ᱠᱤᱥᱟᱹᱬ ᱫᱷᱚᱢᱚᱠ

ᱳᱰᱤᱥᱟ ᱯᱚᱱᱚᱛ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮ ᱢᱤᱫ ᱧᱩᱛᱩᱢᱟᱱ ᱨᱟᱹᱥᱤ ᱟᱹᱛᱩ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ ᱠᱩᱞᱟᱹᱭ ᱡᱷᱟᱹᱨᱤ ᱾ ᱱᱚᱣᱟ ᱨᱟᱹᱥᱤ ᱟᱹᱛᱩᱨᱮ ᱠᱟᱹᱨᱡᱤ ᱴᱩᱰᱩ ᱢᱮᱱᱛᱮ ᱧᱩᱛᱩᱢᱟᱱ ᱠᱤᱥᱟᱹᱬ ᱦᱚᱲ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱟᱹᱡᱤᱡ ᱵᱩᱰᱷᱤ ᱟᱨ ᱫᱩᱞᱟᱹᱲ ᱵᱮᱴᱟ ᱢᱟᱹᱫᱷᱩ ᱟᱠᱚᱣᱟᱜ ᱜᱷᱟᱨᱚᱸᱡᱽ ᱨᱮᱠᱚ ᱛᱟᱦᱮᱸ ᱠᱟᱱᱟ ᱾ ᱟᱹᱠᱤᱱᱤᱡ ᱦᱚᱯᱚᱱᱟᱜ ᱩᱢᱮᱨ ᱫᱚ ᱮᱭᱟᱭ ᱤᱨᱟᱹᱞ ᱵᱚᱪᱷᱚᱨ ᱜᱟᱱ ᱦᱩᱭᱩᱜ ᱛᱟᱭᱟ ᱾ ᱟᱡ ᱨᱤᱱ ᱟᱭᱳ ᱵᱟᱵᱟ ᱢᱤᱫᱴᱟᱹᱝ ᱠᱚᱲᱟ ᱜᱤᱫᱽᱨᱟᱹ ᱤᱫᱤᱛᱮ ᱟᱹᱰᱤ ᱫᱩᱞᱟᱹᱲ ᱛᱤᱠᱤᱱ ᱦᱟᱨᱟ ᱵᱩᱨᱩᱭᱮ ᱛᱟᱦᱮᱸ ᱠᱟᱱᱟ ᱾

ᱱᱚᱣᱟ ᱨᱟᱹᱥᱤ ᱟᱹᱛᱩ ᱫᱚ ᱪᱟᱹᱨ ᱜᱤᱨᱫᱟᱹ ᱵᱩᱨᱩ ᱛᱮᱜᱮ ᱜᱷᱮᱨᱟᱣ ᱮᱥᱮᱫ ᱟᱠᱟᱱᱟ ᱟᱨ ᱢᱤᱫᱴᱟᱹᱝ ᱵᱟᱹᱨᱟᱹᱦᱤ ᱜᱟᱰᱟ ᱦᱚᱸ ᱵᱩᱨᱩ ᱫᱷᱟᱨᱮᱛᱮ ᱞᱤᱧᱤ ᱪᱟᱞᱟᱣ ᱟᱠᱟᱱᱟ ᱾ ᱚᱱᱟ ᱟᱹᱛᱩ ᱨᱤᱱ ᱦᱚᱲ ᱠᱚᱣᱟᱜ ᱫᱚ ᱪᱟᱥᱼᱵᱟᱥ ᱞᱟᱹᱜᱤᱫ ᱫᱟᱜ ᱨᱮᱱᱟᱝ ᱚᱵᱷᱟᱵᱽ ᱜᱮ ᱵᱟᱹᱱᱩᱜ ᱛᱟᱠᱚᱣᱟ ᱾ ᱡᱟᱦᱟᱸᱭ ᱠᱚ ᱪᱟᱥ ᱠᱟᱹᱢᱤ ᱨᱮᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱩᱱᱠᱩ ᱞᱟᱹᱜᱤᱫ ᱫᱚ ᱫᱷᱚᱱ ᱛᱟᱠᱚ ᱫᱚ ᱟᱱᱮᱡ ᱫᱷᱟᱱᱮᱡ ᱜᱮ ᱛᱟᱦᱮᱸᱱ ᱠᱟᱱᱟ ᱟᱨ ᱡᱚᱢ ᱧᱩ ᱠᱚᱦᱚᱸ ᱩᱨᱩᱱ ᱯᱩᱨᱩᱱ ᱜᱮ ᱦᱩᱭᱩᱜ ᱠᱟᱱ ᱛᱟᱠᱚᱣᱟ ᱾ ᱚᱱᱟ ᱨᱟᱹᱥᱤ ᱟᱹᱛᱩ ᱛᱤᱞᱟᱹᱭ ᱡᱷᱟᱹᱨᱤ ᱟᱹᱛᱩ ᱨᱮᱜᱮ ᱢᱤᱫ ᱨᱮᱸᱜᱮᱡ ᱦᱚᱲ ᱚᱲᱟᱜ ᱠᱟᱛᱮᱭ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱧᱩᱛᱩᱢ ᱫᱚ ᱜᱩᱢᱫᱟᱹ ᱥᱚᱨᱮᱱ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱫᱚ ᱢᱚᱬᱮ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱜᱩᱢᱫᱟᱹ ᱥᱚᱨᱮᱱ ᱫᱚ ᱡᱚᱛᱚ ᱠᱷᱚᱱ ᱦᱩᱰᱤᱧ ᱵᱚᱭᱦᱟ ᱠᱟᱱᱟᱭ ᱾ ᱥᱟᱸᱜᱮ ᱵᱚᱭᱦᱟ ᱤᱫᱤᱛᱮ ᱵᱟᱝ ᱠᱚ ᱯᱚᱴᱟᱣ ᱞᱮᱱᱟ ᱾ ᱛᱟᱭᱚᱢ ᱵᱤᱫᱟᱹᱞ ᱵᱷᱮᱜᱟᱨ ᱦᱚᱸ ᱠᱚ ᱵᱷᱮᱜᱟᱨ ᱮᱱᱟ ᱾ ᱢᱤᱫ ᱴᱷᱮᱱ ᱛᱟᱦᱮᱸᱱ ᱚᱠᱛᱚ ᱨᱮᱫᱚ ᱚᱛ ᱦᱟᱥᱟ ᱡᱟᱜᱟ ᱵᱟᱹᱲᱤ ᱠᱚᱦᱚᱸ ᱟᱹᱰᱤ ᱵᱟᱹᱲᱛᱤ ᱜᱮ ᱛᱟᱦᱮᱸ ᱠᱟᱱᱟ ᱾ ᱵᱷᱮᱜᱟᱨ ᱵᱷᱤᱜᱤᱨ ᱠᱟᱛᱮ ᱫᱚ ᱢᱤᱫᱴᱟᱹᱝ ᱯᱤᱴᱷᱟᱹ ᱢᱚᱬᱮ ᱴᱷᱮᱱ ᱦᱟᱹᱴᱤᱧ ᱠᱮᱫ ᱞᱮᱠᱟ ᱢᱤᱫᱴᱟᱹᱝ ᱵᱟᱨᱮᱭᱟ ᱠᱮᱫᱟᱨ ᱜᱮ ᱢᱚᱬᱮ ᱦᱚᱲᱨᱮ ᱵᱷᱟᱜᱽ ᱛᱟᱠᱚ ᱯᱟᱲᱟᱣ ᱮᱱᱟ ᱾ ᱵᱟᱲᱜᱮ ᱠᱚᱦᱚᱸ ᱠᱚᱢ ᱜᱮ ᱵᱷᱟᱜᱽ ᱛᱟᱠᱚ ᱯᱟᱲᱟᱣ ᱮᱱᱟ ᱾

ᱨᱟᱹᱥᱤ ᱟᱹᱛᱩ ᱨᱮ ᱛᱟᱦᱮᱸ ᱠᱟᱛᱮ ᱨᱮᱦᱚᱸ ᱟᱨ ᱵᱟᱝ ᱫᱟᱜ ᱨᱮᱱᱟᱝ ᱥᱩᱵᱤᱫᱷᱟᱹ ᱛᱟᱦᱮᱸ ᱠᱟᱛᱮ ᱨᱮᱦᱚᱸ ᱡᱟᱜᱟ ᱵᱟᱹᱲᱤ ᱠᱚᱢ ᱛᱟᱦᱮᱸᱱ ᱠᱷᱟᱱ ᱪᱟᱥ ᱠᱟᱛᱮ ᱛᱤᱱᱟᱹᱜ ᱫᱷᱚᱱ ᱛᱟᱢ ᱦᱩᱭᱩᱜᱼᱟ ᱾ ᱚᱱᱟ ᱤᱫᱤᱛᱮ ᱡᱚᱛᱚ ᱵᱚᱭᱦᱟ ᱜᱮ ᱟᱯᱟᱱ ᱟᱹᱯᱤᱱ ᱟᱹᱥᱩᱞᱚᱜ ᱨᱮᱱᱟᱜ ᱦᱚᱨ ᱠᱚ ᱫᱤᱥᱟᱹ ᱠᱮᱫᱼᱟ ᱾ ᱜᱩᱢᱫᱟᱹ ᱫᱚ ᱟᱹᱛᱩ ᱨᱮᱜᱮ ᱠᱟᱹᱨᱡᱤ ᱠᱤᱥᱟᱹᱬ ᱚᱲᱟᱜ ᱨᱮ ᱥᱟᱶᱛᱮ ᱟᱹᱡᱤᱡ ᱵᱩᱰᱷᱤ ᱦᱚᱸ ᱩᱱᱠᱩ ᱚᱲᱟᱜ ᱨᱮᱜᱮ ᱡᱚᱲ ᱢᱩᱞᱤᱭᱟᱹ ᱠᱟᱹᱢᱬᱤ ᱞᱮᱠᱟ ᱵᱟᱱᱟ ᱦᱚᱲ ᱠᱤᱱ ᱠᱟᱹᱢᱤ ᱠᱮᱫᱼᱟ ᱾ ᱟᱹᱠᱤᱱᱤᱡ ᱢᱤᱫᱴᱟᱹᱝ ᱜᱮ ᱠᱚᱲᱟ ᱜᱤᱫᱽᱨᱟᱹᱭ ᱛᱟᱦᱮᱸ ᱠᱟᱱ ᱛᱟᱹᱠᱤᱱᱟ ᱾ ᱧᱩᱛᱩᱢ ᱫᱚᱛᱟᱭ ᱛᱟᱦᱮᱸ ᱠᱟᱱᱟ ᱥᱟᱹᱫᱷᱩ ᱥᱚᱨᱮᱱ ᱾ ᱩᱱᱤ ᱜᱤᱫᱽᱨᱟᱹ ᱟᱜ ᱩᱢᱮᱨ ᱫᱚ ᱮᱭᱟᱭ ᱤᱨᱟᱹᱞ ᱜᱟᱱ ᱵᱚᱪᱷᱚᱨ ᱦᱩᱭᱩᱜ ᱛᱟᱭᱟ ᱾ ᱟᱭᱳ ᱵᱟᱵᱟ ᱥᱟᱞᱟᱜ ᱜᱮ ᱟᱹᱠᱤᱱᱤᱡ ᱦᱚᱯᱚᱱ ᱥᱟᱹᱫᱷᱩ ᱦᱚᱸ ᱠᱤᱥᱟᱹᱬ ᱠᱟᱹᱨᱡᱤ ᱚᱲᱟᱜ ᱨᱮᱜᱮ ᱛᱟᱦᱮᱸᱱᱟᱭ ᱾ ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱧᱮᱞ ᱛᱮ ᱟᱹᱠᱤᱱᱤᱡ ᱦᱚᱯᱚᱱ ᱥᱟᱹᱫᱷᱩ ᱦᱚᱸ ᱟᱹᱛᱩ ᱨᱮᱱᱟᱝ ᱤᱛᱩᱱ ᱟᱥᱲᱟ ᱨᱮ ᱚᱞᱚᱜ ᱞᱟᱹᱜᱤᱫ ᱟᱭᱳ ᱵᱟᱵᱟ ᱛᱤᱠᱤᱱᱮ ᱢᱮᱛᱟᱛ ᱠᱤᱱᱟ ᱾ ᱤᱱᱟᱹ ᱦᱤᱞᱚᱜ ᱜᱮ ᱥᱟᱹᱫᱷᱩ ᱟᱡ ᱵᱟᱵᱟ ᱜᱩᱢᱫᱟᱹ, ᱠᱤᱥᱟᱹᱬ ᱛᱟᱭᱮ ᱢᱮᱛᱟᱫ ᱫᱮᱭᱟ, ᱫᱟᱫᱟ ᱜᱟᱯᱟ ᱫᱚ ᱟᱹᱢᱤᱡ ᱜᱩᱸᱜᱩᱢ ᱠᱚᱲᱟ ᱛᱟᱢ ᱟᱹᱛᱩ ᱤᱛᱩᱱ ᱟᱥᱲᱟ ᱨᱤᱧ ᱵᱷᱩᱨᱛᱤ ᱠᱟᱭᱟ ᱾

ᱚᱱᱟ ᱤᱫᱤᱛᱮ ᱜᱟᱯᱟ ᱫᱚ ᱠᱟᱹᱢᱤ ᱦᱤᱡᱩᱜ ᱨᱮ ᱜᱷᱟᱹᱲᱤᱠ ᱧᱚᱜᱚᱜᱼᱟ ᱾ ᱴᱷᱤᱠ ᱜᱮᱭᱟ ᱵᱟᱹᱵᱩ ᱛᱚᱵᱮ, ᱵᱷᱩᱨᱛᱤ ᱵᱟᱲᱟ ᱠᱟᱛᱮ ᱞᱚᱜᱚᱱ ᱫᱷᱟᱨᱟ ᱜᱮ ᱨᱩᱣᱟᱹᱲ ᱵᱤᱱ, ᱠᱟᱹᱢᱤ ᱛᱟᱵᱚᱱ ᱟᱹᱰᱤ ᱜᱟᱱ ᱜᱮ ᱢᱮᱱᱟᱜ ᱛᱟᱵᱚᱱᱟ ᱾ ᱟᱫᱚ ᱠᱤᱥᱟᱹᱬ ᱛᱟᱭᱮ ᱢᱮᱱ ᱨᱩᱣᱟᱹᱲ ᱟᱫᱮᱭᱟ, ᱦᱚᱭ ᱫᱟᱫᱟ ᱛᱚᱵᱮ ᱞᱚᱜᱚᱱ ᱜᱮᱞᱤᱧ ᱨᱩᱣᱟᱹᱲᱟ ᱾

ᱫᱚᱥᱟᱨ ᱦᱤᱞᱚᱜ ᱜᱩᱢᱫᱟᱹ ᱟᱹᱡᱤᱡ ᱦᱚᱯᱚᱱ ᱥᱟᱹᱫᱷᱩ ᱥᱟᱞᱟᱜ ᱟᱹᱛᱩ ᱨᱮᱱᱟᱝ ᱤᱛᱩᱱ ᱟᱥᱲᱟ ᱠᱤᱱ ᱥᱮᱱ ᱮᱱᱟ ᱟᱨ ᱚᱱᱟ ᱟᱥᱲᱟ ᱨᱮᱭ ᱵᱷᱩᱨᱛᱤ ᱠᱟᱫᱮᱭᱟ ᱾ ᱵᱷᱩᱨᱛᱤ ᱛᱟᱭᱱᱚᱢ ᱞᱚᱜᱚᱱ ᱫᱷᱟᱨᱟ ᱜᱮ ᱥᱟᱹᱫᱷᱩᱭᱤᱡ ᱵᱟᱵᱟ ᱫᱚ ᱠᱤᱥᱟᱹᱬ ᱚᱲᱟᱜ ᱨᱩᱣᱟᱹᱲ ᱠᱟᱛᱮ ᱠᱤᱥᱟᱹᱬ ᱮ ᱧᱟᱯᱟᱢ ᱠᱮᱫᱮᱭᱟ ᱟᱨ ᱮ ᱠᱩᱞᱤ ᱠᱮᱫᱮᱭᱟ, ᱫᱟᱫᱟ ᱪᱮᱫ ᱠᱟᱹᱢᱤ ᱠᱚ ᱢᱮᱱᱟᱜᱼᱟ, ᱠᱟᱹᱢᱤᱨᱤᱧ ᱪᱷᱩᱴᱟᱹᱣᱜᱼᱟ ᱾ ᱟᱫᱚ ᱠᱤᱥᱟᱹᱬ ᱟᱹᱡᱤᱡ ᱢᱩᱞᱤᱭᱟᱹ ᱜᱩᱢᱫᱟᱹᱭ ᱢᱮᱛᱟᱫ ᱫᱮᱭᱟ, ᱫᱩ ᱵᱟᱹᱵᱩ ᱵᱟᱲᱮ ᱠᱚᱪᱟ ᱢᱟᱨᱟᱝ ᱵᱟᱹᱭᱦᱟᱹᱲ ᱧᱮᱞ ᱟᱹᱜᱩᱭ ᱢᱮ ᱫᱟᱜ ᱞᱤᱧᱤ ᱛᱮ ᱛᱤᱱ ᱢᱟᱨᱟᱝ ᱵᱷᱟᱸᱜᱟᱴ ᱟᱠᱟᱱᱟ ᱵᱟᱝᱠᱷᱟᱱ ᱜᱟᱯᱟ ᱢᱩᱞᱤᱭᱟᱹ ᱵᱟᱨ ᱯᱮ ᱦᱚᱲ ᱟᱹᱪᱩ ᱠᱟᱛᱮ ᱟᱨ ᱟᱢ ᱢᱮᱥᱟ ᱠᱟᱛᱮ ᱫᱚᱲᱦᱚ ᱥᱟᱹᱦᱤᱡ ᱟᱲᱮ ᱨᱩᱣᱟᱹᱲ ᱠᱟᱜ ᱯᱮ ᱾ ᱴᱷᱤᱠ ᱜᱮᱭᱟ ᱫᱟᱫᱟ ᱪᱟᱞᱟᱜ ᱠᱟᱹᱱᱟᱹᱧ ᱾ ᱪᱟᱞᱟᱣ ᱮᱱᱟᱭ ᱜᱩᱢᱫᱟᱹ ᱵᱟᱲᱮ ᱠᱚᱪᱟ ᱢᱟᱨᱟᱝ ᱵᱟᱹᱭᱦᱟᱹᱲ ᱧᱮᱧᱮᱞ ᱾ ᱥᱮᱴᱮᱨ ᱠᱟᱛᱮ ᱧᱮᱞ ᱟᱫᱚᱭ ᱥᱟᱹᱨᱤ ᱜᱮ ᱟᱹᱰᱤ ᱢᱟᱨᱟᱝ ᱜᱮ ᱵᱟᱹᱭᱦᱟᱹᱲ ᱨᱮᱱᱟᱝ ᱟᱲᱮ ᱫᱚ ᱵᱷᱟᱸᱜᱟᱴ ᱟᱠᱟᱱᱟ ᱾ ᱱᱚᱣᱟ ᱵᱷᱟᱸᱜᱟᱴ ᱠᱟᱛᱷᱟ ᱠᱤᱥᱟᱹᱬ ᱮ ᱞᱟᱹᱭ ᱟᱫᱮᱭᱟ ᱾ ᱛᱚᱵᱮ ᱫᱚ ᱜᱟᱯᱟ ᱵᱟᱨ ᱯᱮ ᱦᱚᱲ ᱢᱩᱞᱤᱭᱟᱹ ᱤᱫᱤ ᱠᱟᱛᱮ ᱚᱱᱟ ᱵᱷᱟᱸᱜᱟᱴ ᱟᱲᱮ ᱠᱮᱴᱮᱡ ᱥᱟᱹᱦᱤᱸᱡ ᱟᱲᱮ ᱨᱩᱣᱟᱹᱲ ᱠᱟᱜ ᱯᱮ ᱾ ᱜᱩᱢᱫᱟᱹ ᱫᱚ ᱠᱤᱥᱟᱹᱬ ᱤᱡ ᱟᱹᱰᱤ ᱵᱤᱥᱟᱹᱥ ᱦᱚᱲ ᱢᱩᱞᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱾ ᱟᱹᱡᱤᱡ ᱜᱤᱫᱽᱨᱟᱹ ᱥᱟᱹᱫᱷᱩ ᱠᱤᱥᱟᱹᱬ ᱦᱚᱯᱚᱱᱤᱡ ᱢᱟᱹᱫᱷᱩ ᱥᱟᱞᱟᱜ ᱟᱹᱰᱤ ᱠᱤᱱ ᱡᱚᱴᱟᱣ ᱯᱚᱴᱟᱣᱜᱼᱟ ᱾ ᱠᱤᱥᱟᱹᱬ ᱦᱚᱯᱚᱱ ᱫᱟᱠᱟ ᱡᱚᱢ ᱡᱷᱚᱜ ᱦᱚᱸ ᱟᱹᱡᱤᱡ ᱜᱟᱛᱮ ᱥᱟᱹᱫᱷᱩ ᱦᱚᱸᱭ ᱫᱩᱲᱩᱵ ᱢᱮᱥᱟᱭᱮᱭᱟ ᱾ ᱠᱤᱥᱟᱹᱬ ᱚᱲᱟᱜ ᱠᱟᱛᱷᱟ ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱟᱹᱰᱤ ᱵᱮᱥ ᱵᱮᱥ ᱫᱟᱠᱟ ᱩᱛᱩ ᱠᱚ ᱥᱩᱨ ᱟᱭᱟ ᱥᱟᱶᱛᱮ ᱟᱹᱡᱤᱡ ᱡᱚᱴᱟᱣ ᱥᱟᱹᱫᱷᱩ ᱦᱚᱸ ᱫᱩᱲᱩᱵ ᱢᱮᱥᱟ ᱠᱟᱛᱮ ᱥᱤᱵᱤᱞᱟᱜ ᱩᱛᱩ ᱫᱟᱠᱟᱭ ᱡᱚᱢ ᱡᱚᱢᱟ ᱾ ᱥᱟᱹᱫᱷᱩ ᱛᱮᱠᱚ ᱢᱟ ᱨᱮᱸᱜᱮᱡ ᱦᱚᱲ ᱱᱚᱝᱠᱟᱱ ᱥᱤᱵᱤᱞ ᱩᱛᱩ ᱫᱟᱠᱟ ᱫᱚ ᱟᱡ ᱨᱤᱱ ᱟᱭᱳ ᱵᱟᱵᱟ ᱚᱠᱟᱨᱮ ᱠᱤᱱ ᱠᱩᱲᱟᱹᱣ ᱫᱟᱲᱮᱭᱟᱜᱼᱟ ᱾ ᱟᱠᱚ ᱚᱲᱟᱜ ᱨᱮᱫᱚ ᱵᱟᱥᱠᱮ ᱫᱟᱠᱟ ᱟᱲᱟᱜ ᱩᱛᱩ ᱥᱟᱞᱟᱜ ᱜᱮᱠᱚ ᱡᱚᱢᱟ ᱾ ᱩᱱᱠᱩ ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱛᱮᱠᱚ ᱟᱜ ᱡᱚᱢ ᱧᱩ ᱧᱮᱞ ᱛᱮ ᱟᱡ ᱨᱤᱱ ᱟᱭᱳ ᱵᱟᱵᱟᱭ ᱢᱮᱛᱟ ᱠᱤᱱᱟ ᱵᱟᱵᱟ ᱵᱟᱵᱟ, ᱟᱭᱳ ᱟᱭᱳ, ᱟᱵᱚ ᱫᱚ ᱫᱤᱱ ᱜᱮ ᱵᱟᱥᱠᱮ ᱫᱟᱠᱟ ᱟᱲᱟᱜ ᱩᱛᱩ ᱜᱮᱵᱚᱱ ᱡᱚᱢᱟ ? ᱟᱡ ᱨᱤᱱ ᱟᱭᱳ ᱵᱟᱵᱟ ᱠᱤᱱ ᱢᱮᱛᱟᱭᱟ, ᱟᱵᱚ ᱫᱚ ᱨᱮᱸᱜᱮᱡ ᱦᱚᱲ ᱠᱟᱱᱟᱵᱚᱱ ᱵᱟᱹᱵᱩ ᱾ ᱟᱹᱢᱤᱡ ᱡᱚᱴᱟᱹᱣ ᱢᱟᱹᱫᱷᱩ ᱛᱮᱠᱚ ᱫᱚ ᱠᱤᱥᱟᱹᱬ ᱦᱚᱲ ᱠᱟᱱᱟᱠᱚ ᱵᱟᱹᱵᱩ ᱫᱤᱱ ᱫᱤᱱ ᱜᱮ ᱡᱤᱞ ᱦᱟᱹᱠᱩ ᱥᱤᱵᱤᱞ ᱥᱤᱵᱤᱞ ᱠᱚ ᱡᱚᱢᱟ ᱾ ᱩᱱᱠᱩᱣᱟᱜ ᱫᱚ ᱚᱛ ᱦᱟᱥᱟ, ᱴᱟᱠᱟ ᱯᱩᱭᱥᱟᱹ ᱫᱷᱚᱱ ᱫᱩᱨᱤᱵᱽ ᱛᱮ ᱛᱟᱠᱚ ᱯᱮᱨᱮᱡ ᱟᱠᱟᱱᱟ ᱾ ᱩᱱᱠᱩ ᱚᱲᱟᱜ ᱨᱮ ᱢᱤᱫ ᱫᱤᱱ ᱜᱟᱱ ᱟᱢ ᱵᱟᱵᱟ ᱟᱨ ᱤᱧ ᱵᱟᱹᱞᱤᱧ ᱠᱟᱹᱢᱤ ᱞᱮᱠᱷᱟᱱ ᱟᱵᱚ ᱚᱲᱟᱜ ᱨᱮᱱᱟᱝ ᱪᱩᱞᱦᱟᱹᱨᱮ ᱥᱮᱸᱜᱮᱞ ᱜᱮ ᱵᱟᱭ ᱡᱩᱞᱩᱜᱼᱟ ᱾ ᱡᱟᱦᱟᱸ ᱛᱤᱱᱟᱹᱜ ᱩᱱᱠᱩ ᱚᱲᱟᱜ ᱨᱮ ᱠᱟᱹᱢᱤ ᱤᱫᱤ ᱠᱟᱛᱮᱜᱮ ᱱᱤᱱᱟᱹᱜ ᱨᱮᱦᱚᱸ ᱵᱟᱥᱠᱮ ᱫᱟᱜ ᱢᱟᱹᱰᱤ ᱟᱨ ᱟᱲᱟᱜ ᱩᱛᱩ ᱡᱩᱴᱟᱹᱣ ᱟᱵᱚᱱ ᱠᱟᱱᱟ ᱾ ᱵᱟᱝᱠᱷᱟᱱ ᱟᱵᱚ ᱫᱚ ᱨᱮᱸᱜᱮᱡ ᱛᱮᱜᱮ ᱵᱚᱱ ᱜᱤᱛᱤᱡᱼᱟ ᱦᱩᱱᱟᱹᱝ ᱾ ᱟᱫᱚ ᱟᱹᱠᱤᱱᱤᱡ ᱜᱤᱫᱽᱨᱟᱹ ᱟᱠᱚ ᱚᱲᱟᱜ ᱨᱮᱱᱟᱝ ᱤᱫᱤ ᱠᱟᱛᱮ ᱡᱚᱛᱚᱣᱟᱜ ᱠᱤᱱ ᱵᱟᱰᱟᱭ ᱚᱪᱚ ᱠᱮᱫᱮᱭᱟ ᱾ ᱟᱨᱦᱚᱸ ᱠᱤᱱ ᱥᱤᱠᱷᱟᱹᱣ ᱯᱟᱲᱦᱟᱣ ᱠᱮᱫᱮᱭᱟ ᱵᱟᱹᱵᱩ ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱥᱟᱞᱟᱜ ᱡᱚᱴᱟᱣ ᱫᱚ ᱡᱚᱴᱟᱹᱣᱜ ᱢᱮᱜᱮ ᱵᱟᱹᱞᱤᱧ ᱢᱟᱱᱟᱭᱮᱫ ᱢᱮᱭᱟ, ᱢᱮᱱᱠᱷᱟᱱ ᱤᱛᱩᱱ ᱟᱥᱲᱟ ᱥᱮᱱᱚᱜ ᱫᱚ ᱟᱞᱚᱢ ᱦᱮᱲᱟᱭᱟ ᱟᱨ ᱢᱚᱱᱮ ᱮᱢ ᱠᱟᱛᱮ ᱯᱟᱲᱦᱟᱣᱜ ᱢᱮ ᱾ ᱵᱮᱥ ᱥᱟᱹᱦᱤᱸᱡ ᱮᱢ ᱯᱟᱲᱦᱟᱣ ᱞᱮᱱᱠᱷᱟᱱ ᱢᱟᱨᱟᱝ ᱚᱯᱷᱤᱥᱟᱨ ᱟᱨ ᱵᱟᱝ ᱰᱟᱠᱛᱚᱨ ᱤᱝᱡᱤᱱᱤᱭᱟᱹᱨ ᱦᱚᱸᱢ ᱵᱮᱱᱟᱣ ᱫᱟᱲᱮᱭᱟᱜᱼᱟ ᱾ ᱯᱟᱲᱦᱟᱣ ᱪᱮᱛᱟᱱ ᱨᱮᱜᱮ ᱱᱚᱣᱟ ᱡᱩᱲᱩ ᱠᱚᱫᱚᱢ ᱟᱯᱱᱟᱨ ᱫᱟᱲᱮᱭᱟᱜᱼᱟ ᱾ ᱯᱩᱭᱥᱟᱹ ᱴᱟᱠᱟ ᱪᱮᱛᱟᱱ ᱨᱮᱫᱚ ᱵᱟᱹᱵᱩ ᱟᱞᱚᱢ ᱩᱭᱦᱟᱹᱨᱚᱜᱼᱟ ᱾ ᱤᱧ ᱟᱨ ᱟᱢ ᱵᱟᱵᱟ ᱟᱜ ᱫᱟᱲᱮ ᱛᱟᱦᱮᱸᱱ ᱨᱮᱜᱮ ᱚᱞᱚᱜ ᱯᱟᱲᱦᱟᱣ ᱨᱮ ᱪᱷᱩᱴᱟᱹᱣ ᱠᱚᱜ ᱢᱮ ᱾ ᱪᱤᱠᱟᱹᱛᱮ ᱱᱤᱛᱚᱜ ᱛᱟᱹᱞᱤᱧ ᱫᱟᱲᱮ ᱢᱮᱱᱟᱜ ᱨᱮᱜᱮ ᱟᱹᱞᱤᱧᱟᱜ ᱫᱟᱲᱮ ᱞᱤᱧ
ᱟᱹᱠᱷᱨᱤᱧ ᱫᱟᱲᱮᱭᱟᱜ ᱠᱟᱱᱟ ᱾ ᱫᱟᱲᱮ ᱪᱟᱞᱟᱣ ᱞᱮᱱᱠᱷᱟᱱ ᱟᱵᱚ ᱫᱚ ᱪᱮᱫ ᱦᱚᱸ ᱵᱟᱝ ᱵᱚᱱ ᱜᱟᱱᱚᱜᱼᱟ ᱾ ᱚᱱᱟ ᱤᱫᱤᱛᱮ ᱟᱭᱳ ᱵᱟᱵᱟ ᱟᱜ ᱠᱟᱛᱷᱟ ᱞᱩᱛᱩᱨ ᱨᱮ ᱨᱮᱵᱮᱫ ᱫᱚᱦᱚ ᱠᱟᱛᱮ ᱪᱷᱩᱴᱟᱹᱣᱜ ᱢᱮ ᱾

ᱨᱮᱸᱜᱮᱡ ᱚᱲᱟᱜ ᱨᱤᱱᱤᱡ ᱜᱩᱢᱫᱟᱹ ᱦᱚᱯᱚᱱ ᱥᱟᱹᱫᱷᱩ ᱯᱟᱲᱦᱟᱣ ᱨᱮ ᱠᱩᱨᱩ ᱢᱩᱴᱩᱭ ᱪᱷᱩᱴᱟᱹᱣ ᱮᱱᱟ ᱤᱛᱩᱱ ᱟᱥᱲᱟ ᱥᱮᱱᱚᱜ ᱨᱮᱦᱚᱸ ᱵᱟᱭ ᱦᱮᱲᱟ ᱞᱮᱫᱼᱟ ᱾ ᱤᱛᱩᱱ ᱟᱥᱲᱟᱨᱮ ᱢᱟᱪᱮᱛ ᱜᱤᱫᱽᱨᱟᱹ ᱠᱚ ᱯᱟᱲᱦᱟᱣ ᱠᱚ ᱚᱠᱛᱚ ᱨᱮ ᱥᱟᱹᱫᱷᱩ ᱫᱚ ᱟᱹᱰᱤ ᱢᱚᱱ ᱫᱷᱮᱭᱟᱱ ᱞᱩᱛᱩᱨ ᱠᱟᱱᱦᱮᱬ ᱠᱟᱛᱮ ᱟᱛᱮᱱ ᱠᱟᱜᱼᱟᱭ ᱾ ᱢᱚᱱᱮ ᱞᱟᱜᱟᱣ ᱠᱟᱛᱮ ᱯᱟᱲᱦᱟᱣ ᱮᱱᱟᱭ ᱾ ᱞᱟᱛᱟᱨ ᱪᱟᱱᱚᱪ ᱨᱮᱱᱟᱜ ᱥᱮᱨᱢᱟ ᱠᱤᱭᱟᱹ ᱵᱤᱱᱤᱰ ᱦᱚᱸ ᱦᱩᱭᱮᱱᱟ ᱾ ᱚᱱᱟᱨᱮ ᱚᱱᱟ ᱨᱟᱹᱥᱤ ᱟᱹᱛᱩ ᱛᱤᱞᱟᱹᱭ ᱡᱷᱟᱹᱨᱤ U.P. School ᱠᱷᱚᱱᱟᱜ ᱡᱟᱦᱟᱸ ᱛᱤᱱᱟ.ᱜ ᱵᱤᱱᱤᱰᱤᱭᱟᱹ ᱠᱚ ᱮᱢ ᱞᱮᱫᱼᱟ ᱩᱱᱠᱩ ᱠᱷᱚᱱᱟᱜ ᱫᱚ ᱥᱟᱹᱫᱷᱩ ᱜᱮ ᱯᱩᱭᱞᱩ ᱯᱚᱡᱤᱥᱳᱱ ᱫᱚᱭ ᱟᱢᱮᱴ ᱞᱮᱫᱼᱟ ᱾ ᱚᱱᱟ ᱤᱫᱤᱛᱮ ᱚᱱᱟ ᱤᱥᱠᱩᱞ ᱨᱤᱱ ᱢᱟᱪᱮᱛ ᱟᱨ ᱟᱹᱛᱩ ᱦᱚᱲ ᱴᱷᱮᱱ ᱠᱷᱚᱱᱟᱜ ᱟᱹᱰᱤ ᱜᱟᱱ ᱥᱟᱨᱦᱟᱣ ᱮ ᱧᱟᱢ ᱠᱮᱫᱼᱟ ᱾ ᱞᱟᱛᱟᱨ ᱪᱟᱱᱚᱪ ᱥᱟᱹᱛ ᱛᱟᱭᱱᱚᱢ ᱪᱮᱛᱟᱱ ᱪᱟᱱᱚᱪ ᱯᱟᱲᱦᱟᱣ ᱞᱟᱹᱜᱤᱫ ᱛᱮ ᱵᱚᱦᱚᱲᱫᱟ M.E. School ᱨᱮᱭ ᱵᱷᱩᱨᱛᱤ ᱮᱱᱟ ᱾

ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱦᱚᱸ ᱟᱹᱰᱤ ᱠᱚᱥᱴᱚ ᱛᱮ ᱞᱟᱛᱟᱨ ᱪᱟᱱᱚᱪ ᱥᱟᱹᱛ ᱠᱟᱛᱮ ᱚᱱᱟ ᱥᱩᱨ ᱨᱮᱱᱟᱝ ᱵᱚᱦᱚᱲᱫᱟ M.E. School ᱨᱮᱜᱮ ᱵᱷᱩᱨᱛᱤ ᱮᱱᱟᱭ ᱾ ᱢᱟᱹᱫᱷᱩ ᱟᱨ ᱥᱟᱹᱫᱷᱩ ᱫᱚ ᱤᱥᱠᱩᱞ ᱯᱟᱲᱦᱟᱣ ᱡᱚᱴᱟᱣ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱟᱹᱛᱩ ᱦᱚᱸ ᱢᱤᱫᱴᱟᱹᱝ ᱟᱹᱛᱩ ᱜᱮ ᱛᱟᱦᱮᱸ ᱠᱟᱱ ᱛᱟᱹᱠᱤᱱᱟ ᱾ ᱟᱯᱟᱱ ᱟᱹᱯᱤᱱᱟᱜ ᱰᱩᱞᱩᱝ ᱜᱟᱹᱰᱤ ᱛᱮᱜᱮ ᱤᱥᱠᱩᱞ ᱫᱚᱠᱤᱱ ᱦᱤᱡᱩᱜ ᱥᱮᱱᱚᱜ ᱠᱟᱱ ᱛᱟᱦᱮᱸᱫᱚᱜ ᱾ ᱚᱲᱟᱜ ᱨᱮᱱᱟᱜ ᱫᱟᱜ ᱥᱤᱛᱟᱹ ᱧᱩ ᱠᱟᱛᱮ ᱦᱤᱡᱩᱜ ᱥᱮᱱᱚᱜ ᱛᱮᱜᱮ M.E. ᱟᱨ Matric ᱫᱚ ᱚᱱᱟ ᱵᱚᱦᱚᱲᱫᱟ High School ᱠᱷᱚᱱᱟᱜ ᱜᱮ First Division ᱛᱮ ᱯᱟᱥ ᱠᱟᱛᱮ ᱵᱟᱹᱨᱯᱟᱫᱟ M.P.C. ᱠᱚᱞᱮᱡᱽ ᱨᱮ +᱒ Science ᱨᱮ ᱵᱷᱩᱨᱛᱤ ᱞᱮᱱᱟᱭ ᱾ ᱠᱚᱞᱮᱡᱽ ᱢᱮᱥ ᱨᱮ ᱛᱟᱦᱮᱸ ᱠᱟᱛᱮ ᱜᱮ ᱠᱩᱨᱩᱢᱩᱴᱩ ᱯᱟᱲᱦᱟᱣ ᱨᱮ ᱪᱷᱩᱴᱟᱹᱣ ᱮᱱᱟᱭ ᱾

ᱠᱟᱹᱨᱡᱤ ᱠᱤᱥᱟᱹᱬ ᱦᱚᱯᱚᱱ ᱢᱟᱹᱫᱷᱩ ᱫᱚᱭ ᱢᱟᱹᱫᱷᱩᱣᱟᱹ ᱮᱱᱟᱭ ᱦᱟᱺᱰᱤ ᱯᱟᱹᱨᱣᱟᱹ ᱨᱮ ᱡᱚᱵᱮ ᱮᱱᱟᱭ, ᱥᱤᱨᱯᱟᱹ ᱥᱚᱲᱮ ᱮᱱᱮᱡ ᱥᱮᱨᱮᱧ ᱨᱮ ᱵᱷᱩᱞᱟᱹᱣ ᱮᱱᱟᱭ ᱾ Matric ᱦᱚᱸ ᱵᱟᱭ ᱯᱟᱥ ᱫᱟᱲᱮᱭᱟᱫᱟ ᱾ ᱫᱟᱬᱟ ᱫᱟᱬᱟ ᱛᱮ ᱵᱷᱚᱝᱠᱚᱲ ᱪᱟᱵᱟᱭᱮᱱᱟᱭ ᱾ ᱯᱟᱲᱦᱟᱣ ᱥᱮᱫ ᱜᱮ ᱢᱚᱱᱮ ᱵᱟᱭ ᱦᱩᱭ ᱟᱫᱮᱭᱟ ᱾ ᱢᱚᱱᱮ ᱛᱟᱭᱮ ᱫᱟᱹᱲ ᱠᱮᱫᱼᱟ ᱵᱟᱹᱦᱩ ᱠᱷᱟᱹᱛᱤᱨ ᱜᱮ ᱾ ᱟᱠᱚ ᱟᱹᱛᱩ ᱥᱩᱨ ᱡᱟᱢᱵᱤᱞᱟᱹ ᱠᱷᱚᱱᱟᱜ ᱵᱟᱹᱦᱩ ᱦᱚᱸᱭ ᱥᱮᱴᱮᱨ ᱠᱮᱫᱮᱭᱟ ᱟᱠᱚ ᱚᱲᱟᱜ ᱛᱮ ᱾ ᱟᱨ ᱪᱮᱫ ᱠᱤᱱ ᱢᱮᱱᱟ ᱟᱡ ᱨᱤᱱ ᱟᱭᱳ ᱵᱟᱵᱟ ᱢᱤᱫᱴᱟᱹᱝ ᱜᱮ ᱛᱟᱹᱠᱤᱱ ᱫᱩᱞᱟᱹᱲ ᱵᱮᱴᱟ ᱾ ᱵᱟᱹᱦᱩᱭ ᱟᱹᱜᱩ ᱩᱛᱟᱹᱨ ᱟᱠᱟᱫᱮᱭᱟ ᱚᱠᱟ ᱠᱟᱭᱟᱠᱤᱱ ᱾ ᱮᱜᱮᱨ ᱛᱮᱦᱚᱸ ᱵᱟᱭ ᱜᱟᱱᱚᱜ ᱠᱟᱱᱟ ᱮᱠᱞᱟ ᱦᱚᱯᱚᱱ ᱠᱟᱱᱟᱭ ᱛᱟᱹᱠᱤᱱ ᱾ ᱢᱟᱹᱫᱷᱩ ᱟᱡ ᱵᱟᱵᱟ ᱟᱹᱛᱩ ᱢᱟᱺᱡᱷᱤ ᱵᱟᱰᱟᱭ ᱚᱪᱚ ᱠᱮᱫᱮᱭᱟᱭ ᱟᱡᱤᱡ ᱦᱚᱯᱚᱱ ᱵᱟᱹᱦᱩᱭ ᱟᱹᱜᱩ ᱟᱠᱟᱫᱮᱭᱟ ᱢᱮᱱᱛᱮ ᱾ ᱢᱟᱺᱡᱷᱤ ᱵᱟᱵᱟ ᱱᱚᱣᱟ ᱠᱟᱛᱷᱟ
ᱵᱟᱰᱟᱭ ᱠᱟᱛᱮ ᱟᱹᱛᱩ ᱨᱤᱱᱤᱡ ᱜᱚᱰᱮᱛ ᱟᱹᱛᱩ ᱦᱚᱲ ᱠᱚ ᱟᱹᱭᱩᱵ ᱵᱮᱲᱟ ᱠᱟᱹᱨᱡᱤ ᱠᱤᱥᱟᱹᱬ ᱚᱲᱟᱜ ᱨᱮ ᱡᱟᱣᱨᱟᱜ ᱞᱟᱹᱜᱤᱫ ᱦᱚᱦᱚᱭ ᱞᱟᱹᱜᱤᱫ ᱮ ᱢᱮᱛᱟᱫ ᱫᱮᱭᱟ ᱾ ᱜᱚᱰᱮᱛ ᱮ ᱦᱚᱦᱚ ᱠᱮᱫᱼᱟᱭ ᱟᱹᱛᱩ ᱦᱚᱲ ᱠᱚ ᱡᱟᱣᱨᱟ ᱮᱱᱟ ᱟᱨ ᱠᱟᱹᱨᱡᱤ ᱦᱚᱯᱚᱱ ᱢᱟᱹᱫᱷᱩ ᱟᱨ ᱱᱟᱣᱟ ᱵᱟᱹᱦᱩ ᱥᱟᱶ ᱠᱚ ᱛᱤᱨᱤᱞ ᱛᱟᱨᱚᱵ ᱠᱮᱫ ᱠᱤᱱᱟ ᱾

ᱜᱩᱢᱫᱟᱹ ᱦᱚᱯᱚᱱ ᱥᱟᱹᱫᱷᱩ ᱟᱹᱰᱤ ᱱᱟᱯᱟᱭ ᱛᱮᱜᱮ +᱒ ᱥᱟᱭᱤᱸᱥ ᱵᱤᱱᱤᱰ ᱮ ᱯᱟᱥ ᱞᱮᱫᱼᱟ ᱚᱱᱟ ᱥᱟᱶᱛᱮ ᱰᱟᱠᱛᱚᱨᱤ ᱯᱟᱲᱦᱟᱣ ᱞᱟᱹᱜᱤᱫ ᱵᱤᱱᱤᱰ ᱦᱚᱸᱭ ᱯᱟᱥ ᱛᱟᱨᱟ ᱞᱮᱫᱼᱟ ᱾ ᱚᱱᱟ ᱤᱫᱤᱛᱮ ᱰᱟᱠᱛᱚᱨ ᱯᱟᱲᱦᱟᱣ ᱞᱟᱹᱜᱤᱫ ᱠᱚᱴᱚᱠ SCB Medical ᱠᱚᱞᱮᱡᱽ ᱨᱮ ᱵᱷᱩᱨᱛᱤ ᱮᱱᱟᱭ ᱾ ᱛᱩᱨᱩᱭ ᱥᱮᱨᱢᱟ ᱰᱟᱠᱛᱚᱨ ᱯᱟᱲᱦᱟᱣ ᱨᱮ ᱠᱷᱟᱴᱟᱣ ᱮᱱᱟᱭ ᱾ ᱠᱷᱟᱴᱟᱣ ᱨᱮᱱᱟᱝ ᱚᱨᱡᱚ ᱦᱚᱸ ᱟᱹᱰᱤ ᱱᱟᱯᱟᱭ ᱛᱮᱜᱮ ᱧᱟᱢ ᱠᱮᱫᱼᱟᱭ ᱾ MBBS ᱵᱤᱱᱤᱰ ᱨᱮᱱᱟᱜ Pass Certificate ᱦᱚᱸᱭ ᱧᱟᱢ ᱠᱮᱫᱼᱟ ᱾ ᱧᱟᱢ ᱛᱟᱭᱱᱚᱢ ᱟᱠᱚ ᱟᱹᱛᱩᱭ ᱥᱮᱱ ᱮᱱᱟ ᱚᱲᱟᱜ ᱛᱮ ᱥᱮᱴᱮᱨ ᱮᱱᱟᱭ ᱾
ᱚᱲᱟᱜ ᱨᱮ ᱟᱭᱳ ᱵᱟᱵᱟᱭ ᱵᱟᱰᱟᱭ ᱚᱪᱚ ᱠᱮᱫ ᱠᱤᱱᱟ ᱰᱟᱠᱛᱚᱨ ᱯᱟᱲᱦᱟᱣ ᱫᱩᱧ ᱪᱟᱵᱟ ᱠᱮᱫᱼᱟ ᱢᱮᱱᱛᱮ ᱟᱨ MBBS ᱦᱚᱸ ᱱᱟᱯᱟᱭ ᱛᱮᱜᱤᱧ Pass ᱠᱮᱫᱼᱟ ᱢᱮᱱᱛᱮ ᱾ ᱟᱡ ᱨᱤᱱ ᱟᱭᱳ ᱵᱟᱵᱟ ᱱᱚᱣᱟ ᱠᱷᱚᱵᱚᱨ ᱵᱟᱰᱟᱭ ᱠᱟᱛᱮ ᱟᱹᱰᱤ ᱡᱩᱨ ᱠᱤᱱ ᱨᱟᱹᱥᱠᱟᱹᱭᱮᱱᱟ ᱥᱟᱶᱛᱮ ᱟᱹᱛᱩ ᱦᱚᱲ ᱦᱚᱸ ᱠᱚ ᱨᱟᱹᱥᱠᱟᱹᱭᱮᱱᱟ ᱾ ᱠᱤᱪᱷᱩᱠ ᱫᱤᱱ ᱯᱚᱞᱚᱢ ᱛᱟᱭᱱᱚᱢ ᱰᱟᱠᱛᱚᱨᱤ ᱪᱟᱹᱠᱨᱤ ᱦᱚᱸᱭ ᱧᱟᱢ ᱠᱮᱫᱼᱟ ᱚᱱᱟ ᱟᱠᱚ ᱟᱹᱛᱩ ᱥᱩᱨ ᱛᱤᱨᱤᱝ PHC ᱨᱮᱜᱮ ᱾ ᱤᱱᱟᱹ ᱤᱞᱟᱹᱠᱟ ᱨᱤᱱ ᱟᱹᱛᱩ ᱦᱚᱲ ᱠᱚ ᱟᱹᱰᱤ ᱠᱚ ᱠᱩᱥᱤᱭᱮᱱᱟ ᱪᱤᱠᱟᱹᱛᱮ ᱟᱵᱚ ᱡᱟᱹᱛᱤ ᱥᱟᱶᱛᱟ ᱨᱤᱱᱤᱡ ᱰᱟᱠᱛᱚᱨ ᱠᱚ ᱧᱟᱢ ᱠᱮᱫᱮᱭᱟ ᱾ ᱥᱮᱵᱟ ᱦᱚᱸ ᱟᱹᱰᱤ ᱱᱟᱯᱟᱭ ᱠᱚ ᱧᱟᱢ ᱠᱮᱫᱼᱟ ᱾ ᱧᱩᱛᱩᱢ ᱦᱚᱸ ᱯᱟᱥᱱᱟᱣ ᱮᱱᱟᱛᱟᱭ ᱤᱱᱟᱹ ᱤᱞᱟᱹᱠᱟᱨᱮ ᱱᱟᱯᱟᱭ ᱰᱟᱠᱛᱚᱨ ᱢᱮᱱᱛᱮ ᱾ ᱱᱚᱣᱟ ᱰᱟᱠᱛᱚᱨᱤ ᱪᱟᱹᱠᱨᱤ ᱧᱟᱢ ᱛᱟᱭᱱᱚᱢ ᱥᱟᱹᱫᱷᱩ, ᱰᱟᱠᱛᱚᱨ ᱛᱮᱠᱚ ᱚᱲᱟᱜ ᱨᱮ ᱡᱚᱢ ᱧᱩ ᱦᱚᱸ ᱟᱹᱰᱤ ᱱᱟᱯᱟᱭ ᱛᱮᱠᱚ ᱪᱚᱲᱟᱣ ᱮᱱᱟ ᱟᱨ ᱚᱲᱟᱜ ᱫᱩᱣᱟᱹᱨ ᱦᱚᱸ ᱠᱮᱴᱮᱡ ᱥᱟᱹᱦᱤᱸᱡ ᱠᱚ ᱵᱮᱱᱟᱣ ᱠᱮᱫᱼᱟ ᱾ ᱵᱟᱯᱞᱟ ᱠᱚᱦᱚᱸ ᱛᱟᱭ ᱟᱹᱰᱤ ᱨᱟᱹᱥᱠᱟᱹ ᱥᱟᱛᱞᱟᱜ ᱛᱮᱜᱮ ᱦᱩᱭ ᱮᱱᱟ ᱾

ᱪᱷᱩᱴᱟᱹᱣ ᱟᱨ ᱠᱷᱟᱴᱟᱣ ᱛᱮᱜᱮ ᱥᱟᱹᱫᱷᱩ ᱫᱚ ᱰᱟᱠᱛᱚᱨ ᱫᱚᱭ ᱵᱮᱱᱟᱣ ᱟᱠᱟᱱᱟ ᱾ ᱠᱤᱥᱟᱹᱬ ᱫᱷᱚᱢᱚᱠ ᱟᱨ ᱢᱟᱹᱫᱷᱩᱣᱟᱹ ᱛᱮ ᱢᱟᱹᱫᱷᱩ ᱫᱚᱭ ᱰᱟᱢᱟᱰᱩᱞ ᱮᱱᱟ ᱾ ᱱᱚᱣᱟ ᱠᱟᱹᱦᱱᱤ ᱯᱟᱲᱦᱟᱣ ᱮᱱᱟᱝ ᱜᱮ ᱵᱟᱰᱟᱭᱚᱜᱼᱟ ᱟᱨ ᱥᱮᱪᱮᱫ ᱦᱚᱸ ᱧᱟᱢᱚᱜ ᱜᱮᱭᱟ ᱢᱮᱱᱛᱮ ᱤᱧᱟᱜ ᱩᱭᱦᱟᱹᱨ ᱾

***