ᱥᱩᱱᱟᱹ ᱫᱚ ᱟᱹᱰᱤ ᱵᱟᱹᱲᱤᱡ ᱦᱚᱲ ᱠᱟᱱᱟᱭ ᱤᱧ ᱚᱵᱷᱟᱜᱤᱭᱟᱹ ᱪᱮᱛᱟᱱ ᱨᱮ ᱱᱟᱥᱮ ᱦᱚᱸ ᱫᱟᱭᱟ ᱢᱟᱭᱟ ᱵᱟᱝ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱨᱟᱜ ᱨᱟᱜ ᱚᱲᱟᱜ ᱤᱧ ᱨᱩᱣᱟᱹᱲᱮᱱᱟ ᱪᱮᱫ ᱦᱚᱸ ᱵᱟᱝ ᱤᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱪᱮᱫ ᱞᱮᱠᱟ ᱨᱮᱫᱚ ᱟᱭᱳ ᱵᱟᱵᱟᱹᱧ ᱞᱟᱹᱭ ᱟᱹᱠᱤᱱᱟ ᱪᱮᱫ ᱦᱚᱸ ᱵᱟᱹᱧ ᱞᱟᱹᱭ ᱞᱮᱫᱟ ᱾ ᱮᱠᱞᱟ ᱩᱭᱦᱟᱹᱨ ᱩᱭᱦᱟᱹᱨ ᱛᱤᱧ ᱨᱟᱜ ᱦᱚᱢᱚᱨᱟ ᱯᱮ ᱦᱟᱯᱛᱟ ᱯᱚᱨᱮ ᱱᱟᱯᱟᱭ ᱜᱮ ᱵᱟᱝ ᱤᱧ ᱵᱩᱡᱷᱟᱹᱣ ᱮᱫᱟ ᱾ ᱵᱚᱦᱚᱜ ᱠᱚ ᱦᱟᱢᱟᱞ ᱜᱮ ᱡᱚᱢ ᱧᱩ ᱨᱮ ᱦᱚᱸ ᱢᱚᱱᱮ ᱵᱟᱭ ᱞᱟᱜᱟᱣᱜ ᱠᱟᱱᱟ ᱫᱤᱱᱟᱹᱢ ᱩᱞᱟᱹ ᱩᱞᱟᱹ ᱥᱟᱱᱟᱹᱧᱟ ᱾ ᱢᱤᱫ ᱫᱤᱱ ᱫᱚ ᱟᱭᱳ ᱠᱩᱰᱟᱹᱢ ᱨᱮ ᱩᱞᱟᱹ ᱧᱮᱞ ᱠᱤᱫᱤᱧᱟᱭ ᱾ ᱵᱟᱨ ᱯᱮ ᱫᱤᱱ ᱠᱷᱚᱱ ᱧᱮᱞ ᱠᱟᱛᱮ ᱟᱭᱳ ᱫᱚ ᱱᱟᱥᱮ ᱫᱚ ᱯᱟᱞᱮ ᱮ ᱵᱩᱡᱷᱟᱹᱣ ᱮᱫᱟ ᱾ ᱤᱧᱟᱜ ᱦᱚᱲᱢᱚ ᱨᱮ ᱯᱟᱯ ᱨᱮᱭᱟᱜ ᱢᱟᱭᱟᱢ ᱛᱮ ᱡᱤᱣᱤ ᱜᱟᱲᱦᱟᱣᱜ ᱠᱟᱱᱟ ᱾ ᱩᱞᱟᱹ ᱧᱮᱞ ᱠᱟᱛᱮ ᱠᱩᱰᱟᱹᱢ ᱠᱷᱚᱱᱮ ᱚᱨ ᱟᱹᱜᱩ ᱠᱤᱫᱤᱧᱟ ᱟᱨ ᱢᱤᱫ ᱪᱮᱴᱟᱜ ᱮ ᱫᱟᱞ ᱠᱤᱫᱤᱧᱟ ᱟᱭᱳᱭ ᱢᱮᱱᱮᱫᱼᱟᱭ ᱞᱟᱹᱭ ᱢᱮ ᱚᱠᱚᱭ ᱠᱟᱱᱟᱭ ᱪᱮᱫᱟᱜ ᱵᱷᱤᱱᱟᱹ ᱜᱤᱧ ᱧᱮᱞᱮᱫ ᱢᱮᱭᱟ ᱞᱟᱹᱭ ᱢᱮ ᱪᱮᱫ ᱪᱤᱠᱟᱹ ᱟᱠᱟᱱᱟ ᱾ ᱟᱭᱳ ᱵᱟᱵᱟ ᱵᱚᱦᱚᱜ ᱠᱤᱱ ᱛᱟᱹᱯᱤᱧᱚᱜ ᱠᱟᱱᱟ ᱪᱟᱸᱫᱚ ᱱᱚᱶᱟ ᱪᱮᱫ ᱫᱤᱱ ᱮᱢ ᱫᱮᱠᱷᱟᱣ ᱟᱹᱞᱤᱧ ᱠᱟᱱᱟ ᱾ ᱡᱟᱱᱟᱢ ᱜᱮᱥᱮ ᱞᱤᱧ ᱵᱟᱰᱟᱭᱟ ᱪᱟᱸᱫᱚ ᱦᱟᱨᱟ ᱜᱮᱥᱮ ᱞᱤᱧ ᱵᱟᱰᱟᱭᱟ ᱠᱚᱨᱚᱢ ᱠᱚᱯᱟᱲ ᱞᱤᱠᱷᱚᱱ ᱫᱚ ᱟᱢ ᱜᱮᱢ ᱵᱟᱰᱟᱭᱟ ᱵᱟᱵᱟᱭ ᱢᱮᱱ ᱠᱮᱫᱟ ᱟᱨ ᱫᱚᱢᱮ ᱠᱤᱱ ᱨᱟᱜᱮᱜᱼᱟ ᱟᱭᱳ ᱵᱟᱵᱟ ᱜᱟᱯᱟᱞ ᱢᱟᱨᱟᱣ ᱠᱟᱛᱮ ᱵᱟᱵᱟ ᱫᱚ ᱢᱟᱺᱡᱷᱤ ᱚᱲᱟᱜ ᱮ ᱥᱮᱱ ᱮᱱᱟ, ᱢᱟᱺᱡᱷᱤ ᱮᱠᱞᱟ ᱵᱟᱭ ᱥᱟᱞᱟ ᱜᱚᱴᱟ ᱫᱟᱲᱮᱭᱟᱜ ᱠᱟᱱᱟ ᱚᱱᱟᱛᱮ ᱢᱚᱬᱮ ᱦᱚᱲ ᱡᱟᱣᱨᱟ ᱠᱮᱫ ᱠᱚᱣᱟ ᱢᱚᱬᱮ ᱦᱚᱲ ᱡᱟᱣᱨᱟ ᱯᱚᱨᱮ ᱟᱭᱳ ᱛᱮᱞᱤᱧ ᱠᱚ ᱦᱚᱦᱚ ᱟᱫ ᱞᱤᱧᱟ ᱟᱨ ᱥᱟᱱᱟᱢ ᱟᱭᱳᱭ ᱞᱟᱹᱭ ᱵᱩᱡᱷᱟᱹᱣᱟᱫ ᱠᱚᱣᱟ ᱤᱧᱟᱜ ᱠᱟᱛᱷᱟ ᱟᱭᱳᱭ ᱥᱚᱫᱚᱨᱟᱫ ᱠᱚᱣᱟ ᱚᱱᱟ ᱯᱚᱨᱮ ᱥᱩᱱᱟᱹ ᱠᱚ ᱠᱩᱞᱤ ᱠᱮᱫᱮᱭᱟ ᱾
ᱥᱩᱱᱟᱹ ᱟᱡᱟᱜ ᱠᱟᱛᱷᱟ ᱵᱟᱭ ᱦᱮᱸ ᱥᱤᱠᱟᱹᱨ ᱞᱮᱱᱟ ᱢᱮᱱ ᱠᱮᱫᱟᱭ ᱠᱩᱸᱫᱤ ᱢᱟ ᱟᱡᱟᱜ ᱢᱚᱪᱟ ᱛᱮᱢᱟ ᱵᱟᱭ ᱞᱟᱹᱭ ᱟᱠᱟᱫᱼᱟ ᱥᱮ ᱥᱟᱹᱠᱷᱤ ᱦᱚᱸ ᱵᱟᱝ ᱠᱚ ᱯᱩᱨᱟᱹᱣ ᱟᱠᱟᱫᱼᱟ ᱟᱡ ᱟᱭᱳ ᱫᱚ ᱠᱤᱥᱟᱹᱬ ᱦᱚᱯᱚᱱ ᱧᱮᱞ ᱠᱟᱛᱮ ᱮᱲᱮ ᱠᱟᱛᱷᱟ ᱜᱮᱭ ᱞᱟᱹᱭ ᱮᱫᱼᱟ ᱾ ᱟᱫᱚ ᱵᱟᱵᱟ ᱨᱟᱜ ᱟᱛᱮ ᱠᱤᱱ ᱞᱟᱹᱭ ᱮᱫᱟ ᱱᱚᱶᱟ ᱥᱟᱹᱨᱤ ᱠᱟᱛᱷᱟ ᱜᱮ ᱠᱟᱱᱟ ᱾ ᱤᱧ ᱠᱩᱸᱫᱤ ᱥᱟᱱᱟᱢᱟᱜ ᱤᱧ ᱟᱹᱭᱠᱟᱹᱣ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱢᱮᱱᱠᱷᱟᱱ ᱥᱚᱫᱚᱨ ᱫᱚ ᱩᱱᱟᱹᱜ ᱵᱟᱝ ᱤᱧ ᱫᱟᱲᱮᱭᱟᱜ ᱠᱟᱱᱟ ᱾ ᱦᱤᱰᱤᱨ ᱦᱤᱰᱤᱨ ᱜᱮ ᱡᱚᱨᱚᱜ ᱠᱟᱱᱟ ᱨᱚᱲ ᱦᱚᱸ ᱵᱟᱝ ᱤᱧ ᱫᱟᱲᱮᱭᱟᱜ ᱠᱟᱱᱟ ᱱᱚᱶᱟ ᱠᱟᱛᱷᱟ ᱜᱤᱧ ᱫᱚᱦᱚ ᱠᱮᱫᱟ ᱢᱚᱬᱮ ᱦᱚᱲ ᱴᱷᱮᱱ, ᱟᱭᱳᱭ ᱵᱩᱡᱷᱟᱹᱣ ᱟᱫ ᱠᱚᱣᱟ ᱠᱩᱸᱫᱤ ᱢᱮᱱᱮᱫᱼᱟᱭ, ᱪᱮᱫ ᱠᱩᱲᱤ ᱦᱚᱯᱚᱱᱟᱜ ᱦᱚᱲᱢᱚ ᱫᱚ ᱥᱩᱢᱩᱝ ᱠᱷᱤᱞᱰᱩ ᱡᱟᱜᱟ ᱜᱮ ᱥᱮ ᱞᱟᱹᱭᱟᱹᱧ ᱯᱮ ᱡᱟᱦᱟᱸᱭ ᱠᱩᱸᱫᱤ ᱠᱚᱸᱫᱟ ᱠᱟᱬᱟ ᱠᱟᱹᱬᱤ ᱦᱚᱲᱟᱜ ᱫᱚ ᱵᱤᱪᱟᱹᱨ ᱵᱟᱝ ᱦᱩᱭᱩᱜᱼᱟ ᱵᱤᱱᱟᱹ ᱥᱟᱹᱠᱷᱤ ᱯᱩᱨᱟᱹᱣ ᱛᱮᱫᱚ ᱪᱮᱫ ᱵᱟᱝ ᱥᱟᱞᱟ ᱜᱚᱴᱟᱜᱼᱟ, ᱯᱟᱯ ᱨᱮᱭᱟᱜ ᱢᱟᱭᱟᱢ ᱛᱮ ᱛᱚᱞ ᱟᱠᱟᱱ ᱵᱤᱥ ᱫᱚ ᱫᱚᱦᱚ ᱠᱟᱜ ᱟᱹᱧ ᱥᱮ ᱜᱤᱰᱤ ᱠᱟᱜᱼᱟᱹᱧ ᱵᱤᱪᱟᱹᱨ ᱟᱹᱧ ᱯᱮ ᱟᱨ ᱞᱟᱹᱭ ᱟᱹᱧ ᱯᱮ ᱥᱚᱢᱟᱡᱽ ᱨᱤᱱ ᱢᱟᱱᱣᱟ ᱠᱚ ᱱᱚᱶᱟ ᱜᱮ ᱠᱩᱠᱞᱤ ᱾
ᱱᱚᱶᱟ ᱨᱤᱱ ᱵᱷᱟᱹᱜᱤᱫᱟᱨ ᱫᱚ ᱚᱠᱚᱭ ?
***
