ᱛᱟᱹᱯᱤᱧ ᱥᱟᱱᱟ.ᱧ ᱢᱚᱞᱚᱝ
ᱵᱟᱝ ᱫᱚ ᱵᱤᱥᱤᱧ ᱥᱚᱞᱚᱝ
ᱢᱤᱪᱷᱟᱹ ᱛᱮᱜᱮ ᱪᱟᱵᱟᱭᱮᱱᱟ
ᱡᱤᱭᱚᱱ ᱨᱮᱱᱟᱜ ᱜᱚᱱᱚᱝ ᱾
ᱵᱟᱹᱱᱩᱜ ᱥᱩᱞᱩᱠ ᱱᱤᱨᱟᱹᱭ
ᱚᱠᱟᱨᱮ ᱟᱹᱫᱩᱧ ᱯᱤᱪᱷᱟᱹᱭ
ᱯᱤᱪᱷᱟᱹ ᱛᱮᱦᱚᱸ ᱵᱟᱝ ᱜᱮ ᱧᱟᱢᱚᱜ
ᱵᱟᱹᱱᱩᱜ ᱱᱤᱛᱚᱜ ᱩᱯᱟᱹᱭ ᱾
ᱦᱤᱫᱤᱡ ᱢᱚᱱᱮ ᱛᱟᱞᱟ
ᱛᱤᱱᱟᱹᱜ ᱞᱮᱠᱟᱱ ᱡᱟᱞᱟ
ᱨᱚᱫᱷᱚᱱ ᱛᱮᱜᱮ ᱱᱚᱣᱟ ᱡᱤᱭᱚᱱ
ᱦᱟᱭᱨᱮ ᱡᱷᱟᱞᱟ ᱯᱟᱞᱟ ᱾
ᱦᱚᱨᱛᱮ ᱛᱟᱲᱟᱣ ᱵᱟᱲᱟ
ᱫᱤᱥᱚᱢ ᱦᱚᱲ ᱠᱚ ᱨᱚᱲᱟ
ᱪᱤᱠᱟᱹ ᱛᱮᱫᱚ ᱢᱮᱫ ᱤᱧ ᱧᱮᱯᱮᱞ
ᱢᱟᱥᱮ ᱞᱟᱡᱟ ᱯᱟᱲᱟ ᱾
ᱩᱢᱮᱨ ᱨᱮᱱᱟᱜ ᱥᱩᱥᱤ
ᱚᱱᱟ ᱛᱮᱜᱮ ᱛᱚ ᱫᱩᱥᱤ
ᱯᱤᱰᱤᱡ ᱯᱤᱰᱤᱡ ᱨᱟᱹᱥᱠᱟᱹ ᱛᱟᱞᱟ
ᱛᱟᱦᱮᱸ ᱞᱤᱱᱤᱧ ᱠᱩᱥᱤ ᱾
ᱚᱠᱟᱨᱮ ᱟᱹᱫᱩᱧ ᱪᱟᱞᱟᱜ
ᱛᱟᱦᱮᱸᱱᱟᱹᱧ ᱚᱠᱚᱭ ᱥᱟᱞᱟᱜ
ᱟᱛᱟᱝ ᱞᱮᱫᱤᱧ ᱦᱟᱯᱛᱟ ᱯᱤᱪᱷᱤ
ᱞᱟᱹᱰᱩ ᱫᱚ ᱠᱷᱟᱞᱟᱜ ᱠᱷᱟᱞᱟᱜ ᱾
ᱦᱤᱲᱤᱧ ᱞᱮᱫᱤᱧ ᱥᱟᱱᱟᱢ
ᱢᱤᱪᱷᱟᱹᱜ ᱯᱟᱞᱮ ᱡᱟᱱᱟᱢ
ᱡᱷᱚᱛᱚ ᱜᱮᱠᱚ ᱢᱤᱛᱟᱹᱧ ᱠᱟᱱᱟ
ᱟᱢ ᱫᱚ ᱚᱠᱚᱭ ᱠᱟᱱᱟᱢ ?
ᱥᱟᱶᱛᱟ ᱛᱟᱞᱟ ᱫᱟᱣ
ᱵᱟᱹᱱᱩᱜ ᱮᱠᱟᱞ ᱴᱷᱟᱶ
ᱵᱩᱴᱩᱧ ᱵᱩᱴᱩᱧ ᱦᱟᱹᱥᱩᱧ ᱠᱟᱱᱟ
ᱢᱚᱱᱮ ᱨᱮᱱᱟᱜ ᱜᱷᱟᱣ ᱾
ᱦᱟᱭᱨᱮ ᱱᱚᱣᱟ ᱡᱟᱞᱟ
ᱡᱤᱭᱚᱱ ᱟᱞᱟ ᱡᱷᱟᱞᱟ
ᱵᱟᱹᱱᱩᱜ ᱱᱤᱛ ᱢᱟ ᱱᱚᱣᱟ ᱡᱤᱵᱚᱱ
ᱟᱫᱚ ᱨᱤᱞᱟᱹᱢᱟᱞᱟ ᱾
ᱢᱚᱞᱚᱝ ᱨᱮᱱᱟᱜ ᱞᱤᱠᱷᱚᱱ
ᱠᱷᱚᱱᱰᱚᱱ ᱚᱠᱟ ᱠᱷᱚᱱ ?
ᱯᱚᱥᱟᱜ ᱠᱟᱛᱮ ᱵᱷᱤᱨᱚ ᱵᱷᱚᱨᱚ
ᱵᱟᱹᱱᱩᱜ ᱪᱤᱠᱚᱱ ᱪᱚᱠᱷᱚᱱ ᱾
ᱮᱲᱟᱣ ᱠᱟᱱ ᱠᱚ ᱡᱷᱚᱛᱚ
ᱢᱤᱱᱟᱹᱧ ᱤᱧ ᱢᱚᱛᱚ
ᱛᱤᱢᱤᱱ ᱨᱮᱪᱚ ᱯᱟᱨᱚᱢ ᱟᱠᱟᱱ
ᱵᱩᱜᱤ ᱨᱮᱱᱟᱜ ᱚᱠᱛᱚ ᱾
ᱦᱟᱭᱨᱮ ᱵᱟᱹᱲᱤᱡ ᱚᱨᱥᱚᱝ
ᱱᱤᱛᱤᱧ ᱩᱭᱦᱟᱹᱨ ᱡᱚᱝ
ᱚᱠᱚᱭ ᱟᱫᱚᱭ ᱯᱩᱪᱷᱟᱹᱣ ᱤᱧᱟ
ᱛᱟᱹᱯᱤᱧ ᱥᱟᱱᱟᱧ ᱢᱚᱞᱚᱝ ᱾
***
