ᱟᱹᱫᱤᱵᱟᱹᱥᱤ ᱡᱤᱭᱚᱱ ᱟᱹᱰᱤ ᱨᱤᱞᱟᱹᱢᱟᱞᱟ
ᱦᱮᱢᱟᱞ ᱵᱩᱨᱩ ᱱᱟᱹᱭ ᱱᱟᱞᱟ ᱫᱟᱜ ᱞᱮᱠᱟ ᱾
ᱞᱮᱜᱮᱢ ᱞᱮᱜᱮᱢ ᱞᱤᱸᱜᱤᱱ ᱠᱟᱱ ᱜᱮᱭᱟ
ᱨᱤᱞᱟᱹᱢᱟᱞᱟ ᱯᱤᱞᱪᱩ ᱛᱟᱹᱠᱤᱱᱟᱜ ᱥᱟᱶᱛᱟ ᱾
ᱟᱨᱡᱚ ᱯᱟᱴᱷᱟᱱ ᱢᱳᱜᱷᱚᱞ
ᱤᱝᱨᱟᱹᱡᱽ ᱠᱚ ᱪᱤᱭᱟᱹ ᱞᱮᱫ ᱜᱮᱭᱟ
ᱮᱱ ᱦᱚᱸ ᱵᱟᱝ ᱫᱷᱟᱹᱥᱩᱲ ᱟᱠᱟᱱᱟ
ᱯᱤᱞᱪᱩ ᱛᱟᱹᱠᱤᱱᱟᱜ ᱥᱟᱶᱛᱟ ᱾
ᱩᱢᱩᱞ ᱟᱠᱟᱫ ᱜᱮᱭᱟᱠᱤᱱ ᱦᱟᱸᱥ ᱦᱟᱹᱥᱞᱤ ᱪᱮᱬᱮ
ᱢᱮᱱᱟᱜ ᱜᱮᱭᱟ ᱛᱮᱨᱮᱞ ᱛᱟᱨᱚᱵ
ᱥᱟᱨᱡᱚᱢ ᱢᱟᱛᱠᱚᱢ ᱫᱟᱨᱮ ᱾
ᱢᱟᱨᱟᱝ ᱵᱩᱨᱩ ᱡᱟᱦᱮᱨ ᱟᱭᱳ ᱢᱚᱲᱮ ᱠᱚ ᱛᱩᱨᱩᱭ ᱠᱚ
ᱵᱤᱨ ᱫᱤᱥᱚᱢ ᱫᱚ ᱵᱮᱱᱟᱣ ᱞᱮᱫ ᱟᱠᱚ ᱾
ᱵᱮᱱᱟᱣ ᱟᱠᱟᱫ ᱟᱠᱚ ᱡᱟᱦᱮᱨ ᱫᱷᱚᱨᱚᱢ ᱜᱟᱲ
ᱚᱱᱟ ᱨᱮᱜᱮ ᱠᱷᱮᱨᱣᱟᱞ ᱥᱟᱶᱛᱟ ᱫᱚ ᱡᱤᱭᱟᱹᱲ ᱾
ᱛᱤᱸᱜᱩ ᱟᱠᱟᱫ ᱟᱠᱚ ᱥᱟᱶᱛᱟ ᱨᱮᱱᱟᱜ ᱠᱷᱟᱢ ᱠᱷᱩᱱᱴᱤ
ᱢᱟᱹᱡᱷᱤ ᱜᱳᱰᱮᱫ ᱱᱟᱭᱠᱮ ᱢᱚᱲᱮ ᱢᱟᱯᱟᱧᱡᱤ ᱾
ᱟᱛᱱᱟᱜ ᱛᱮᱨᱮᱞ ᱛᱟᱨᱚᱵ ᱥᱟᱨᱡᱚᱢ ᱢᱟᱛᱠᱚᱢ
ᱥᱟᱶᱨᱮ ᱛᱟᱦᱮᱱ ᱡᱚᱱᱚᱢ ᱢᱚᱨᱚᱱ ᱾
ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ ᱥᱟᱡᱟᱣ ᱫᱷᱟᱹᱨᱛᱤ
ᱚᱸᱰᱮ ᱜᱮᱵᱚ ᱛᱟᱦᱮᱱ ᱵᱷᱟᱜᱮ ᱟᱵᱚ ᱟᱹᱫᱤᱵᱟᱹᱥᱤ ᱾
ᱢᱟᱨᱟᱝ ᱵᱩᱨᱩ ᱪᱤᱭᱟᱹ ᱞᱮᱫᱟᱭ ᱵᱤᱨ ᱫᱤᱥᱚᱢ
ᱚᱸᱰᱮ ᱜᱮ ᱥᱟᱹᱨᱤ ᱟᱠᱟᱱᱟ ᱟᱵᱚᱣᱟᱜ ᱫᱷᱚᱨᱚᱢ ᱾
ᱟᱵᱚᱣᱟᱜ ᱟᱹᱭᱠᱟᱹᱣ, ᱟᱵᱚᱣᱟᱜ ᱯᱟᱹᱛᱭᱟᱹᱣ ᱾
ᱚᱸᱰᱮ ᱜᱮ ᱟᱵᱚᱣᱟᱜ ᱡᱟᱹᱛᱤ ᱥᱟᱶᱛᱟ ᱵᱚᱱ ᱥᱟᱡᱟᱣ,
ᱟᱵᱚᱣᱟᱜ ᱢᱚᱱᱮ ᱡᱤᱣᱤ ᱵᱚᱱ ᱨᱟᱹᱨᱟᱣ ᱾
ᱵᱮᱱᱟᱣ ᱟᱠᱟᱱᱟ ᱞᱟᱭ ᱞᱟᱠᱪᱟᱨ ᱟᱹᱨᱤᱪᱟᱹᱞᱤ,
ᱡᱤᱭᱟᱹᱲ ᱢᱮᱱᱟᱜ ᱜᱮᱭᱟ ᱠᱷᱮᱨᱣᱟᱞ ᱡᱟᱹᱛᱤ ᱾
ᱨᱚᱲ ᱞᱟᱸᱫᱟ ᱨᱟᱹᱥᱠᱟᱹ ᱛᱷᱩᱛᱤ,
ᱡᱟᱱᱟᱢ ᱯᱟᱹᱨᱥᱤ, ᱵᱚᱸᱜᱟ ᱵᱩᱨᱩ ᱟᱹᱨᱤ ᱾
ᱛᱚᱞ ᱟᱠᱟᱫᱟᱠᱚ ᱠᱷᱮᱨᱣᱟᱞ ᱡᱟᱹᱛᱤ,
ᱱᱟᱱᱟᱦᱩᱱᱟᱹᱨ ᱵᱟᱠᱷᱮᱬ ᱵᱤᱱᱛᱤ ᱾
ᱵᱮᱱᱟᱣ ᱟᱠᱟᱫᱟᱠᱚ ᱵᱤᱱ ᱥᱩᱛᱟᱹᱢ ᱜᱟᱞᱟᱝ ᱢᱟᱞᱟ,
ᱵᱟᱦᱟ ᱥᱚᱦᱨᱟᱭ ᱫᱟᱥᱟᱸᱭ ᱠᱟᱨᱟᱢ ᱨᱟᱦᱟ ᱾
ᱚᱱᱟᱛᱮ ᱛᱚ ᱠᱷᱮᱨᱣᱟᱞ ᱥᱟᱶᱛᱟ ᱡᱤᱭᱟᱹᱲ,
ᱱᱟᱶᱟ ᱛᱮ ᱟᱨ ᱦᱚᱸ ᱡᱤᱣᱤᱫ ᱨᱩᱣᱟᱹᱲ ᱾
ᱟᱨᱡᱚ ᱯᱟᱴᱷᱟᱱ ᱢᱳᱜᱷᱚᱞ ᱤᱝᱨᱟᱹᱡᱽ ᱟᱜ ᱦᱟᱹᱵᱩᱲ,
ᱵᱟᱠᱚ ᱫᱟᱲᱮ ᱞᱮᱫᱟ ᱠᱷᱮᱨᱣᱟᱞ ᱥᱟᱶᱛᱟ ᱫᱷᱟᱹᱥᱩᱲ ᱾
ᱪᱷᱤᱛᱟᱹ ᱠᱟᱹᱯᱨᱟᱹ ᱦᱤᱥᱤ ᱰᱩᱢᱱᱤ ᱫᱟᱹᱱᱜᱤ ᱯᱩᱲᱜᱤ,
ᱠᱷᱮᱨᱣᱟᱞ ᱥᱟᱶᱛᱟ ᱨᱮᱱ ᱫᱷᱚᱨᱚᱢ ᱨᱟᱹᱱᱤ ᱾
ᱵᱮᱱᱟᱣ ᱟᱠᱟᱫ ᱟᱠᱚ ᱵᱚᱸᱜᱟ ᱡᱟᱦᱮᱨ ᱛᱷᱟᱱ,
ᱨᱤᱞᱟᱹᱢᱟᱞᱟ ᱥᱟᱶᱛᱟ ᱡᱤᱭᱟᱹᱲ ᱾
ᱢᱟᱱᱟᱣ ᱟᱠᱚ ᱫᱷᱚᱨᱚᱢ ᱠᱚᱨᱚᱢ ᱱᱮᱢᱟᱪᱟᱨ,
ᱥᱟᱡᱟᱣ ᱟᱸᱥ ᱛᱮ ᱥᱩᱞᱩᱠ ᱥᱚᱝᱥᱟᱨ ᱾
ᱥᱟᱹᱜᱩᱱ ᱯᱮᱨᱮᱡ ᱞᱚᱴᱟ ᱫᱟᱜ ᱠᱚ ᱫᱚᱲᱚᱢ,
ᱥᱟᱨ ᱥᱟᱹᱜᱩᱱ ᱯᱮᱲᱟ ᱠᱚ ᱫᱟᱨᱟᱢ ᱾
ᱵᱮᱦᱟ ᱵᱟᱯᱞᱟ ᱥᱟᱹᱜᱩᱱ ᱠᱟᱹᱢᱤ ᱨᱮ,
ᱵᱮᱲᱟ ᱠᱚ ᱧᱮᱞᱮ ᱥᱮᱸᱜᱮᱞ ᱛᱤᱛᱤ ᱨᱮ ᱾
ᱫᱩᱲᱩᱵ ᱛᱤᱸᱜᱩ ᱨᱮ ᱥᱟᱹᱜᱩᱱ ᱛᱟᱵᱚᱱᱟ,
ᱵᱟᱨ ᱛᱤᱛᱮ ᱜᱟᱞᱟᱝ ᱠᱤᱛᱟᱹ ᱯᱟᱹᱴᱤᱭᱟᱹ ᱾
ᱫᱤᱥᱚᱢ ᱨᱮᱱ ᱢᱟᱹᱡᱷᱤ ᱢᱟᱯᱟᱧᱡᱤ,
ᱵᱟᱯᱞᱟ ᱨᱮ ᱛᱟᱦᱮᱱ ᱟᱠᱚ ᱨᱟᱡᱟᱨᱤ ᱥᱟᱹᱠᱷᱤ ᱾
ᱢᱟᱨᱟᱝ ᱵᱩᱨᱩ ᱡᱟᱦᱮᱨ ᱟᱭᱳ ᱢᱚᱲᱮ ᱛᱩᱨᱩᱭ ᱠᱚ,
ᱵᱮᱦᱟ ᱵᱟᱯᱞᱟ ᱠᱚ ᱥᱟᱨ ᱥᱟᱹᱜᱩᱱ ᱠᱚ ᱾
ᱟᱵᱚᱣᱟᱜ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ,
ᱡᱚᱨ ᱡᱚᱜᱟᱣ ᱟᱵᱚ ᱜᱷᱟᱹᱲᱤ ᱜᱷᱟᱹᱲᱤ ᱾
ᱪᱟᱹᱛ ᱵᱟᱹᱭᱥᱟᱹᱠᱷ ᱛᱮᱨᱮᱞ ᱛᱟᱨᱚᱵ ᱡᱚ ᱵᱮᱞᱮ,
ᱟᱥᱟᱲ ᱥᱟᱱ ᱩᱫ ᱯᱩᱴᱠᱟᱹ ᱥᱚᱲᱮ ᱾
ᱵᱷᱟᱫᱚᱨ ᱫᱟᱥᱟᱸᱭ ᱥᱟᱝ ᱵᱟᱶᱞᱟ ᱛᱮᱠᱮ,
ᱡᱚᱢ ᱠᱟᱛᱮ ᱵᱚ ᱛᱟᱦᱮᱱ ᱪᱮᱦᱮ ᱵᱚᱡᱮ ᱾
ᱱᱤᱛ ᱥᱚᱵᱷᱚᱛᱥ ᱫᱚᱨᱯᱤ ᱥᱟᱨᱛᱷᱚᱵᱟᱫᱤ,
ᱱᱟᱥᱟᱣ ᱞᱟᱹᱜᱤᱫ ᱠᱷᱮᱨᱣᱟᱞ ᱡᱟᱹᱛᱤ,
ᱱᱚᱡᱚᱨ ᱠᱟᱣᱫᱟᱠᱚ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ,
ᱵᱟᱲᱜᱮ ᱵᱷᱤᱴᱟᱹ ᱦᱟᱥᱟ ᱡᱚᱢᱤ ᱾
ᱵᱮᱱᱟᱣ ᱞᱟᱹᱜᱤᱫ ᱱᱟᱱᱟ ᱦᱩᱱᱟᱹᱨ ᱯᱨᱚᱠᱚᱞᱯᱚ,
ᱢᱚᱱᱮ ᱮᱫ ᱵᱚᱱᱟᱠᱚ ᱟᱠᱚᱣᱟᱜ ᱯᱳᱱᱱᱚ ᱾
ᱵᱮᱱᱟᱣ ᱮᱫᱟᱠᱚ ᱢᱚᱱᱫᱤᱨ ᱢᱚᱥᱡᱤᱫᱽ,
ᱨᱟᱹᱯᱩᱫ ᱮᱫᱟᱠᱚ ᱠᱷᱮᱨᱣᱟᱞ ᱡᱩᱢᱤᱫᱽ ᱾
ᱨᱟᱡᱟᱨᱤ ᱨᱟᱯᱟᱪᱟᱜ ᱠᱷᱟᱹᱛᱤᱨ,
ᱟᱵᱚ ᱪᱷᱤᱛᱤᱨ ᱵᱤᱛᱤᱨ ᱾
ᱚᱱᱮ ᱧᱮᱞᱚᱜ ᱠᱟᱱ ᱡᱟᱦᱮᱨ ᱛᱷᱟᱱ,
ᱚᱸᱰᱮ ᱱᱤᱛ ᱵᱟᱹᱭᱨᱤ ᱠᱚ ᱠᱷᱤᱞᱰᱩ ᱮᱱᱮᱡ ᱠᱟᱱ ᱾
ᱨᱟᱹᱯᱩᱫ ᱮᱫᱟᱠᱚ ᱡᱟᱦᱮᱨ ᱛᱷᱟᱱ,
ᱵᱮᱱᱟᱣ ᱞᱟᱹᱜᱤᱫ ᱠᱚᱭᱞᱟ ᱠᱷᱟᱫᱟᱱ ᱾
ᱟᱫᱚᱜᱼᱟ ᱢᱟᱹᱡᱷᱤ ᱛᱷᱟᱱ,
ᱫᱟᱯᱟᱞᱚᱜᱼᱟ ᱠᱷᱮᱨᱣᱟᱞ ᱱᱟᱜᱟᱢ ᱾
ᱡᱤᱵᱽ ᱡᱤᱭᱟᱹᱞᱤ ᱵᱟᱠᱚ ᱧᱮᱞᱚᱜ ᱠᱟᱱ,
ᱵᱤᱨ ᱵᱩᱨᱩ ᱩᱡᱟᱹᱲ ᱪᱟᱵᱟᱜ ᱠᱟᱱ ᱾
ᱦᱤᱲᱤᱧᱚᱜᱼᱟ ᱟᱫᱚ ᱵᱩᱠᱟᱹ ᱛᱚᱯᱟ ᱴᱷᱟᱶ,
ᱚᱠᱚᱭ ᱵᱟᱰᱟᱭ ᱛᱟᱦᱮᱱ ᱟᱵᱚ ᱚᱠᱚᱭ ᱥᱟᱶ ᱾
ᱵᱟᱹᱱᱩᱜ ᱱᱤᱥᱟᱱ, ᱵᱟᱹᱱᱩᱜ ᱴᱷᱤᱠᱟᱹᱱ,
ᱵᱟᱝ ᱧᱮᱞᱚᱜ ᱠᱟᱱ ᱛᱟᱦᱮᱱ ᱴᱷᱤᱠᱟᱹᱱ ᱾
ᱚᱠᱚᱭ ᱚᱠᱟ ᱠᱚᱨᱮ ᱪᱚᱵᱚ ᱢᱟᱰᱨᱟᱣᱜ,
ᱵᱟᱧᱪᱟᱣᱜ ᱞᱟᱹᱜᱤᱫ ᱡᱤᱭᱚᱱ ᱠᱷᱟᱸᱰᱟᱣ ᱾
ᱦᱤᱲᱤᱧᱚᱜ ᱟᱫᱚ ᱥᱮᱨᱮᱧ ᱫᱩᱨᱟᱹᱝ,
ᱛᱤᱨᱭᱚ ᱚᱨᱚᱝ ᱥᱟᱠᱣᱟ ᱚᱨᱚᱝ ᱾
ᱥᱟᱯᱟᱵ ᱛᱤ ᱟᱲᱟᱜ ᱠᱟᱛᱮ,
ᱮᱱᱮᱡ ᱚᱪᱚ ᱵᱚᱱᱟᱠᱚ ᱛᱤ ᱛᱩᱞ ᱠᱟᱛᱮ ᱾
ᱞᱟᱫᱮ ᱟᱵᱚᱱᱟ ᱟᱠᱚᱣᱟᱜ ᱫᱷᱚᱨᱚᱢ,
ᱟᱫᱽ ᱟᱵᱚ ᱟᱫᱚ ᱟᱵᱚᱣᱟᱜ ᱳᱯᱨᱳᱢ ᱾
ᱟᱫᱽ ᱟᱵᱚ ᱡᱟᱱᱟᱢ ᱯᱟᱹᱨᱥᱤ,
ᱞᱟᱹᱭ ᱞᱟᱠᱪᱟᱨ ᱟᱹᱨᱤᱪᱟᱹᱞᱤ ᱾
ᱱᱤᱞᱟᱹᱢᱚᱜ ᱠᱟᱱ ᱫᱮᱣᱪᱟ ᱯᱟᱪᱟᱢᱤ,
ᱥᱩᱛᱟᱹᱱ ᱴᱟᱺᱰᱤ, ᱥᱤᱛᱟᱹ ᱱᱟᱞᱟ ᱰᱟᱹᱰᱤ ᱥᱚᱱᱟᱡᱷᱩᱨᱤ ᱾
ᱪᱮᱞᱟ ᱠᱚ ᱡᱩᱣᱟᱹᱱ ᱮᱵᱷᱮᱱᱚᱜ ᱯᱮ,
ᱛᱤᱸᱜᱩᱱ ᱟᱵᱚ ᱫᱮᱞᱟ ᱡᱩᱢᱤᱫᱽ ᱠᱟᱛᱮ ᱾
ᱵᱟᱧᱪᱟᱣ ᱟᱵᱚ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ,
ᱵᱟᱧᱪᱟᱣ ᱟᱵᱚ ᱟᱹᱛᱩ ᱰᱤ ᱾
ᱟᱵᱚᱣᱟᱜ ᱡᱟᱦᱮᱨ ᱡᱟᱱᱛᱟᱨ ᱢᱟᱱᱛᱟᱨ,
ᱵᱟᱧᱪᱟᱣ ᱞᱟᱹᱜᱤᱫ ᱢᱮᱱᱟᱜ ᱛᱟᱵᱚ ᱟᱹᱭᱫᱟᱹᱨ ᱾
ᱫᱮᱞᱟ ᱛᱟᱦᱮᱱ ᱟᱵᱚ ᱥᱟᱶ ᱥᱟᱶ,
ᱡᱩᱢᱤᱫᱽ ᱠᱟᱛᱮ ᱡᱤᱭᱚᱱ ᱵᱚ ᱠᱷᱟᱸᱰᱟᱣ ᱾
***
