ᱱᱟᱶᱟ ᱫᱤᱞᱞᱤ
ᱦᱩᱞᱟᱹ ᱪᱟᱢᱠᱟ ᱜᱚᱴᱟ ᱨᱚᱲᱛᱮ, ᱱᱚᱣᱟ ᱠᱟᱛᱷᱟ
ᱢᱟᱱᱟᱣ ᱮᱫ ᱡᱮᱜᱮᱛ, ᱛᱤᱨᱞᱟᱹ ᱢᱟᱦᱟᱸ
ᱴᱤᱼᱵᱷᱤ, ᱢᱳᱵᱟᱭᱤᱞ ᱜᱚᱴᱟ ᱮᱯᱷᱼᱮᱢ ᱨᱮᱰᱤᱭᱳ ᱠᱚᱨᱮ
ᱛᱤᱨᱞᱟᱹ ᱧᱩᱛᱩᱢ, ᱥᱮᱨᱮᱧ ᱟᱸᱡᱚᱢᱚᱜ, ᱨᱟᱹᱦᱱᱤ ᱨᱟᱦᱟ ᱾
ᱛᱤᱨᱞᱟᱹ ᱵᱟᱠᱷᱨᱟ, ᱞᱟᱹᱠᱛᱤ ᱦᱩᱱᱟᱹᱝ, ᱡᱟᱦᱟᱸ ᱠᱟᱹᱢᱤ
ᱚᱱᱟ ᱠᱟᱹᱢᱤ ᱠᱷᱚᱱ ᱵᱚ, ᱥᱟᱦᱟᱜ ᱠᱟᱱᱟ
ᱡᱟᱦᱟᱸᱭ ᱡᱟᱱᱟᱢ ᱟᱭᱳ, ᱟᱢ ᱮ ᱡᱟᱱᱟᱢ ᱞᱮᱫ ᱢᱮ
ᱫᱮᱭᱟᱭᱮ ᱠᱟᱱᱟᱢ ᱢᱮᱱᱛᱮ, ᱵᱟᱵᱚ ᱞᱟᱦᱟᱜ ᱠᱟᱱᱟ ᱾
ᱫᱷᱚᱨᱚᱢ ᱟᱭᱳ, ᱡᱟᱦᱟᱸᱭ ᱥᱤᱥᱤᱨᱡᱟᱹᱣᱤᱡ
ᱩᱱᱤ ᱩᱯᱩᱨᱩᱢ ᱛᱟᱭ, ᱟᱡᱟᱜ ᱢᱟᱨᱟᱝ ᱫᱮᱣᱟ
ᱨᱩᱯ ᱛᱟᱭ ᱵᱷᱮᱜᱟᱨᱼᱵᱷᱮᱜᱟᱨ, ᱨᱟᱯ ᱛᱟᱭ ᱥᱟᱱᱟᱢ ᱯᱟᱲᱟ
ᱧᱟᱢ ᱟᱭ ᱵᱚᱸᱜᱟ ᱵᱳᱨᱳ ᱩᱱᱤ, ᱫᱮᱣᱟ ᱥᱮᱵᱟ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱢᱟ, ᱵᱩᱨᱩ ᱟᱢ ᱠᱚ, ᱵᱚᱸᱜᱟ ᱞᱮᱠᱟ
ᱵᱩᱡᱷᱟᱹᱣ ᱢᱤᱢᱤᱫ ᱫᱷᱟᱣ ᱫᱚ, ᱧᱮᱞ ᱚᱪᱚ ᱞᱮᱠᱟ
ᱥᱟᱹᱨᱤᱛᱮ ᱦᱩᱱᱟᱹᱝ, ᱮᱢᱟᱭ ᱮᱢ, ᱢᱟᱹᱱ ᱢᱟᱱᱚᱛ
ᱠᱷᱟᱹᱞᱤᱼᱠᱷᱟᱹᱞᱤ ᱛᱮ, ᱵᱮᱧᱪᱚᱜᱚᱜ ᱪᱮᱠᱟ ᱾
ᱥᱮᱪᱮᱫ ᱠᱟᱛᱮ ᱪᱮᱫ, ᱧᱟᱢᱚᱜ, ᱥᱟᱹᱨᱤ
ᱚᱞᱚᱜ ᱟᱥᱲᱟ, ᱵᱟᱢ ᱵᱷᱮᱡᱟᱭᱮ
ᱡᱩᱣᱟᱹᱱ ᱮᱱ ᱠᱷᱟᱱ, ᱵᱟᱯᱞᱟ ᱞᱟᱹᱜᱤᱫ
ᱦᱚᱨᱚ ᱵᱚᱨᱚ, ᱟᱲᱟᱜ ᱥᱟᱠᱟᱢ ᱞᱮᱠᱟᱢ, ᱠᱷᱮᱡᱟᱭᱮ ᱾
ᱛᱟᱦᱮᱸ ᱮᱱ ᱠᱷᱟᱱ, ᱰᱟᱺᱜᱩᱣᱟᱹ ᱛᱮ ᱱᱟᱥᱮ
ᱢᱮᱱᱟᱢ ᱚᱲᱟᱜ ᱨᱮ ᱱᱩᱭ ᱫᱚ ᱵᱳᱡᱽ
ᱱᱟᱥᱮ ᱠᱟᱛᱷᱟ ᱨᱮᱢ ᱨᱚᱲ ᱦᱟᱹᱥᱩ ᱟᱭ
ᱪᱟᱫᱟᱜ ᱪᱚ, ᱵᱟᱢ ᱪᱷᱤᱸᱰᱟᱹᱣᱜ ᱠᱟᱱ ᱜᱚᱡ ᱾
ᱛᱤᱨᱞᱟᱹ ᱢᱟ ᱫᱤᱱ ᱜᱮ, ᱠᱟᱹᱢᱤ ᱟᱠᱟᱭ ᱛᱟᱦᱮᱱ
ᱚᱲᱟᱜ ᱫᱩᱣᱟᱹᱨ, ᱡᱚᱛᱚᱱ, ᱫᱚᱦᱚᱭ ᱮ ᱥᱟᱢᱴᱟᱣ
ᱥᱮᱛᱟᱜ ᱠᱷᱚᱱ ᱟᱹᱣᱨᱤ, ᱞᱟᱸᱜᱟ, ᱡᱟᱹᱯᱤᱫ, ᱫᱷᱟᱹᱨᱤᱡ
ᱪᱷᱩᱴᱟᱹᱣ ᱠᱚᱜᱼᱟᱭ, ᱚᱲᱟᱜ ᱦᱚᱲ ᱞᱟᱹᱜᱤᱫ ᱞᱟᱲᱟᱣ ᱾
ᱦᱤᱡᱩᱜ ᱥᱮᱱᱚᱜ, ᱦᱚᱨ ᱵᱤᱨ ᱛᱮ ᱮᱠᱞᱟ
ᱟᱡ ᱫᱚ ᱫᱤᱱ ᱜᱮ, ᱵᱚᱸᱜᱟᱼᱵᱳᱨᱳ ᱦᱤᱨᱞᱟᱹ
ᱱᱚᱛᱮ ᱫᱚ ᱜᱚᱴᱟᱢ, ᱨᱚᱲ ᱡᱚᱝ ᱠᱟᱱ
ᱡᱮᱜᱮᱛ ᱨᱮ, ᱱᱤᱨᱟᱹᱭ ᱢᱮᱱᱟᱜ ᱠᱚ ᱛᱤᱨᱞᱟᱹ ᱾
ᱛᱤᱨᱞᱟᱹ ᱜᱮ, ᱟᱭᱳ, ᱦᱟᱛᱚᱢ, ᱢᱟᱹᱢᱤ, ᱠᱟᱹᱠᱤ
ᱩᱱᱤ ᱜᱮ ᱦᱤᱞᱤ, ᱢᱤᱥᱮᱨᱟ, ᱵᱷᱟᱹᱜᱽᱱᱤ, ᱦᱚᱯᱚᱱ ᱮᱨᱟ
ᱚᱯᱷᱤᱥ, ᱠᱟᱨᱵᱟᱨ, ᱯᱮᱲᱟ ᱯᱚᱨᱵᱷᱩ ᱟᱡ ᱜᱮ, ᱧᱮᱞ ᱠᱚ
ᱩᱱᱤ ᱴᱷᱮᱱ ᱜᱮ, ᱡᱚᱛᱚ ᱚᱲᱟᱜ ᱦᱚᱲᱟᱜ ᱟᱥᱨᱟ ᱾
ᱡᱟᱦᱟᱸ ᱛᱤᱱᱟᱹᱜ, ᱫᱩᱠᱷ ᱠᱚᱥᱴᱚ, ᱦᱟᱨᱠᱮᱛ ᱜᱮ
ᱟᱡᱨᱮ ᱛᱟᱭ ᱢᱮᱱᱟᱜ, ᱡᱚᱛᱚ ᱫᱟᱲᱮ ᱥᱟᱦᱟᱣ
ᱟᱡ ᱵᱟᱭ ᱡᱚᱢ, ᱢᱟᱬᱟᱝ, ᱦᱚᱲ ᱮ ᱮᱢᱟᱠᱚ
ᱞᱟᱸᱫᱟ ᱟᱛᱮ, ᱚᱲᱟᱜ ᱦᱚᱲᱟᱜ ᱡᱚᱛᱚ ᱠᱩᱠᱢᱩ, ᱯᱩᱨᱟᱹᱣ ᱾
ᱮᱱᱛᱮ ᱨᱮᱦᱚᱸ, ᱢᱟᱹᱱ ᱥᱚᱢᱟᱱ, ᱦᱚᱠ ᱟᱹᱭᱫᱟᱹᱨ, ᱩᱠᱩᱨᱟᱱ ᱟᱫᱚ
ᱛᱤᱨᱞᱟᱹ ᱟᱜ ᱢᱮᱫ ᱠᱷᱚᱱ, ᱫᱤᱱ ᱜᱮ ᱡᱚᱨᱚᱜ ᱠᱟᱱᱟ ᱢᱮᱫ ᱫᱟᱜ
ᱛᱤᱨᱞᱟᱹ ᱢᱟᱦᱟᱸ ᱦᱚᱸ, ᱠᱷᱟᱹᱞᱤ ᱢᱤᱫ ᱫᱤᱱ ᱞᱟᱹᱜᱤᱫ ᱜᱮ
ᱛᱚᱵᱮ ᱫᱤᱱ ᱫᱚ ᱵᱟᱵᱚ ᱢᱟᱱᱟᱣ ᱮᱫ ᱪᱮᱫᱟᱜ ?
***
