ᱫᱩᱞᱤ ᱢᱟᱹᱭ ᱨᱮᱥᱴ ᱨᱩᱢ ᱨᱮ ᱵᱚᱞᱚ ᱠᱟᱛᱮ ᱰᱨᱮᱥ ᱠᱚᱭ ᱵᱚᱫᱚᱞ ᱮᱱᱟ ᱾ ᱦᱚᱨᱚᱜ ᱨᱮᱭᱟᱜ ᱥᱟᱞᱣᱟᱨ ᱵᱚᱫᱚᱞ ᱠᱟᱛᱮ ᱯᱩᱸᱰ ᱥᱟᱞᱣᱟᱨ ᱠᱟᱹᱢᱤᱡᱽ ᱮ ᱦᱚᱨᱚᱜ ᱠᱮᱫᱟ ᱾ ᱡᱟᱸᱜᱟ ᱯᱟᱱᱟᱦᱤ ᱢᱤᱫ ᱫᱷᱟᱨᱮ ᱨᱮ ᱫᱚᱦᱚ ᱠᱟᱛᱮ, ᱦᱮᱸᱫᱮ ᱯᱟᱱᱟᱦᱤ ᱡᱟᱸᱜᱟ ᱨᱮ ᱦᱚᱨᱚᱜ ᱠᱮᱫᱟᱭ ᱾ ᱱᱟᱯᱟᱭ ᱥᱟᱺᱦᱤᱡ ᱩᱵ ᱠᱚᱭ ᱱᱟᱹᱠᱤᱡ ᱯᱷᱟᱨᱪᱟ ᱮᱱᱛᱮᱭ ᱥᱩᱫ ᱮᱱᱟ ᱾ ᱟᱨ ᱡᱟᱹᱞᱛᱤ ᱛᱮᱭ ᱡᱟᱹᱞᱛᱤ ᱠᱮᱫ ᱛᱮ ᱵᱚᱦᱚᱜ ᱨᱮ ᱠᱮᱯ ᱮ ᱦᱚᱨᱚᱜ ᱠᱮᱫᱟ ᱾ ᱱᱟᱨᱥᱟᱜ ᱱᱚᱶᱟ ᱯᱩᱸᱰ ᱜᱮ ᱛᱳᱣᱟ ᱞᱮᱠᱟ ᱛᱮᱦᱮ ᱛᱮᱦᱮ ᱰᱨᱮᱥ ᱮ ᱦᱚᱨᱚᱜ ᱞᱮᱠᱷᱟᱱ ᱢᱚᱱᱮ ᱡᱤᱣᱤ ᱨᱮ ᱟᱹᱰᱤ ᱥᱟᱹᱱᱛᱤ ᱜᱮ ᱵᱩᱡᱷᱟᱹᱣᱜᱼᱟ ᱾ ᱟᱨ ᱟᱹᱰᱤ ᱛᱷᱤᱨᱞᱟᱹ ᱜᱮ ᱟᱹᱭᱠᱟᱹᱣᱜᱼᱟ ᱾ ᱟᱯᱱᱟᱨᱟᱜ ᱯᱟᱨᱚᱢ ᱟᱠᱟᱱ ᱡᱤᱭᱚᱱ ᱨᱮᱱᱟᱜ ᱟᱱᱟᱴ ᱮᱴᱠᱮᱴᱚᱬᱮ ᱥᱟᱱᱟᱢᱟᱜ ᱢᱮᱫ ᱥᱟᱢᱟᱝ ᱠᱷᱚᱱᱟᱜ ᱪᱷᱟᱱ ᱜᱚᱫᱚᱜ ᱛᱟᱭᱟ ᱾ ᱡᱤᱣᱤ ᱡᱟᱹᱛᱤ ᱨᱮ ᱨᱟᱣᱟᱞ ᱜᱮᱭ ᱵᱩᱡᱷᱟᱹᱣᱟ ᱾ ᱨᱩᱜᱤ ᱠᱚᱣᱟᱜ ᱥᱮᱵᱟ ᱡᱚᱛᱚᱱ ᱨᱮ ᱢᱚᱱᱮ ᱴᱟᱱᱟᱣᱜ ᱛᱟᱭᱟ ᱾ ᱟᱨ ᱱᱚᱶᱟ ᱦᱚᱸᱭ ᱜᱚᱴᱟ ᱩᱛᱟᱹᱨ ᱟᱠᱟᱫᱟ ᱛᱟᱭᱚᱢ ᱞᱟᱦᱟ ᱵᱟᱝ ᱟᱹᱦᱤ ᱵᱷᱟᱹᱵᱤ ᱠᱟᱛᱮ ᱱᱚᱶᱟ ᱦᱟᱥᱯᱟᱛᱟᱞ ᱨᱮᱜᱮ ᱱᱟᱨᱥ ᱫᱚᱭ ᱛᱟᱦᱮᱸᱱᱟ ᱾ ᱜᱷᱟᱨᱚᱸᱡᱽ ᱥᱚᱝᱥᱟᱨ ᱨᱮᱱᱟᱜ ᱠᱟᱛᱷᱟ ᱠᱚᱫᱚ ᱟᱫᱚ ᱮᱠᱟᱞ ᱵᱟᱭ ᱩᱭᱦᱟᱹᱨᱟ ᱾ ᱟᱭᱳ ᱵᱟᱵᱟ ᱜᱮᱭ ᱡᱚᱜᱟᱣ ᱡᱚᱛᱚᱱ ᱠᱤᱱᱟ ᱾ ᱛᱮᱦᱮᱧ ᱯᱮ ᱥᱮᱨᱢᱟ ᱦᱩᱭ ᱮᱱᱟ ᱢᱤᱫᱤᱱᱯᱩᱨ ᱥᱚᱫᱚᱨ ᱦᱟᱥᱯᱟᱛᱟᱞ ᱨᱮ ᱯᱟᱨᱢᱟᱱᱮᱸᱴ ᱥᱴᱟᱯᱷ ᱞᱮᱠᱟᱛᱮᱭ ᱵᱟᱦᱟᱞ ᱟᱠᱟᱱᱟ ᱾ ᱫᱩᱞᱤ ᱢᱟᱹᱭ ᱟᱹᱰᱤ ᱜᱚᱨᱚᱡᱽ ᱫᱩᱞᱟᱹᱲ ᱟᱛᱮ ᱨᱩᱜᱤ ᱠᱚᱭ ᱨᱚᱲ ᱟᱠᱚᱣᱟ ᱟᱨ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱠᱚᱭ ᱠᱩᱞᱤ ᱵᱟᱲᱟ ᱠᱚᱣᱟ ᱾ ᱟᱨ ᱱᱟᱯᱟᱭ ᱞᱮᱠᱟ ᱤᱧᱡᱮᱠᱥᱚᱱ ᱠᱚ ᱟᱨ ᱥᱮᱞᱟᱭᱤᱱ ᱠᱚᱭ ᱞᱟᱜᱟᱣ ᱟᱠᱚᱣᱟ ᱾ ᱟᱡ ᱠᱚ ᱧᱮᱞ ᱞᱮᱠᱷᱟᱱ ᱜᱮ ᱨᱩᱜᱤ ᱠᱚ ᱟᱹᱰᱤ ᱡᱩᱨ ᱠᱚ ᱨᱟᱹᱥᱠᱟᱹᱜᱼᱟ ᱾ ᱟᱨ ᱟᱹᱰᱤ ᱡᱩᱨ ᱠᱚ ᱠᱩᱥᱤ ᱟᱭᱟ ᱾ ᱛᱮᱦᱮᱧ ᱫᱚ ᱱᱟᱭᱤᱴ ᱰᱤᱣᱴᱤ ᱯᱟᱲᱟᱣ ᱟᱠᱟᱱᱟ ᱾ ᱢᱮᱞ – ᱣᱚᱨᱰ ᱨᱮ ᱾
ᱣᱟᱨᱰ ᱨᱮ ᱫᱩᱲᱩᱵ ᱠᱟᱛᱮ ᱠᱟᱹᱢᱤ ᱠᱟᱱᱟᱭ ᱨᱮᱡᱤᱥᱴᱟᱨ ᱠᱷᱟᱛᱟ ᱚᱰᱚᱠ ᱠᱟᱛᱮ ᱨᱩᱜᱤ ᱠᱚᱣᱟᱜ ᱧᱩᱛᱩᱢ ᱮ ᱧᱮᱞ ᱮᱫᱟ ᱾ ᱚᱠᱚᱭ ᱨᱩᱜᱤᱭᱟᱜ ᱪᱮᱫ ᱨᱟᱱ ᱤᱧᱡᱮᱠᱥᱚᱱ ᱠᱚ ᱞᱟᱜᱟᱣᱜᱼᱟ ᱾ ᱢᱚᱱᱮ ᱩᱨᱤᱡ ᱠᱟᱛᱮᱭ ᱧᱮᱞ ᱵᱟᱲᱟᱭᱮᱫᱼᱟ ᱾ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱟᱸᱫᱟᱜ ᱛᱟᱣᱟᱜ ᱫᱟᱹᱲ ᱦᱮᱡ ᱠᱟᱛᱮ ᱢᱮᱱ ᱜᱚᱫ ᱠᱮᱫ ᱟᱭ, “ᱥᱤᱥᱴᱟᱨ ᱫᱮᱞᱟ ᱥᱮ ᱦᱤᱡᱩᱜ ᱢᱮ, ᱤᱧᱤᱡ ᱨᱩᱜᱤ ᱵᱮᱥ ᱵᱟᱹᱱᱩᱜ ᱮᱭᱟ ᱾ ᱠᱷᱩᱜ ᱠᱷᱩᱜ ᱛᱮ ᱫᱚᱭᱚᱜ ᱮᱱᱟᱭ ᱟᱨ ᱡᱤᱣᱤ ᱠᱚ ᱦᱟᱹᱭ ᱯᱷᱟᱹᱭᱩᱜ ᱠᱟᱱ ᱛᱟᱭᱟ ᱾ ᱥᱟᱦᱮᱫ ᱵᱟᱭ ᱦᱟᱛᱟᱣ ᱫᱟᱲᱮᱭᱟᱜ ᱠᱟᱱᱟ ᱾ ᱫᱩᱞᱤ ᱦᱚᱸ ᱢᱚᱪᱟᱨᱮ ᱢᱟᱥᱠ ᱦᱚᱨᱚᱜ ᱦᱚᱨᱚᱜ ᱛᱮ ᱩᱥᱟᱹᱨᱟ ᱩᱱᱤ ᱵᱟᱹᱦᱩ ᱠᱩᱲᱤᱭᱟᱜ ᱛᱟᱭᱚᱢ ᱛᱟᱭᱚᱢ ᱛᱮ ᱨᱩᱜᱤ ᱴᱷᱮᱱ ᱮ ᱥᱮᱴᱮᱨ ᱮᱱᱟ ᱾ ᱧᱮᱞ ᱛᱚᱨᱟᱭ ᱫᱷᱟᱠ ᱜᱚᱫ ᱮᱱᱟ, ᱵᱚᱣᱟᱲ ᱦᱟᱹᱠᱩ ᱞᱮᱠᱟᱭ ᱟᱸᱜᱚᱵ ᱟᱸᱜᱚᱵᱚᱜ ᱠᱟᱱᱟ ᱾ ᱢᱮᱫ ᱠᱚᱦᱚᱸ ᱩᱞᱴᱟᱹᱣ ᱟᱠᱟᱱ ᱛᱟᱭᱟ ᱾ ᱮᱨᱟ ᱛᱟᱭ ᱪᱮᱫ ᱮ ᱪᱤᱠᱟᱹᱭᱟ, ᱟᱹᱰᱤ ᱟᱹᱴᱩᱯᱟᱹᱴᱩ ᱜᱮᱭ ᱵᱩᱡᱷᱟᱹᱣ ᱮᱫᱟ ᱾ ᱡᱟᱦᱟᱸᱱᱟᱜ ᱵᱟᱝ ᱵᱷᱟᱹᱵᱤ ᱠᱟᱛᱮ ᱟᱹᱰᱤ ᱞᱚᱜᱚᱱ ᱚᱠᱥᱤᱡᱮᱱ ᱮ ᱞᱟᱜᱟᱣ ᱟᱫᱮᱭᱟ ᱾ ᱟᱨ ᱰᱟᱠᱛᱚᱨ ᱮ ᱦᱚᱦᱚ ᱟᱹᱜᱩ ᱠᱮᱫᱮᱭᱟ ᱾ ᱰᱟᱠᱛᱚᱨᱟᱜ ᱠᱟᱛᱷᱟ ᱞᱮᱠᱟᱛᱮ ᱩᱛᱟᱹᱦᱩᱞᱤ ᱵᱟᱨᱭᱟ ᱤᱧᱡᱮᱠᱥᱚᱱ ᱮ ᱮᱢᱟᱫᱮᱭᱟ ᱟᱨ ᱥᱮᱞᱟᱭᱤᱱ ᱮ ᱞᱟᱜᱟᱣ ᱟᱫᱮᱭᱟ ᱾ ᱵᱟᱹᱭ ᱵᱟᱹᱭ ᱛᱮ ᱟᱸᱜᱚᱵ ᱟᱸᱜᱚᱵ ᱦᱚᱸ ᱱᱟᱥᱮ ᱠᱚᱢ ᱮᱱ ᱞᱮᱠᱟ ᱟᱹᱭᱠᱟᱹᱣ ᱮᱱᱟ ᱾ ᱰᱟᱠᱛᱚᱨ ᱮ ᱪᱟᱞᱟᱣ ᱮᱱᱟ ᱾ ᱮᱴᱟᱜ ᱱᱟᱨᱥ ᱠᱚᱠᱚ ᱪᱟᱞᱟᱣ ᱮᱱ ᱨᱮᱦᱚᱸ ᱫᱩᱞᱤ ᱢᱟᱹᱭ ᱫᱚ ᱚᱸᱰᱮ ᱠᱷᱚᱱ ᱪᱤᱠᱟᱹᱛᱮᱭ ᱥᱟᱦᱟᱜᱼᱟ ᱚᱱᱟ ᱨᱮᱱᱟᱜ ᱫᱟᱲᱮ ᱵᱟᱹᱱᱩᱜ ᱛᱟᱭᱟ ᱾ ᱚᱠᱚᱭ ᱪᱚ ᱢᱮᱬᱦᱮᱫ ᱥᱤᱠᱲᱤ ᱛᱮ ᱡᱟᱸᱜᱟ ᱠᱚ ᱪᱷᱟᱸᱫᱟ ᱟᱠᱟᱫ ᱛᱟᱭ ᱞᱮᱠᱟ ᱛᱤᱸᱜᱩ ᱛᱷᱤᱨ ᱠᱟᱛᱮ ᱨᱩᱜᱤ ᱥᱮᱫ ᱮ ᱠᱚᱭᱚᱜ ᱟᱠᱟᱫᱟ ᱾
ᱚᱱᱛᱚᱨ ᱫᱟᱨᱦᱟ ᱨᱮ ᱦᱮᱸᱫᱮ ᱨᱤᱢᱤᱞ ᱦᱚᱭ ᱫᱟᱜ ᱛᱮ ᱥᱟᱱᱟᱢᱟᱜ ᱩᱞᱟᱹᱴ ᱠᱟᱪᱟᱲ ᱨᱟᱹᱯᱩᱫ ᱪᱷᱟᱠᱟ ᱪᱷᱩᱲᱚᱜ ᱠᱟᱱ ᱛᱟᱭᱟ ᱾ ᱡᱟᱦᱟᱸᱭᱟᱜ ᱪᱟᱛᱚᱢ ᱩᱢᱩᱞ ᱨᱮ ᱛᱤᱸᱜᱩ ᱠᱟᱛᱮ ᱫᱟᱜ ᱡᱟᱹᱯᱩᱫ ᱥᱤᱛᱩᱝ ᱞᱚᱞᱚ ᱡᱤᱣᱤᱭ ᱨᱮᱭᱟᱲᱟ ᱢᱮᱱᱛᱮ ᱢᱤᱫ ᱫᱤᱱ ᱮ ᱵᱷᱟᱹᱵᱤ ᱞᱮᱫᱼᱟ ᱾ ᱡᱟᱦᱟᱸᱭᱟᱜ ᱛᱤᱨᱮ ᱥᱟᱵ ᱠᱟᱛᱮ ᱛᱟᱲᱟᱢ ᱥᱟᱱᱟ ᱞᱮᱫᱮᱭᱟ ᱡᱤᱭᱚᱱ ᱰᱟᱦᱟᱨ, ᱡᱟᱦᱟᱸᱭᱟᱜ ᱥᱟᱠᱚᱢ ᱥᱤᱸᱫᱩᱨ ᱵᱟᱝ ᱛᱮ ᱱᱤᱛ ᱦᱚᱸ ᱟᱹᱡᱟᱹᱲᱤ ᱜᱮ ᱢᱮᱱᱟᱜᱼᱟ ᱞᱮᱸᱜᱟ ᱛᱤ, ᱠᱚᱪᱮ ᱨᱮᱜᱮ ᱢᱮᱱᱟᱜᱼᱟ ᱦᱚᱨᱟᱥᱤ, ᱢᱤᱫ ᱫᱤᱱ ᱛᱟᱞᱟ ᱴᱟᱺᱰᱤ ᱨᱮ ᱰᱷᱟᱠᱟ ᱜᱤᱰᱤ ᱠᱟᱛᱮᱭ ᱧᱤᱨ ᱯᱩᱪᱩᱡ ᱞᱮᱱᱟ ᱾ᱠᱟᱹᱦᱤᱸᱥ ᱟᱹᱲᱤᱥ ᱛᱮ ᱢᱚᱱᱮ ᱡᱤᱣᱤ ᱫᱷᱤᱛᱠᱟᱹᱨ ᱞᱮᱱᱟ ᱫᱩᱠ ᱫᱟᱨᱦᱟ ᱠᱷᱚᱱ ᱛᱤᱸᱜᱩ ᱴᱟᱨᱦᱟᱣ ᱠᱟᱛᱮ ᱠᱤᱨᱤᱭᱟᱹᱭ ᱟᱛᱟᱝ ᱞᱮᱫᱟ ᱪᱟᱸᱫᱚ ᱴᱷᱮᱱ – “ᱪᱟᱸᱫᱚ ᱩᱱᱤᱭᱟᱜ ᱚᱱᱟ ᱢᱮᱫᱦᱟ ᱛᱤᱥ ᱨᱮᱦᱚᱸ ᱤᱧ ᱥᱟᱢᱟᱝ ᱨᱮ ᱟᱞᱚᱢ ᱡᱷᱟᱞᱠᱟᱣᱟ ᱾ ᱩᱱᱤᱭᱟᱜ ᱩᱢᱩᱞ ᱠᱷᱚᱱᱟᱜ ᱡᱟᱭᱡᱩᱜᱽ ᱥᱟᱦᱟᱨᱮ ᱫᱚᱦᱚ ᱠᱟᱹᱧ ᱢᱮ ᱾”
ᱩᱱᱤᱭᱟᱜ ᱦᱟᱞᱚᱛ ᱧᱮᱞ ᱛᱮ ᱫᱩᱞᱤ ᱢᱟᱹᱭ ᱢᱮᱫ ᱠᱚᱬᱨᱮ ᱢᱮᱫ ᱫᱟᱜ ᱵᱟᱝ ᱥᱟᱸᱵᱽᱲᱟᱣᱜ ᱠᱟᱱᱟ ᱾ ᱦᱩᱨᱩᱢᱮ ᱰᱤᱜᱤᱨ ᱵᱚᱨᱥᱮ ᱥᱮᱸᱜᱮᱞ ᱞᱮᱠᱟ ᱡᱤᱣᱤ ᱞᱚᱜ ᱠᱟᱱᱟ ᱢᱚᱜᱚᱫ ᱢᱚᱜᱚᱫ ᱚᱛ ᱥᱮᱨᱢᱟ ᱩᱭᱦᱟᱹᱨ ᱫᱚᱨᱮᱭᱟ ᱨᱮ ᱩᱱᱩᱢ ᱠᱟᱛᱮ ᱦᱟᱹᱛᱲᱟᱹᱣ ᱟᱹᱪᱩᱨ ᱮᱫᱟᱭ ᱥᱮᱫᱟᱭ ᱱᱟᱜᱟᱢ ᱾
ᱟᱪᱠᱟ ᱜᱮ ᱮᱵᱷᱮᱱ ᱮᱱᱟᱭ ᱩᱱᱤ ᱵᱟᱹᱦᱩ ᱠᱩᱲᱤᱭᱟᱜ ᱦᱚᱦᱚ ᱟᱲᱟᱝ ᱛᱮ – ᱥᱤᱥᱴᱟᱨ ᱥᱮᱞᱟᱭᱤᱱ ᱪᱟᱵᱟ ᱟᱠᱟᱱ ᱛᱟᱭᱟ ᱾”
***
