ᱚᱰᱚᱠ ᱞᱤᱱᱟᱹᱧ ᱪᱟᱨᱟ ᱯᱟᱜᱱᱛᱮ ᱤᱧᱟᱜ ᱛᱩᱠᱟ. ᱠᱷᱚᱱ
ᱩᱰᱟ.ᱣ ᱵᱟᱲᱟᱭ ᱠᱟᱱᱟ ᱜᱚᱴᱟ ᱦᱟᱱᱛᱮᱼᱱᱷᱟᱛᱮ,
ᱵᱟᱹᱧ ᱴᱷᱤᱠᱟᱹ ᱟᱱ ᱥᱟᱵ ᱠᱤᱫᱤᱧᱟ ᱠᱚ ᱤᱧ ᱢᱟ
ᱪᱮᱫ ᱤᱧ ᱪᱮᱠᱟᱭᱟ ᱱᱤᱛᱚᱜ ᱫᱩᱠᱷ ᱡᱟᱞᱟ ᱛᱮ ᱾
ᱦᱮ ᱢᱟᱹᱱᱢᱤ ! ᱟᱸᱡᱚᱢ ᱢᱮ ᱤᱧᱟᱜ ᱢᱤᱫ ᱠᱟᱛᱷᱟ
ᱪᱷᱩᱰᱟᱹᱨ ᱟᱠᱟᱱᱟᱹᱧ ᱜᱟᱫᱮᱞ ᱠᱚ ᱛᱟᱞᱟ ᱠᱷᱚᱱ,
ᱩᱱᱠᱩ ᱪᱷᱟᱰᱟ ᱵᱟᱝᱤᱧ ᱛᱟᱦᱮᱸ ᱫᱟᱲᱮᱭᱟᱜ ᱥᱩᱠ ᱛᱮ
ᱧᱮᱞ ᱡᱚᱝᱜᱤᱧ ᱥᱚᱵᱷᱟᱜ ᱤᱧ ᱫᱚ ᱥᱟᱺᱜᱤᱧ ᱠᱷᱚᱱ ᱾
ᱵᱩᱫᱷᱤ- ᱫᱤᱥᱟ. ᱵᱟᱝ ᱛᱮ ᱪᱟᱨᱟ ᱞᱚᱵᱷ ᱧᱮᱞ ᱛᱮ
ᱡᱷᱟᱹᱞᱤ ᱤᱱᱟᱹᱧ ᱢᱟᱥᱮ ᱟᱢᱟᱜ ᱯᱟᱹᱥᱤ ᱨᱮ,
ᱵᱟᱝ ᱤᱧ ᱩᱰᱟᱹᱣ ᱫᱟᱲᱮᱭᱟᱜ ᱢᱟ ᱚᱱᱟᱛᱮ
ᱠᱟᱴᱨᱚᱵ ᱠᱮᱫᱼᱟᱢ ᱤᱧᱟᱜ ᱯᱷᱟᱺᱠᱲᱟᱹᱜ ᱨᱮ ᱾
ᱵᱟᱹᱧ ᱧᱟᱢ ᱠᱟᱱ ᱥᱤᱵᱤᱞ ᱡᱚᱢ ᱛᱳᱣᱟ-ᱛᱟᱵᱮᱱ
ᱵᱟᱹᱧ ᱠᱩᱥᱤᱭᱟᱜ ᱟᱢᱟᱜ ᱱᱚᱣᱟ ᱥᱚᱱᱟ ᱠᱷᱟᱧᱪᱟᱨ,
ᱡᱚᱼᱵᱟᱦᱟ, ᱛᱤᱡᱩ ᱡᱚᱢ ᱛᱮ ᱫᱤᱱᱟᱹᱢᱤᱧ ᱛᱟᱦᱮᱱ
ᱢᱚᱱ ᱠᱩᱥᱤᱧ ᱠᱷᱟᱸᱰᱟᱣ ᱤᱧᱟᱜ ᱡᱤᱭᱚᱱ-ᱥᱚᱝᱥᱟᱨ ᱾
ᱟᱹᱜᱩ ᱠᱤᱫᱤᱧᱟᱢ ᱪᱚᱨᱚᱠ ᱪᱮᱦᱨᱟ ᱨᱩᱯ ᱧᱮᱞᱛᱮ
ᱯᱟᱞᱮᱫ ᱤᱧ ᱥᱚᱵᱷᱟᱭ ᱪᱚᱝ ᱟᱢᱟᱜ ᱚᱲᱟᱜ,
ᱠᱷᱟᱧᱪᱟᱨ ᱨᱮᱢ ᱫᱚᱦᱚᱭᱤᱧ ᱠᱩᱥᱤᱜ ᱟᱹᱧ ᱢᱮᱱᱛᱮ
ᱥᱨᱤᱥᱴᱤᱭᱟᱜ ᱠᱚᱞᱮ ᱜᱮ ᱤᱧᱟᱜ ᱫᱚ ᱚᱲᱟᱜ ᱾
ᱦᱟᱥᱟ-ᱫᱷᱩᱲᱤ ᱨᱮ ᱢᱮᱥᱟᱜ ᱞᱮᱠᱟᱱ ᱠᱩᱠᱢᱩᱧ ᱥᱟᱡᱟᱣᱮᱫ
ᱫᱩᱠᱷᱟᱹᱞᱤ ᱡᱤᱭᱚᱱ ᱮ ᱟᱹᱭᱠᱟ.ᱣᱮᱫ ᱤᱧᱟᱜ ᱩᱢᱩᱞ ᱦᱚᱸ,
ᱚᱱᱟᱛᱮ ᱠᱷᱟᱧᱪᱟᱨ ᱨᱮ ᱦᱚᱴᱚᱜ ᱛᱤᱭᱟᱹᱨ ᱠᱟᱛᱮᱧ ᱥᱮᱨᱮᱧ ᱮᱫ
ᱪᱮᱫᱟᱜ ᱥᱮ ᱥᱟᱨᱟ ᱜᱷᱟᱱᱮ ᱨᱟᱜᱮᱫ ᱤᱧᱟᱜ ᱚᱱᱛᱚᱨ ᱡᱤᱣᱤ ᱦᱚᱸ ᱾
ᱤᱧ ᱫᱚ ᱵᱟᱝ, ᱟᱢ ᱥᱩᱢᱩᱝ ᱮᱢ ᱛᱟᱦᱮᱱ ᱨᱟᱹᱥᱠᱟᱹ ᱨᱮ
ᱤᱧᱟᱜ ᱠᱟᱛᱷᱟ, ᱤᱧᱟᱜ ᱩᱭᱦᱟᱹᱨ ᱵᱟᱹᱧ ᱞᱟᱹᱭ ᱫᱟᱲᱮᱭᱟᱜ,
ᱜᱟᱛᱮᱧ ᱧᱮᱞ ᱧᱟᱢ ᱠᱚ ᱞᱤᱞ ᱥᱮᱨᱢᱟᱧ ᱠᱚᱭᱚᱜᱽ ᱨᱮ
ᱟᱠᱚᱴ ᱟᱠᱟᱫᱤᱧ ᱠᱷᱟᱧᱪᱟᱨ ᱩᱱᱠᱩ ᱥᱟᱶ ᱵᱟᱹᱧ ᱜᱟᱛᱮ ᱫᱟᱲᱮᱭᱟᱜ ᱾
ᱩᱰᱟᱹᱣᱚᱜ ᱥᱟᱹᱱᱟᱹᱧ ᱞᱟᱯᱷᱟᱝ ᱞᱤᱞ ᱥᱮᱨᱢᱟ ᱨᱮ
ᱠᱷᱟᱸᱰᱟᱣ ᱥᱟᱹᱱᱟᱹᱧ ᱞᱮᱜᱮᱡ ᱦᱟᱹᱨᱤᱭᱟᱹᱲ ᱫᱷᱟᱹᱨᱛᱤ ᱨᱮ,
ᱨᱟᱜᱮᱫ ᱞᱤᱴᱷᱩᱨ ᱟᱲᱟᱝ ᱛᱮ ᱫᱟᱭᱟᱼᱦᱟᱭᱟ ᱜᱮ
ᱢᱮᱱᱟᱜ ᱟᱠᱟᱫᱮ ᱢᱤᱨᱩ ᱪᱮᱬᱮ ᱠᱷᱟᱧᱪᱟᱨ ᱵᱷᱤᱛᱤᱨ ᱨᱮ ᱾
ᱢᱚᱱᱠᱩᱥᱤ ᱵᱟᱹᱧ ᱨᱚᱲ ᱞᱟᱸᱫᱟ ᱫᱟᱲᱮᱭᱟᱜ ᱠᱷᱟᱧᱪᱟᱨ ᱨᱮ
ᱡᱤᱣᱤ ᱪᱟᱞᱟᱜ ᱞᱮᱠᱟᱹᱧ ᱟᱹᱭᱠᱟᱹᱣ ᱠᱷᱟᱧᱪᱟᱨ ᱨᱮ,
ᱡᱷᱤᱡ ᱟᱹᱧ ᱢᱮ ᱫᱩᱣᱟᱹᱨ ᱩᱰᱟᱹᱣ ᱚᱪᱚᱣᱟᱹᱧ ᱢᱮ
ᱱᱟᱯᱟᱭ ᱪᱮᱦᱨᱟᱧ ᱥᱮᱨᱮᱧ ᱯᱷᱩᱨᱜᱟᱹᱞ ᱡᱤᱭᱚᱱ ᱨᱮ ᱾
ᱪᱮᱨᱚᱼ ᱵᱮᱨᱚᱧ ᱥᱮᱨᱮᱧ ᱡᱚᱝ ᱞᱟᱯᱷᱟᱝ ᱞᱤᱞ ᱥᱮᱨᱢᱟ ᱨᱮ
ᱩᱰᱟᱹᱣ ᱵᱟᱲᱟᱭᱟᱹᱧ ᱠᱮᱱᱮ ᱠᱚᱛᱮ ᱜᱟᱛᱮ ᱠᱚ ᱥᱟᱶ,
ᱛᱟᱠᱮᱨᱚᱜ ᱟᱲᱟᱝ ᱨᱟᱲᱟᱝᱼ ᱨᱟᱲᱟᱝ ᱥᱟᱨᱚ ᱢᱤᱨᱩ ᱞᱮᱠᱟ
ᱡᱚᱯᱚᱨ ᱡᱚᱞᱮ ᱛᱟᱦᱮᱸ ᱚᱪᱚᱣᱟᱹᱧ ᱢᱮ ᱜᱟᱛᱮ ᱠᱚ ᱥᱟᱶ ᱾
***
