ᱛᱳᱣᱟ ᱵᱟᱦᱟ, ᱵᱟᱦᱟ ᱠᱷᱚᱱᱟᱜ,
ᱛᱤᱨᱞᱟᱹ ᱦᱚᱯᱚᱱ, ᱠᱚᱲᱟᱢ ᱠᱷᱚᱱᱟᱜ,
ᱡᱮᱦᱮᱡᱚᱵᱮ ᱦᱤᱸᱡᱽᱨᱟᱹᱣ ᱟᱬᱜᱚᱱ,
ᱛᱳᱣᱟ ᱫᱟᱠᱟ ᱞᱤᱸᱡᱤ ᱟᱬᱜᱚᱱ ᱾
ᱜᱚᱴᱟ ᱧᱤᱫᱟᱹ ᱮ ᱩᱸᱫᱷᱤ ᱠᱚᱜᱼᱟ,
ᱜᱤᱫᱽᱨᱟᱹ ᱵᱩᱥᱟᱹᱜ ᱮ ᱞᱟᱴᱷᱟ ᱠᱚᱜᱼᱟ,
ᱮᱸᱜᱟᱛ ᱢᱚᱱᱮ, ᱫᱩᱞᱟᱹᱲ ᱥᱟᱨᱥᱟᱣᱜ ᱛᱟᱭ,
ᱵᱟᱞᱮ ᱨᱟᱜ ᱛᱮ, ᱢᱚᱱᱮ ᱵᱷᱩᱞᱟᱹᱣᱜ ᱛᱟᱭ ᱾
ᱪᱮᱫᱟᱜ ᱵᱟᱝ ᱮᱢ ᱵᱩᱡᱷᱟᱹᱣ ᱞᱮᱫᱼᱟ?
ᱮᱸᱜᱟᱛ ᱠᱟᱛᱷᱟ ᱵᱟᱝ ᱮᱢ ᱩᱭᱦᱟᱹᱨ ᱞᱮᱫᱼᱟ?
ᱮᱢᱟᱭᱟᱢ ᱡᱚᱢᱼᱧᱩ ᱨᱟᱵᱼᱠᱚᱴᱟᱵ,
ᱠᱟᱛᱷᱟᱢ ᱟᱸᱡᱚᱢᱟᱭ ᱪᱟᱹᱴᱤᱼᱪᱚᱠᱟᱜ,
ᱵᱟᱝ ᱮ ᱜᱟᱱ ᱮᱫ ᱪᱮᱫ ᱠᱚᱪᱚᱝ?
ᱠᱟᱛᱷᱟᱢ ᱚᱠᱛᱟᱭ ᱛᱟᱭ ᱟᱹᱰᱤ ᱜᱮᱪᱚᱝ ᱾
ᱵᱟᱝ ᱮ ᱥᱟᱦᱟᱣ ᱨᱮᱭᱟᱲᱼᱞᱚᱞᱚ,
ᱵᱟᱞᱮᱼᱵᱮᱨᱮᱞ ᱱᱟᱣᱟ ᱦᱚᱲᱢᱚ,
ᱦᱟᱸᱰᱮᱼᱱᱟᱰᱮ ᱦᱟᱹᱥᱩ ᱮ ᱦᱚᱲᱢᱚ,
ᱧᱟᱢᱚᱜ ᱠᱟᱱᱟ ᱟᱡᱟᱜ, ᱡᱚᱛᱚᱱ ᱦᱚᱲᱢᱚ ᱾
ᱪᱮᱫᱟᱜ ᱵᱟᱝ ᱮᱢ ᱛᱩᱱᱠᱷᱤ ᱞᱮᱫᱮᱭᱟ ?
ᱪᱮᱫᱟᱜ ᱢᱚᱱᱮᱼᱡᱤᱣᱤᱢ ᱠᱚᱥᱴᱚ ᱠᱮᱫᱼᱟ ?
ᱡᱤᱨᱟᱹᱣᱜ ᱥᱟᱱᱟᱭ, ᱞᱟᱸᱜᱟᱭ ᱵᱩᱡᱷᱟᱹᱣ,
ᱛᱚᱞᱥᱟᱝᱚᱜ ᱥᱟᱱᱟᱭ, ᱟᱸᱜᱟ ᱢᱟᱨᱥᱟᱞᱚᱜ ᱾
ᱠᱟᱹᱢᱤ ᱩᱭᱦᱟᱹᱨ ᱛᱮ, ᱜᱟᱨᱟᱫ ᱮᱢ ᱦᱚᱦᱚᱭ,
ᱟᱫᱚ ᱞᱟᱸᱜᱟ ᱜᱮ ᱵᱮᱨᱮᱫ ᱮ ᱵᱟᱹᱭᱼᱵᱟᱹᱭ ᱾
ᱵᱟᱝ ᱮᱢ ᱠᱷᱟᱹᱛᱤᱨᱟᱜ ᱟᱡᱟᱜ ᱫᱚᱥᱟ,
ᱞᱟᱹᱭ ᱟᱢ ᱨᱮ ᱠᱟᱛᱷᱟᱢ, ᱟᱡ ᱮᱢ ᱫᱚᱥᱮ,
ᱵᱟᱝᱪᱚᱝ ᱮᱢ ᱵᱩᱡᱷᱟᱹᱣ ᱞᱟᱡᱟᱣᱼᱥᱚᱨᱚᱢ!
ᱵᱟᱝᱪᱚᱝ ᱮᱢ ᱵᱩᱡᱷᱟᱹᱣ ᱞᱟᱡᱟᱣᱼᱥᱚᱨᱚᱢ ᱾
ᱪᱮᱫᱟᱜ ᱵᱟᱝ ᱮᱢ ᱟᱞᱟᱫ ᱞᱮᱫᱮᱭᱟ ?
ᱪᱮᱫᱟᱜ ᱵᱟᱝ ᱮᱢ ᱜᱚᱲᱚ ᱟᱫᱮᱭᱟ ?
ᱟᱢᱟᱜ ᱯᱟᱛᱚᱠ ᱟᱹᱭᱠᱟᱹᱣ ᱞᱮᱠᱟᱭ,
ᱨᱤᱥᱨᱤᱥᱮᱢ ᱠᱚᱭᱚᱜ, ᱵᱤᱸᱰᱩᱡ ᱟᱭ,
ᱦᱚᱲ ᱥᱟᱢᱟᱝ ᱠᱚᱨᱮ, ᱧᱮᱞ ᱚᱪᱚᱜ ᱟᱹᱰᱤ,
ᱜᱤᱫᱽᱨᱟᱹ ᱵᱩᱥᱟᱹᱜ ᱮᱢ ᱪᱟᱹᱯᱩᱼᱪᱮᱨᱮᱡ ᱵᱟᱹᱲᱛᱤ ᱾
ᱛᱤᱨᱞᱟᱹ ᱠᱟᱛᱮᱫ, ᱛᱤᱨᱞᱟᱹ ᱦᱚᱯᱚᱱ ᱠᱟᱛᱷᱟ,
ᱵᱟᱝ ᱮᱢ ᱩᱨᱩᱢ ᱞᱮᱫ, ᱪᱮᱫ ᱦᱚᱸ ᱠᱟᱛᱷᱟ,
ᱢᱚᱱᱮᱼᱡᱤᱣᱤ ᱨᱮ ᱵᱮᱥ ᱜᱮᱢ ᱟᱹᱭᱟᱹ ᱠᱮᱫ!!!
ᱟᱢ ᱢᱚᱱᱮ ᱛᱮᱫᱚ ᱯᱟᱞᱮᱱ, ᱥᱩᱦᱤ ᱜᱮᱢ ᱠᱟᱹᱢᱤ ᱠᱮᱫ!!!
ᱪᱮᱫᱟᱜ ᱵᱟᱝ ᱮᱢ ᱛᱮᱛᱷᱟ ᱞᱮᱫᱼᱟ ?
ᱪᱮᱫᱟᱜ ᱵᱟᱝ ᱮᱢ ᱵᱩᱡᱷᱟᱹᱣ ᱞᱮᱱᱟ ?
***
