ᱵᱚᱸᱜᱟ ᱠᱩᱲᱤ

ᱢᱤᱫ ᱫᱤᱱ ᱥᱮᱛᱟᱜ ᱨᱮ ᱜᱮ ᱱᱤᱪᱚᱞ ᱫᱚ ᱨᱚᱵᱤ ᱛᱟᱠᱚ ᱚᱲᱟᱜ ᱛᱮᱭ ᱪᱟᱞᱟᱣ ᱟᱠᱟᱱᱟ ᱾ ᱟᱹᱰᱤ ᱫᱤᱱ ᱨᱚᱵᱤ ᱛᱟᱠᱤᱱ ᱵᱟᱠᱤᱱ ᱧᱟᱯᱟᱢ ᱟᱠᱟᱱ ᱛᱮ ᱱᱤᱪᱚᱞ ᱫᱚ ᱨᱚᱵᱤ ᱛᱟᱠᱚ ᱚᱲᱟᱜ ᱛᱮᱜᱮᱭ ᱪᱟᱞᱟᱣ ᱮᱱᱟ ᱾ ᱚᱲᱟᱜ ᱥᱮᱴᱮᱨ ᱛᱚᱨᱟ ᱜᱮᱭ ᱧᱮᱞ ᱠᱮᱫᱟ ᱨᱟᱪᱟ ᱨᱮ ᱫᱚᱢᱮ ᱦᱚᱲ ᱠᱚ ᱡᱟᱣᱨᱟ ᱟᱠᱟᱱᱟ ᱾ ᱛᱟᱞᱟ ᱨᱟᱪᱟ ᱨᱮ ᱫᱚ ᱨᱚᱵᱤ ᱠᱚ ᱫᱚᱲᱩᱵ ᱟᱠᱟᱫᱮᱭᱟ ᱟᱨ ᱢᱤᱫᱴᱟᱝ ᱚᱡᱷᱟ ᱨᱚᱵᱤᱭᱟᱜ ᱫᱮᱭᱟ ᱨᱮ ᱥᱟᱨᱡᱚᱢ ᱥᱟᱠᱟᱢ ᱨᱮ ᱥᱩᱱᱩᱢ ᱚᱡᱚᱜ ᱠᱟᱛᱮᱫ ᱮ ᱜᱷᱟᱥᱟᱣ ᱮᱫᱟ ᱾ ᱡᱚᱛᱚ ᱦᱚᱲ ᱠᱚ ᱧᱮᱞ ᱮᱫᱟ ᱚᱡᱷᱟ ᱫᱚ ᱪᱮᱫ ᱮ ᱪᱮᱠᱟᱭᱮᱫᱟ ᱾ ᱱᱤᱪᱚᱞ ᱦᱚᱸ ᱛᱤᱸᱜᱩ ᱠᱟᱛᱮᱫ ᱚᱱᱟ ᱜᱮ ᱧᱮᱞᱮᱞᱮ ᱫᱷᱩᱨᱟᱣ ᱮᱱᱟ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱩᱱᱤ ᱚᱡᱷᱟ ᱫᱚ ᱫᱮᱭᱟ ᱠᱷᱚᱱᱟᱜ ᱥᱟᱨᱡᱚᱢ ᱥᱟᱠᱟᱢ ᱚᱪᱚᱜ ᱠᱟᱛᱮᱫ ᱦᱚᱲ ᱠᱚ ᱥᱟᱢᱟᱝ ᱨᱮ ᱩᱫᱩᱜ ᱠᱟᱛᱮᱫ ᱮ ᱢᱮᱱ ᱠᱮᱫᱟ –

“ᱱᱚᱜᱼᱚᱭ ᱵᱟᱵᱟ, ᱱᱚᱜᱼᱚᱭ ᱱᱚᱣᱟ ᱠᱚ ᱰᱟᱸᱰᱟ ᱨᱮ ᱛᱟᱸᱦᱮ ᱠᱟᱱ ᱛᱮ ᱱᱩᱭ ᱫᱚ ᱰᱟᱸᱰᱟ ᱫᱚ ᱦᱟᱹᱥᱩᱭᱮ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱡᱚᱛᱚ ᱦᱚᱲ ᱟᱫᱚ ᱩᱭᱩᱝ ᱠᱟᱛᱮ ᱠᱚ ᱧᱮᱞ ᱠᱮᱫᱟ ᱥᱟᱨᱡᱚᱢ ᱥᱟᱠᱟᱢ ᱨᱮ ᱥᱮᱸᱜᱮᱞ ᱟᱸᱜᱽᱨᱟ ᱟᱨ ᱢᱤᱫᱴᱟᱝ ᱡᱟᱝ ᱩᱵ ᱛᱮ ᱵᱩᱲᱦᱩ ᱢᱮᱱᱟᱜᱼᱟ ᱾ ᱩᱱᱫᱚ ᱟᱛᱳ ᱦᱚᱲ ᱠᱚᱫᱚ ᱟᱯᱟᱱ ᱟᱹᱯᱤᱱ ᱠᱚ ᱠᱷᱟᱭᱠᱷᱚᱭ ᱵᱟᱲᱟᱭᱮᱫᱟ ᱾ ᱚᱡᱷᱟ ᱫᱚᱭ ᱢᱮᱱ ᱠᱮᱫᱟ – ‘ᱱᱚᱣᱟ ᱠᱚᱧ ᱳᱰᱳᱠ ᱠᱮᱫᱟ ᱟᱫᱚ ᱛᱤᱥ ᱦᱚᱸ ᱰᱟᱸᱰᱟ ᱫᱚ ᱵᱟᱝ ᱦᱟᱥᱳᱭᱮᱭᱟ’ ᱾ ᱫᱮᱱ ᱟᱫᱚ ᱤᱧᱟᱹᱜ ᱯᱟᱣᱱᱟ ᱫᱚ ᱮᱢ ᱠᱟᱹᱛᱤᱧ ᱯᱮ ᱾ ᱨᱚᱵᱤ ᱟᱡ ᱵᱟᱵᱟ ᱫᱚ ᱢᱤᱫᱴᱟᱝ ᱥᱤᱢ ᱥᱟᱺᱰᱤ ᱟᱨ ᱢᱚᱬᱮ ᱥᱟᱭ ᱴᱟᱠᱟᱭ ᱮᱢᱟᱫᱮᱭᱟ ᱾ ᱱᱚᱣᱟ ᱜᱷᱚᱴᱚᱱᱟ ᱫᱚ ᱑᱙᱘᱕ ᱥᱟᱞ ᱨᱮᱱᱟᱜ ᱠᱟᱱᱟ ᱾ ᱩᱱᱫᱚ ᱢᱚᱬᱮ ᱥᱟᱭ ᱴᱟᱠᱟ ᱨᱮᱱᱟᱜ ᱜᱮ ᱟᱹᱰᱤ ᱜᱚᱱᱚᱝ ᱛᱟᱸᱦᱮ ᱠᱟᱱᱟ ᱾ ᱚᱡᱷᱟ ᱵᱟᱵᱟ ᱫᱚ ᱩᱱᱤ ᱥᱤᱢ ᱥᱟᱺᱰᱤ ᱟᱨ ᱢᱚᱬᱮ ᱥᱟᱭ ᱴᱟᱠᱟ ᱦᱟᱛᱟᱣ ᱠᱟᱛᱮᱫ ᱮ ᱪᱟᱞᱟᱣ ᱮᱱᱟ ᱾

ᱟᱛᱳ ᱦᱚᱲ ᱠᱚᱦᱚᱸ ᱡᱮ ᱡᱟᱨ ᱚᱲᱟᱜ ᱛᱮᱠᱚ ᱪᱟᱞᱟᱣ ᱮᱱᱟ ᱾ ᱤᱱᱟᱹ ᱛᱟᱭᱱᱚᱢ ᱱᱤᱪᱚᱞ ᱥᱟᱶᱛᱮ ᱚᱲᱟᱜ ᱦᱚᱲ ᱠᱚ ᱜᱟᱞᱢᱟᱨᱟᱣ ᱠᱮᱫᱟ ᱵᱟᱝᱢᱟ ᱨᱚᱵᱤ ᱫᱚ ᱢᱤᱫ ᱪᱟᱸᱫᱳ ᱞᱟᱦᱟ ᱠᱷᱚᱱ ᱰᱟᱸᱰᱟ ᱦᱟᱥᱳᱭᱮ ᱠᱟᱱᱟ ᱾ ᱰᱟᱠᱛᱟᱨ ᱨᱟᱱ ᱠᱚ ᱡᱚᱢ ᱵᱟᱲᱟ ᱠᱟᱛᱮᱫ ᱦᱟᱥᱳ ᱵᱟᱝ ᱛᱷᱤᱨᱳᱜ ᱠᱟᱱ ᱛᱟᱭᱛᱮ ᱱᱩᱭ ᱚᱡᱷᱟ ᱞᱮ ᱟᱹᱜᱩ ᱞᱮᱫᱮᱭᱟ ᱾ ᱱᱤᱪᱚᱞ ᱫᱚ ᱜᱟᱞᱢᱟᱨᱟᱣ ᱠᱚ ᱟᱸᱡᱚᱢ ᱠᱟᱛᱮᱫ ᱫᱚᱢᱮ ᱫᱚ ᱵᱟᱭ ᱠᱩᱥᱤ ᱞᱮᱱᱟ ᱾ ᱟᱫᱚ ᱨᱚᱵᱤ ᱟᱡ ᱵᱟᱵᱟᱭ ᱢᱮᱛᱟᱭ ᱠᱟᱱᱟ ᱢᱟᱨᱟᱝᱵᱟ, ᱢᱟ ᱛᱚᱵᱮ ᱮᱱᱠᱟ ᱜᱮ ᱤᱧ ᱫᱚ ᱚᱲᱟᱜ ᱤᱧ ᱪᱟᱞᱟᱜ ᱠᱟᱱᱟ ᱾ ᱨᱚᱵᱤ ᱟᱡ ᱵᱟᱵᱟᱭ ᱢᱮᱱ ᱠᱮᱫᱟ ᱵᱟᱹᱵᱩ ᱵᱟᱥᱠᱮᱭᱟᱜ ᱵᱮᱲᱟ ᱦᱳᱭ ᱜᱚᱫ ᱟᱠᱟᱱᱟ ᱠᱟᱹᱴᱤᱡ ᱫᱟᱜ ᱢᱟᱸᱰᱤ ᱡᱚᱢ ᱛᱚᱨᱟᱭ ᱢᱮ ᱾ ᱱᱤᱪᱚᱞ ᱦᱚᱸ ᱫᱟᱜ ᱢᱟᱸᱰᱤ ᱠᱚ ᱡᱚᱢ ᱵᱟᱲᱟ ᱠᱟᱛᱮᱫ ᱚᱲᱟᱜ ᱛᱮᱭ ᱨᱩᱣᱟᱹᱲ ᱠᱟᱱᱟ ᱾ ᱨᱚᱵᱤ ᱫᱚ ᱚᱡᱷᱟᱣᱟᱜ ᱠᱟᱛᱷᱟ ᱠᱚ ᱛᱤᱱᱟᱹᱜ ᱥᱟᱹᱨᱤᱭᱟ ᱚᱱᱟ ᱠᱚ ᱜᱟᱞᱢᱟᱨᱟᱣ ᱞᱟᱹᱜᱤᱫ ᱛᱮ ᱱᱤᱪᱚᱞ ᱥᱟᱶ ᱛᱮ ᱠᱩᱞᱦᱤ ᱢᱩᱪᱟᱹᱫ ᱫᱷᱟᱹᱵᱤᱡ ᱮ ᱥᱮᱱ ᱮᱱᱟ ᱾

ᱨᱚᱵᱤ ᱫᱚ ᱱᱤᱪᱚᱞ ᱮ ᱠᱩᱞᱤ ᱠᱮᱫᱮᱭᱟ ᱼ ᱟᱪᱼᱪᱷᱟ ᱱᱤᱪᱚᱞ ᱟᱢ ᱠᱤ ᱵᱚᱸᱜᱟ, ᱰᱟᱹᱱ, ᱵᱷᱩᱛ ᱱᱚᱣᱟ ᱠᱚᱢ ᱯᱟᱹᱛᱭᱟᱹᱣ ᱟᱠᱚᱣᱟ? ᱱᱤᱪᱚᱞ ᱮ ᱢᱮᱱ ᱠᱮᱫᱟ, ᱯᱟᱹᱛᱭᱟᱹᱣ, ᱵᱟᱝ ᱯᱟᱹᱛᱭᱟᱹᱣ ᱪᱮᱫ ᱤᱧ ᱢᱮᱱᱟ? ᱯᱟᱹᱛᱭᱟᱹᱣ ᱦᱚᱸᱧ ᱢᱮᱱᱟ ᱟᱨ ᱵᱟᱝ ᱯᱟᱹᱛᱭᱟᱹᱣ ᱦᱚᱸᱧ ᱢᱮᱱᱟ ᱾ ᱟᱫᱚ ᱢᱮᱫ ᱛᱮ ᱵᱟᱢ ᱧᱮᱞ ᱞᱮᱠᱚ ᱠᱷᱟᱱ ᱫᱚ ᱪᱮᱫ ᱮᱢ ᱯᱟᱹᱛᱭᱟᱹᱣ ᱟᱠᱚᱣᱟ ᱾ ᱧᱮᱞ ᱢᱮ ᱱᱤᱛ ᱜᱮ ᱟᱢᱟᱜ ᱫᱮᱭᱟ ᱠᱷᱚᱱ ᱟᱸᱜᱽᱨᱟ, ᱡᱟᱝ, ᱩᱵ ᱠᱚ ᱚᱡᱷᱟ ᱵᱟᱵᱟ ᱟᱢᱟᱜ ᱫᱮᱭᱟ ᱠᱷᱚᱱᱮ ᱳᱰᱳᱠ ᱠᱮᱫᱟ, ᱟᱫᱚ ᱟᱢᱟᱜ ᱫᱮᱭᱟ ᱦᱟᱨᱛᱟ ᱠᱚᱫᱚ ᱵᱟᱝ ᱵᱷᱩᱜᱟᱹᱜ ᱞᱮᱱ ᱛᱟᱢᱟ ᱾ ᱢᱩ, ᱢᱚᱪᱟ, ᱞᱩᱛᱩᱨ ᱠᱷᱚᱱ ᱮ ᱳᱰᱳᱠ ᱞᱮᱠᱷᱟᱱ ᱛᱟᱹᱣ ᱚᱱᱟ ᱫᱚ ᱵᱟᱛᱟᱣ ᱜᱟᱱᱚᱜᱼᱟ ᱾ ᱢᱮᱱᱠᱷᱟᱱ ᱫᱮᱭᱟ ᱦᱟᱨᱛᱟ ᱦᱚᱸ ᱵᱟᱝ ᱵᱷᱩᱜᱟᱹᱜ ᱞᱮᱱᱟ ᱟᱨ ᱚᱠᱟ ᱞᱮᱠᱟᱛᱮ ᱡᱟᱝ, ᱟᱸᱜᱽᱨᱟ, ᱩᱵ ᱠᱚᱫᱚ ᱳᱰᱳᱠ ᱮᱱᱟ? ᱱᱚᱣᱟ ᱠᱚᱫᱚ ᱚᱠᱟ ᱞᱮᱠᱟ ᱪᱚᱝ ᱟᱸᱫᱷᱟ ᱯᱟᱹᱛᱭᱟᱹᱣ ᱞᱮᱠᱟ ᱜᱮᱧ ᱵᱩᱡᱷᱟᱹᱣ ᱮᱫᱟ ᱾ ᱱᱚᱝᱠᱟᱱ ᱚᱡᱷᱟ ᱫᱚ ᱛᱤᱦᱤᱧ ᱜᱮᱧ ᱧᱮᱞ ᱠᱮᱫᱮᱭᱟ ᱾ ᱤᱧ ᱢᱮᱱ ᱮᱫᱟ ᱚᱡᱷᱟ ᱡᱟᱦᱟ ᱠᱚᱭ ᱠᱟᱹᱢᱤ ᱠᱮᱫᱟ ᱚᱱᱟ ᱫᱚ ᱵᱳᱜᱮ ᱜᱮᱭᱟ ᱾ ᱩᱱᱤ ᱫᱚ ᱟᱡ ᱡᱟᱦᱟ ᱞᱮᱠᱟᱭ ᱵᱟᱰᱟᱭᱟ ᱠᱟᱹᱢᱤ ᱚᱪᱚᱣᱟᱹᱭ ᱢᱮ ᱾ ᱱᱤᱛᱚᱜ ᱟᱵᱳ ᱫᱚ ᱥᱟᱬᱮᱥ ᱡᱩᱜᱽ ᱨᱮᱵᱚᱱ ᱦᱮᱡ ᱟᱠᱟᱱᱟ ᱾ ᱥᱟᱬᱮᱥ ᱫᱚ ᱱᱚᱝᱠᱟᱱᱟᱜ ᱠᱟᱱᱟ ᱡᱟᱦᱟ ᱫᱚ ᱢᱮᱫ ᱛᱮ ᱵᱟᱢ ᱧᱮᱞᱟ ᱚᱱᱟ ᱫᱚ ᱟᱞᱳᱢ ᱯᱟᱹᱛᱭᱟᱹᱣᱟᱜᱼᱟ ᱾ ᱚᱱᱟᱛᱮᱧ ᱢᱮᱱ ᱮᱫᱟ ᱟᱢ ᱫᱚ ᱱᱚᱣᱟ ᱫᱚ ᱮᱠᱥᱼᱨᱮ ᱠᱟᱛᱮᱫ ᱧᱮᱞ ᱢᱮ ᱾

ᱱᱤᱪᱚᱞᱟᱜ ᱠᱟᱛᱷᱟ ᱞᱮᱠᱟᱛᱮ ᱫᱚᱥᱟᱨ ᱦᱤᱞᱳᱜ ᱥᱮᱛᱟᱜ ᱨᱮᱜᱮ ᱨᱚᱵᱤ ᱫᱚ ᱠᱟᱞᱼᱞᱟ ᱦᱟᱥᱯᱟᱛᱟᱞ ᱛᱮᱭ ᱪᱟᱞᱟᱣ ᱮᱱᱟ ᱾ ᱰᱟᱠᱛᱟᱨ ᱴᱷᱮᱱ ᱧᱮᱞ ᱵᱟᱲᱟ ᱚᱪᱚ ᱠᱟᱛᱮᱫ ᱮᱠᱥᱼᱨᱮ ᱦᱚᱸᱭ ᱠᱚᱨᱟᱣ ᱚᱪᱚ ᱠᱮᱫᱟ ᱾ ᱮᱠᱥᱼᱨᱮ ᱨᱮ ᱧᱟᱢ ᱮᱱᱟ ᱵᱟᱝ ᱢᱟ ᱨᱚᱵᱤᱭᱟᱜ ᱫᱚ ᱵᱳᱱ ᱴᱤᱵᱤ ᱦᱳᱭ ᱟᱠᱟᱱ ᱛᱟᱭᱟ ᱾ ᱰᱟᱠᱛᱟᱨ ᱮ ᱢᱮᱱ ᱠᱮᱫᱟ ᱱᱚᱣᱟ ᱫᱚ ᱮᱛᱚᱦᱚᱵ ᱫᱷᱟᱯ ᱠᱟᱱᱟ ᱾ ᱵᱟᱝᱠᱷᱟᱱ ᱛᱩᱨᱩᱭ ᱪᱟᱸᱫᱳ ᱯᱟᱨᱠᱚᱢ ᱨᱮ ᱜᱤᱛᱤᱡ ᱠᱟᱛᱮᱫ ᱛᱟᱸᱦᱮ ᱦᱳᱭ ᱠᱚᱜ ᱛᱟᱢᱟ ᱾ ᱱᱤᱛᱚᱜ ᱫᱚ ᱨᱟᱱ ᱛᱮᱜᱮ ᱵᱮᱥᱚᱜᱼᱟ ᱾ ᱛᱚᱵᱮ ᱛᱩᱨᱩᱭ ᱪᱟᱸᱫᱳ ᱨᱟᱱ ᱡᱚᱢ ᱞᱟᱜᱟᱣ ᱢᱮᱭᱟ ᱾ ᱟᱫᱚ ᱨᱚᱵᱤ ᱫᱚ ᱞᱮᱛᱟᱲ ᱜᱮ ᱛᱩᱨᱩᱭ ᱪᱟᱸᱫᱳ ᱨᱟᱱ ᱮ ᱡᱚᱢ ᱠᱮᱫ ᱛᱮ ᱰᱟᱸᱰᱟ ᱦᱟᱥᱳ ᱫᱚ ᱵᱮᱥ ᱩᱛᱟᱹᱨᱮᱱ ᱛᱟᱭᱟ ᱾ ᱛᱩᱨᱩᱭ ᱪᱟᱸᱫᱳ ᱛᱟᱭᱚᱢ ᱨᱚᱵᱤ ᱟᱨ ᱱᱤᱪᱚᱞ ᱫᱚ ᱵᱚᱞ ᱠᱷᱮᱞᱳᱸᱰ ᱰᱟᱹᱦᱤ ᱨᱮᱠᱤᱱ ᱧᱟᱯᱟᱢ ᱟᱠᱟᱱᱟ ᱾ ᱱᱤᱪᱚᱞ ᱟᱨ ᱨᱚᱵᱤ ᱫᱚ ᱟᱹᱰᱤ ᱠᱟᱹᱴᱤᱡ ᱨᱮᱱ ᱜᱟᱛᱮ ᱠᱟᱱᱟ ᱠᱤᱱ ᱾ ᱚᱱᱟᱛᱮ ᱵᱟᱱᱟ ᱦᱚᱲ ᱜᱮ ᱵᱟᱱᱟ ᱦᱚᱲᱟᱜ ᱫᱩᱠ ᱥᱩᱠᱷ ᱨᱮᱠᱤᱱ ᱥᱚᱦᱚᱨ ᱥᱮᱴᱮᱨ ᱜᱚᱫᱚᱜᱼᱟ ᱾ ᱨᱚᱵᱤ ᱟᱨ ᱱᱤᱪᱚᱞ ᱛᱟᱠᱚᱣᱟᱜ ᱟᱛᱳ ᱫᱚ ᱱᱟᱥᱮᱱᱟᱜ ᱯᱷᱟᱨᱟᱠ ᱧᱚᱜ ᱜᱮᱭᱟ ᱾ ᱚᱱᱟᱛᱮ ᱡᱟᱣ ᱫᱚ ᱵᱟᱝ ᱠᱤᱱ ᱧᱟᱯᱟᱢ ᱵᱟᱲᱟᱜᱼᱟ ᱾

ᱱᱤᱪᱚᱞ ᱛᱟᱠᱚᱣᱟᱜ ᱟᱛᱳ ᱧᱩᱛᱩᱢ ᱫᱚ ᱪᱤᱨᱩ ᱜᱚᱰᱟ ᱟᱨ ᱨᱚᱵᱤ ᱛᱟᱠᱚᱣᱟᱜ ᱟᱛᱳ ᱧᱩᱛᱩᱢ ᱫᱚ ᱦᱮᱥᱟᱜ ᱜᱷᱩᱴᱩ ᱾ ᱨᱚᱵᱤ ᱛᱟᱠᱚ ᱫᱚ ᱮᱭᱟᱜ ᱵᱚᱭᱦᱟ ᱟᱨ ᱯᱮᱭᱟ ᱢᱤᱥᱨᱟ ᱠᱚ ᱛᱟᱸᱦᱮ ᱠᱟᱱᱟ ᱟᱨ ᱱᱤᱪᱚᱞ ᱛᱟᱠᱚ ᱫᱚ ᱢᱤᱫ ᱠᱚᱲᱟ ᱟᱨ ᱵᱟᱨ ᱠᱩᱲᱤ ᱵᱚᱭᱦᱟ ᱠᱚ ᱛᱟᱸᱦᱮ ᱠᱟᱱᱟ ᱾ ᱩᱱᱠᱤᱱ ᱫᱚ ᱜᱟᱛᱮ ᱞᱮᱥᱟᱲᱦᱮᱫ ᱛᱮ ᱵᱟᱱᱟ ᱦᱚᱲ ᱜᱮ ᱵᱟᱱᱟ ᱦᱚᱲᱟᱜ ᱚᱲᱟᱜ ᱦᱤᱡᱩᱜ ᱥᱮᱱᱚᱜ ᱫᱚ ᱛᱟᱸᱦᱮ ᱠᱟᱱ ᱛᱟᱠᱤᱱᱟ ᱾ ᱨᱚᱵᱤᱭᱟᱜ ᱰᱟᱸᱰᱟ ᱦᱟᱥᱳ ᱵᱮᱥ ᱛᱟᱭᱚᱢ ᱱᱤᱭᱟᱹᱜᱮ ᱯᱳᱭᱞᱳ ᱠᱤᱱ ᱧᱟᱯᱟᱢ ᱮᱱᱟ ᱾ ᱚᱱᱟᱛᱮ ᱱᱤᱪᱚᱞ ᱫᱚ ᱨᱚᱵᱤᱭ ᱠᱩᱞᱤ ᱜᱚᱫ ᱠᱮᱫᱮᱭᱟ ᱚᱢᱟᱜ ᱰᱟᱸᱰᱟ ᱦᱟᱥᱳ ᱫᱚ ᱵᱮᱥ ᱩᱛᱟᱹᱨ ᱟᱠᱟᱱ ᱛᱟᱢᱟ? ᱨᱚᱵᱤᱭ ᱢᱮᱱ ᱠᱮᱫᱟ ᱵᱷᱟᱜᱮ ᱟᱢᱟᱜ ᱠᱟᱛᱷᱟ ᱞᱮᱠᱟᱛᱮ ᱦᱟᱥᱯᱟᱛᱟᱞ ᱤᱧ ᱪᱟᱞᱟᱣ ᱞᱮᱱ, ᱚᱡᱷᱟ ᱵᱟᱵᱟᱣᱟᱜ ᱠᱟᱛᱷᱟ ᱞᱮᱠᱟ ᱛᱮᱠᱷᱟᱱ ᱟᱹᱰᱤ ᱢᱟᱨᱟᱝ ᱵᱤᱯᱚᱫᱽ ᱦᱳᱭ ᱠᱚᱜᱼᱟ ᱾ ᱮᱱ ᱦᱤᱞᱳᱜ ᱫᱚ ᱯᱷᱩᱴᱵᱚᱞ ᱠᱷᱮᱞ ᱧᱮᱞ ᱠᱟᱛᱮᱫ ᱨᱚᱵᱤ ᱛᱟᱠᱚ ᱚᱲᱟᱜ ᱛᱮᱜᱮ ᱵᱟᱱᱟ ᱦᱚᱲ ᱠᱤᱱ ᱪᱟᱞᱟᱣ ᱮᱱᱟ ᱾ ᱪᱟᱞᱟᱜ ᱛᱮ ᱱᱟᱥᱮᱱᱟᱜ ᱠᱤᱱ ᱧᱤᱫᱟᱹ ᱧᱚᱜ ᱮᱱᱟ ᱾ ᱚᱲᱟᱜ ᱨᱮ ᱪᱟᱞᱟᱣ ᱠᱟᱛᱮᱫ ᱨᱚᱵᱤ ᱟᱡ ᱟᱭᱳ ᱫᱚᱭ ᱮᱜᱮᱨ ᱵᱟᱲᱟ ᱠᱮᱫ ᱠᱤᱱᱟ ᱾

ᱢᱮᱛᱟ ᱠᱤᱱ ᱠᱟᱱᱟᱭ, ᱧᱤᱫᱟᱹ ᱧᱩᱛᱟᱹᱫ ᱫᱟᱬᱟᱱ ᱫᱚ ᱵᱟᱝ ᱵᱳᱜᱮᱭᱟ ᱾ ᱡᱟᱦᱟᱱ ᱠᱚᱠᱚ ᱧᱟᱢ ᱵᱚᱛᱮᱡ ᱠᱮᱵᱮᱱᱟ ᱾ ᱫᱚᱥᱟᱨ ᱦᱤᱞᱳᱜ ᱥᱮᱛᱟᱜ ᱨᱮᱜᱮ ᱱᱤᱪᱚᱞ ᱫᱚ ᱚᱲᱟᱜ ᱛᱮᱭ ᱪᱟᱞᱟᱜ ᱠᱟᱱᱟ ᱟᱨ ᱨᱚᱵᱤ ᱫᱚ ᱱᱤᱪᱚᱞᱮ ᱠᱚᱭᱚᱜ ᱜᱚᱫ ᱠᱟᱭ ᱠᱟᱱᱟ ᱾ ᱪᱟᱞᱟᱜ ᱪᱟᱞᱟᱜ ᱛᱮ ᱨᱚᱵᱤᱭ ᱢᱮᱱ ᱠᱮᱫᱟ – ᱱᱤᱪᱚᱞ ᱟᱢᱮᱢ ᱢᱮᱱ ᱮᱫᱟ ᱵᱚᱸᱜᱟ, ᱰᱟᱹᱱ, ᱵᱷᱩᱛ ᱵᱟᱢ ᱯᱟᱛᱭᱟᱹᱣ ᱟᱠᱚᱣᱟ, ᱢᱮᱱᱠᱷᱟᱱ ᱟᱞᱮ ᱟᱛᱳ ᱨᱮ ᱥᱟᱱᱟᱢ ᱦᱚᱲ ᱠᱚ ᱢᱮᱱᱟ ᱛᱟᱞᱟ ᱧᱤᱸᱫᱟᱹ ᱚᱠᱛᱚ ᱟᱨ ᱟᱢᱵᱟᱵᱟᱹᱥᱭᱟᱹ ᱠᱩᱱᱟᱹᱢᱤ ᱠᱚᱨᱮ ᱠᱩᱞᱦᱤ ᱠᱩᱞᱦᱤ ᱛᱮ ᱢᱤᱫᱴᱟᱝ ᱵᱚᱸᱜᱟ ᱠᱩᱲᱤᱭ ᱯᱟᱨᱚᱢᱚᱜᱼᱟ ᱾ ᱟᱨ ᱠᱚ ᱢᱮᱱᱟ ᱡᱟᱦᱟᱭ ᱡᱩᱫᱤ ᱩᱱᱤ ᱵᱚᱸᱜᱟ ᱠᱩᱲᱤ ᱥᱟᱶ ᱛᱮ ᱥᱟᱢᱟᱝ ᱫᱟᱯᱨᱟᱢ ᱮ ᱧᱟᱯᱟᱢᱟ ᱩᱱᱤ ᱫᱚ ᱟᱫᱚ ᱵᱟᱭ ᱵᱟᱧᱪᱟᱣᱜᱼᱟ ᱾ ᱱᱤᱪᱚᱞᱮ ᱢᱮᱱ ᱠᱮᱫᱟ ᱡᱟᱦᱟᱭ ᱠᱚ ᱧᱮᱞ ᱵᱟᱲᱟ ᱟᱠᱟᱫᱮᱭᱟ? ᱨᱚᱵᱤᱭ ᱢᱮᱱ ᱠᱮᱫᱟ – ᱧᱮᱞ ᱫᱚ ᱚᱠᱚᱭ ᱦᱚᱸ ᱵᱟᱝ ᱠᱚ ᱧᱮᱞ ᱟᱠᱟᱫᱮᱭᱟ ᱟᱸᱡᱚᱢ ᱛᱮᱜᱮ ᱦᱚᱲ ᱠᱚ ᱵᱚᱛᱚᱨᱚᱜᱼᱟ ᱚᱱᱟ ᱛᱮ ᱟᱞᱮ ᱟᱛᱳ ᱨᱮ ᱧᱤᱫᱟᱹ ᱧᱩᱛᱟᱹᱫ ᱫᱚ ᱦᱚᱲ ᱠᱚ ᱵᱟᱠᱚ ᱫᱟᱲᱟᱱᱟ ᱾

ᱦᱚᱞᱟ ᱤᱧ ᱜᱚᱜᱚ ᱫᱚ ᱚᱱᱟᱛᱮᱭ ᱮᱜᱮᱨ ᱠᱮᱫ ᱞᱟᱝᱼᱟ ᱾ ᱱᱤᱪᱚᱞᱮ ᱢᱮᱱ ᱠᱮᱫᱟ ᱟᱢ ᱫᱚ ᱛᱟᱦᱚᱞᱮ ᱢᱤᱫ ᱫᱤᱱ ᱩᱱᱤ ᱵᱚᱸᱜᱟ ᱠᱩᱲᱤ ᱧᱮᱞᱮ ᱢᱮ ᱾ ᱥᱟᱹᱨᱤ ᱥᱮ ᱱᱟᱥᱮ ᱵᱚᱸᱜᱟ ᱠᱩᱲᱤᱭ ᱯᱟᱨᱚᱢᱚᱜᱼᱟ ᱾ ᱨᱚᱵᱤᱭ ᱢᱮᱱ ᱠᱮᱫᱟ ᱡᱚᱫᱤ ᱡᱟᱦᱟᱱᱟᱜ ᱦᱳᱭᱳᱜ ᱾ ᱱᱤᱪᱚᱞᱮ ᱢᱮᱱ ᱠᱮᱫᱟ ᱮᱭᱟ ᱟᱯᱮ ᱫᱚ ᱮᱭᱟᱭ ᱵᱚᱭᱦᱟᱜ ᱟᱯᱮ, ᱢᱤᱫ ᱵᱚᱭᱦᱟᱢ ᱜᱚᱡ ᱞᱮᱱᱠᱷᱟᱱ ᱫᱚᱢ ᱪᱮᱠᱟᱜᱼᱟ ᱾ ᱮᱱᱦᱚᱸᱛᱚᱢ ᱯᱨᱚᱢᱟᱱ ᱚᱴᱚ ᱠᱟᱜᱼᱟ ᱥᱟᱹᱨᱤ ᱜᱮ ᱵᱚᱸᱜᱟ ᱠᱩᱲᱤ ᱫᱚ ᱢᱮᱱᱟᱭ ᱜᱮᱭᱟ ᱾ ᱟᱨ ᱡᱩᱫᱤᱧ ᱜᱩᱡᱩᱜᱼᱟ ᱮᱸᱰᱮᱠᱷᱟᱱ ᱚᱠᱚᱭ ᱮ ᱯᱨᱚᱢᱟᱱᱟ? ᱩᱱ ᱫᱚ ᱟᱡ ᱛᱮᱜᱮ ᱯᱨᱚᱢᱟᱱᱚᱜᱼᱟ ᱾ ᱱᱤᱪᱚᱞᱟᱜ ᱩᱫᱽᱜᱟᱹᱣ ᱛᱮ ᱨᱚᱵᱤ ᱫᱚ ᱢᱚᱱᱮ ᱢᱚᱱᱮ ᱛᱮᱭ ᱢᱮᱱ ᱠᱮᱫᱟ ᱵᱚᱸᱜᱟ ᱠᱩᱲᱤ ᱫᱚ ᱮᱸᱰᱮᱠᱷᱟᱱ ᱧᱮᱞᱮ ᱜᱮ ᱦᱳᱭᱚᱜᱼᱟ ᱾ ᱨᱚᱵᱤ ᱫᱚ ᱮᱱ ᱦᱤᱞᱳᱜ ᱠᱷᱚᱱ ᱜᱮ ᱵᱚᱸᱜᱟ ᱠᱩᱲᱤᱭ ᱛᱟᱠ ᱵᱟᱲᱟᱭᱮᱭᱟ ᱾

ᱢᱤᱫ ᱫᱤᱱ ᱛᱟᱞᱟ ᱧᱤᱫᱟᱹ ᱚᱠᱛᱚ ᱠᱩᱞᱦᱤ ᱥᱮᱱ ᱨᱟᱪᱟ ᱡᱚᱝ ᱮ ᱳᱰᱳᱠ ᱞᱮᱱᱟ ᱾ ᱳᱰᱳᱠᱚᱜ ᱚᱠᱛᱚ ᱜᱮ ᱡᱷᱚᱢᱚᱨ ᱡᱷᱚᱢᱚᱨ ᱥᱟᱰᱮᱭ ᱟᱸᱡᱚᱢ ᱠᱮᱫᱟ ᱾ ᱟᱫᱚ ᱟᱠᱚᱣᱟᱜ ᱫᱩᱣᱟᱹᱨ ᱨᱮᱜᱮᱭ ᱛᱟᱲᱟᱜ ᱮᱱᱟ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱧᱮᱞ ᱠᱮᱫᱮᱭᱟᱭ ᱡᱟᱦᱟ ᱞᱮᱠᱟ ᱦᱚᱲ ᱠᱚ ᱞᱟᱹᱭᱟ ᱚᱱᱠᱟ ᱜᱮ ᱢᱤᱫ ᱠᱩᱲᱤ ᱦᱚᱯᱚᱱ ᱮ ᱯᱟᱨᱚᱢ ᱮᱱᱟ ᱾ ᱯᱳᱸᱰ ᱥᱟᱹᱲᱤᱭ ᱵᱟᱸᱫᱮ ᱟᱠᱟᱫᱟ, ᱩᱵ ᱫᱚ ᱟᱲᱟᱜ ᱜᱮ ᱛᱟᱭᱟ ᱟᱨ ᱛᱤ ᱨᱮ ᱥᱩᱸᱧᱡᱟᱹ ᱵᱟᱹᱛᱤ ᱞᱮᱠᱟ ᱪᱮᱫ ᱵᱟᱹᱛᱤ ᱪᱚᱝ ᱮ ᱥᱟᱵ ᱟᱠᱟᱫᱟ ᱟᱨ ᱡᱟᱸᱜᱟ ᱛᱚᱲᱟ ᱫᱚ ᱡᱷᱚᱢᱚᱨ ᱡᱷᱚᱢᱚᱨ ᱥᱟᱰᱮ ᱪᱟᱞᱟᱣᱮᱱ ᱛᱟᱭᱟ ᱾ ᱩᱱ ᱫᱤᱱ ᱫᱚᱭ ᱟᱸᱡᱚᱢ ᱞᱮᱫᱟ ᱛᱤᱦᱤᱧ ᱫᱚ ᱢᱮᱫ ᱛᱮᱭ ᱧᱮᱞ ᱠᱮᱫᱮᱭᱟ ᱾ ᱟᱪᱚᱠ ᱧᱮᱞ ᱦᱚᱛᱮᱡ ᱛᱮ ᱵᱚᱛᱚᱨ ᱮᱱᱟᱭ, ᱟᱫᱚ ᱪᱮᱠᱟ ᱦᱚᱸ ᱵᱟᱭ ᱪᱮᱠᱟ ᱫᱟᱲᱮᱭᱟᱫᱮᱭᱟ ᱾ ᱫᱚᱥᱟᱨ ᱦᱤᱞᱳᱜ ᱥᱮᱛᱟᱜ ᱨᱮᱜᱮ ᱨᱚᱵᱤ ᱫᱚ ᱱᱤᱪᱚᱞ ᱛᱟᱠᱚ ᱚᱲᱟᱜ ᱮ ᱪᱟᱞᱟᱣ ᱮᱱᱟ ᱾ ᱨᱚᱵᱤ ᱫᱚ ᱱᱟᱥᱮᱱᱟᱜ ᱨᱟᱹᱥᱠᱟᱹ ᱧᱚᱜ ᱜᱮ ᱱᱤᱪᱚᱞ ᱮ ᱢᱮᱛᱟᱭ ᱠᱟᱱᱟ – ᱛᱤᱦᱤᱧ ᱫᱚᱧ ᱧᱟᱢ ᱞᱮᱫᱮᱭᱟ ᱾ ᱥᱤᱱᱟᱹᱢ ᱵᱚᱸᱜᱟ ᱠᱩᱲᱤ ᱾ ᱢᱮᱫ ᱛᱮ ᱵᱟᱢ ᱧᱮᱞ ᱞᱮᱠᱷᱟᱱ ᱟᱢ ᱦᱚᱸ ᱵᱟᱢ ᱯᱟᱹᱛᱭᱟᱹᱣᱜᱼᱟ ᱾ ᱱᱤᱪᱚᱞ ᱮ ᱢᱮᱱ ᱠᱮᱫᱟ ᱵᱟᱢ ᱥᱟᱵ ᱞᱮᱫᱮ ᱫᱚ! ᱨᱚᱵᱤᱭ ᱢᱮᱱ ᱠᱮᱫᱟ ᱟᱨ ᱮᱢ ᱥᱟᱵᱮᱭᱟ ᱵᱚᱛᱚᱨ ᱛᱮ ᱡᱤᱣᱤ ᱚᱴᱟᱝ ᱞᱮᱱ ᱛᱤᱧᱟ ᱾ ᱛᱚᱵᱮ ᱧᱮᱞ ᱟᱠᱟᱫᱮ ᱛᱮᱫᱚᱧ ᱥᱟᱵᱮ ᱜᱮᱭᱟ ᱾ ᱡᱩᱫᱤᱭ ᱡᱚᱢᱮᱧᱟ ᱮᱸᱰᱮᱠᱷᱟᱱ ᱟᱢᱮᱧ ᱞᱟᱹᱭ ᱚᱴᱚᱣᱟᱢ ᱠᱟᱱᱟ ᱵᱚᱸᱜᱟ ᱠᱩᱲᱤᱭᱟᱜ ᱠᱟᱛᱷᱟ ᱫᱚ ᱟᱢ ᱜᱮ ᱫᱤᱥᱚᱢ ᱦᱚᱲᱮᱢ ᱞᱟᱹᱭ ᱟᱠᱚᱣᱟ ᱾ ᱱᱤᱪᱚᱞ ᱮ ᱢᱮᱱ ᱠᱮᱫᱟ ᱤᱧ ᱛᱚᱧ ᱢᱮᱱ ᱟᱠᱟᱫ ᱢᱮᱭᱟ ᱥᱟᱸᱜᱮ ᱵᱚᱭᱦᱟ
ᱨᱮ ᱢᱤᱫ ᱵᱚᱭᱦᱟᱢ ᱪᱟᱞᱟᱜ ᱨᱮᱦᱚᱸ ᱵᱚᱸᱜᱟ ᱠᱩᱲᱤ ᱛᱚᱢ ᱧᱟᱢ ᱚᱴᱚ ᱠᱟᱭᱟ ᱾

ᱨᱚᱵᱤᱭ ᱢᱮᱱ ᱠᱮᱫᱟ ᱛᱤᱦᱤᱧ ᱜᱮ ᱟᱢᱵᱟᱵᱟᱹᱥᱭᱟᱹ ᱧᱤᱫᱟᱹ ᱠᱟᱱᱟ, ᱦᱚᱞᱟ ᱫᱚ ᱪᱚᱛᱩᱨᱫᱚᱥᱤ ᱛᱟᱸᱦᱮ ᱠᱟᱱᱟ ᱚᱱᱟ ᱛᱮ ᱯᱟᱥᱮᱫ ᱮ ᱳᱰᱳᱠ ᱞᱮᱱ ᱾ ᱛᱤᱦᱤᱧ ᱦᱚᱸ ᱡᱟᱹᱱᱤᱡ ᱮ ᱳᱰᱳᱠᱚᱜ ᱜᱮᱭᱟ ᱾ ᱳᱰᱳᱠᱚᱜ ᱠᱷᱟᱱᱮ ᱛᱤᱦᱤᱧ ᱫᱚᱧ ᱥᱟᱵᱮ ᱜᱮᱭᱟ ᱾ ᱱᱤᱪᱚᱞ ᱮ ᱢᱮᱱ ᱠᱮᱫᱟ ᱮᱠᱟᱞ ᱛᱮ ᱥᱟᱯᱲᱟᱣ ᱠᱟᱛᱮᱫ ᱜᱮ ᱛᱤᱦᱤᱧ ᱫᱚᱢ ᱛᱟᱸᱦᱮᱱᱟ ᱾ ᱵᱩᱡᱽ ᱠᱟᱢ ᱵᱚᱸᱜᱟ ᱠᱩᱲᱤ ᱵᱚᱞᱮ ᱠᱟᱛᱷᱟ ᱦᱟᱹᱛᱭᱟᱹᱨ ᱫᱚ ᱥᱚᱸᱜᱮ ᱨᱮᱢ ᱫᱚᱦᱚᱭ ᱜᱮᱭᱟ ᱾ ᱨᱚᱵᱤᱭ ᱢᱮᱱ ᱠᱮᱫᱟ ᱚᱱᱟ ᱫᱚ ᱢᱮᱢᱮᱱ ᱵᱟᱝ ᱦᱳᱭᱳᱜᱼᱟ ᱾ ᱱᱤᱪᱚᱞᱮ ᱢᱮᱱ ᱠᱮᱫᱟ ᱴᱷᱤᱠ ᱜᱮᱭᱟ ᱜᱟᱯᱟ ᱥᱮᱛᱟᱜ ᱨᱮ ᱠᱷᱚᱵᱚᱨᱤᱧ ᱦᱟᱛᱟᱣᱟ ᱾ ᱨᱚᱵᱤ ᱫᱚ ᱚᱲᱟᱜ ᱦᱮᱡ ᱠᱟᱛᱮᱫ ᱢᱚᱱᱮ ᱨᱮ ᱫᱤᱞ ᱫᱟᱲᱮ ᱫᱚᱦᱚ ᱠᱟᱛᱮᱫ ᱵᱚᱸᱜᱟ ᱠᱩᱲᱤ ᱥᱟᱵᱮ ᱞᱟᱹᱜᱤᱫ ᱮ ᱥᱟᱹᱛ ᱥᱟᱯᱲᱟᱣ ᱮᱱᱟ ᱾

ᱧᱤᱫᱟᱹ ᱠᱤᱫᱩᱵ ᱫᱟᱠᱟ ᱡᱚᱢ ᱵᱟᱲᱟ ᱠᱟᱛᱮᱫ ᱡᱚᱛᱚ ᱦᱚᱲ ᱠᱚ ᱡᱟᱹᱯᱤᱫ ᱵᱟᱲᱟ ᱠᱮᱫᱟ ᱾ ᱡᱚᱛᱚ ᱦᱚᱲ ᱠᱚ ᱡᱟᱹᱯᱤᱫ ᱵᱟᱲᱟ ᱠᱮᱫ ᱠᱷᱟᱱ ᱨᱚᱵᱤ ᱫᱚ ᱢᱤᱫᱴᱟᱝ ᱦᱟᱯ ᱯᱮᱱᱴ ᱦᱚᱨᱚᱜ ᱠᱟᱛᱮᱫ ᱵᱷᱩᱴᱩᱝ ᱛᱮᱜᱮ ᱢᱤᱫᱴᱟᱝ ᱪᱟᱹᱠᱩ ᱪᱷᱩᱨᱤ ᱟᱨ ᱢᱤᱫᱴᱟᱝ ᱴᱚᱨᱪ ᱥᱚᱸᱜᱮ ᱠᱟᱛᱮᱫ ᱮ ᱛᱟᱲᱟᱜ ᱛᱟᱸᱦᱮᱭᱮᱱᱟ ᱾ ᱴᱷᱤᱠ ᱛᱟᱞᱟ ᱧᱤᱫᱟᱹ ᱚᱠᱛᱚ ᱧᱮᱞᱮ ᱠᱟᱱᱟᱭ ᱦᱚᱞᱟ ᱞᱮᱠᱟ ᱜᱮ ᱵᱚᱸᱜᱟ ᱠᱩᱲᱤ ᱫᱚ ᱞᱟᱛᱟᱨ ᱠᱩᱞᱦᱤ ᱥᱮᱫ ᱠᱷᱚᱱᱮ ᱨᱟᱠᱟᱵ ᱦᱤᱡᱩᱜ ᱠᱟᱱᱟ ᱾ ᱟᱠᱳ ᱫᱩᱣᱟᱹᱨ ᱦᱤᱡᱩᱜ ᱛᱮᱫᱚ ᱨᱚᱵᱤ ᱫᱚᱭ ᱵᱚᱛᱚᱨᱮᱱᱟ ᱾ ᱧᱮᱞ ᱧᱮᱞ ᱛᱮᱜᱮ ᱵᱚᱸᱜᱟ ᱠᱩᱲᱤ ᱫᱚᱭ ᱯᱟᱨᱚᱢ ᱚᱪᱚ ᱠᱮᱫᱮᱭᱟ ᱾ ᱵᱚᱸᱜᱟ ᱠᱩᱲᱤᱭ ᱯᱟᱨᱚᱢ ᱪᱟᱞᱟᱣ ᱮᱱ ᱠᱷᱟᱱ ᱨᱚᱵᱤᱭ ᱢᱮᱱ ᱠᱮᱫᱟ ᱵᱚᱛᱚᱨ ᱞᱮᱱ ᱠᱷᱟᱱ ᱫᱚ ᱵᱟᱝ ᱜᱟᱱᱚᱜᱼᱟ, ᱛᱤᱦᱤᱧ ᱫᱚ ᱡᱟᱦᱟ ᱞᱮᱠᱟ ᱠᱟᱛᱮᱫ ᱥᱟᱵᱮ ᱜᱮ ᱦᱩᱭᱩᱜ ᱛᱤᱧᱟ ᱾ ᱱᱚᱝᱠᱟ ᱢᱚᱱᱮ ᱠᱟᱛᱮᱫ ᱨᱚᱵᱤ ᱫᱚ ᱵᱚᱸᱜᱟ ᱠᱩᱲᱤ ᱛᱟᱭᱚᱢ ᱛᱟᱭᱚᱢ ᱛᱮᱭ ᱯᱤᱪᱷᱟᱹ ᱠᱮᱫᱮᱭᱟ ᱾ ᱵᱚᱸᱜᱟ ᱠᱩᱲᱤ ᱫᱚ ᱞᱟᱦᱟ ᱞᱟᱦᱟ ᱛᱮᱭ ᱛᱟᱲᱟᱢ ᱟᱠᱟᱫᱟ ᱟᱨ ᱨᱚᱵᱤ ᱫᱚ ᱛᱟᱭᱚᱢ ᱛᱟᱭᱚᱢ ᱛᱮ ᱾ ᱚᱠᱟ ᱡᱚᱠᱷᱟᱱ ᱮ ᱩᱭᱦᱟᱹᱨ ᱜᱚᱫ ᱮᱫᱟ ᱯᱟᱪᱮ ᱮ ᱧᱮᱞ ᱧᱟᱢᱤᱧ ᱚᱱᱟᱛᱮ ᱫᱚᱢᱮ ᱥᱩᱨ ᱛᱮᱦᱚᱸ ᱵᱟᱭ ᱪᱟᱞᱟᱜ ᱠᱟᱱᱟ ᱾ ᱵᱚᱸᱜᱟ ᱠᱩᱲᱤ ᱠᱷᱚᱱ ᱥᱟᱺᱜᱤᱧ ᱥᱟᱺᱜᱤᱧ ᱛᱮᱜᱮᱭ ᱪᱟᱞᱟᱜ ᱠᱟᱱᱟ ᱾ ᱛᱟᱲᱟᱢ ᱛᱟᱲᱟᱢ ᱛᱮ ᱠᱩᱞᱦᱤ ᱢᱩᱪᱟᱹᱫ ᱠᱤᱱ ᱯᱟᱨᱚᱢ ᱠᱮᱫᱟ ᱾ ᱠᱩᱞᱦᱤ ᱢᱩᱪᱟᱹᱫ ᱨᱮᱜᱮ ᱢᱤᱫᱴᱟᱝ ᱢᱟᱨᱟᱝ ᱜᱚᱰᱟ ᱢᱮᱱᱟᱜᱼᱟ, ᱵᱚᱸᱜᱟ ᱠᱩᱲᱤ ᱫᱚ ᱚᱱᱟ ᱜᱚᱰᱟ ᱜᱚᱰᱟ ᱛᱮᱭ ᱛᱟᱲᱟᱢ ᱠᱮᱫᱟ ᱾ ᱨᱚᱵᱤ ᱦᱚᱸ ᱵᱚᱸᱜᱟ ᱠᱩᱲᱤ ᱛᱟᱭᱚᱢ ᱛᱮᱜᱮᱭ ᱛᱟᱲᱟᱢ ᱠᱮᱫᱟ ᱾ ᱢᱟᱱᱹᱢᱤ ᱡᱤᱣᱤ ᱵᱚᱞᱮ ᱠᱟᱛᱷᱟ ᱵᱚᱛᱚᱨ ᱦᱚᱸᱭ ᱵᱚᱛᱚᱨᱚᱜ ᱠᱟᱱ ᱜᱮᱭᱟ᱾ ᱠᱷᱟᱱᱮᱠ ᱛᱟᱭᱚᱢ ᱧᱮᱞ ᱠᱮᱫᱟᱭ ᱩᱞᱴᱟᱹ ᱥᱮᱱ ᱠᱷᱟᱱ ᱟᱨ ᱢᱤᱫ ᱴᱟᱝ ᱵᱟᱹᱛᱤ ᱵᱚᱸᱜᱟ ᱠᱩᱲᱤ ᱥᱮᱱ ᱜᱮ ᱦᱤᱡᱩᱜ ᱠᱟᱱᱟ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱚᱱᱟ ᱵᱟᱹᱛᱤ ᱫᱚ ᱵᱚᱸᱜᱟ ᱠᱩᱲᱤ ᱥᱟᱶ ᱛᱮ ᱧᱟᱯᱟᱢ ᱮᱱᱟ ᱟᱨ ᱵᱟᱱᱟᱨ ᱵᱟᱹᱛᱤ ᱤᱲᱤᱡ ᱮᱱᱟ ᱾ ᱱᱤᱛᱚᱜ ᱫᱚ ᱵᱟᱨ ᱦᱚᱲ ᱠᱤᱱ ᱦᱳᱭ ᱮᱱᱟ ᱾ ᱚᱱᱟᱛᱮ ᱨᱚᱵᱤ ᱫᱚ ᱟᱨ ᱦᱚᱸᱭ ᱵᱚᱛᱚᱨ ᱧᱚᱜ ᱮᱱ ᱛᱮ ᱱᱟᱥᱮᱱᱟᱜ ᱯᱷᱟᱨᱟᱠ ᱨᱮᱜᱮ ᱟᱡ ᱦᱚᱸᱭ ᱫᱩᱲᱩᱵ ᱮᱱᱟ ᱾ ᱟᱱᱫᱟᱡᱽ ᱵᱟᱨ ᱜᱷᱚᱱᱴᱟ ᱞᱮᱠᱟ ᱜᱟᱱ ᱛᱟᱭᱚᱢ ᱟᱨᱦᱚᱸ ᱚᱱᱟ ᱠᱤᱱ ᱵᱟᱹᱛᱤ ᱫᱚ ᱡᱩᱞ ᱮᱱᱟ ᱾ ᱢᱤᱫ ᱴᱟᱝ ᱵᱟᱹᱛᱤ ᱫᱚ ᱡᱟᱦᱟ ᱥᱮᱱ ᱠᱷᱚᱱ ᱦᱮᱡ ᱞᱮᱱᱟ ᱚᱱᱛᱮ ᱨᱩᱣᱟᱹᱲ ᱪᱟᱞᱟᱣ ᱮᱱᱟ ᱟᱨ ᱢᱤᱫᱴᱟᱝ ᱵᱟᱹᱛᱤ ᱫᱚ ᱟᱡ ᱥᱮᱱ ᱜᱮ ᱨᱩᱣᱟᱹᱲ ᱦᱤᱡᱩᱜ ᱠᱟᱱᱟ ᱾

ᱨᱟᱵᱤ ᱫᱚ ᱵᱟᱭ ᱥᱟᱦᱚᱥ ᱞᱮᱫᱟ ᱾ ᱚᱱᱟ ᱛᱮ ᱦᱚᱨ ᱠᱷᱚᱱ ᱥᱟᱦᱟ ᱠᱟᱛᱮᱫ ᱮ ᱫᱟᱱᱟᱝ ᱧᱚᱜ ᱮᱱᱟ ᱾ ᱧᱮᱞ ᱠᱮᱫᱮᱭᱟᱭ ᱩᱱᱤ ᱵᱚᱸᱜᱟ ᱠᱩᱲᱤ ᱜᱮᱭ ᱨᱩᱣᱟᱹᱲ ᱦᱤᱡᱩᱜ ᱠᱟᱱᱟ ᱾ ᱩᱱᱦᱚᱸ ᱵᱟᱭ ᱥᱟᱢᱥᱟᱣ ᱫᱟᱲᱮᱭᱟᱫᱟ ᱧᱮᱞ ᱧᱮᱞ ᱛᱮᱜᱮᱭ ᱯᱟᱨᱚᱢ ᱚᱪᱚ ᱠᱮᱫᱮᱭᱟ ᱾ ᱪᱮᱠᱟ ᱛᱮᱭ ᱥᱟᱵᱮᱭᱟ ᱱᱟᱥᱮᱱᱟᱜ ᱮ ᱜᱩᱱᱤ ᱵᱷᱟᱵᱤᱭᱮᱱᱟ ᱾ ᱩᱭᱦᱟᱹᱨ ᱧᱟᱢ ᱠᱮᱫᱟᱭ ᱪᱮᱠᱟ ᱛᱮᱭ ᱥᱟᱵᱮᱭᱟ ᱱᱟᱥᱮᱱᱟᱜ ᱮ ᱜᱩᱱᱤ ᱵᱷᱟᱵᱤᱭᱮᱱᱟ ᱾ ᱩᱭᱦᱟᱹᱨ ᱧᱟᱢ ᱠᱮᱫᱟᱭ ᱟᱠᱳ ᱠᱩᱞᱦᱤ ᱢᱩᱪᱟᱹᱫ ᱨᱮᱜᱮ ᱢᱤᱫᱴᱟᱝ ᱡᱚᱨᱚ ᱵᱟᱲᱮ ᱫᱟᱨᱮ ᱢᱮᱱᱟᱜᱼᱟ ᱾ ᱧᱤᱨ ᱞᱟᱦᱟ ᱠᱟᱛᱮᱫ ᱚᱸᱰᱮ ᱜᱮᱭ ᱛᱟᱲᱟᱜᱚᱜᱼᱟ ᱾ ᱡᱚᱠᱷᱚᱱ ᱜᱮ ᱵᱚᱸᱜᱟ ᱠᱩᱲᱤ ᱚᱱᱟ ᱵᱟᱲᱮ ᱫᱟᱨᱮ ᱵᱩᱴᱟᱹᱭ ᱯᱟᱨᱚᱢᱟ ᱩᱱ ᱜᱮ ᱛᱟᱭᱚᱢ ᱥᱮᱱ ᱠᱷᱱᱮ ᱦᱟᱹᱲᱩᱵ ᱮᱭᱟ ᱾ ᱚᱱᱠᱟ ᱩᱭᱦᱟᱹᱨ ᱵᱟᱲᱟ ᱠᱟᱛᱮᱫ ᱨᱚᱵᱤ ᱫᱚ ᱯᱟᱹᱥᱟᱹᱲᱤ ᱛᱮ ᱧᱤᱨ ᱯᱟᱨᱚᱢ ᱠᱟᱛᱮᱫ ᱚᱱᱟ ᱵᱟᱲᱮ ᱫᱟᱨᱮ ᱵᱩᱴᱟᱹ ᱨᱮᱭ ᱡᱟᱯᱟᱜ ᱮᱱᱟ ᱾

ᱵᱚᱸᱜᱟ ᱠᱩᱲᱤ ᱵᱟᱲᱮ ᱫᱟᱨᱮ ᱵᱩᱴᱟᱹᱭ ᱯᱟᱨᱚᱢ ᱠᱮᱫ ᱥᱟᱶᱛᱮ ᱨᱚᱵᱤ ᱫᱚ ᱵᱚᱸᱜᱟ ᱠᱩᱲᱤ ᱛᱟᱭᱚᱢ ᱥᱮᱱ ᱠᱷᱚᱱᱮ ᱦᱟᱹᱲᱩᱵ ᱜᱚᱫ ᱠᱮᱫᱮᱭᱟ ᱾ ᱵᱚᱸᱜᱟ ᱠᱩᱲᱤ ᱡᱮᱢᱱᱤᱭ ᱦᱟᱹᱲᱩᱵ ᱜᱚᱫ ᱠᱮᱫᱮᱭᱟ ᱩᱱ ᱜᱮ ᱵᱚᱸᱜᱟ ᱠᱩᱲᱤ ᱫᱚ ᱚᱪᱤᱛ ᱠᱟᱛᱮᱫ ᱮ ᱵᱷᱤᱸᱫᱟᱹᱲ ᱜᱚᱫ ᱮᱱᱟ ᱾ ᱨᱚᱵᱤ ᱫᱚ ᱴᱚᱨᱪ ᱞᱟᱭᱤᱴ ᱛᱮᱭ ᱧᱮᱞ ᱠᱮᱫᱮᱭᱟ ᱟᱠᱳ ᱟᱛᱳ ᱨᱮᱱ ᱜᱮ ᱞᱟᱛᱟᱨ ᱠᱩᱞᱦᱤ ᱢᱩᱪᱟᱹᱫ ᱚᱲᱟᱜ ᱠᱚᱨᱮᱱ ᱥᱩᱜᱤ ᱢᱟᱹᱭ ᱠᱟᱱᱟᱭ ᱾ ᱩᱱᱫᱚ ᱨᱚᱵᱤ ᱟᱨᱦᱚᱸᱭ ᱵᱚᱛᱚᱨ ᱜᱚᱫ ᱮᱱᱟ ᱾ ᱪᱮᱫ ᱮ ᱪᱮᱠᱟᱭᱟ ᱵᱟᱭ ᱵᱩᱡᱽ ᱫᱟᱲᱮᱭᱟᱜ ᱠᱟᱱᱟ ᱾ ᱟᱹᱴᱩᱯᱟᱹᱴᱩ ᱟᱭᱟᱜ ᱟᱧᱪᱟᱨ ᱞᱩᱜᱽᱲᱤ ᱛᱮᱜᱮ ᱫᱚᱢᱮᱭ ᱮᱣᱮᱨ ᱠᱮᱫᱮᱭᱟ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱱᱚᱢ ᱥᱩᱜᱤ ᱢᱟᱹᱭ ᱫᱚ ᱫᱤᱥᱟᱹ ᱦᱮᱡ ᱟᱫᱮᱭᱟ ᱾ ᱨᱚᱵᱤ ᱫᱚ ᱪᱟᱹᱠᱩ ᱪᱷᱩᱨᱤ ᱩᱫᱩᱜ ᱠᱟᱛᱮᱫ ᱮ ᱢᱮᱛᱟᱭ ᱠᱟᱱᱟ ᱞᱟᱹᱭ ᱢᱮ ᱟᱢ ᱫᱚᱢ ᱚᱠᱚᱭ ᱠᱟᱱᱟ, ᱥᱩᱜᱤ ᱢᱟᱹᱭ ᱥᱮ ᱵᱚᱸᱜᱟ ᱠᱩᱲᱤ? ᱥᱩᱜᱤ ᱢᱟᱹᱭ ᱦᱚᱸ ᱩᱱᱫᱚ ᱫᱚᱢᱮᱭ ᱵᱚᱛᱚᱨ ᱟᱠᱟᱱᱟ᱾ ᱨᱟᱜ ᱢᱮᱫ ᱟᱦᱟ ᱠᱟᱛᱮᱫ ᱥᱩᱜᱤ ᱢᱟᱹᱭ ᱮ ᱢᱮᱱ ᱠᱮᱫᱟ, ᱫᱟᱫᱟ ᱤᱧ ᱫᱚ ᱵᱚᱸᱜᱟ ᱠᱩᱲᱤ ᱫᱚᱧ ᱵᱟᱝ ᱠᱟᱱᱟ ᱾ ᱨᱚᱵᱤᱭ ᱢᱮᱱ ᱠᱮᱫᱟ ᱪᱮᱫᱟᱜ ᱛᱚᱵᱮ ᱵᱚᱸᱜᱟ ᱠᱩᱲᱤ ᱞᱮᱠᱟ ᱥᱟᱡᱽ ᱠᱟᱛᱮ ᱫᱤᱱᱟᱹᱢ ᱠᱩᱞᱦᱤ ᱠᱩᱞᱦᱤ ᱛᱮᱢ ᱯᱟᱨᱚᱢᱚᱜᱼᱟ? ᱥᱟᱹᱨᱤ ᱥᱟᱹᱨᱤ ᱞᱟᱹᱭ ᱢᱮ ᱵᱟᱝ ᱠᱷᱟᱱᱤᱧ ᱵᱚᱸᱜᱟ ᱢᱮᱭᱟ ᱾

ᱥᱩᱜᱤ ᱢᱟᱹᱭ ᱮ ᱢᱮᱱ ᱠᱮᱫᱟ ᱫᱟᱫᱟ ᱚᱠᱚᱭ ᱴᱷᱮᱱ ᱦᱚᱸ ᱟᱞᱳᱢ ᱞᱟᱹᱭ ᱠᱟᱹᱧᱟ ᱤᱧ ᱫᱚ ᱠᱚᱞᱚᱱᱤ ᱨᱮᱱ ᱢᱤᱫᱴᱟᱝ ᱠᱚᱲᱟ ᱜᱤᱫᱽᱨᱟᱹ ᱥᱟᱶᱛᱮ ᱫᱩᱞᱟᱹᱲ ᱥᱟᱹᱜᱟᱹᱭ ᱢᱮᱱᱟᱜ ᱛᱤᱧᱟ ᱾ ᱩᱱᱤ ᱥᱟᱶ ᱧᱟᱯᱟᱢ ᱞᱟᱹᱜᱤᱫ ᱛᱮᱜᱮ ᱵᱚᱸᱜᱟ ᱠᱩᱲᱤ ᱥᱟᱡᱽ ᱠᱟᱛᱮᱫ ᱤᱧ ᱪᱟᱞᱟᱜᱼᱟ ᱾ ᱟᱵᱳ ᱟᱛᱳ ᱨᱮ ᱵᱚᱸᱜᱟ ᱠᱩᱲᱤ ᱦᱟᱹᱣᱟᱹᱭ ᱟᱠᱟᱱ ᱛᱮ ᱤᱧ ᱫᱚ ᱵᱚᱸᱜᱟ ᱠᱩᱲᱤ ᱞᱮᱠᱟ ᱜᱮ ᱥᱟᱡᱽ ᱠᱟᱛᱮᱫ ᱜᱮᱧ ᱪᱟᱞᱟᱜᱼᱟ ᱾ ᱫᱟᱫᱟ ᱡᱚᱦᱟᱨ ᱠᱟᱛᱮᱫ ᱤᱧ ᱢᱮᱛᱟᱢ ᱠᱟᱱᱟ ᱱᱚᱣᱟ ᱠᱟᱛᱷᱟ ᱚᱠᱚᱭ ᱴᱷᱮᱱ ᱜᱮ ᱟᱞᱚᱢ ᱞᱟᱹᱭᱟ ᱵᱟᱠᱷᱟᱱ ᱤᱧ ᱫᱚ ᱯᱷᱟᱹᱥᱤ ᱜᱩᱡᱩᱜ ᱦᱩᱭᱩᱜ ᱛᱤᱧᱟ ᱾ ᱨᱚᱵᱤᱭ ᱢᱮᱱ ᱠᱮᱫᱟ ᱛᱤᱦᱤᱧ ᱠᱷᱚᱱ ᱟᱫᱚ ᱱᱚᱝᱠᱟ ᱫᱚ ᱟᱞᱚᱢ ᱠᱟᱹᱢᱤᱭᱟ ᱾ ᱨᱚᱵᱤ ᱫᱚ ᱮᱱᱦᱚᱸ ᱵᱟᱭ ᱯᱟᱹᱛᱭᱟᱹᱜ ᱠᱟᱱ ᱜᱮᱭᱟ ᱚᱱᱟᱛᱮ ᱚᱲᱟᱜ ᱫᱷᱟᱹᱵᱤᱡ ᱜᱮᱭ ᱤᱫᱤ ᱚᱴᱚ ᱠᱟᱫᱮᱭᱟ ᱾ ᱫᱚᱥᱟᱨ ᱦᱤᱞᱳᱜ ᱥᱮᱛᱟᱜ ᱨᱮᱜᱮ ᱨᱚᱵᱤ ᱫᱚ ᱟᱨᱦᱚᱸ ᱟᱹᱴᱩᱯᱟᱹᱴᱩ ᱱᱤᱪᱚᱞ ᱴᱷᱮᱱᱮ ᱪᱟᱞᱟᱣ ᱮᱱᱟ ᱾ ᱪᱟᱞᱟᱣ ᱠᱟᱛᱮᱫ ᱜᱮ ᱨᱚᱵᱤ ᱫᱚ ᱱᱤᱪᱚᱞ ᱛᱟᱠᱚ ᱚᱲᱟᱜ ᱨᱮ ᱚᱱᱟ ᱜᱷᱚᱴᱚᱱᱟ ᱫᱚᱭ ᱞᱟᱹᱭ ᱟᱫ ᱠᱚᱣᱟ ᱾ ᱱᱤᱪᱚᱞ ᱫᱚᱭ ᱢᱮᱱ ᱠᱮᱫᱟ ᱧᱮᱞ ᱠᱮᱫᱟᱢ ᱤᱧ ᱡᱟᱦᱟᱧ ᱞᱟᱹᱭ ᱞᱮᱫᱟ ᱚᱱᱟ ᱜᱮ ᱦᱳᱭ ᱮᱱᱟ ᱥᱮ ᱾

***