ᱪᱮᱫ ᱡᱟᱭ ᱠᱟᱱ ᱱᱚᱶᱟ ᱥᱟᱹᱜᱟᱹᱭ
ᱦᱟᱦᱟᱲᱟ ᱟᱨ ᱞᱟᱥᱟᱬᱦᱮᱫ ᱜᱮ
ᱱᱚᱶᱟ ᱥᱟᱱᱟᱢ ᱥᱟᱹᱜᱟᱹᱭ ᱾
ᱟᱭᱳ ᱵᱟᱵᱟ ᱥᱟᱶ ᱡᱟᱱᱟᱢ ᱥᱟᱹᱜᱟᱹᱭ
ᱟᱹᱠᱤᱱ ᱠᱚᱞᱮᱨᱮ ᱠᱮᱱᱮᱠᱚᱛᱮ
ᱦᱟᱨᱟᱵᱩᱨᱩ ᱠᱩᱰᱟᱹᱢ ᱥᱟᱛᱮ
ᱩᱠᱩ ᱠᱷᱤᱞᱰᱩ ᱚᱱᱛᱮ ᱱᱚᱛᱮ ᱾
ᱜᱩᱨᱩ ᱢᱟᱪᱮᱛ ᱥᱟᱶ ᱢᱟᱹᱱᱟᱱ ᱥᱟᱹᱜᱟᱹᱭ
ᱫᱷᱤ ᱢᱚᱱᱮ ᱱᱤᱯᱷᱩᱴ ᱦᱟᱨᱟᱜ
ᱟᱹᱠᱤᱞ ᱜᱮᱭᱟᱱ ᱫᱟᱨᱟᱦᱟᱨᱟᱜ
ᱵᱩᱫᱷᱤ ᱫᱤᱥᱟᱹ ᱟᱨ ᱦᱚᱸ ᱦᱟᱨᱟᱜ ᱾
ᱡᱩᱨᱤ ᱥᱟᱶ ᱥᱤᱯᱤᱵᱤᱞ ᱥᱟᱹᱜᱟᱹᱭ
ᱥᱤᱵᱤᱞ ᱫᱩᱞᱟᱹᱲ ᱛᱮ ᱫᱚᱲᱦᱚ ᱥᱟᱹᱜᱟᱹᱭ
ᱡᱚᱛᱚ ᱠᱷᱚᱱ ᱥᱚᱱᱚᱛ ᱚᱱᱟ
ᱥᱚᱨᱮᱥ ᱥᱟ.ᱜᱩᱱ ᱥᱟᱹᱜᱟᱹᱭ ᱾
ᱦᱟᱱᱦᱟᱨ ᱦᱚᱧᱦᱟᱨ ᱥᱟᱶ ᱥᱟᱹᱜᱟᱹᱭ
ᱫᱚᱥᱟᱨ ᱡᱟᱱᱟᱢ ᱟᱭᱳ ᱵᱟᱵᱟ
ᱟᱭᱳ ᱵᱟᱵᱟ ᱵᱤᱫᱟᱹᱞ ᱟᱭᱳ ᱵᱟᱵᱟ
ᱩᱱᱠᱤᱱ ᱥᱟᱞᱟᱜ ᱥᱟᱹᱜᱟᱹᱭ ᱾
ᱦᱚᱧᱦᱟᱨ ᱤᱨᱤᱞ ᱥᱟᱶ ᱥᱟᱹᱜᱟᱹᱭ
ᱜᱚᱫᱚᱜ ᱢᱚᱱ ᱫᱚ ᱱᱮᱢᱚᱥ ᱜᱚᱨᱚᱡᱽ
ᱦᱩᱰᱤᱧ ᱢᱟᱨᱟᱝ ᱵᱚᱭᱦᱟ ᱞᱮᱠᱟ
ᱩᱱᱠᱩ ᱥᱟᱞᱟᱜ ᱥᱟᱹᱜᱟᱹᱭ ᱾
ᱟᱹᱛᱩ ᱴᱚᱞᱟ ᱨᱮ ᱱᱟᱶᱟ ᱥᱟᱹᱜᱟᱹᱭ
ᱦᱟᱲᱟᱢ ᱵᱩᱰᱷᱤ ᱟᱹᱛᱩ ᱟᱵᱟ
ᱫᱟᱜ ᱞᱩ ᱛᱩᱯᱩᱱ ᱜᱷᱟᱴ ᱨᱮ
ᱱᱟᱶᱟ ᱱᱟᱶᱟ ᱡᱚᱴᱟᱣ ᱥᱟᱹᱜᱟᱹᱭ ᱾
ᱥᱟᱶᱛᱟ ᱥᱟᱞᱟᱜ ᱥᱟᱹᱜᱟᱹᱭ
ᱦᱩᱨᱤ ᱵᱤᱠᱚᱞ ᱢᱚᱱᱮ ᱨᱟᱜᱟᱭ
ᱞᱟᱦᱟᱱᱛᱤ ᱩᱛᱱᱟᱹᱣ ᱞᱟᱹᱜᱤᱫ
ᱢᱚᱱᱮ ᱜᱷᱟᱱᱮ ᱜᱷᱟᱱᱮ ᱠᱷᱚᱡᱟᱭ ᱾
ᱫᱮᱥ ᱫᱤᱥᱚᱢ ᱥᱟᱶ ᱥᱟᱹᱜᱟᱹᱭ
ᱥᱟᱶᱛᱟ ᱥᱟᱶᱦᱮᱫ ᱥᱟᱞᱟᱜ ᱥᱟᱹᱜᱟᱹᱭ
ᱢᱚᱱᱮ ᱢᱩᱠᱨᱩᱲ ᱡᱤᱣᱤ ᱟᱞᱟᱭ
ᱢᱚᱱᱮ ᱜᱷᱟᱱᱮ ᱨᱟᱜᱟᱭ ᱾
ᱢᱤᱫ ᱫᱚ ᱟᱱᱫᱷᱟ ᱠᱟᱱᱟ ᱥᱟᱹᱜᱟᱹᱭ
ᱢᱤᱫ ᱫᱚ ᱪᱷᱟᱸᱫᱟ ᱠᱟᱱᱟ ᱥᱟᱹᱜᱟᱹᱭ
ᱡᱤᱣᱤᱭ ᱡᱤᱭᱟᱹᱛ ᱯᱟᱨᱟᱝᱜᱚᱛᱚᱜ
ᱚᱱᱠᱟᱱ ᱱᱚᱣᱟ ᱥᱟᱹᱜᱟᱹᱭ ᱾
ᱥᱟᱹᱜᱟᱹᱭ ᱫᱚ ᱱᱚᱝᱠᱟ ᱦᱟᱦᱟᱲᱟ ᱟᱱ
ᱵᱟᱹᱨᱥᱤᱧ ᱥᱟᱹᱜᱩᱱ ᱥᱟᱦᱬᱟ ᱟᱱ
ᱜᱩᱨᱚᱜ ᱫᱷᱟᱹᱵᱤᱡ ᱛᱟᱦᱮᱸᱱ
ᱱᱚᱣᱟ ᱥᱟᱹᱜᱟᱹᱭ ᱡᱟᱱᱟᱢ ᱠᱷᱚᱱ ᱾
ᱥᱟᱹᱜᱟᱹᱭ ᱵᱟᱹᱞᱤ ᱜᱤᱛᱤᱞ ᱥᱚᱢᱟᱱ
ᱥᱟᱵ ᱨᱮ ᱵᱟᱝ ᱜᱮᱢ ᱥᱟᱵ ᱜᱟᱱ
ᱵᱩᱡᱩᱨᱚᱜ ᱜᱷᱟᱱᱮ ᱪᱩᱯᱩᱫ ᱛᱤ ᱠᱷᱚᱱ
ᱞᱩᱢᱩᱧ ᱞᱮᱢᱮᱧ ᱵᱟᱹᱞᱤ ᱥᱚᱢᱟᱱ ᱾
ᱥᱟᱢᱴᱟᱣ ᱡᱚᱛᱚᱱ ᱛᱮᱢ ᱞᱟᱸᱜᱟᱜ
ᱥᱟᱹᱜᱟᱹᱭ ᱧᱩᱛᱚᱜ ᱨᱮ ᱵᱟᱝ ᱜᱮ ᱟᱸᱜᱟᱜ
ᱚᱱᱟ ᱞᱟᱹᱜᱤᱫ ᱟᱢᱮᱢ ᱛᱟᱦᱮᱸᱱ
ᱦᱩᱰᱩᱜ ᱟᱸᱜᱟᱵ-ᱟᱸᱜᱟᱵ ᱾
ᱵᱟᱨ ᱯᱟᱦᱴᱟ ᱠᱷᱚᱱ ᱡᱚᱲᱟᱣ ᱥᱟᱹᱜᱟᱹᱭ
ᱫᱚᱲᱦᱚ ᱛᱟᱦᱮᱸᱱ ᱥᱟᱹᱜᱟᱹᱭ
ᱢᱤᱫ ᱯᱟᱦᱴᱟ ᱛᱟᱦᱮᱸᱱ ᱥᱟᱹᱜᱟᱹᱭ
ᱛᱚᱯᱟᱜ ᱜᱚᱫᱚᱜ ᱥᱟᱹᱜᱟᱹᱭ ᱾
***
