ᱥᱮᱛᱟᱜ ᱥᱤᱢᱨᱟᱜ ᱟᱸᱜᱟ ᱛᱚᱨᱟ
ᱡᱟᱹᱯᱤᱫ ᱮᱵᱷᱮᱱ ᱪᱮᱬᱮ ᱪᱤᱯᱨᱩᱜ
ᱥᱮᱨᱮᱧ ᱛᱩᱞᱩᱡ ᱪᱮᱨᱚᱵᱮᱨᱚ ᱠᱚ ᱪᱚᱦᱚᱲᱟ
ᱡᱮᱡᱷᱟᱨ ᱪᱟᱨᱟ ᱵᱚᱱ ᱥᱮᱸᱫᱽᱨᱟᱭ ᱵᱤᱨ ᱵᱩᱨᱩ ᱾
ᱮᱵᱷᱮᱱᱚᱜ ᱯᱮ ᱮᱵᱷᱮᱱᱚᱜ ᱯᱮ ᱥᱟᱱᱟᱢ ᱠᱚ
ᱡᱟᱹᱯᱤᱫ ᱦᱮᱞᱠᱚᱢ ᱟᱫᱚ ᱵᱟᱝ ᱵᱚᱱ ᱛᱟᱦᱮᱸᱱ
ᱠᱩᱨᱩᱢᱩᱴᱩ ᱭᱟᱵᱚᱱ ᱫᱮᱜᱳ ᱚᱲᱟᱜ ᱠᱟᱹᱢᱤ
ᱚᱠᱛᱚ ᱨᱮᱜᱮ ᱠᱟᱹᱢᱤᱜ ᱥᱟᱱᱟᱢ ᱠᱟᱹᱢᱤ ᱾
ᱥᱮᱛᱟᱜ ᱨᱮᱱᱟᱜ ᱠᱟᱹᱢᱤ ᱥᱮᱛᱟᱜ ᱨᱮᱜᱮ
ᱛᱤᱠᱤᱱ ᱨᱮᱱᱟᱜ ᱠᱟᱹᱢᱤ ᱛᱤᱠᱤᱱ ᱨᱮᱜᱮ
ᱚᱠᱟ ᱠᱟᱹᱢᱤ ᱚᱠᱟ ᱚᱠᱛᱚ ᱦᱩᱭᱩᱜ
ᱚᱱᱟ ᱚᱠᱛᱚ ᱫᱚ ᱚᱱᱟ ᱜᱮᱵᱚᱱ ᱠᱟᱹᱢᱤ ᱾
ᱵᱟᱝ ᱯᱚᱞᱚᱢ ᱠᱟᱛᱮ ᱚᱠᱛᱚ ᱨᱮᱜᱮ
ᱠᱟᱹᱢᱤ ᱜᱚᱫᱽ ᱢᱮ ᱟᱢ ᱫᱚ ᱥᱚᱸᱜᱮ
ᱥᱮᱛᱟᱜ ᱛᱤᱠᱤᱱ ᱛᱟᱨᱟᱥᱤᱧ ᱧᱤᱫᱟᱹ
ᱚᱠᱛᱚ ᱯᱤᱪᱷᱤ ᱠᱟᱹᱢᱤ ᱡᱩᱫᱟᱹ ᱡᱩᱫᱟᱹ ᱾
ᱥᱟᱱᱟᱢ ᱠᱚ ᱞᱟᱹᱜᱤᱫ ᱚᱠᱛᱚ ᱥᱚᱢᱟᱱ ᱢᱮᱱᱟᱜ
ᱮᱱ ᱦᱚᱸ ᱢᱮᱱᱟᱢ ᱢᱟᱱᱣᱟ ᱟᱢ ᱫᱚ ᱪᱮᱫᱟᱜ
ᱱᱩᱱᱟᱹᱜ ᱞᱤᱪᱟᱹᱲᱤᱭᱟᱹ ᱱᱩᱱᱟᱹᱜ ᱟᱹᱲᱤᱥᱤᱭᱟᱹ
ᱟᱢᱟᱜ ᱩᱛᱱᱟᱹᱣ ᱟᱢ ᱜᱮᱢ ᱱᱟᱥᱟᱣ ᱾
ᱜᱩᱨᱩ ᱵᱟᱵᱟ ᱚᱞ ᱪᱤᱠᱤ ᱵᱮᱱᱟᱣ ᱞᱮᱫᱟᱭ
ᱟᱵᱚᱣᱟᱜ ᱚᱞ ᱨᱚᱲ ᱛᱮ ᱥᱤᱠᱷᱱᱟᱹᱛᱚᱜ ᱞᱟᱹᱜᱤᱫ
ᱥᱟᱶᱛᱟ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱩᱯᱨᱩᱢ ᱫᱚᱦᱚᱭ ᱞᱟᱹᱜᱤᱫ
ᱥᱟᱭ ᱥᱮᱨᱢᱟ ᱯᱩᱨᱟᱹᱣ ᱮᱱᱟ ᱚᱞ ᱪᱤᱠᱤ ᱵᱮᱱᱟᱣ ᱠᱟᱛᱮ ᱾
ᱟᱫᱚᱢ ᱠᱚ ᱞᱟᱦᱟᱭᱮᱱ ᱟᱫᱚᱢ ᱠᱚ ᱛᱟᱭᱚᱢᱮᱱ
ᱟᱫᱚᱢ ᱠᱚᱣᱟᱜ ᱫᱚ ᱥᱤᱠᱷᱱᱟᱹᱛ ᱛᱟᱞᱟᱢᱟᱞᱟ ᱨᱮ
ᱟᱫᱚᱢ ᱠᱚᱫᱚ ᱫᱤᱥᱟᱹ ᱦᱟᱨᱟ ᱨᱮ
ᱠᱷᱮᱨᱣᱟᱲ ᱩᱯᱨᱩᱢ ᱚᱞ ᱪᱤᱠᱤ ᱵᱟᱝ ᱠᱚ ᱵᱟᱛᱟᱣᱮᱫ ᱾
ᱠᱩᱨᱩᱢᱩᱴᱩ ᱭᱟᱵᱚᱱ ᱥᱤᱠᱷᱱᱟᱹᱛ ᱟᱠᱟᱱ ᱦᱚᱲ ᱠᱚ
ᱫᱤᱥᱟᱹᱦᱟᱨᱟ ᱦᱚᱲ ᱵᱚᱱ ᱫᱤᱥᱟᱹ ᱟᱠᱚ
ᱟᱯᱚᱱ ᱩᱯᱨᱩᱢ ᱥᱤᱠᱷᱱᱟᱹᱛ ᱵᱚᱱ ᱥᱮᱪᱮᱫ ᱟᱠᱚ
ᱛᱟᱭᱚᱢ ᱟᱠᱟᱱ ᱦᱚᱲ ᱵᱚᱱ ᱛᱤᱭᱟᱹᱜ ᱟᱹᱭᱩᱨ ᱠᱚ ᱾
ᱥᱮᱫᱟᱭ ᱨᱮ ᱜᱩᱨᱩ ᱵᱟᱵᱟᱭ ᱢᱮᱱ ᱟᱠᱟᱫ
ᱚᱞ ᱢᱮᱱᱟᱜ ᱛᱟᱢᱟ ᱨᱚᱲ ᱢᱮᱱᱟᱜ ᱛᱟᱢᱟ
ᱫᱷᱚᱨᱚᱢ ᱢᱮᱱᱟᱜ ᱛᱟᱢᱟ ᱟᱢ ᱦᱚᱸ ᱢᱮᱱᱟᱢ
ᱚᱞᱮᱢ ᱟᱫ ᱞᱮᱨᱮ ᱨᱚᱲᱮᱢ ᱟᱫ ᱞᱮ
ᱫᱷᱚᱨᱚᱢᱮᱢ ᱟᱫ ᱞᱮᱨᱮ ᱟᱢ ᱦᱚᱸᱢ ᱟᱫᱚᱜ ᱾
ᱱᱚᱣᱟ ᱡᱩᱡᱩᱞᱟᱝ ᱡᱮᱜᱮᱛ ᱨᱮ ᱡᱮᱢᱚᱱ
ᱠᱷᱮᱨᱣᱟᱲ ᱵᱚᱝᱥᱚ ᱟᱵᱚ ᱟᱹᱫᱤᱢ ᱡᱟᱹᱛᱤ
ᱟᱵᱚᱣᱟᱜ ᱚᱞ ᱨᱚᱲ ᱫᱷᱚᱨᱚᱢ ᱟᱹᱨᱤᱪᱟᱹᱞᱤ
ᱵᱟᱧᱪᱟᱣ ᱠᱟᱛᱮ ᱜᱮ ᱵᱚᱱ ᱛᱟᱦᱮᱸ ᱠᱚᱜ ᱢᱟ ᱡᱩᱜᱮᱼᱡᱩᱜᱮ ᱾
**᱘
