ᱱᱚᱣᱟ ᱢᱟᱹᱱᱢᱤ ᱡᱤᱭᱚᱱ ᱨᱮ ᱵᱩᱜᱤ ᱵᱟᱹᱲᱤᱡ ᱫᱩᱠ ᱥᱩᱠ ᱫᱤᱱᱟᱹᱢ ᱜᱮ ᱞᱮᱛᱟᱲ ᱛᱚᱸᱜᱮ ᱛᱟᱦᱮᱸᱱᱟ ᱾ ᱢᱮᱱᱠᱷᱟᱱ ᱟᱨ ᱦᱚᱸ ᱚᱱᱟ ᱥᱟᱶᱨᱮ ᱦᱚᱲᱢᱚᱨᱮ ᱟᱨ ᱢᱚᱱᱮᱨᱮ ᱨᱟᱹᱜᱤ ᱦᱚᱸ ᱛᱟᱦᱮᱸᱱᱟ ᱾ ᱨᱟᱹᱜᱤ ᱫᱚ ᱥᱚᱝᱥᱟᱨ ᱨᱮᱱᱟᱜ ᱠᱟᱛᱷᱟ ᱞᱮᱠᱟᱛᱮ ᱦᱩᱭᱩᱜᱼᱟ ᱟᱵᱚ ᱥᱟᱱᱟᱢ ᱢᱟᱹᱱᱢᱤ ᱟᱨᱵᱟᱝ ᱦᱚᱲ ᱴᱷᱮᱱ ᱜᱮ ᱥᱟᱨᱥᱟᱣᱜᱼᱟ ᱾
ᱨᱟᱹᱜᱤ ᱫᱚ ᱢᱤᱫ ᱢᱚᱦᱰᱟ ᱜᱮ ᱨᱟᱹᱜᱤ ᱞᱮᱱᱠᱷᱟᱱ ᱟᱹᱰᱤ ᱜᱮ ᱠᱷᱟᱨᱟᱯᱟ ᱾ ᱢᱤᱫ ᱢᱚᱦᱰᱟ ᱨᱟᱹᱜᱤ ᱞᱮᱱᱠᱷᱟᱱ ᱡᱟᱦᱟᱸᱭ ᱦᱚᱲ ᱥᱟᱶ ᱟᱨᱵᱟᱝ ᱚᱲᱟᱜ ᱦᱚᱲ ᱥᱟᱶ ᱛᱤᱱᱟᱹᱜ ᱮ ᱨᱟᱹᱜᱤᱜᱼᱟ ᱢᱤᱫ ᱦᱚᱲ ᱛᱤᱱᱟᱹᱜ ᱮ ᱨᱚᱦᱮᱫᱟ ᱟᱨᱵᱟᱝ ᱮ ᱮᱜᱮᱨᱟ ᱩᱱᱤ ᱦᱚᱲ ᱫᱚ ᱛᱟᱹᱦᱩᱸ ᱠᱮ ᱛᱟᱹᱦᱩᱸ ᱨᱟᱹᱜᱤ ᱫᱚ ᱵᱟᱹᱲᱛᱤ ᱤᱫᱤᱜ ᱛᱟᱭᱟ ᱾ ᱟᱨ ᱩᱱᱤ ᱨᱟᱹᱜᱤ ᱟᱠᱟᱣᱫᱮ ᱦᱚᱲ ᱪᱮᱛᱟᱱ ᱨᱮ ᱛᱟᱹᱦᱩᱸ ᱠᱮ ᱛᱟᱹᱦᱩᱸᱭ ᱨᱚᱦᱮᱫ ᱮᱜᱮᱨ ᱮᱭᱟ ᱾ ᱪᱮᱫ ᱜᱮᱭ ᱧᱟᱢᱟ, ᱚᱱᱟ ᱛᱮᱜᱮᱭ ᱫᱟᱞᱮᱭᱟ ᱾ ᱦᱟᱯᱟᱭ ᱧᱟᱢᱟ ᱦᱟᱯᱟ ᱟᱨᱵᱟᱝ ᱨᱚᱰ ᱢᱮᱬᱦᱮᱫ ᱮ ᱧᱟᱢᱟ ᱚᱱᱟᱛᱮ ᱟᱨ ᱠᱩᱰᱤ, ᱠᱟᱹᱴᱨᱤ, ᱵᱤᱱᱴᱷᱤ, ᱴᱷᱮᱸᱜᱟ ᱪᱮᱫ ᱜᱮᱭ ᱦᱟᱹᱨ ᱧᱟᱢᱟ ᱚᱱᱟ ᱛᱮᱜᱮ ᱟᱡᱟᱜ ᱢᱚᱱᱮ ᱟᱹᱣᱨᱤ ᱢᱟᱱᱟᱣᱜ ᱵᱷᱩᱨ ᱨᱟᱹᱜᱤ ᱟᱹᱣᱨᱤ ᱠᱚᱢᱚᱜ ᱫᱷᱟᱹᱵᱤᱡ ᱜᱮᱭ ᱫᱟᱞᱮ ᱠᱟᱱᱟ ᱟᱹᱣᱨᱤ ᱫᱟᱞ ᱵᱷᱟᱜᱟᱣᱜ ᱫᱷᱟᱹᱵᱤᱡ ᱾
ᱟᱨ ᱤᱱᱟᱹᱜ ᱛᱮ ᱩᱱᱤ ᱫᱟᱞ ᱚᱪᱚᱜ ᱠᱟᱱ ᱦᱚᱲᱟᱜ ᱚᱵᱚᱥᱛᱟ ᱛᱤᱱᱟᱹᱜ ᱪᱮᱫ ᱪᱤᱠᱟᱹᱜ ᱠᱟᱱᱟ ᱚᱱᱟ ᱫᱚ ᱵᱟᱭ ᱩᱭᱦᱟᱹᱨᱟ ᱾ ᱛᱤ ᱡᱟᱸᱜᱟ ᱨᱟᱹᱯᱩᱫᱚᱜ ᱠᱟᱱᱟ ᱥᱮ ᱵᱚᱦᱚᱜ ᱯᱚᱥᱟᱜᱚᱜ ᱠᱟᱱᱟ ᱥᱮ ᱡᱤᱣᱤ ᱜᱮ ᱪᱟᱞᱟᱜ ᱠᱟᱱ ᱛᱟᱭᱟ ᱚᱱᱟ ᱫᱚ ᱠᱟᱹᱴᱤᱡ ᱦᱚᱸ ᱵᱟᱭ ᱩᱭᱦᱟᱹᱨ ᱟᱹᱪᱩᱨᱟ ᱟᱨ ᱨᱟᱹᱜᱤ ᱦᱚᱸ ᱵᱟᱭ ᱫᱟᱵᱚᱱ ᱮᱫ ᱛᱟᱭᱟ ᱾
ᱚᱱᱠᱟ ᱜᱮ ᱟᱨ ᱦᱚᱸ ᱚᱠᱚᱭ ᱫᱚ ᱨᱟᱹᱜᱤ ᱛᱮ ᱚᱲᱟᱜ ᱨᱮᱱᱟᱜ ᱡᱟᱭ ᱡᱤᱱᱤᱥ ᱠᱚᱫᱚᱭ ᱫᱟᱞ ᱨᱟᱹᱯᱩᱫᱮᱜᱼᱟ ᱾ ᱥᱟᱢᱴᱟᱣ ᱥᱟᱹᱶᱛᱤ ᱡᱤᱱᱤᱥ ᱠᱚᱦᱚᱸᱭ ᱪᱟᱯᱟᱫ ᱛᱩᱫ ᱜᱤᱰᱤ ᱠᱟᱜ ᱠᱟᱱᱟ ᱟᱨ ᱟᱭᱳ ᱵᱟᱵᱟ, ᱱᱤᱡᱚᱨ ᱵᱚᱭᱦᱟ, ᱢᱤᱥᱨᱟ, ᱜᱤᱫᱽᱨᱟᱹ ᱠᱚᱦᱚᱸ ᱵᱟᱭ ᱪᱤᱱᱦᱟᱹᱣ ᱮᱫ ᱠᱚᱣᱟ ᱾ ᱟᱨ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱫᱤᱱᱟᱹᱢ ᱜᱮ ᱠᱟᱹᱴᱤᱡ ᱠᱟᱹᱴᱤᱡ ᱠᱟᱛᱷᱟ ᱨᱮᱜᱮ ᱢᱟᱨᱟᱝᱚᱜᱼᱟ ᱾ ᱚᱠᱚᱭ ᱜᱮᱢ ᱵᱩᱡᱷᱟᱹᱣ ᱟᱭᱟ, ᱩᱱᱤᱜᱮᱭ ᱨᱟᱹᱜᱤ ᱟᱭᱟ ᱾ ᱚᱠᱚᱭ ᱜᱮ ᱫᱟᱞᱮ ᱠᱟᱱ ᱦᱚᱲ ᱴᱷᱮᱱ ᱫᱟᱭᱟ ᱧᱮᱞᱛᱮ ᱫᱩᱫᱩᱜ ᱮ ᱪᱟᱞᱟᱜᱼᱟ ᱩᱱᱤᱜᱮᱭ ᱫᱟᱞ ᱚᱪᱚᱜᱼᱟ ᱾
ᱟᱫᱚ ᱚᱱᱟ ᱠᱷᱟᱹᱛᱤᱨ ᱨᱟᱹᱜᱤ ᱟᱠᱟᱱ ᱦᱚᱲ ᱫᱚ ᱚᱦᱚᱜᱮᱢ ᱵᱩᱡᱷᱟᱹᱣ ᱚᱪᱚ ᱠᱮᱭᱟ ᱾ ᱱᱤᱡᱮ ᱜᱮ ᱥᱟᱦᱟᱨᱮ ᱛᱟᱦᱮᱸᱱ ᱢᱮ ᱾ ᱟᱫᱚ ᱚᱱᱟ ᱠᱟᱛᱷᱟ ᱜᱮ ᱞᱟᱹᱭ ᱞᱮᱠᱷᱟᱱ ᱫᱚ ᱨᱟᱹᱜᱤ ᱫᱚ ᱱᱤᱡᱚᱨᱟᱜ ᱡᱤᱣᱤ ᱟᱛᱢᱟ ᱨᱮ ᱟᱹᱰᱤ ᱵᱟᱹᱲᱛᱤ ᱜᱮ ᱵᱩᱡᱷᱟᱹᱣᱜᱼᱟ ᱾ ᱤᱠᱷᱟᱹᱱ ᱩᱱᱟᱹᱝ ᱵᱟᱝ ᱟᱲᱟᱜ ᱜᱤᱰᱤ ᱠᱟᱛᱮ ᱱᱤᱡᱮ ᱛᱮᱜᱮ ᱨᱟᱹᱜᱤ ᱟᱠᱟᱱ ᱢᱚᱱᱮ ᱡᱤᱣᱤ ᱫᱚ ᱱᱮᱢᱚᱥ ᱨᱩᱣᱟᱹᱲ ᱞᱟᱹᱠᱛᱤᱜ ᱠᱟᱱᱟ ᱾ ᱟᱨ ᱵᱟᱝᱠᱷᱟᱱ ᱨᱟᱹᱜᱤ ᱛᱮ ᱪᱮᱫ ᱪᱚ ᱪᱮᱫ ᱢᱤᱫ ᱜᱷᱟᱹᱲᱤᱡ ᱨᱮ ᱪᱤᱠᱟᱹᱜᱼᱟ, ᱱᱤᱡᱚᱨᱟᱜ ᱜᱮ ᱞᱚᱥ ᱫᱚ ᱦᱩᱭᱩᱜᱼᱟ ᱾
ᱚᱱᱮᱛᱮᱹᱧ ᱢᱮᱱᱟ ᱵᱟᱹᱲᱛᱤ ᱨᱟᱹᱜᱤ ᱫᱚ ᱪᱮᱫ ᱦᱚᱸ ᱵᱟᱭ ᱠᱟᱹᱢᱤᱭᱟ ᱾ ᱨᱟᱹᱜᱤ ᱵᱮᱲᱟᱨᱮ ᱩᱭᱦᱟᱹᱨ ᱵᱚᱫᱚᱞ ᱜᱮ ᱱᱟᱯᱟᱭᱟ ᱾
***
***
