ᱧᱩᱛᱩᱢ ᱛᱟᱢ ᱫᱚ
ᱥᱟᱹᱜᱩᱱ ᱥᱩᱯᱟᱹᱲᱤ
ᱵᱟᱠᱚ ᱫᱚᱦᱚ ᱫᱟᱲᱮᱭᱟᱢᱟ
ᱦᱟᱸᱰᱮ ᱱᱷᱟᱰᱮ ᱟᱹᱛᱷᱟᱹᱣᱲᱤ
ᱟᱢᱮᱢ ᱟᱫ ᱞᱮᱱ ᱨᱮ
ᱦᱚᱲ ᱦᱚᱯᱚᱱᱟᱜ ᱥᱟᱹᱨᱤ
ᱵᱚᱫᱚᱞ ᱪᱟᱵᱟᱜ-ᱟ ᱟᱹᱨᱤᱪᱟᱹᱞᱤ ᱾
ᱚᱠᱟ ᱨᱤᱱ ᱦᱚᱲᱮ
ᱚᱠᱟ ᱡᱟᱹᱛᱤ ᱨᱤᱱ ᱦᱚᱲᱮ
ᱜᱚᱲᱦᱚᱱ ᱞᱮᱫ ᱢᱮ ?
ᱵᱟᱝ ᱫᱚ ᱠᱩᱝᱠᱟᱹᱞ
ᱵᱟᱝ ᱫᱚ ᱥᱟᱱᱛᱟᱲ
ᱵᱟᱝ ᱫᱚ ᱢᱟᱦᱞᱮ
ᱵᱟᱝ ᱫᱚ ᱢᱩᱰᱟᱹ
ᱚᱠᱚᱭ ᱡᱟᱹᱛᱤ ᱪᱚ
ᱟᱢ ᱫᱚᱠᱚ ᱜᱚᱲᱦᱚᱱ ᱞᱮᱫ ᱢᱮ ?
ᱜᱚᱲᱦᱚᱱ ᱧᱮᱞ ᱡᱚᱝ ᱛᱟᱢ ᱢᱟ
ᱵᱚᱠᱟᱜ ᱦᱚᱛᱚᱫ ᱞᱮᱠᱟ
ᱵᱟᱠᱚ ᱞᱩᱛᱚᱭᱟ ᱥᱟᱹᱨᱤ
ᱚᱱᱟ ᱛᱮᱫᱚ ᱴᱩᱢᱟᱹᱝ ᱫᱟᱠᱟ ᱾
ᱚᱠᱚᱭ ᱥᱤᱨᱡᱚᱱᱤᱭᱟᱹ ᱢᱟᱹᱱᱢᱤ
ᱟᱢ ᱫᱚᱭ ᱥᱤᱨᱡᱚᱱ ᱞᱮᱫ ᱢᱮ
ᱱᱟᱥᱮ ᱛᱩᱠᱩᱡ ᱱᱟᱥᱮ ᱛᱟᱹᱯᱤᱧ ᱛᱮᱜᱮ ᱮᱱᱛᱮ
ᱟᱢᱟᱜ ᱦᱚᱲᱢᱚ ᱫᱚᱭ ᱨᱟᱹᱯᱩᱫᱽ ᱮᱱᱛᱮ ᱾
ᱟᱢᱟᱜ ᱦᱚᱲᱢᱚ ᱨᱮ ᱯᱮᱨᱮᱡ ᱫᱟᱜ ᱧᱮᱞ ᱛᱮ
ᱦᱚᱲ ᱦᱚᱯᱚᱱᱟᱜ ᱢᱚᱱᱮ ᱡᱤᱣᱤ ᱨᱮ
ᱥᱟᱹᱜᱩᱱ ᱮ ᱥᱟᱨᱥᱟᱣᱟ
ᱟᱢᱟᱜ ᱨᱟᱹᱯᱩᱫ ᱦᱚᱲᱢᱚ ᱨᱮ
ᱞᱤᱸᱜᱤ ᱫᱟᱜ ᱧᱮᱞ ᱛᱮ
ᱦᱚᱲ ᱦᱚᱯᱚᱱᱟᱜ ᱡᱤᱣᱤ ᱨᱮ
ᱢᱩᱦᱤᱱ ᱮ ᱥᱟᱨᱪᱟᱣᱟ ᱾
***
