ᱵᱷᱩᱴᱩᱜ ᱵᱟᱦᱟ

ᱥᱮᱛᱟᱜ ᱵᱷᱳᱨ ᱨᱮ ᱟᱭᱳᱭ ᱦᱚᱦᱚ ᱮᱫᱟ ᱦᱚᱯᱚᱱ ᱵᱮᱨᱮᱫ ᱢᱮ ᱾ ᱟᱫᱳ ᱛᱤᱨᱮᱢ ᱵᱮᱨᱮᱫ ᱛᱮ ᱥᱮᱛᱟᱜ ᱛᱮᱫᱚ ᱟᱫᱳᱢ ᱪᱟᱞᱟᱜᱼᱟ ᱾ ᱢᱟᱥᱮ ᱥᱟᱲᱮ ᱯᱟᱪᱴᱟ ᱵᱟᱡᱟᱣ ᱮᱱᱫᱚ, ᱱᱳᱛᱮ ᱪᱷᱚ ᱴᱟ ᱨᱮᱛᱟᱢ ᱵᱟᱥ ᱾ ᱟᱭᱳ ᱟᱜ ᱠᱟᱛᱷᱟ ᱞᱩᱛᱩᱨ ᱨᱮ ᱛᱟᱨᱠᱳ ᱟᱫᱤᱧ ᱠᱷᱟᱱ ᱡᱟᱹᱯᱤᱫ ᱠᱷᱳᱱ ᱤᱧ ᱫᱟᱹᱲ ᱵᱮᱨᱮᱫ ᱮᱱᱛᱮ ᱟᱸᱫᱷᱟ ᱩᱸᱫᱷᱩ ᱥᱟᱹᱛ ᱵᱟᱨᱟ ᱠᱟᱛᱮᱫ ᱜᱟᱰᱤᱢᱳᱲ ᱤᱧ ᱫᱟᱹᱲ ᱠᱮᱫᱟ ᱾ ᱤᱧ ᱥᱮᱴᱮᱨ ᱵᱟᱲᱟᱜ ᱛᱮ ᱮᱠᱟᱞ ᱪᱷᱚ ᱴᱟ ᱜᱮ ᱵᱟᱡᱟᱣ ᱜᱚᱫ ᱮᱱᱟ ᱾ ᱤᱱᱟᱹᱜ ᱛᱮᱜᱮ ᱜᱟᱰᱤ ᱦᱚᱭ ᱦᱚᱦᱚ ᱥᱟᱰᱮ ᱠᱮᱫᱟ ᱵᱟᱝ ᱢᱟᱹᱧ ᱥᱮᱴᱮᱨᱚᱜ ᱠᱟᱱᱟ ᱞᱚᱜᱚᱱᱚᱜ ᱯᱮ ᱾ ᱡᱷᱟᱹᱞ ᱧᱚᱜ ᱨᱮ ᱚᱲᱟᱜ ᱛᱟᱦᱮᱱ ᱠᱷᱟᱱ ᱯᱟᱞᱮ ᱜᱟᱰᱤ ᱫᱳ ᱵᱟᱹᱧ ᱥᱟᱵ ᱫᱟᱲᱮᱭᱟᱜ ᱠᱮᱭᱟ ᱾ ᱜᱟᱰᱤᱨᱮ ᱟᱱᱫᱩᱜ ᱥᱟᱱᱫᱩᱜ ᱤᱧ ᱫᱟᱹᱲ ᱫᱮᱡ ᱮᱱᱟ ᱾ ᱜᱟᱰᱤ ᱫᱳ ᱫᱳᱢᱮ ᱵᱷᱤᱲ ᱫᱳ ᱵᱟᱝ ᱛᱟᱦᱮ ᱠᱟᱱ ᱨᱮᱦᱚᱸ ᱥᱤᱴ ᱠᱳᱫᱳ ᱩᱱᱟᱹᱜ ᱯᱷᱟᱸᱠᱟ ᱫᱳ ᱵᱟᱹᱱᱩᱜᱼᱟ ᱾ ᱢᱤᱫᱴᱟᱝ ᱤᱧ ᱧᱮᱞ ᱧᱟᱢ ᱠᱮᱫᱟ ᱚᱱᱟ ᱦᱚᱸ ᱡᱟᱱᱞᱟ ᱫᱷᱟᱨᱮ ᱨᱮᱫᱳ ᱵᱟᱝ ᱾ ᱡᱟᱱᱞᱟ ᱫᱷᱟᱨᱮ ᱨᱮᱫᱳ ᱢᱤᱫ ᱠᱩᱲᱤ ᱜᱤᱫᱽᱨᱟᱹᱭ ᱫᱩᱲᱩᱵ ᱟᱠᱟᱱᱟ ᱾ ᱟᱫᱳ ᱵᱤᱥᱤ ᱜᱟᱰᱤ ᱨᱮᱱᱟᱜ ᱥᱤᱴ ᱵᱟᱝ ᱛᱚᱞᱟᱥ ᱠᱟᱛᱮᱫ ᱚᱸᱰᱮ ᱜᱤᱧ ᱫᱩᱲᱩᱵ ᱱᱟᱯᱳᱲ ᱮᱱᱟ ᱾ ᱩᱨᱩᱢ ᱩᱨᱩᱢ ᱜᱤᱧ ᱧᱮᱞᱮ ᱠᱟᱱᱟ ᱴᱷᱤᱠ ᱥᱟᱦᱤᱡ ᱵᱟᱹᱧ ᱩᱨᱩᱢ ᱫᱟᱲᱮᱭᱟᱭ ᱠᱟᱱᱛᱮ ᱵᱟᱹᱧ ᱨᱚᱲ ᱟᱭ ᱠᱟᱱᱟ ᱾ ᱢᱮᱱᱠᱷᱟᱱ ᱠᱷᱟᱴᱤ ᱜᱮ ᱤᱧ ᱫᱚᱭ ᱩᱨᱩᱢ ᱠᱤᱫᱤᱧ ᱛᱮ ᱨᱚᱲ ᱜᱚᱫ ᱟᱫᱤᱧᱟᱭ ᱾ ᱳᱠᱟᱛᱮᱢ ᱪᱟᱞᱟᱜ ᱠᱟᱱᱟ ? ᱤᱧ ᱮᱢ ᱩᱨᱩᱢᱤᱧ ᱠᱟᱱᱟ ᱛᱳ? ᱠᱚᱭᱚᱜ ᱛᱷᱤᱨ ᱠᱟᱛᱮᱫ ᱢᱤᱫ ᱜᱷᱟᱲᱤ ᱯᱚᱨ ᱤᱧ ᱢᱮᱱ ᱠᱮᱫᱟ ᱩᱨᱩᱢ ᱮᱫ ᱢᱤᱭᱟᱹᱧ ᱟᱰᱤ ᱫᱤᱱ ᱯᱚᱨᱮ ᱧᱮᱞ ᱛᱚ ᱵᱟᱹᱧ ᱩᱨᱩᱢ ᱦᱚᱫ ᱮᱫ ᱢᱮᱭᱟ ᱾ ᱤᱧ ᱤᱧ ᱫᱚ ᱵᱚᱨᱫᱷᱚᱢᱟᱱ ᱟᱨ ᱟᱢ ᱫᱳ ᱚᱠᱟᱛᱮᱢ ᱪᱟᱞᱟᱜ ᱠᱟᱱᱟ ᱾ ᱞᱟᱹᱭ ᱠᱮᱫᱟᱭ ᱤᱧ ᱤᱧ ᱫᱳ ᱵᱟᱠᱩᱲᱟ ᱠᱟᱢᱤᱧ ᱪᱟᱞᱟᱜ ᱠᱟᱱᱟ ᱾ ᱚᱸᱰᱮ ᱢᱤᱫᱴᱟᱝ ᱨᱩᱴᱤ ᱠᱟᱨᱠᱷᱟᱱᱟ ᱠᱚ ᱵᱮᱱᱟᱣ ᱞᱟᱜᱤᱫ ᱟᱸᱰᱮ ᱜᱮ ᱠᱟᱢᱤ ᱞᱮ ᱪᱟᱞᱟᱜ ᱠᱟᱱᱟ ᱾ ᱱᱚᱝᱠᱟ ᱟᱞᱤᱧᱟᱜ ᱩᱯᱨᱩᱢ ᱟᱨ ᱟᱛᱩ ᱚᱲᱟᱜ ᱨᱮᱱᱟᱜ ᱵᱩᱜᱤ ᱵᱟᱲᱤᱡ ᱠᱟᱛᱷᱟ ᱠᱚ ᱨᱚᱯᱚᱲ ᱵᱟᱲᱟ ᱠᱟᱛᱮᱫ ᱢᱤᱫ ᱜᱷᱟᱲᱤᱡ ᱫᱚ ᱞᱤᱧ ᱛᱷᱤᱨ ᱟᱠᱟᱱᱟ ᱾

ᱢᱚᱱᱮ ᱨᱮᱱᱟᱜ ᱫᱩᱠ, ᱠᱚᱥᱴᱚ, ᱨᱟᱜᱤ, ᱤᱨᱥᱟᱹ, ᱜᱷᱤᱨᱱᱟᱹ ᱥᱟᱢᱲᱟᱣ ᱫᱚᱦᱚ ᱠᱟᱛᱮᱫ ᱮᱦᱚᱵ ᱠᱮᱫᱟᱭ ᱨᱚᱲ, ᱠᱩᱞᱤ ᱠᱤᱫᱤᱧᱟᱭ ᱱᱮᱛᱟᱨ ᱫᱳ ᱛᱟᱨᱟᱥ ᱨᱮᱱ ᱜᱤᱫᱽᱨᱟᱹ ᱫᱚᱠᱚ ᱛᱤᱱᱟᱹᱜ ᱮᱱ ᱛᱟᱭᱟ ᱠᱳ ᱾ ᱞᱟᱹᱭ ᱟᱫᱮᱭᱟᱹᱧ ᱢᱤᱫ ᱠᱳᱲᱟ ᱟᱨ ᱢᱤᱫ ᱠᱩᱲᱤ ᱜᱤᱫᱟᱹᱨ ᱾ ᱟᱰᱤ ᱱᱟᱯᱟᱭ ᱮ ᱥᱚᱝᱥᱟᱨ ᱮᱫᱟ ᱡᱟᱱᱤᱡ ᱵᱟᱝ? ᱞᱟᱹᱭ ᱠᱤᱫᱟᱹᱧ ᱦᱮᱸ ᱱᱟᱯᱟᱭ ᱫᱚ ᱱᱟᱯᱟᱭ ᱜᱮ ᱾ ᱟᱢ ᱫᱚ ᱟᱫᱳ ᱚᱠᱟ ᱨᱮᱦᱚᱸ ᱵᱟᱢ ᱴᱷᱟᱶ ᱟᱠᱟᱱᱟ ᱩᱱᱟᱹᱜ ᱫᱤᱱ ᱦᱩᱭᱮᱱᱟ ᱾ ᱟᱢ ᱦᱚᱛᱚᱢ ᱵᱟᱲᱟᱭ ᱜᱮᱭᱟ ᱡᱮ ᱥᱚᱢᱟᱡᱽ ᱨᱮ ᱡᱟᱦᱟᱭ ᱤᱧ ᱞᱮᱠᱟᱱ ᱢᱚᱞᱚᱝ ᱫᱩᱥᱤ ᱥᱮ ᱥᱚᱢᱟᱡᱽ ᱫᱩᱥᱤ ᱠᱩᱲᱤ ᱜᱤᱫᱽᱨᱟᱹ ᱠᱳᱣᱟᱜ ᱫᱚᱥᱨᱟ ᱠᱟᱨᱛᱮ ᱥᱚᱝᱥᱟᱨ ᱥᱮ ᱡᱟᱶᱟᱭ ᱧᱟᱢ ᱨᱩᱣᱟᱹᱲ ᱫᱳ ᱩᱱᱟᱹᱜ ᱫᱳ ᱵᱟᱝ ᱟᱞᱜᱟᱣᱟ ᱾ ᱛᱤᱱᱟᱹᱜ ᱟᱞᱜᱟ ᱛᱮᱢ ᱢᱮᱱ ᱠᱟᱫᱟ, ᱢᱤᱫ ᱫᱷᱟᱣ ᱟᱞᱮᱭᱟᱜ ᱡᱟᱭᱜᱟᱨᱮ ᱛᱤᱸᱜᱩ ᱠᱟᱛᱮᱫ ᱧᱮᱞ ᱯᱮᱥᱮ ᱩᱱᱟᱹᱜ ᱫᱳ ᱵᱟᱝ ᱟᱞᱜᱟᱣᱟ ᱾ ᱱᱚᱝᱠᱟᱭ ᱢᱮᱱ ᱠᱮᱫ ᱠᱷᱟᱱ ᱞᱟᱹᱭ ᱤᱧ ᱮᱦᱚᱵ ᱠᱮᱫᱟ, ᱪᱮᱫ ᱤᱧ ᱢᱮᱛᱟᱢᱟ ᱵᱟᱹᱦᱩ ᱥᱟᱱᱟᱢᱟᱜ ᱜᱤᱧ ᱵᱩᱡᱷᱟᱹᱣ ᱮᱫᱟ ᱢᱮᱱᱠᱷᱟᱱ ᱤᱧᱟᱜ ᱛᱤ ᱨᱮᱛᱚ ᱵᱟᱹᱱᱩᱜᱼᱟ ᱥᱚᱢᱟᱡᱽ, ᱵᱟᱹᱱᱩᱜᱼᱟ ᱥᱚᱢᱟᱡᱽ ᱨᱮᱱᱟᱜ ᱟᱹᱱ ᱟᱹᱨᱤ ᱾ ᱤᱧ ᱦᱚᱛᱚ ᱟᱢ ᱞᱮᱠᱟᱜᱮ ᱢᱤᱫᱴᱟᱝ ᱱᱟᱪᱟᱨ ᱛᱤᱨᱞᱟᱹ ᱦᱚᱯᱚᱱ ᱾ ᱛᱤᱨᱞᱟᱹ ᱦᱚᱯᱚᱱ ᱡᱩᱫᱤ ᱵᱟᱹᱧ ᱦᱩᱭ ᱠᱚᱜ ᱠᱮᱭᱟ ᱛᱟᱦᱞᱮ ᱠᱷᱟᱱ ᱟᱢᱟᱜ ᱛᱤ ᱥᱟᱵ ᱠᱟᱛᱮᱫ ᱱᱟᱣᱟ ᱡᱤᱭᱳᱱ ᱤᱧ ᱮᱢ ᱨᱩᱣᱟᱲ ᱟᱢ ᱠᱮᱭᱟ ᱾ ᱟᱨ ᱥᱚᱢᱟᱡᱽ ᱨᱮᱱᱟᱜ ᱫᱩᱥᱤ ᱠᱚᱞᱚᱝᱠᱚ ᱠᱷᱚᱱ ᱤᱧ ᱚᱣᱟᱨ ᱨᱟᱠᱟᱵ ᱠᱮᱢᱟ ᱾

ᱠᱟᱛᱷᱟ ᱫᱚ ᱱᱳᱝᱠᱟ ᱟᱞᱮ ᱥᱩᱨ ᱟᱹᱛᱩ ᱛᱮᱨᱮᱞ ᱜᱷᱩᱴᱩ ᱩᱱᱫᱳ ᱤᱧ ᱠᱟᱹᱴᱤᱡ ᱧᱚᱜ ᱤᱧ ᱛᱟᱦᱮ ᱠᱟᱱᱟ ᱛᱳ ᱱᱩᱱᱟᱹᱜ ᱠᱟᱹᱴᱤᱡ ᱫᱳ ᱵᱟᱝ ᱡᱟᱦᱟ ᱫᱳ ᱪᱮᱫ ᱦᱚᱸ ᱵᱮᱥ ᱵᱟᱹᱲᱤᱡ ᱫᱳ ᱵᱟᱹᱧ ᱵᱩᱡᱷᱟᱹᱣ ᱛᱟᱦᱮᱱ ᱾ ᱢᱤᱫ ᱥᱮᱨᱢᱟ ᱨᱮᱱᱟᱜ ᱠᱟᱛᱷᱟ ᱩᱱ ᱫᱚ ᱯᱩᱥ ᱪᱟᱸᱫᱚ ᱛᱟᱦᱮ ᱠᱟᱱᱟ ᱾ ᱛᱟᱨᱟᱥ ᱫᱚ ᱵᱟᱞᱤᱰᱤ ᱧᱩᱛᱩᱢᱟᱱ ᱟᱹᱛᱩ ᱠᱷᱳᱱ ᱵᱟᱹᱦᱩᱭ ᱟᱹᱜᱩ ᱞᱮᱫᱮᱭᱟ ᱾ ᱧᱮᱞ ᱛᱮ ᱮᱥᱮᱞ ᱩᱥᱩᱞ ᱱᱟᱯᱟᱭ ᱪᱚᱨᱚᱠ ᱠᱩᱲᱤ ᱜᱤᱫᱟᱹᱨ ᱾ ᱫᱩᱞᱟᱹᱲ ᱠᱟᱛᱮᱫ ᱠᱤᱱ ᱫᱚᱦᱚ ᱛᱟᱦᱮ ᱟᱠᱟᱱ ᱛᱮ ᱛᱟᱨᱟᱥ ᱨᱮᱱ ᱟᱭᱳ ᱵᱟᱵᱟ ᱫᱳ ᱮᱠᱟᱞ ᱛᱮ ᱵᱟᱝ ᱠᱤᱱ ᱠᱩᱥᱤ ᱟᱠᱟᱫᱮᱭᱟ ᱾ ᱵᱟᱹᱦᱩ ᱟᱹᱜᱩ ᱠᱟᱛᱮᱫ ᱜᱮᱞ ᱢᱳᱲᱮ ᱫᱤᱱ ᱵᱷᱤᱛᱨᱤ ᱛᱮ ᱟᱹᱛᱩ ᱥᱚᱞᱚ ᱟᱱᱟ ᱢᱳᱲᱮ ᱦᱚᱲ ᱫᱳ ᱯᱚᱱᱯᱟᱱᱤ ᱫᱚᱠᱚ ᱡᱚᱢ ᱠᱮᱫᱟ ᱾ ᱢᱮᱱᱠᱷᱟᱱ ᱛᱟᱨᱟᱥ ᱟᱭᱳ ᱵᱟᱵᱟ ᱫᱚ ᱢᱳᱱᱮ ᱨᱮ ᱢᱤᱫᱴᱟᱝ ᱜᱮ ᱡᱮ ᱱᱩᱭ ᱵᱟᱹᱦᱩ ᱫᱳ ᱵᱟᱝ ᱵᱳᱱ ᱫᱚᱦᱚ ᱮᱭᱟ ᱾ ᱡᱟᱦᱟ ᱵᱟᱝ ᱡᱟᱦᱟ ᱠᱟᱛᱮᱫ ᱜᱮ ᱩᱰᱩᱠ ᱮ ᱜᱮ ᱦᱩᱭᱩᱜᱼᱟ, ᱛᱟᱛᱮ ᱡᱟᱦᱟ ᱜᱮ ᱠᱚᱨᱟᱣ ᱦᱩᱭᱩᱜ ᱾ ᱱᱚᱝᱠᱟ ᱠᱟᱛᱮᱫ ᱛᱟᱨᱟᱥ ᱟᱭᱳ ᱫᱚ ᱟᱫᱳ ᱠᱤᱢᱤᱱ ᱛᱮᱫ ᱠᱷᱤᱡᱽᱞᱟᱹᱣ ᱮ ᱫᱷᱩᱨᱟᱹᱣ ᱮᱱᱟ ᱾ᱱᱟᱣᱟ ᱵᱟᱹᱦᱩ ᱜᱷᱟᱱᱮ ᱫᱚ ᱥᱮᱛᱟᱜ ᱫᱟᱜᱢᱟᱹᱰᱤᱭ ᱧᱟᱢ ᱠᱷᱟᱱ ᱛᱤᱠᱤᱱ ᱫᱚ ᱵᱟᱝ, ᱱᱚᱛᱮ ᱫᱟᱜᱢᱟᱰᱤᱭ ᱧᱟᱢ ᱮᱫ ᱠᱷᱟᱱ ᱩᱛᱩ ᱫᱳ ᱵᱟᱝ ᱾ ᱞᱩᱜᱽᱲᱤ ᱦᱚᱛᱟᱭ ᱵᱟᱸᱫᱮ ᱥᱩᱢᱩᱝ ᱜᱮ ᱾ ᱡᱚᱜ ᱨᱟᱪᱟ ᱜᱤᱛᱤᱞ ᱢᱟᱡᱟᱣ ᱤᱥᱤᱱ ᱵᱟᱥᱟᱝ ᱨᱮ ᱠᱷᱩᱱᱫ ᱜᱮᱭ ᱯᱟᱸᱡᱟ ᱵᱟᱲᱟᱭᱟ ᱦᱟᱱᱦᱟᱨ ᱛᱮᱫ ᱾ ᱡᱚᱢ ᱟᱠᱟᱫ ᱵᱟᱢ ᱡᱚᱢ ᱟᱠᱟᱫ ᱠᱟᱢᱤ ᱫᱳ ᱞᱟᱜᱟᱣ ᱢᱮᱜᱮᱭᱟ ᱾ ᱱᱟᱥᱮᱱᱟᱜ ᱠᱷᱩᱱᱫ ᱮ ᱧᱟᱢ ᱞᱮᱠᱷᱟᱱ ᱥᱚᱯᱚᱜ ᱨᱚᱰᱚᱜ ᱥᱚ ᱥᱤᱲᱤᱡ ᱮ ᱮᱜᱮᱨᱟ ᱾ ᱠᱟᱛᱷᱟ ᱠᱟᱛᱷᱟᱨᱮ ᱩᱰᱩᱠ ᱪᱟᱞᱟᱜ ᱢᱮ ᱢᱮᱱᱛᱮᱭ ᱨᱚᱲᱟ ᱾ ᱱᱳᱣᱟ ᱠᱳ ᱠᱟᱛᱷᱟ ᱛᱟᱨᱟᱥ ᱮ ᱞᱟᱹᱭ ᱟᱭ ᱠᱷᱟᱱ ᱢᱮᱛᱟᱭᱟᱭ ᱥᱟᱦᱟᱣ ᱠᱟᱜ ᱢᱮ ᱤᱧᱛᱤᱧ ᱟᱹᱜᱩ ᱟᱠᱟᱫ ᱢᱮᱭᱟ ᱾ ᱱᱳᱛᱮ ᱛᱟᱨᱟᱥ ᱮᱜᱟᱸᱛ ᱟᱯᱟᱛ ᱫᱳ ᱢᱤᱫ ᱜᱮ ᱳᱡᱷᱟ ᱡᱟᱱ ᱳᱲᱟᱜ ᱠᱤᱱ ᱫᱟᱹᱲᱟᱜᱼᱟ ᱾ ᱜᱷᱟᱱᱮ ᱫᱳ ᱢᱟᱱᱥᱤᱠ ᱜᱷᱟᱱᱮ ᱫᱳ ᱠᱤᱱ ᱠᱟᱹᱢᱤ ᱵᱟᱲᱟ ᱚᱪᱚᱭᱟ ᱡᱟᱛᱮ ᱵᱟᱹᱦᱩ ᱠᱩᱲᱤᱭ ᱩᱰᱩᱠ ᱪᱟᱞᱟᱜ ᱢᱟ ᱢᱮᱱᱛᱮ ᱾ ᱱᱳᱝᱠᱟᱛᱮ ᱧᱮᱞ ᱮᱱᱟ ᱟᱪᱠᱟᱜᱮ ᱛᱟᱨᱟᱥ ᱮᱸᱜᱟᱛ ᱟᱡᱟᱨ ᱨᱮᱭ ᱯᱟᱲᱟᱣ ᱮᱱᱟ ᱳᱱᱟᱨᱮ ᱦᱚᱸᱭ ᱞᱚ ᱛᱟᱨᱟᱜ ᱠᱟᱱᱟ ᱵᱟᱹᱦᱩ ᱠᱩᱲᱤ ᱵᱟᱝ ᱢᱟ ᱱᱩᱭ ᱜᱮᱭ ᱡᱳᱢᱮ ᱠᱟᱱᱟ ᱾ ᱛᱟᱨᱟᱥ ᱮᱸᱜᱟᱛ ᱛᱟᱨᱟᱥ ᱴᱷᱮᱱ ᱢᱤᱫ ᱜᱮᱭ ᱢᱮᱱ ᱠᱮᱫᱟ ᱱᱩᱭ ᱵᱟᱹᱦᱩ ᱡᱩᱫᱤᱢ ᱫᱚᱦᱚ ᱮᱭᱟ ᱛᱟᱦᱞᱮ ᱤᱧ ᱫᱳ ᱨᱟᱱ ᱵᱟᱹᱧ ᱡᱳᱢᱟ ᱜᱚᱡ ᱚᱪᱳᱣᱟᱱᱤᱧ ᱦᱚᱸᱭ ᱱᱩᱭ ᱵᱟᱹᱦᱩᱭ ᱛᱟᱦᱮᱱᱟ ᱵᱟᱝᱠᱷᱟᱱ ᱤᱧᱤᱧ ᱛᱟᱦᱮᱱᱟ ᱾ ᱛᱟᱨᱟᱥ ᱮᱸᱜᱟᱛ ᱪᱮᱛᱟᱱ ᱨᱮ ᱟᱹᱰᱤ ᱫᱟᱭᱟ ᱫᱩᱞᱟᱹᱲ ᱢᱮᱱᱟᱜ ᱛᱟᱭᱟ ᱾ᱪᱮᱫᱟᱜ ᱥᱮ ᱡᱟᱱᱟᱢ ᱮᱸᱜᱟᱛ ᱵᱳᱞᱮ ᱠᱟᱛᱷᱟ ᱾ ᱛᱟᱨᱟᱥ ᱟᱹᱰᱤ ᱵᱷᱟᱹᱵᱤᱛ ᱨᱮᱭ ᱯᱟᱱᱟᱣ ᱮᱱᱟ ᱢᱤᱫ ᱥᱮᱡ ᱟᱭᱟᱜ ᱫᱩᱞᱟᱹᱲ, ᱡᱤᱣᱤᱡᱩᱨᱤ ᱵᱟᱹᱦᱩ ᱠᱩᱲᱤ ᱟᱨ ᱢᱤᱫ ᱥᱮᱫ ᱫᱳ ᱡᱟᱱᱟᱢ ᱮᱸᱜᱟᱛ ᱾ ᱵᱟᱱᱟ ᱦᱚᱲ ᱜᱮ ᱟᱡ ᱨᱮᱱ ᱟᱹᱰᱤ ᱥᱩᱨ ᱨᱮᱱ ᱦᱚᱲ ᱠᱟᱱᱟ ᱠᱤᱱ ᱾ ᱳᱠᱚᱭᱴᱟᱜ ᱫᱚᱭ ᱟᱲᱟᱜ ᱠᱤᱱᱟ ᱾ ᱡᱩᱫᱤ ᱵᱟᱹᱦᱩ ᱠᱩᱲᱤᱭ ᱟᱲᱟᱜ ᱮᱭᱟ ᱛᱟᱦᱞᱮ ᱠᱷᱟᱱ ᱵᱟᱹᱦᱩᱣᱟᱜ ᱫᱚ ᱪᱮᱫ ᱦᱩᱭᱩᱜᱼᱟ ᱾ ᱛᱤᱱᱟᱹᱜ ᱟᱥᱟ ᱠᱟᱛᱮᱫ ᱮ ᱦᱮᱡ ᱟᱠᱟᱱᱟ, ᱥᱚᱝᱥᱟᱨ ᱟᱹᱞᱤᱧ ᱢᱮᱱᱛᱮ ᱠᱟᱛᱷᱟᱧ ᱮᱢ ᱟᱠᱟᱫᱮᱭᱟ ᱾ ᱩᱱᱤᱭᱟᱜ ᱫᱚᱥᱟ ᱫᱳ ᱚᱠᱟᱨᱮ ᱛᱤᱸᱜᱩᱱᱟ ᱡᱩᱫᱤ ᱤᱧ ᱵᱟᱹᱧ ᱫᱚᱦᱚ ᱮᱭᱟ, ᱱᱤᱛ ᱫᱚᱭ ᱫᱩᱥᱤ ᱟᱠᱟᱱᱟ, ᱩᱱᱟᱹᱜ ᱢᱟᱨᱟᱝ ᱡᱤᱭᱳᱱ ᱪᱮᱫ ᱞᱮᱠᱟ ᱠᱟᱛᱮᱫ ᱮ ᱵᱤᱛᱟᱹᱣᱟ ᱾ ᱥᱚᱝᱥᱟᱨ ᱮ ᱧᱟᱢ ᱨᱩᱣᱟᱹᱲ ᱪᱚᱝ ᱵᱟᱝᱪᱚᱝ ᱾ ᱟᱨ ᱦᱚᱸ ᱱᱳᱛᱮ ᱡᱟᱱᱟᱢ ᱮᱸᱜᱟᱛ ᱦᱚᱸᱛᱚ ᱛᱳᱣᱟ ᱫᱟᱨᱮ ᱩᱱᱤ ᱠᱷᱟᱹᱛᱤᱨ ᱱᱳᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱤᱧ ᱪᱟᱪᱳ ᱠᱮᱴᱮᱡ ᱟᱠᱟᱱᱟ ᱤᱧ ᱠᱷᱟᱹᱛᱤᱨ ᱡᱤᱣᱤ ᱪᱟᱞᱟᱜ ᱛᱟᱭ ᱢᱟ ᱳᱱᱟ ᱫᱚ ᱵᱟᱹᱧ ᱠᱷᱚᱡᱚᱜᱼᱟ ᱾ ᱱᱚᱝᱠᱟ ᱛᱩᱞᱟᱹᱯᱟᱹᱭᱞᱟᱹ ᱠᱟᱛᱮᱫ ᱛᱟᱨᱟᱥ ᱡᱤᱭᱳᱱ ᱠᱷᱚᱱ ᱫᱚ ᱡᱤᱣᱤ ᱜᱮ ᱢᱟᱨᱟᱝ ᱢᱮᱱᱛᱮ ᱢᱳᱱᱮ ᱠᱮᱫᱟ ᱾ ᱜᱚᱴᱟ ᱠᱮᱫᱟᱭ ᱡᱟᱦᱟᱜ ᱠᱟᱱ ᱜᱮ ᱵᱟᱹᱦᱩᱜᱤᱧ ᱟᱲᱟᱜ ᱮᱭᱟ ᱾ ᱫᱤᱱ ᱫᱤᱱᱛᱮ ᱛᱟᱨᱟᱥ ᱟᱫᱳ ᱵᱟᱹᱦᱩ ᱠᱩᱲᱤ ᱳᱱᱦᱮᱞᱟᱭ ᱫᱷᱩᱨᱟᱹᱣ ᱮᱱᱟ ᱾ ᱢᱩᱪᱟᱹᱫ ᱨᱮ ᱳᱲᱟᱜ ᱠᱷᱳᱱ ᱮ ᱫᱟᱹᱲ ᱵᱟᱹᱜᱤ ᱟᱫᱮᱭᱟ ᱾ ᱱᱳᱛᱮ ᱳᱲᱟᱜ ᱦᱚᱲ ᱱᱚᱝᱠᱟ ᱵᱟᱹᱦᱩ ᱠᱩᱲᱤ ᱠᱚ ᱠᱷᱤᱡᱽᱞᱟᱹᱣ ᱠᱮᱫᱮᱭᱟ ᱢᱩᱪᱟᱹᱫ ᱨᱮ ᱳᱲᱟᱜ ᱠᱷᱚᱱ ᱠᱳ ᱥᱤᱧ ᱵᱟᱦᱨᱮ ᱠᱮᱫᱮᱭᱟ ᱾ ᱵᱟᱹᱦᱩ ᱫᱚ ᱥᱟᱨᱟ ᱧᱤᱫᱟᱹ ᱠᱩᱰᱟᱹᱢ ᱥᱮᱫ ᱨᱮ ᱫᱩᱲᱩᱵ ᱟᱸᱜᱟ ᱠᱮᱫ ᱛᱮ ᱵᱷᱳᱨ ᱵᱷᱳᱨ ᱛᱮ ᱟᱠᱳ ᱳᱲᱟᱜ ᱮ ᱢᱚᱦᱰᱟ ᱮᱱᱟ ᱾ ᱳᱱᱟ ᱠᱤᱪᱷᱩ ᱫᱤᱱ ᱛᱟᱭᱳᱢ ᱠᱷᱟᱱ ᱜᱮ ᱛᱟᱨᱟᱥ ᱫᱚ ᱟᱠᱚ ᱚᱲᱟᱜ ᱦᱚᱲ ᱨᱮᱱ ᱧᱮᱞ ᱠᱩᱥᱤ ᱵᱟᱹᱦᱩᱭ ᱟᱹᱜᱩ ᱠᱮᱫᱮᱭᱟ ᱾ ᱱᱤᱛ ᱫᱚ ᱛᱟᱨᱟᱥ ᱵᱟᱨᱭᱟ ᱜᱤᱫᱽᱨᱟᱹ ᱨᱮᱱ ᱟᱯᱟᱛ ᱾

ᱵᱩᱡᱷᱟᱹᱣ ᱠᱤᱫᱟᱹᱧ ᱛᱟᱨᱟᱥ ᱵᱟᱹᱦᱩᱣᱟᱜ ᱢᱳᱱᱮ ᱫᱚ ᱵᱟᱲᱤᱡ ᱮᱱ ᱛᱟᱭᱟ ᱾ ᱪᱮᱫᱟᱜ ᱥᱮ ᱟᱭᱟᱜ ᱡᱤᱭᱳᱱ ᱨᱮ ᱯᱟᱨᱳᱢ ᱪᱟᱞᱟᱣ ᱟᱠᱟᱱ ᱜᱷᱚᱴᱚᱱᱟ ᱫᱳ ᱡᱟᱦᱟ ᱯᱷᱟᱹᱨᱭᱟᱹ ᱫᱟᱜ ᱞᱮᱠᱟ ᱵᱟᱹᱭᱥᱟᱹᱣ ᱞᱮᱱᱟ ᱚᱱᱟ ᱫᱳ ᱟᱨ ᱦᱚᱸ ᱵᱚᱰᱮ ᱫᱟᱜ ᱞᱮᱠᱟ ᱜᱷᱤᱞᱴᱟᱹᱣ ᱨᱩᱣᱟᱹᱲ ᱮᱱᱟ ᱾ᱳᱱᱟᱛᱮ ᱢᱳᱱᱮ ᱫᱷᱤᱨᱡᱟᱹᱣ ᱞᱟᱹᱜᱤᱫ ᱛᱮ ᱞᱟᱹᱭ ᱠᱤᱫᱟᱹᱧ,ᱵᱟᱹᱦᱩ ᱟᱞᱳᱢ ᱩᱭᱦᱟᱹᱨᱟ ᱾ ᱠᱟᱛᱷᱟ ᱨᱮᱠᱳ ᱢᱮᱱ ᱟᱠᱟᱫᱟ ᱡᱟᱦᱟᱸ ᱦᱩᱭᱩᱜᱼᱟ ᱳᱱᱟ ᱫᱚ ᱵᱷᱟᱹᱞᱤᱜ ᱞᱟᱹᱜᱤᱫ ᱜᱮ ᱦᱩᱭᱩᱜᱼᱟ ᱟᱢᱟᱜ ᱟᱪᱟᱨ ᱵᱮᱣᱦᱟᱨ ᱜᱩᱱ ᱪᱚᱨᱤᱛ ᱱᱟᱯᱟᱭ ᱫᱚᱦᱚᱭ ᱛᱟᱢ ᱢᱤᱫ ᱫᱤᱱ ᱟᱢᱮᱢ ᱥᱩᱠᱤᱜ ᱜᱮᱭᱟ, ᱢᱳᱱᱮ ᱢᱮ ᱱᱚᱣᱟ ᱫᱳ ᱤᱧᱟᱜ ᱢᱤᱫᱴᱟᱝ ᱫᱩᱨᱜᱷᱚᱴᱚᱱᱟ ᱜᱮ ᱛᱟᱦᱮ ᱠᱟᱱᱟ ᱾ ᱳᱸᱰᱮ ᱫᱚ ᱟᱢ ᱵᱟᱢ ᱥᱩᱠᱷᱤ ᱠᱚᱜ ᱠᱮᱭᱟ ᱟᱨ ᱵᱟᱝ ᱠᱚ ᱥᱤᱵᱤᱞᱟᱢ ᱠᱮᱭᱟ ᱩᱱ ᱫᱳ ᱩᱭᱦᱟᱹᱨ ᱢᱮᱥᱮ ᱱᱤᱛ ᱟᱢᱟᱜ ᱫᱤᱱ ᱳᱠᱟ ᱞᱮᱠᱟ ᱪᱟᱞᱟᱣ ᱠᱚᱜ ᱛᱟᱢᱟ ᱾ ᱳᱱᱟᱢᱟ ᱦᱮᱸᱜᱮ ᱥᱚᱢᱟᱡᱽ ᱨᱮ ᱤᱧ ᱞᱮᱠᱟᱱ ᱪᱷᱟᱰᱣᱤ ᱠᱩᱲᱤ ᱜᱤᱫᱽᱨᱟᱹ ᱟᱜ ᱴᱷᱟᱶ ᱫᱚ ᱚᱠᱟᱨᱮ ᱟᱨ ᱥᱚᱢᱟᱡᱽ ᱩᱱᱠᱩ ᱫᱚ ᱪᱮᱫ ᱞᱮᱠᱟᱱ ᱢᱮᱫ ᱛᱮᱭ ᱧᱮᱞ ᱠᱳᱣᱟ ᱳᱱᱟ ᱫᱚ ᱥᱟᱱᱟᱢ ᱦᱚᱲ ᱜᱮᱵᱚᱱ ᱵᱟᱲᱟᱭᱟ ᱾ ᱢᱤᱫᱴᱟᱝ ᱠᱟᱛᱷᱟ ᱟᱸᱡᱳᱢ ᱢᱮ ᱟᱵᱳ ᱥᱚᱢᱟᱡᱽ ᱨᱮᱥᱮ ᱡᱚᱛᱚ ᱠᱷᱚᱱ ᱫᱚ ᱟᱵᱳ ᱠᱩᱲᱤ ᱦᱚᱯᱚᱱ ᱜᱮᱵᱚᱱ ᱦᱤᱥᱠᱟᱹᱣᱟ ᱥᱮ ᱵᱳᱱ ᱸᱤᱨᱢᱟᱭᱟᱣᱟ ᱟᱨ ᱛᱮᱦᱮᱧ ᱟᱵᱚ ᱦᱚᱛᱮᱡ ᱛᱮᱜᱮ ᱤᱧ ᱞᱮᱠᱟᱱ ᱪᱷᱟᱰᱣᱤ ᱥᱮ ᱨᱟᱺᱰᱤ ᱛᱤᱨᱞᱟᱹ ᱦᱚᱯᱚᱱᱟᱜ ᱫᱚ ᱱᱳᱝᱠᱟ ᱫᱚᱥᱟ ᱥᱚᱢᱟᱡᱽ ᱨᱮ, ᱢᱟᱹᱱ ᱵᱟᱹᱱᱩᱜ ᱛᱟᱠᱚᱣᱟ ᱾ ᱛᱤᱨᱞᱟᱹ ᱦᱚᱯᱚᱱ ᱦᱩᱭ ᱠᱟᱛᱮᱫ ᱡᱩᱫᱤ ᱛᱤᱨᱞᱟᱹ ᱦᱚᱯᱚᱱᱟᱜ ᱫᱩᱠ ᱵᱟᱵᱳᱱ ᱵᱩᱡᱟᱹᱣᱟ ᱛᱟᱦᱞᱮ ᱠᱤ ᱠᱳᱲᱟ ᱦᱚᱯᱚᱱ ᱠᱚ ᱵᱩᱡᱟ ? ᱞᱟᱹᱭ ᱢᱮ ᱪᱤᱠᱟᱹᱛᱮ, ᱛᱚᱵᱮ ᱟᱸᱡᱚᱢ ᱢᱮ ᱢᱚᱱᱮ ᱢᱮ ᱛᱮᱦᱮᱧ ᱤᱧᱟᱜ ᱡᱟᱭᱜᱟᱨᱮ ᱟᱢ ᱢᱮᱱᱟᱜ ᱢᱮᱭᱟ ᱾ ᱩᱱ ᱫᱳ ᱟᱢ ᱨᱮᱱ ᱵᱚᱭᱦᱟ ᱫᱤᱫᱤ, ᱟᱭᱳ ᱵᱟᱵᱟ ᱠᱷᱚᱭ ᱟᱠᱳᱛᱚ ᱡᱮ ᱟᱢ ᱥᱚᱝᱥᱟᱨ ᱮᱢ ᱧᱟᱢ ᱨᱩᱣᱟᱹᱲ ᱢᱟ ᱢᱮᱱᱛᱮ ᱥᱮ ᱢᱤᱫᱴᱟᱝ ᱱᱟᱯᱟᱭ ᱧᱚᱜ ᱠᱚᱲᱟ ᱜᱤᱫᱽᱨᱟᱹ ᱨᱮᱞᱮ ᱮᱢ ᱠᱟᱭᱟ ᱾ ᱩᱱ ᱚᱠᱛᱚ ᱧᱮᱞ ᱢᱮ ᱡᱩᱫᱤ ᱚᱱᱟ ᱡᱟᱭᱜᱟ ᱨᱮᱜᱮ ᱟᱡ ᱨᱮᱱ ᱠᱚᱲᱟ ᱜᱤᱫᱽᱨᱟᱹ ᱡᱚᱠᱷᱚᱱ ᱢᱤᱫᱛᱴᱟᱝ ᱪᱷᱟᱰᱣᱤ ᱵᱟᱹᱦᱩᱭ ᱟᱹᱜᱩ ᱮ ᱠᱟᱱᱟ ᱩᱱᱫᱳ ᱵᱟᱝ ᱵᱳᱱ ᱠᱩᱥᱤᱜ ᱠᱟᱱᱟ ᱚᱲᱟᱜ ᱨᱮ ᱯᱟᱲᱟᱯᱩᱲᱥᱤ ᱟᱛᱩ ᱨᱮ ᱩᱱ ᱫᱚᱵᱚᱱ ᱢᱮᱱᱟ ᱪᱮᱫ ᱯᱷᱟᱱᱱᱟ ᱫᱚ ᱫᱤᱥᱚᱢ ᱨᱮ ᱪᱤᱞᱤ ᱰᱟᱹᱜᱽᱣᱟᱹ ᱠᱩᱲᱤ ᱦᱚᱸ ᱵᱟᱝ ᱡᱩᱴᱟᱹᱣ ᱟᱫᱮᱭᱟ ᱪᱷᱟᱰᱣᱤ ᱠᱩᱲᱤᱭ ᱟᱜᱩ ᱠᱮᱫᱮᱭᱟ ᱾ ᱩᱱ ᱠᱷᱟᱱ ᱜᱮ ᱧᱮᱞᱮ ᱢᱮ ᱪᱮᱫ ᱞᱮᱠᱟᱱ ᱠᱩᱲᱤ ᱦᱚᱯᱚᱱ, ᱟᱢ ᱫᱚᱢ ᱠᱷᱚᱡᱽ ᱮᱫᱟ ᱡᱮ ᱟᱢ ᱨᱮᱱ ᱪᱷᱟᱰᱩᱭ ᱠᱩᱲᱤ ᱜᱤᱫᱽᱨᱟᱹ ᱥᱚᱝᱥᱟᱨ ᱮ ᱧᱟᱢ ᱢᱟ ᱢᱮᱱᱛᱮ ᱥᱮ ᱡᱟᱣᱟᱭ ᱮ ᱧᱟᱢᱮ ᱢᱟ ᱢᱮᱱᱛᱮ ᱾ ᱢᱮᱱᱠᱷᱟᱱ ᱟᱢ ᱞᱮᱠᱟ ᱜᱮᱛᱳ ᱟᱨ ᱢᱤᱫᱴᱟᱝ ᱪᱷᱟᱰᱣᱤ ᱱᱟᱪᱟᱨ ᱛᱤᱨᱞᱟᱹ ᱦᱚᱯᱚᱱ ᱨᱮᱱ ᱟᱭᱳ ᱵᱟᱵᱟ ᱦᱚᱛᱚ ᱠᱤᱱ ᱠᱟᱭ ᱟ ᱡᱮ ᱟᱞᱤᱧ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱥᱚᱝᱥᱟᱨ ᱮ ᱧᱟᱢ ᱢᱟ ᱢᱮᱱᱛᱮ ᱾ ᱪᱤᱠᱟᱹᱛᱮᱢ ᱢᱳᱱᱮ ᱮᱫᱟ ᱟᱢ ᱫᱳ ᱵᱟᱢ ᱥᱟᱦᱟᱣᱟ ᱟᱨ ᱦᱚᱲ ᱫᱚᱠᱚ ᱥᱟᱦᱟᱣᱟ ᱾ ᱱᱤᱛ ᱫᱷᱟᱨᱤᱡ ᱛᱮ ᱤᱧᱟᱜ ᱢᱮᱫ ᱛᱤᱧ ᱧᱮᱞ ᱟᱠᱟᱫᱟ ᱪᱷᱟᱰᱣᱤ ᱠᱩᱲᱤ ᱜᱤᱫᱟᱹᱨ ᱥᱚᱝᱥᱟᱨ ᱠᱚ ᱧᱟᱢ ᱟᱠᱟᱫᱟ ᱵᱟᱝ ᱢᱮᱱᱛᱮ ᱫᱚ ᱵᱟᱝ, ᱢᱮᱱᱠᱷᱟᱱ ᱡᱟᱣᱟᱭ ᱚᱲᱟᱜ ᱨᱮ ᱥᱮ ᱟᱛᱩ ᱚᱲᱟᱜ ᱨᱮ ᱡᱚᱛᱚ ᱠᱷᱚᱱ ᱥᱟᱱᱛᱟᱣ ᱡᱩᱫᱤ ᱠᱳ ᱧᱟᱢ ᱟᱠᱟᱫ ᱠᱷᱟᱱ ᱚᱱᱟ ᱫᱳ ᱚᱲᱟᱜ ᱨᱮᱱ ᱦᱟᱱᱦᱟᱨ ᱵᱟᱝᱠᱷᱟᱱ ᱤᱨᱤᱞ ᱠᱩᱲᱤ ᱵᱟᱝᱠᱷᱟᱱ ᱟᱡᱷᱱᱟᱨ ᱢᱟᱱᱮ ᱠᱩᱲᱤ ᱦᱚᱯᱚᱱ ᱴᱷᱮᱱ ᱠᱷᱚᱱ ᱜᱮ ᱠᱷᱤᱡᱽᱞᱟᱹᱣ ᱫᱚᱠᱚ ᱧᱟᱢ ᱟᱠᱟᱫᱟ ᱾ ᱟᱨ ᱟᱛᱩ ᱨᱮᱱ ᱠᱩᱲᱤ ᱦᱚᱯᱚᱱ ᱴᱷᱮᱱ ᱠᱷᱚᱱ ᱜᱮ ᱥᱚ ᱥᱤᱬᱤᱡ ᱠᱟᱛᱠᱟ ᱫᱚ ᱟᱸᱡᱳᱢ ᱦᱩᱭ ᱟᱠᱟᱱ ᱛᱟᱠᱳᱣᱟ ᱾

ᱟᱪᱷᱟ ᱢᱟᱹᱭ ᱞᱟᱹᱭ ᱠᱮᱭᱟᱢ ᱪᱮᱫᱟᱜ ᱟᱞᱮ ᱞᱮᱠᱟᱱ ᱛᱤᱨᱞᱟᱹ ᱦᱚᱯᱚᱱ ᱫᱚ ᱥᱚᱢᱟᱡᱽ ᱨᱮᱱ ᱦᱚᱲ ᱫᱚ ᱱᱤᱫᱷᱟᱹᱱ ᱜᱮᱠᱚ ᱧᱮᱞ ᱠᱚᱣᱟ, ᱪᱮᱫᱟᱜ ᱟᱞᱮᱭᱟᱜ ᱴᱷᱟᱶ ᱫᱚ ᱥᱚᱢᱟᱡᱽ ᱨᱮᱱᱟᱜ ᱱᱚᱨᱚᱠ ᱡᱟᱭᱜᱟᱨᱮ, ᱠᱟᱲᱟᱝ ᱧᱩᱛᱟᱹᱛᱨᱮ ᱪᱷᱩᱸᱣᱟᱹᱛ ᱟᱠᱟᱱ ᱩᱰᱩᱠ ᱜᱤᱰᱤ ᱴᱩᱠᱩᱡ ᱛᱟᱱᱟᱜ ᱞᱮᱠᱟ ᱾ᱪᱮᱫ ᱞᱮ ᱫᱳᱥ ᱟᱠᱟᱫ ᱛᱮ ᱟᱞᱮ ᱫᱚ ᱫᱩᱥᱤ ᱠᱚᱞᱚᱝᱠᱚ ᱟᱛᱮᱫ ᱥᱚᱢᱟᱡᱽ ᱛᱟᱞᱟᱨᱮ ᱟᱹᱪᱩᱨ ᱵᱟᱲᱟᱭ ᱦᱩᱭᱩᱜ ᱠᱟᱱ ᱛᱟᱞᱮᱭᱟ ᱾ ᱪᱮᱫ ᱤᱧ ᱫᱳᱥ ᱞᱮᱫ ᱛᱮ ᱛᱮᱦᱮᱧ ᱤᱧ ᱫᱚ ᱥᱚᱢᱟᱡᱽ ᱪᱷᱟᱰᱣᱤ ᱠᱚᱞᱚᱝᱠᱚᱭ ᱮᱢᱟᱫᱤᱧᱟ ᱾ ᱟᱢ ᱜᱮᱢ ᱯᱮᱴᱮᱡ ᱠᱤᱫᱤᱧᱟ ᱟᱢ ᱜᱮᱢ ᱴᱮᱸᱜᱚᱡ ᱪᱟᱜᱟᱫ ᱠᱤᱫᱤᱧᱟ ᱟᱨ ᱦᱚᱸ ᱟᱢ ᱜᱮ ᱥᱚᱢᱟᱡᱽ ᱛᱟᱞᱟᱨᱮ ᱠᱚᱞᱚᱝᱠᱚᱢ ᱡᱚᱫ ᱟᱫᱤᱧᱟ ᱾ ᱤᱧ ᱦᱚᱸᱛᱚ ᱟᱢ ᱨᱮᱱ ᱜᱮ ᱦᱚᱯᱚᱱ ᱠᱟᱹᱱᱟᱹᱧ ᱛᱚᱵᱮ ᱤᱧ ᱫᱚ ᱪᱮᱫᱟᱜ ᱮᱴᱟᱜ ᱢᱮᱫ ᱛᱮᱢ ᱧᱮᱞᱤᱧ ᱠᱟᱱᱟ ᱾ ᱤᱧ ᱛᱚ ᱵᱟᱹᱧ ᱠᱚᱭ ᱟᱠᱟᱫᱟ ᱤᱧᱟᱜ ᱥᱚᱝᱥᱟᱨ ᱨᱟᱹᱯᱩᱫᱚᱜ ᱢᱟ ᱢᱮᱱᱛᱮ, ᱤᱧ ᱛᱚ ᱵᱟᱹᱧ ᱠᱚᱭᱟᱠᱟᱫᱟ ᱥᱚᱢᱟᱡᱽ ᱛᱟᱞᱟᱨᱮ ᱫᱩᱥᱤ ᱠᱟᱛᱮᱫ ᱤᱧ ᱫᱟᱲᱟ ᱫᱟᱱᱟᱭ ᱢᱟ ᱢᱮᱱᱛᱮ, ᱛᱚᱵᱮ ᱪᱮᱫᱟᱜ ᱛᱮᱦᱮᱧ ᱤᱧ ᱫᱚ ᱱᱚᱝᱠᱟᱱ ᱫᱚᱥᱟᱨᱮ ᱾ ᱛᱮᱦᱮᱧ ᱤᱧ ᱤᱧᱟᱜ ᱫᱚᱥᱟ ᱱᱚᱝᱠᱟ ᱦᱩᱭ ᱟᱠᱟᱱ ᱛᱮ ᱵᱷᱟᱞᱤ ᱚᱠᱚᱡ ᱛᱤᱧ ᱟᱹᱭᱠᱟᱹᱣ ᱮᱫᱟ ᱤᱧ ᱞᱮᱠᱟᱜᱮ ᱡᱟᱦᱟᱭ ᱛᱤᱨᱞᱟᱹ ᱠᱚᱫᱚ ᱢᱮᱱᱟᱜ ᱠᱳᱣᱟ ᱩᱱᱠᱩᱣᱟᱜ ᱦᱟᱞᱚᱛ ᱚᱠᱟᱨᱮ ᱾ ᱩᱱᱠᱩᱣᱟᱜ ᱚᱱᱛᱚᱨ ᱦᱚᱸ ᱯᱟᱞᱮ ᱱᱚᱝᱠᱟ ᱜᱮ ᱦᱮᱰᱮᱡᱚᱜ ᱠᱟᱱᱟ ᱾

ᱠᱟᱛᱷᱟ ᱠᱟᱛᱷᱟ ᱛᱤᱧ ᱞᱟᱹᱭ ᱟᱫᱮᱭᱟᱹᱧ ᱵᱟᱝᱢᱟ ᱱᱮ ᱥᱩᱨ ᱫᱤᱱ ᱜᱮ ᱴᱟᱴᱠᱟ ᱜᱮ ᱟᱡ ᱵᱟᱵᱟ ᱫᱚᱭ ᱦᱟᱱᱟᱯᱩᱨᱤ ᱮᱱᱟ ᱾ ᱱᱳᱣᱟ ᱠᱟᱛᱷᱟ ᱟᱸᱡᱚᱢ ᱥᱟᱶᱛᱮ ᱯᱳᱭᱞᱳ ᱫᱚᱭ ᱦᱟᱦᱟᱲᱟ ᱮᱱᱟ ᱾ ᱤᱱᱟᱹ ᱛᱟᱭᱳᱢ ᱨᱟᱜ ᱢᱮᱥᱟ ᱞᱟᱹᱞᱟᱹᱭ ᱮ ᱮᱦᱚᱵ ᱠᱮᱫᱟ, ᱠᱟᱛᱷᱟ ᱨᱮᱠᱚ ᱢᱮᱱ ᱟᱠᱟᱫᱟ, “ᱟᱢ ᱡᱩᱫᱤ ᱡᱟᱦᱟᱸᱭᱟᱜ ᱠᱷᱩᱵ ᱢᱩᱞᱞᱚᱵᱟᱱ ᱡᱤᱱᱤᱥ ᱮᱢ ᱨᱮᱡ ᱦᱟᱛᱟᱣᱟ, ᱛᱟᱦᱞᱮ ᱟᱢ ᱦᱚᱸ ᱟᱢᱟᱜ ᱢᱩᱞᱞᱚᱵᱟᱱ ᱡᱤᱱᱤᱥ ᱜᱮᱢ ᱟᱫᱟ ᱟᱢᱟᱜ ᱠᱟᱹᱭ ᱨᱮᱱᱟᱜ ᱠᱩᱲᱟᱹᱭ ᱞᱮᱠᱟᱛᱮ” ᱾ ᱵᱟᱲᱟᱭᱟᱢ ᱦᱟᱱᱦᱟᱨᱤᱧ ᱫᱚ ᱫᱩᱞᱟᱲ ᱠᱟᱛᱮᱫ ᱮ ᱵᱟᱯᱞᱟ ᱞᱮᱱᱟ ᱾ ᱡᱟᱶᱟᱭ ᱚᱲᱟᱜ ᱨᱮ ᱟᱡ ᱫᱚ ᱦᱟᱱᱦᱟᱨ ᱛᱮᱫ ᱮ ᱢᱟᱱᱟᱣ ᱵᱟᱛᱟᱣ ᱠᱮᱫᱮ ᱛᱮ ᱦᱮᱥᱮᱡ ᱥᱮᱠᱮᱡ ᱮ ᱥᱚᱝᱥᱟᱨ ᱠᱮᱫᱟ ᱜᱤᱫᱟᱹᱨ ᱯᱤᱫᱟᱹᱨ ᱟᱛᱮᱫ ᱾ ᱟᱫᱚ ᱪᱤᱠᱟᱹᱛᱮ ᱟᱡ ᱫᱚᱭ ᱵᱩᱡᱟ ᱡᱮ ᱥᱟᱨᱤ ᱫᱩᱞᱟᱲ ᱥᱮ ᱥᱚᱝᱥᱟᱨ ᱨᱟᱹᱯᱩᱫ ᱞᱮᱱᱠᱷᱟᱱ ᱛᱤᱱᱟᱹᱜ ᱠᱚᱥᱴᱚ ᱵᱩᱡᱷᱟᱹᱜᱼᱟ ᱾ ᱡᱟᱦᱟᱭ ᱠᱚ ᱟᱫ ᱟᱠᱟᱫᱟ ᱩᱱᱠᱩ ᱜᱮᱠᱚ ᱵᱩᱡᱷᱟᱹᱣᱟ ᱟᱫ ᱨᱮᱱᱟᱜ ᱠᱚᱥᱴᱚ ᱫᱚ ᱪᱮᱫ ᱞᱮᱠᱟ ᱵᱩᱡᱷᱟᱹᱜᱼᱟ ᱾ ᱢᱮᱱᱠᱷᱟᱱ ᱱᱤᱛᱮᱢ ᱵᱩᱡᱷᱟᱹᱣᱟ ᱟᱫᱽ ᱨᱮᱱᱟᱜ ᱥᱚᱠᱫᱚ ᱪᱮᱫ ᱞᱮᱠᱟ ᱵᱩᱡᱷᱟᱹᱜ ᱢᱮᱱᱛᱮ, ᱤᱧ ᱫᱚᱢ ᱨᱮᱡ ᱟᱠᱟᱫᱤᱧᱟ ᱤᱧᱟᱜ ᱥᱩᱠ, ᱤᱧᱟᱹᱜ ᱠᱩᱥᱤ ᱨᱟᱹᱥᱠᱟᱹ ᱥᱟᱹᱨᱤ ᱫᱩᱞᱟᱹᱲ ᱡᱤᱣᱤᱡᱩᱨᱤ ᱥᱚᱱᱮᱨ ᱥᱚᱝᱥᱟᱨ ᱾ᱢᱮᱱᱠᱷᱟᱱ ᱟᱢ ᱫᱚ ᱟᱢᱟᱜ ᱠᱟᱹᱭ ᱠᱩᱲᱟᱹᱭ ᱛᱮᱜᱮ ᱟᱢ ᱫᱚᱢ ᱟᱫ ᱟᱠᱟᱫᱮᱭᱟ ᱟᱫᱷᱟ ᱫᱤᱱ ᱨᱮ ᱟᱢᱤᱡ ᱡᱤᱣᱤ ᱡᱩᱨᱤ ᱾ ᱱᱤᱛᱮᱢ ᱵᱩᱡᱷᱟᱹᱣᱟ ᱴᱷᱤᱠ ᱩᱱ ᱚᱠᱛᱚ ᱤᱧ ᱪᱮᱫ ᱞᱮᱠᱟᱧ ᱵᱩᱡᱷᱟᱹᱣ ᱞᱮᱫᱟ ᱾ ᱟᱢ ᱫᱚ ᱟᱭᱚ ᱪᱮᱫᱟᱜ ᱮᱢ ᱨᱟᱜ ᱮᱫᱟ ᱠᱟᱦᱩ ᱠᱩᱲᱤᱫ ᱟᱢᱟᱜ ᱢᱟ ᱥᱟᱱᱟᱢᱟᱜ ᱜᱮ ᱢᱮᱱᱟᱜᱼᱟ ᱥᱚᱝᱥᱟᱨ, ᱚᱲᱟᱜ ᱯᱮᱨᱮᱡ ᱦᱚᱯᱚᱱ ᱠᱤᱢᱤᱱ ᱞᱟᱛᱤᱯᱩᱛᱤ, ᱦᱚᱭᱛᱚ ᱵᱟᱨ ᱫᱤᱱ ᱞᱟᱦᱟᱭ ᱪᱟᱞᱟᱣ ᱮᱱᱟ ᱾ ᱞᱟᱦᱟ ᱥᱮ ᱛᱟᱭᱳᱢ ᱚᱱᱠᱟᱢᱟ ᱥᱟᱱᱟᱢ ᱦᱚᱲ ᱜᱮ ᱪᱟᱞᱟᱜ ᱦᱩᱭᱩᱜ ᱛᱟᱵᱚᱱᱟ ᱢᱮᱱᱠᱷᱟᱱ ᱩᱭᱦᱟᱹᱨ ᱢᱮᱥᱮ ᱤᱧᱟᱜ ᱫᱚ ᱪᱮᱫ ᱦᱩᱭᱩᱜᱼᱟ ᱚᱱᱟᱢ ᱞᱟᱹᱭ ᱤᱧ ᱠᱮᱭᱟ ᱟᱭᱳ? ᱤᱧ ᱡᱮ ᱥᱟᱱᱟᱢ ᱥᱩᱠ ᱥᱚᱱᱮᱨ ᱥᱚᱝᱥᱟᱨ ᱨᱮᱡ ᱠᱟᱛᱮᱫ ᱰᱟᱦᱟᱨ ᱫᱷᱩᱲᱤ ᱨᱮᱢ ᱞᱩᱥᱩᱯᱩᱸᱰᱩ ᱟᱠᱟᱫᱤᱧᱟ ᱾ ᱟᱢ ᱠᱷᱟᱹᱛᱤᱨ ᱛᱟᱞᱟ ᱴᱟᱺᱰᱤᱨᱮ ᱤᱧ ᱫᱚ ᱵᱮᱦᱤᱨᱞᱟᱹ ᱨᱮ ᱾ ᱵᱟᱲᱟᱭᱟᱢ ᱟᱢ ᱠᱷᱟᱹᱛᱤᱨ ᱥᱟᱢᱟᱡᱽ ᱤᱧ ᱫᱚ ᱚᱠᱟᱨᱮ ᱦᱚᱸ ᱴᱷᱟᱣ ᱵᱟᱭ ᱤᱢᱟᱹᱧ ᱠᱟᱱᱟ, ᱤᱧᱟᱜ ᱫᱚ ᱪᱮᱫ ᱦᱩᱭᱩᱜᱼᱟ ᱩᱭᱦᱟᱹᱨ ᱠᱟᱛᱮᱫ ᱮᱢ ᱧᱮᱞ ᱟᱠᱟᱫᱟ ?

ᱱᱤᱝᱠᱟ ᱜᱟᱞᱢᱟᱨᱟᱣ ᱛᱮᱜᱮ ᱛᱤᱨᱮ ᱡᱮ ᱵᱟᱠᱩᱲᱟ ᱥᱮᱴᱮᱨ ᱮᱱᱟ ᱵᱟᱝᱞᱤᱧ ᱵᱩᱡᱽ ᱞᱮᱫᱟ ᱾ ᱠᱦᱟᱱ ᱜᱮ ᱵᱟᱦᱩᱭ ᱢᱮᱱ ᱠᱮᱫᱟ ᱤᱱᱠᱟᱹ ᱜᱮ ᱞᱟᱝ ᱨᱚᱯᱚᱲᱟ ᱦᱚᱯᱚᱱ ᱢᱟᱹᱭ ᱟᱨ ᱦᱚᱸ ᱞᱟᱝ ᱧᱟᱯᱟᱢᱟ ᱟᱲᱜᱚ ᱞᱮᱱ ᱜᱤᱧ, ᱱᱳᱣᱟ ᱢᱮᱱ ᱠᱟᱛᱮᱫ ᱮ ᱟᱲᱜᱚ ᱪᱟᱞᱟᱣ ᱮᱱᱟ ᱾ ᱩᱱᱤᱭᱟᱜ ᱛᱟᱲᱟᱢ ᱰᱟᱦᱟᱨ ᱥᱮᱫ ᱠᱚᱭᱚᱜ ᱨᱮᱜᱤᱧ ᱛᱟᱦᱮ ᱮᱱᱟ ᱢᱤᱫ ᱜᱷᱟᱲᱤ ᱫᱚ᱾

ᱵᱟᱹᱦᱩᱣᱟᱜ ᱱᱳᱣᱟ ᱠᱳ ᱠᱟᱛᱷᱟ ᱟᱸᱡᱳᱢ ᱠᱟᱛᱮᱫ ᱤᱧ ᱩᱭᱦᱟᱹᱨ ᱮᱫᱟ ᱥᱟᱨᱤ ᱜᱮ ᱱᱩᱭ ᱞᱮᱠᱟᱱ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱫᱚᱥᱟᱹ ᱫᱚ ᱛᱮᱦᱮᱧ ᱚᱠᱟᱨᱮ ᱛᱤᱸᱜᱩ ᱟᱠᱟᱱᱟ ᱚᱱᱟ ᱫᱚ ᱡᱟᱦᱟᱭ ᱟᱜ ᱡᱤᱭᱚᱱ ᱨᱮ ᱜᱷᱚᱴᱟᱜ ᱠᱟᱱᱟ ᱩᱱᱤ ᱜᱮᱭ ᱵᱩᱡᱽ ᱫᱟᱲᱮᱭᱟᱜ ᱠᱟᱱᱟ ᱡᱮ ᱛᱤᱱᱟᱹᱜ ᱞᱮᱠᱟᱱ ᱢᱩᱦᱤᱢ ᱫᱚᱥᱟᱨᱮ ᱥᱟᱢᱟᱝ ᱚᱜ ᱞᱟᱜᱟᱣ ᱮ ᱠᱟᱱᱟ ᱾ ᱛᱤᱱᱟᱹᱜ ᱴᱟ ᱥᱟᱦᱟᱣ ᱞᱟᱜᱟᱣ ᱮ ᱠᱟᱱᱟ ᱾ ᱥᱟᱨᱤ ᱜᱮᱛᱚ ᱱᱩᱭᱟᱜ ᱫᱚᱥᱢᱟ ᱵᱟᱱᱩᱜ ᱛᱚᱵᱮ ᱛᱮᱦᱮᱧ ᱪᱮᱫᱟᱜ ᱱᱩᱱᱟᱹᱜ ᱠᱤᱪᱷᱩ ᱥᱟᱦᱟᱣ ᱞᱟᱜᱟᱣ ᱮ ᱠᱟᱱᱟ ᱾ ᱱᱚᱣᱟ ᱫᱚ ᱡᱟᱱᱤᱡ ᱠᱷᱟᱱ ᱥᱚᱢᱟᱡᱽ ᱜᱮᱭ ᱞᱟᱹᱭ ᱫᱟᱲᱮᱭᱟᱜᱼᱟ᱾ᱢᱩᱪᱟᱹᱫ ᱨᱮ ᱱᱳᱣᱟᱜᱤᱧ ᱞᱟᱹᱭᱟ ᱱᱚᱝᱠᱟ ᱫᱚ ᱟᱨ ᱛᱤᱱᱟᱹᱜ ᱫᱤᱱ ᱡᱩᱣᱟᱹᱱ ᱞᱳᱵᱽ ᱛᱮ ᱵᱷᱩᱴᱩᱜ ᱵᱟᱦᱟ ᱫᱚᱯᱮ ᱴᱮᱸᱜᱚᱡ ᱵᱚᱨᱵᱟᱫᱽᱼᱟ ᱾

***