ᱱᱤᱛᱚᱜ ᱱᱚᱶᱟ ᱡᱩᱜᱽ ᱨᱮ ᱚᱠᱚᱭᱮᱢ ᱯᱟᱹᱛᱭᱟᱹᱣ ᱟᱭ,
ᱵᱟᱹᱲᱤᱡ ᱵᱮᱜᱚᱨ ᱵᱩᱜᱤ ᱫᱚ ᱛᱤᱥ ᱦᱚᱸ ᱵᱟᱭ ᱠᱷᱚᱡᱟᱭ ᱾
ᱞᱟᱹᱣᱡᱷᱟᱹᱣ ᱯᱟᱹᱣᱡᱷᱟᱹᱣ ᱦᱚᱲᱟᱜ ᱠᱟᱛᱷᱟ ᱛᱮ,
ᱵᱚᱦᱚᱜ ᱜᱮᱛᱟᱢ ᱜᱷᱩᱨ ᱜᱷᱩᱨᱟᱹᱜ ᱞᱟᱹᱭ ᱪᱟᱞ ᱠᱟᱛᱷᱟ ᱛᱮ ᱾
ᱞᱟᱹᱭ ᱟᱠᱚ ᱥᱟᱹᱨᱤ ᱜᱮ ᱞᱟᱹᱭ ᱪᱟᱞ ᱠᱟᱛᱷᱟ ᱛᱮ,
ᱥᱩᱞᱩᱠ ᱥᱟᱹᱜᱟᱹᱭ ᱛᱚᱯᱟᱜᱚᱜ ᱦᱚᱲᱟᱜ ᱨᱟᱹᱜᱤ ᱛᱮ ᱾
ᱢᱚᱱᱮ ᱡᱩᱫᱤ ᱟᱢᱟᱜ ᱩᱫᱟᱹᱨ ᱜᱮ ᱛᱟᱢᱟ,
ᱵᱟᱹᱲᱤᱡ ᱵᱮᱜᱚᱨ ᱵᱩᱜᱤ ᱫᱚ ᱪᱤᱠᱟᱹᱢ ᱧᱟᱢᱟ ᱾
ᱱᱟᱯᱟᱭ ᱦᱚᱲ ᱦᱚᱸ ᱩᱱ ᱫᱚᱭ ᱧᱮᱞᱚᱜ ᱟᱹᱲᱤᱥ ᱜᱮ,
ᱟᱸᱜᱟ ᱟᱹᱭᱩᱵ ᱧᱮᱯᱮᱞ ᱧᱟᱯᱟᱢ ᱥᱤᱠᱤᱲ ᱜᱮᱪᱚ ᱫᱤᱱ ᱜᱮ ᱾
ᱱᱟᱯᱟᱭ ᱥᱤᱵᱤᱞ ᱨᱚᱲ ᱦᱚᱸ ᱦᱟᱲᱦᱟᱫᱚᱜ ᱛᱟᱢ,
ᱞᱟᱹᱭ ᱪᱟᱞ ᱠᱟᱛᱷᱟ ᱛᱮ ᱫᱤᱥᱟᱹ ᱦᱟᱨᱟᱜ ᱟᱢ ᱾
ᱦᱟᱸᱰᱮ ᱱᱟᱸᱰᱮ ᱠᱷᱚᱱᱮᱢ ᱜᱟᱹᱵᱽᱞᱩ ᱟᱹᱜᱩᱭ ᱟᱫᱚᱢ ᱡᱷᱟᱲᱟᱣ ᱚᱲᱟᱜ ᱨᱮ,
ᱟᱢ ᱛᱮᱜᱮ ᱟᱢ ᱥᱮᱸᱜᱮᱞᱮᱢ ᱫᱷᱚᱨᱟᱣ ᱟᱢᱟᱜ ᱜᱷᱟᱨᱚᱸᱡᱽ ᱨᱮ ᱾
ᱛᱟᱭᱚᱢ ᱢᱟᱲᱟᱝ ᱵᱩᱡᱷᱟᱹᱣ ᱞᱮᱢ ᱟᱹᱣᱦᱟᱹ ᱟᱞᱚᱢ ᱫᱚᱱ,
ᱚᱲᱟᱜ ᱰᱷᱤᱝᱠᱤᱢ ᱛᱟᱭᱟᱱᱚᱜ ᱠᱟᱱ ᱠᱩᱞᱤ ᱭᱮᱛᱟᱢ ᱢᱚᱱ ᱾
ᱟᱹᱰᱤ ᱡᱩᱨ ᱜᱮ ᱦᱟᱥᱩᱣᱟ ᱞᱟᱹᱭ ᱪᱟᱞ ᱠᱟᱛᱷᱟ ᱫᱚ,
ᱟᱨ ᱨᱮᱭᱟᱲ ᱜᱮᱭᱟ ᱦᱚᱲ ᱟᱨᱮᱡ ᱫᱟᱜ ᱫᱚ ᱾
ᱞᱟᱹᱭ ᱪᱟᱞ ᱠᱟᱛᱷᱟ ᱫᱚ ᱛᱤᱥ ᱦᱚᱸ ᱟᱞᱚᱢ ᱟᱸᱡᱚᱢᱟ,
ᱵᱟᱹᱲᱤᱡ ᱜᱮᱪᱚᱢ ᱜᱚᱦᱚᱲ ᱟᱹᱜᱩᱭ ᱥᱩᱠ ᱫᱚ ᱪᱤᱠᱟᱹᱢ ᱧᱟᱢᱟ ᱾
ᱟᱢᱟᱜ ᱜᱷᱟᱨᱚᱸᱡᱽ ᱥᱟᱡᱟᱣ ᱟᱠᱟᱱ ᱦᱮᱥᱮᱡ ᱥᱮᱠᱮᱡ ᱛᱮ,
ᱚᱵᱷᱟᱵᱽ ᱟᱱᱟᱴ ᱪᱮᱫ ᱦᱚᱸ ᱵᱟᱹᱱᱩᱜ ᱥᱩᱞᱩᱠ ᱥᱟᱹᱜᱟᱹᱭ ᱛᱮ ᱾
ᱯᱮᱨᱮᱡ ᱟᱠᱟᱱ ᱦᱩᱲᱩ ᱪᱟᱣᱞᱮ ᱯᱩᱭᱥᱟᱹ ᱠᱟᱹᱣᱰᱤ ᱛᱮ,
ᱟᱱᱮᱡ ᱫᱷᱟᱱᱮᱡ ᱮᱢ ᱟᱨᱡᱟᱣ ᱟᱠᱟᱫ ᱢᱚᱞᱚᱝ ᱫᱟᱜ ᱡᱚᱨᱚ ᱠᱟᱛᱮ ᱾
ᱚᱲᱟᱜ ᱯᱮᱨᱮᱡ ᱢᱮᱱᱟᱜ ᱠᱚᱛᱟᱢ ᱦᱚᱸᱱ ᱦᱚᱯᱚᱱ ᱟᱢᱨᱤᱱ,
ᱫᱩᱞᱟᱹᱲ ᱟᱠᱚ ᱛᱟᱢ ᱥᱮ ᱢᱚᱱ ᱠᱩᱥᱤ ᱫᱤᱱᱟᱹᱢ ᱫᱤᱱ ᱾
ᱜᱟᱹᱭ ᱠᱟᱰᱟ ᱢᱤᱦᱩᱸ ᱢᱮᱨᱚᱢ ᱛᱮ ᱯᱮᱨᱮᱡ ᱟᱠᱟᱱ ᱜᱚᱲᱟ,
ᱡᱚᱛᱚᱱ ᱡᱚᱜᱟᱣ ᱠᱚᱢ ᱥᱮ ᱥᱮᱛᱟᱜ ᱥᱤᱸᱜᱟᱹᱲ ᱵᱮᱲᱟ ᱾
ᱟᱢᱟᱜ ᱦᱩᱫᱤᱥ ᱫᱤᱥᱟᱹ ᱠᱟᱹᱢᱤ ᱨᱮ ᱞᱟᱜᱟᱣ ᱢᱮᱥᱮ,
ᱠᱟᱹᱢᱤ ᱛᱟᱢ ᱫᱚ ᱞᱟᱦᱟᱜ ᱟᱞᱚᱢ ᱢᱮᱱᱟ ᱦᱟᱯᱮ ᱥᱮ ᱾
ᱢᱩᱫᱷᱩᱱ ᱠᱷᱩᱱᱴᱤ ᱞᱮᱠᱟ ᱵᱷᱟᱹᱨᱭᱟᱹ ᱞᱟᱫᱮ ᱢᱮᱱᱟᱜ ᱟᱢ ᱨᱮ,
ᱟᱞᱚᱢ ᱟᱹᱛᱨᱩᱧᱚᱜᱼᱟ ᱜᱷᱟᱨᱚᱸᱡᱽ ᱪᱟᱞᱟᱣ ᱨᱮ ᱾
ᱜᱷᱟᱨᱚᱸᱡᱽ ᱵᱷᱟᱹᱨᱭᱟᱹ ᱫᱚ ᱟᱹᱰᱤ ᱜᱮ ᱵᱷᱟᱹᱨᱤᱭᱟ,
ᱜᱚᱜᱻ ᱫᱤᱯᱤᱞ ᱵᱮᱜᱚᱨ ᱪᱤᱠᱟᱹᱢ ᱞᱟᱦᱟ ᱤᱫᱤᱭᱟ ᱾
ᱟᱢᱟᱜ ᱦᱩᱫᱤᱥ ᱫᱤᱥᱟᱹ ᱟᱞᱚᱢ ᱞᱮᱣᱰᱟ ᱞᱚᱴᱚᱢ,
ᱟᱜᱟᱢ ᱟᱹᱰᱤ ᱡᱮᱞᱮᱧ ᱜᱮᱭᱟ ᱪᱤᱠᱟᱹᱢ ᱯᱟᱨᱚᱢ ᱾
ᱛᱟᱲᱟᱢ ᱰᱟᱦᱟᱨ ᱨᱮ ᱢᱮᱱᱟᱜ ᱞᱮᱸᱡᱮᱫ ᱰᱷᱚᱰᱟ ᱪᱤᱠᱤᱡ ᱫᱟᱲᱟᱝ,
ᱯᱟᱨᱚᱢ ᱛᱮᱜᱮ ᱦᱩᱭᱟᱢ ᱛᱚᱵᱮ ᱛᱚᱢ ᱢᱟᱲᱟᱝ ᱾
ᱟᱢ ᱜᱮ ᱡᱩᱫᱤ ᱦᱚᱲ ᱠᱟᱛᱷᱟ ᱛᱮᱢ ᱟᱺᱰᱤᱡᱚᱜ,
ᱟᱫᱷᱟ ᱫᱤᱱ ᱨᱮ ᱜᱷᱟᱨᱚᱸᱡᱽ ᱡᱷᱤᱝᱠᱟᱹ ᱡᱷᱟᱲᱟᱝ ᱜᱟᱺᱰᱤᱡᱚᱜ ᱾
ᱟᱹᱠᱤᱞᱚᱜ ᱢᱮ ᱫᱮᱥᱮ ᱵᱩᱜᱤ ᱵᱟᱹᱲᱤᱡ ᱵᱟᱪᱷᱟᱣ ᱢᱮ,
ᱢᱟᱹᱱᱢᱤ ᱞᱮᱠᱟ ᱢᱟᱹᱱᱢᱤ ᱟᱢ ᱫᱚ ᱛᱮᱭᱟᱨᱚᱜ ᱢᱮ ᱾
ᱟᱢᱟᱜ ᱥᱩᱠ ᱦᱚᱲᱟᱜ ᱢᱮᱫ ᱨᱮ ᱰᱷᱟᱝᱚᱜ ᱠᱟᱱ,
ᱟᱢ ᱫᱚ ᱞᱮᱞᱦᱟ ᱩᱫᱟᱹᱨ ᱵᱟᱢ ᱴᱷᱤᱠᱟᱹ ᱡᱚᱝ ᱠᱟᱱ ᱾
ᱱᱟᱯᱟᱭ ᱛᱷᱩᱛᱤ ᱜᱟᱞᱢᱟᱨᱟᱣ ᱛᱮᱢ ᱵᱷᱩᱞᱟᱹᱣ ᱮᱱ,
ᱦᱟᱹᱱᱤ ᱱᱟᱹᱭᱟᱜ ᱥᱩᱭᱟᱹ ᱥᱩᱸᱜᱟᱹ ᱠᱟᱛᱷᱟ ᱨᱮᱢ ᱡᱷᱟᱹᱞᱤᱭᱮᱱ ᱾
ᱵᱟᱢ ᱫᱤᱥᱟᱹ ᱦᱟᱱᱟ ᱪᱮᱫ ᱮᱢ ᱪᱤᱠᱟᱹ ᱠᱟᱱᱟ,
ᱟᱢ ᱧᱮᱞ ᱛᱮ ᱦᱚᱲ ᱠᱚ ᱞᱟᱸᱫᱟ ᱡᱚᱝ ᱠᱟᱱᱟ ᱾
ᱞᱟᱹᱭ ᱪᱟᱞ ᱠᱟᱛᱷᱟ ᱛᱮ ᱟᱢ ᱫᱚᱢ ᱫᱤᱥᱟᱹ ᱦᱟᱨᱟᱭᱮᱱᱟ,
ᱥᱩᱞᱩᱠ ᱜᱷᱟᱨᱚᱸᱡᱽ ᱛᱟᱢ ᱫᱚ ᱱᱩᱛᱤ ᱪᱷᱩᱛᱤ ᱪᱟᱵᱟᱭᱮᱱᱟ ᱾
ᱯᱟᱨᱚᱢ ᱪᱟᱵᱟ ᱠᱟᱛᱮ ᱫᱚ ᱥᱟᱱᱟᱢᱟᱜ ᱜᱮ ᱵᱮᱨᱛᱷᱟ,
ᱟᱹᱠᱤᱞᱚᱜ ᱢᱮ ᱫᱮᱥᱮ ᱟᱞᱚᱢ ᱟᱸᱡᱚᱢᱟ ᱞᱟᱹᱭ ᱪᱟᱞ ᱠᱟᱛᱷᱟ ᱾
***
