ᱠᱟᱹᱢᱤᱭᱟᱹᱧ ᱥᱟᱨᱟ ᱫᱤᱱ ᱤᱧ ᱫᱚ ᱟᱹᱴᱩᱯᱟᱹᱴᱩ
ᱵᱟᱲᱜᱮ ᱜᱚᱴᱟ ᱮᱥᱮᱫ ᱟᱠᱟᱱ ᱜᱷᱟᱸᱥᱛᱮ ᱞᱟᱹᱴᱩᱯᱟᱹᱴᱩ
ᱠᱚᱸᱰᱟᱲᱟᱹᱧ ᱠᱩᱠᱩᱴᱟᱹᱧ ᱜᱚᱴᱟ ᱵᱟᱲᱜᱮᱧ ᱥᱟᱯᱷᱟᱭ
ᱩᱥᱟᱹᱨᱟᱜᱤᱧ ᱪᱷᱩᱴᱟᱹᱣ ᱠᱚᱜᱼᱟ ᱞᱚᱜᱚᱱ ᱠᱟᱹᱢᱤᱧ ᱪᱟᱵᱟᱭ ᱾
ᱮᱸᱴᱮᱫᱟᱹᱧ ᱮᱥᱮᱫᱟᱹᱧ ᱯᱷᱟᱫᱟ ᱵᱟᱹᱧ ᱫᱚᱦᱚᱭ
ᱵᱟᱲᱜᱮ ᱯᱮᱨᱮᱡ ᱦᱟᱱᱟ ᱱᱟᱣᱟ ᱤᱧ ᱫᱚ ᱢᱟᱥᱮᱧ ᱨᱚᱦᱚᱭ
ᱥᱟᱝ ᱥᱟᱥᱟᱝ ᱥᱟᱹᱨᱩ ᱯᱮᱸᱰᱮ ᱨᱚᱦᱚᱭ ᱠᱤᱫᱟᱹᱧ ᱜᱚᱴᱟ
ᱱᱟᱹᱲᱤ ᱮᱱᱟ ᱫᱟᱨᱮ ᱮᱱᱟ ᱫᱟᱭᱮᱱ ᱢᱚᱴᱟ ᱢᱚᱴᱟ ᱾
ᱡᱷᱤᱸᱜᱟᱹ ᱵᱮᱸᱜᱟᱲ ᱢᱟᱞᱦᱟᱱ ᱢᱟᱹᱨᱤᱪ ᱜᱚᱴᱟ ᱵᱟᱲᱜᱮᱧ ᱨᱚᱦᱚᱭ
ᱵᱟᱲᱜᱮ ᱮᱠᱟᱞ ᱠᱷᱟᱹᱞᱤ ᱫᱚ ᱛᱤᱥ ᱦᱚᱸ ᱵᱟᱹᱧ ᱫᱚᱦᱚᱭ
ᱚᱲᱟᱜ ᱞᱟᱹᱜᱤᱫ ᱩᱛᱩ ᱠᱚᱫᱚ ᱠᱤᱨᱤᱧ ᱜᱮ ᱵᱟᱝ ᱦᱩᱭᱟᱹᱧ
ᱠᱟᱹᱢᱤ ᱛᱟᱦᱮᱱ ᱛᱮ ᱫᱩᱲᱩᱵ ᱛᱷᱤᱨ ᱫᱚ ᱵᱟᱝ ᱜᱮᱪᱚ ᱥᱟᱱᱟᱹᱧ ᱾
ᱥᱤᱧ ᱥᱟᱨᱟ ᱫᱤᱱ ᱩᱫᱩᱲ ᱫᱷᱩᱯᱩᱲ ᱠᱟᱹᱢᱤ ᱨᱮᱜᱮᱧ ᱛᱟᱦᱮᱱ
ᱞᱟᱸᱜᱟ ᱦᱚᱲᱢᱚ ᱥᱤᱸᱜᱟᱹᱲ ᱛᱚᱨᱟ ᱢᱮᱫ ᱢᱟ ᱨᱚᱰᱚᱡ ᱮᱱ
ᱡᱟᱹᱯᱤᱫ ᱮᱵᱷᱮᱱ ᱩᱴᱩᱡ ᱯᱩᱴᱩᱡ ᱛᱤᱨᱮ ᱟᱸᱜᱟ ᱧᱤᱫᱟᱹ
ᱢᱮᱫ ᱨᱮ ᱡᱟᱹᱯᱤᱫ ᱵᱟᱹᱱᱩᱜ ᱟᱫᱚ ᱵᱮᱨᱮᱫ ᱤᱱᱟᱹᱧ ᱥᱤᱫᱷᱟᱹ ᱾
ᱠᱚᱪᱟ ᱨᱤᱱᱤᱡ ᱥᱤᱢ ᱥᱟᱺᱰᱤ ᱢᱟᱭ ᱠᱩᱨᱠᱩᱪᱩᱫ ᱠᱟᱱ
ᱧᱤᱫᱟᱹ ᱟᱫᱚ ᱪᱟᱵᱟᱭᱮᱱᱟ ᱟᱸᱜᱟ ᱦᱤᱡᱩᱜ ᱠᱟᱱ
ᱴᱷᱮᱠᱟ ᱯᱮᱨᱮᱡ ᱨᱚᱦᱚᱲ ᱦᱩᱲᱩ ᱰᱷᱤᱝᱠᱤ ᱵᱩᱴᱟᱹᱧ ᱤᱫᱤ
ᱦᱩᱲᱩᱝ ᱛᱮᱜᱤᱧ ᱞᱟᱹᱦᱩᱫ ᱠᱮᱫᱟ ᱤᱧ ᱫᱚ ᱥᱤᱸᱫᱤ ᱢᱤᱸᱫᱤ ᱾
ᱵᱮᱲᱟ ᱟᱹᱣᱨᱤ ᱧᱮᱞᱚᱜ ᱛᱮᱜᱮ ᱤᱥᱤᱱ ᱠᱚᱫᱚ ᱥᱟᱹᱛᱮᱱ
ᱞᱚᱞᱚ ᱢᱟᱹᱰᱤ ᱵᱟᱹᱴᱤ ᱯᱮᱨᱮᱡ ᱫᱷᱩᱨᱟᱹᱣ ᱠᱚᱫᱚ ᱦᱩᱭᱮᱱ
ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚᱫᱚ ᱡᱷᱚᱛᱚ ᱪᱟᱵᱟᱭᱮᱱ
ᱥᱟᱹᱛ ᱥᱟᱯᱲᱟᱣ ᱩᱰᱩᱠ ᱤᱱᱟᱹᱧ ᱤᱧ ᱫᱚ ᱜᱚᱰᱟ ᱥᱮᱱ ᱾
ᱰᱟᱹᱦᱤ ᱜᱚᱰᱟ ᱜᱷᱩᱴᱩ ᱵᱟᱹᱫᱽ ᱯᱩᱲᱣᱟᱹ ᱵᱟᱹᱧ ᱫᱚᱦᱚᱭ
ᱥᱤᱻ ᱠᱟᱛᱮ ᱰᱷᱮᱞᱟᱠ ᱦᱟᱥᱟ ᱡᱷᱚᱛᱚᱧ ᱞᱟᱹᱦᱩᱫ ᱚᱪᱚᱭ
ᱟᱱᱟᱡᱽ ᱵᱟᱲᱜᱮ ᱠᱚᱨᱮ ᱜᱮ ᱤᱧ ᱫᱚ ᱜᱷᱩᱨᱟᱹ ᱜᱷᱩᱨᱤ
ᱦᱚᱛᱚᱫ ᱠᱚᱦᱚᱸᱰᱟ ᱠᱟᱨᱞᱟ ᱵᱷᱩᱸᱰᱤ ᱨᱚᱦᱚᱭ ᱠᱤᱫᱟᱹᱧ ᱠᱩᱸᱫᱽᱨᱤ ᱾
ᱟᱨᱦᱚᱸ ᱢᱮᱱᱟᱜ ᱟᱹᱞᱩ ᱯᱮᱭᱟᱸᱡᱽ ᱨᱟᱹᱥᱩᱸᱲ ᱟᱫᱟ
ᱥᱤᱡᱤᱱ ᱨᱮᱜᱮ ᱱᱚᱣᱟ ᱠᱚᱫᱚ ᱟᱱᱟᱡᱽ ᱛᱮᱜᱮᱢ ᱜᱟᱹᱫᱟ
ᱵᱟᱦᱟ ᱠᱩᱵᱤ ᱯᱚᱴᱚᱢ ᱠᱩᱵᱤ ᱟᱨᱦᱚᱸ ᱫᱟᱻ ᱠᱩᱵᱤ
ᱠᱩᱨᱩᱢᱩᱴᱩ ᱪᱷᱩᱴᱟᱹᱣᱜ ᱢᱮᱥᱮ ᱟᱞᱚᱢ ᱛᱟᱦᱮᱱ ᱦᱟᱹᱯᱤ ᱾
ᱯᱟᱞᱚᱝ ᱢᱩᱞᱟᱹ ᱠᱷᱚᱥᱞᱟ ᱜᱟᱺᱫᱷᱟᱹᱨᱤ ᱞᱮᱜᱮᱡ ᱞᱮᱜᱮᱡ ᱟᱲᱟᱜ
ᱧᱮᱞᱛᱮ ᱟᱫᱚ ᱠᱤᱨᱤᱧ ᱞᱟᱹᱜᱤᱫ ᱦᱚᱲ ᱠᱚ ᱦᱤᱡᱩᱜ ᱚᱲᱟᱜ
ᱥᱤᱫ ᱟᱹᱜᱩ ᱴᱟᱴᱠᱟ ᱟᱲᱟᱜ ᱡᱚᱢ ᱫᱚ ᱟᱹᱰᱤ ᱵᱩᱜᱤ
ᱞᱮᱜᱮᱡ ᱞᱮᱜᱮᱡ ᱥᱟᱜᱴᱮᱸᱱ ᱨᱟᱠᱟᱵ ᱚᱱᱟ ᱛᱮᱠᱚ ᱰᱩᱜᱤ
ᱪᱷᱩᱴᱟᱹᱣ ᱠᱚᱜ ᱟᱹᱧ ᱫᱤᱱ ᱜᱮ ᱵᱟᱹᱧ ᱯᱷᱟᱠᱤᱭᱟ ᱵᱤᱥᱤ
ᱤᱧ ᱧᱮᱞ ᱛᱮ ᱦᱚᱱ ᱠᱚ ᱢᱮᱱᱟ ᱟᱢ ᱜᱮ ᱠᱟᱱᱟᱢ ᱪᱟᱹᱥᱤ ᱾᱾
***
