ᱵᱟᱦᱟ ᱥᱚᱦᱨᱟᱭ ᱡᱟᱦᱮᱨ ᱵᱚᱸᱜᱟᱜ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱵᱚᱸᱜᱟ ᱥᱟᱨᱮᱡ ᱡᱟᱦᱮᱨ ᱥᱚᱲᱮ
ᱟᱢ ᱫᱚ ᱡᱚᱡᱚᱢ ᱵᱤᱫᱟᱹᱞ ᱨᱮ ᱿
ᱵᱟᱯᱞᱟ ᱵᱮᱦᱟ ᱫᱚᱝ ᱮᱱᱮᱡ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ?
ᱵᱟᱯᱞᱟ ᱥᱟᱨᱮᱡ ᱵᱟᱥᱠᱮ ᱛᱟᱥᱠᱮ
ᱟᱢ ᱫᱚ ᱵᱷᱚᱡᱽ ᱡᱚᱡᱚᱢ ᱵᱤᱫᱟᱹᱞ ᱨᱮ ᱿
ᱜᱚᱡ ᱜᱩᱨ ᱫᱩᱠ ᱢᱩᱦᱤᱢ ᱵᱮᱲᱟ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱢᱟᱬᱟ ᱪᱮᱛᱟᱱ ᱫᱩᱠ ᱦᱟᱹᱴᱤᱧ
ᱟᱢ ᱫᱚᱢ ᱪᱟᱞᱟᱜᱼᱟ ᱜᱟᱯᱟ ᱢᱮᱫ ᱧᱮᱯᱮᱞ ᱿
ᱵᱷᱟᱰᱟᱱ ᱠᱩᱸᱰᱟᱹᱱ ᱠᱟᱹᱢᱤ ᱦᱚᱨᱟ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱞᱟᱡᱟᱣ ᱫᱮᱭᱟ ᱠᱟᱛᱮᱢ ᱪᱟᱞᱟᱜ ᱠᱟᱱ
ᱫᱚᱥᱟᱨ ᱦᱤᱞᱚᱜ ᱵᱷᱚᱡᱽ ᱡᱚᱡᱚᱢ ᱵᱤᱫᱟᱹᱞ ᱨᱮ ᱿
ᱟᱪᱟᱨᱻᱵᱤᱪᱟᱹᱨ ᱫᱩᱨᱤ ᱫᱚᱨᱵᱟᱨ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱛᱟᱭᱚᱢᱻᱛᱟᱭᱚᱢ ᱛᱮᱢ ᱥᱮᱴᱮᱨᱚᱜᱼᱟ
ᱯᱟᱹᱴᱭᱟᱹ ᱵᱮᱨᱮᱫ ᱵᱮᱲᱟ ᱨᱮ ᱿
ᱵᱟᱹᱫᱽ ᱵᱟᱹᱭᱦᱟᱹᱲ ᱪᱟᱥ ᱠᱟᱹᱢᱤ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱥᱮᱨᱢᱟ ᱡᱟᱹᱲᱤ ᱯᱟᱨᱚᱢ ᱠᱟᱛᱮ
ᱟᱢ ᱫᱚ ᱟᱲᱮᱢ ᱮᱜᱥᱮᱫ ᱠᱟᱱᱟ ᱿
ᱚᱞᱚᱜ ᱯᱚᱲᱦᱚᱱ ᱥᱤᱠᱷᱱᱟᱹᱛ ᱵᱮᱲᱟ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ?
ᱚᱠᱛᱚ ᱟᱹᱦᱤᱡ ᱜᱮᱭᱟᱱ ᱟᱨᱡᱟᱣ
ᱱᱤᱦᱟᱹᱛᱤ ᱟᱹᱰᱤ ᱞᱟᱹᱠᱛᱤ ᱠᱟᱱᱟ ᱿
ᱯᱟᱛᱟ ᱪᱷᱟᱛᱟ ᱨᱮᱦᱚᱸ ᱦᱚᱲᱠᱚ ᱛᱟᱭᱚᱢ ᱨᱮ
ᱥᱮᱸᱫᱽᱨᱟ ᱠᱟᱨᱠᱟ ᱨᱮᱦᱚᱸ ᱦᱚᱲᱠᱚ ᱛᱟᱭᱚᱢ ᱨᱮ
ᱵᱩᱜᱤ ᱠᱟᱹᱢᱤ ᱨᱮᱦᱚᱸ ᱦᱚᱲ ᱠᱚ ᱛᱟᱭᱚᱢ ᱨᱮ
ᱟᱢ ᱫᱚ ᱪᱮᱫᱟᱜ ᱛᱟᱭᱚᱢ ᱨᱮ ???
***
