ᱠᱤᱫᱤᱧ ᱠᱟᱴᱠᱚᱢ ᱡᱤᱭᱚᱱ (ᱵᱟᱰᱟᱭ ᱡᱚᱝ)

ᱱᱚᱣᱟ ᱚᱣᱟᱝ ᱨᱮ ᱥᱤᱨᱡᱚᱱ ᱨᱮᱭᱟᱜ ᱨᱤᱛ ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱾ ᱪᱮᱫ ᱫᱚ ᱪᱮᱫ ᱞᱮᱠᱟ ᱥᱮ ᱚᱠᱟ ᱞᱮᱠᱟᱭ ᱴᱷᱟᱹᱣᱠᱟᱹ ᱟᱠᱟᱫ-ᱟ ᱥᱮᱭ ᱜᱚᱲᱦᱚᱱ ᱟᱠᱟᱫ-ᱟ, ᱚᱱᱟ ᱨᱮᱱᱟᱜ ᱴᱷᱟᱹᱣᱠᱟᱹ ᱵᱟᱹᱱᱩᱜ ᱟᱱᱟ ᱾

ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱥᱤᱨᱡᱚᱱᱤᱭᱟᱹ ᱫᱚ ᱟᱭᱳ ᱦᱚᱲ ᱠᱚᱣᱟᱜ ᱡᱤᱭᱚᱱ ᱚᱱᱠᱟᱭ ᱜᱚᱲᱦᱚᱱ ᱟᱠᱟᱫ-ᱟ, ᱥᱟᱹᱨᱤ ᱜᱮ ᱩᱭᱦᱟᱹᱨ ᱞᱮᱠᱷᱟᱱ ᱟᱹᱰᱤ ᱦᱟᱦᱟᱲᱟ ᱾ ᱟᱭᱳ ᱦᱚᱲᱟᱜ ᱡᱤᱭᱚᱱ ᱫᱚ ᱥᱩᱢᱩᱝ ᱟᱞᱟᱭ, ᱟᱨ ᱟᱞᱟᱭ ᱜᱮ ᱾

ᱚᱱᱠᱟᱱ ᱟᱞᱟᱭ, ᱢᱤᱫ ᱮᱸᱜᱟᱛ ᱫᱚ ᱟᱡ ᱨᱤᱱ ᱜᱤᱫᱽᱨᱟᱹ ᱞᱟᱹᱜᱤᱫ, ᱟᱡ ᱨᱤᱱ ᱦᱚᱯᱚᱱ ᱞᱟᱹᱜᱤᱫ ᱟᱡᱟᱜ ᱡᱤᱣᱤ ᱦᱚᱲᱢᱚ ᱟᱞᱟᱭ ᱪᱮᱛᱟᱱ ᱮ ᱟᱞᱟᱭ ᱜᱚᱫ ᱠᱟᱜ-ᱟ ᱾ ᱢᱩᱪᱟᱹᱫᱚᱜ, ᱢᱟᱹᱬᱤ ᱢᱮᱴᱟᱣᱜ ᱫᱷᱟᱹᱵᱤᱡ ᱮ ᱟᱞᱟᱭ ᱜᱤᱰᱤ ᱜᱚᱫ ᱠᱟᱜ-ᱟ ᱾ ᱱᱟᱥᱮ ᱦᱚᱸ ᱵᱟᱭ ᱩᱭᱦᱟᱹᱨ ᱵᱷᱤᱸᱵᱤᱠ ᱜᱮᱞᱟᱭᱟ, ᱟᱡ ᱨᱤᱱ ᱡᱟᱱᱟᱢ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱡᱤᱣᱤ ᱦᱚᱲᱢᱚ ᱟᱞᱟᱭ ᱜᱚᱫ ᱠᱟᱜ ᱾

ᱱᱚᱣᱟ ᱫᱷᱟᱹᱨᱛᱤ ᱨᱮ ᱡᱟᱦᱟᱸ ᱜᱮ ᱡᱤᱵᱽ ᱢᱮᱱᱟᱜ ᱵᱚᱱᱟ, ᱡᱚᱛᱚ ᱡᱤᱵᱽ ᱜᱮ ᱟᱠᱚ ᱟᱠᱚ ᱨᱤᱱ ᱟᱭᱳ ᱫᱚ ᱟᱹᱰᱤ ᱜᱮᱠᱚ ᱢᱟᱱᱟᱣ ᱠᱚᱣᱟ ᱟᱨ ᱠᱚ ᱫᱩᱞᱟᱹᱲ ᱠᱚᱣᱟ ᱾ ᱤᱠᱷᱟᱹᱱ ᱠᱤᱫᱤᱧ ᱠᱟᱴᱠᱚᱢ ᱫᱚ ᱢᱤᱫᱴᱟᱹᱝ ᱱᱚᱝᱠᱟᱱ ᱡᱤᱵᱽ ᱠᱟᱱᱟ ᱠᱚ, ᱡᱟᱦᱟᱸᱭ ᱨᱤᱱ ᱜᱤᱫᱽᱨᱟᱹ ᱫᱚ ᱟᱠᱚᱭᱤᱡ ᱡᱟᱱᱟᱢ ᱟᱭᱳ ᱥᱮ ᱮᱸᱜᱟᱛ ᱠᱚ ᱡᱚᱢ ᱜᱚᱡᱮᱭᱟ ᱾ ᱱᱚᱣᱟ ᱠᱟᱹᱦᱱᱤ ᱠᱷᱚᱱ ᱢᱤᱫ ᱮᱸᱜᱟᱛᱟᱜ ᱢᱟᱦᱟᱱ ᱜᱩᱱ ᱯᱟᱞᱮ ᱵᱚ ᱵᱩᱡᱷᱟᱹᱣ ᱧᱟᱢ ᱫᱟᱲᱮᱭᱟᱜ-ᱟ ᱾

ᱠᱤᱫᱤᱧ ᱠᱟᱴᱠᱚᱢ ᱫᱚ ᱢᱤᱫᱴᱟᱹᱝ ᱟᱹᱰᱤ ᱜᱮ ᱵᱚᱛᱚᱨ ᱟᱱ ᱡᱤᱵᱽ ᱠᱟᱱᱟᱭ ᱾ ᱚᱱᱠᱟ ᱫᱚ ᱢᱤᱫ ᱠᱤᱫᱤᱧ ᱠᱟᱴᱠᱚᱢ ᱪᱤᱞᱤ ᱦᱚᱸ ᱪᱮᱫ ᱦᱚᱸ ᱵᱟᱭ ᱪᱤᱠᱟᱹ ᱠᱚᱣᱟ ᱾ ᱤᱠᱷᱟᱹᱱ ᱩᱱᱤᱭᱟᱜ ᱦᱚᱲᱢᱚ ᱨᱮ ᱩᱱᱟᱹᱝ ᱵᱤᱥ ᱢᱮᱱᱟᱜ-ᱟ ᱫᱚ ᱡᱩᱫᱤ ᱱᱩᱭ ᱠᱤᱫᱤᱧ ᱠᱟᱴᱠᱚᱢ ᱡᱟᱦᱟᱸᱭ ᱜᱮᱭ ᱜᱮᱨ ᱠᱚᱣᱟ ᱥᱮᱭ ᱛᱩᱲ ᱠᱚᱣᱟ, ᱩᱱᱠᱩ ᱦᱚᱲ ᱫᱚ ᱜᱚᱡ ᱦᱚᱸ ᱠᱚ ᱜᱚᱡ ᱫᱟᱲᱮᱭᱟᱜ-ᱟ ᱾ ᱟᱨ ᱵᱟᱝᱠᱷᱟᱱ ᱠᱤᱫᱤᱧ ᱠᱟᱴᱠᱚᱢ ᱟᱜ ᱥᱩᱸᱜᱟᱹ ᱠᱷᱚᱱ ᱚᱰᱚᱠ ᱟᱠᱟᱱ ᱵᱤᱥ ᱛᱮ ᱦᱚᱲ ᱛᱤ ᱡᱟᱸᱜᱟ ᱦᱚᱸ ᱛᱟᱭ ᱧᱩᱨ ᱫᱟᱲᱮᱭᱟ-ᱟ ᱾

ᱚᱱᱠᱟ ᱫᱚ ᱠᱤᱫᱤᱧ ᱠᱟᱴᱠᱚᱢ ᱫᱷᱤᱨᱤ ᱟᱨ ᱵᱟᱝ ᱤᱴᱟᱹ ᱜᱟᱫᱟ ᱞᱟᱛᱟᱨ ᱠᱚᱨᱮ ᱠᱚ ᱛᱟᱦᱮᱸᱱᱟ ᱾ ᱠᱤᱫᱤᱧ ᱠᱟᱴᱠᱚᱢ ᱫᱚ ᱢᱮᱱ ᱟᱠᱚ ᱒᱐᱐᱐ ᱠᱷᱚᱱ ᱦᱚᱸ ᱵᱟᱹᱲᱛᱤ ᱨᱚᱠᱚᱢ ᱨᱤᱱ ᱢᱮᱱᱟᱜ ᱠᱚᱣᱟ ᱾ ᱟᱨ ᱠᱤᱫᱤᱧ ᱠᱟᱴᱠᱚᱢ ᱫᱚ ᱒᱐ ᱰᱤᱜᱽᱨᱤ ᱠᱷᱚᱱ ᱔᱐ ᱰᱤᱜᱽᱨᱤ ᱥᱮᱞᱥᱤᱭᱚᱥ ᱞᱚᱞᱚᱥᱚᱝ ᱨᱮ ᱛᱟᱦᱮᱸᱱ ᱠᱚ ᱠᱩᱥᱤᱭᱟᱜ-ᱟ ᱾ ᱤᱠᱷᱟᱹᱱ ᱱᱩᱠᱩᱣᱟᱜ ᱦᱚᱲᱢᱚ ᱫᱚ ᱱᱚᱝᱠᱟᱱᱟ ᱡᱮ ᱵᱚᱨᱚᱯᱷ ᱵᱮᱱᱟᱣᱜ ᱨᱮᱭᱟᱲ ᱟᱨ ᱞᱚ ᱛᱚᱨᱚᱡᱚᱜ ᱞᱚᱞᱚ ᱦᱚᱸ ᱠᱚ ᱥᱟᱦᱟᱣ ᱫᱟᱲᱮᱭᱟᱜ ᱜᱮᱭᱟ ᱾

ᱟᱨ ᱛᱤᱱ ᱡᱚᱦᱚᱜ ᱢᱤᱫ ᱮᱸᱜᱟ ᱠᱤᱫᱤᱧ ᱠᱟᱴᱠᱚᱢ ᱟᱡ ᱨᱤᱱ ᱜᱤᱫᱽᱨᱟᱹᱭ ᱡᱟᱱᱟᱢ ᱠᱚᱣᱟ, ᱩᱱᱤ ᱫᱚ ᱢᱤᱫ ᱫᱷᱟᱣ ᱨᱮ ᱑᱐᱐ ᱥᱩᱨ ᱥᱩᱯᱩᱨ ᱜᱤᱫᱽᱨᱟᱹᱭ ᱡᱟᱱᱟᱢ ᱠᱚᱣᱟ ᱾ ᱟᱨ ᱠᱤᱫᱤᱧ ᱠᱟᱴᱠᱚᱢ ᱫᱚ ᱞᱮᱛᱟᱲ ᱠᱟᱹᱴᱤᱡ ᱢᱟᱹᱴᱤᱡ ᱛᱤᱡᱩ ᱡᱚᱢ ᱠᱟᱛᱮ ᱠᱚ ᱡᱤᱣᱤᱫᱚᱜ-ᱟ ᱾ ᱮᱴᱟᱜ ᱛᱤᱡᱩ ᱠᱚ ᱥᱮᱸᱫᱽᱨᱟ ᱡᱚᱦᱚᱜ ᱫᱚ ᱟᱡᱟᱜ ᱦᱚᱲᱢᱚ ᱨᱮᱱᱟᱜ ᱵᱤᱥ ᱮᱴᱟᱜ ᱛᱤᱡᱩᱣᱟᱜ ᱦᱚᱲᱢᱚ ᱨᱮᱭ ᱟᱲᱟᱜᱟ, ᱡᱟᱦᱟᱸ ᱛᱮ ᱩᱱᱠᱩᱣᱟᱜ ᱦᱚᱲᱢᱚ ᱦᱚᱸ ᱵᱟᱭ ᱠᱟᱹᱢᱤᱭᱟ ᱾ ᱟᱨ ᱠᱤᱫᱤᱧ ᱠᱟᱴᱠᱚᱢ ᱫᱚ ᱩᱱᱠᱩ ᱡᱤᱣᱤᱫ ᱛᱮᱜᱮ ᱠᱚ ᱡᱚᱢ ᱠᱚᱣᱟ ᱾

ᱛᱤᱱ ᱡᱚᱦᱚᱜ ᱢᱤᱫ ᱮᱸᱜᱟᱛ ᱟᱡ ᱨᱤᱱ ᱜᱤᱫᱽᱨᱟᱹᱭ ᱡᱟᱱᱟᱢ ᱠᱚᱱᱟ, ᱢᱤᱫ ᱫᱷᱟᱣ ᱨᱮ ᱑᱐᱐ ᱜᱟᱱ ᱜᱤᱫᱽᱨᱟᱹᱭ ᱡᱟᱱᱟᱢ ᱠᱚᱣᱟ ᱾ ᱡᱟᱱᱟᱢ ᱠᱟᱛᱮ ᱩᱱᱤ ᱮᱸᱜᱟᱛ ᱫᱚ ᱟᱡ ᱨᱤᱱ ᱡᱚᱛᱚ ᱦᱚᱯᱚᱱ ᱟᱡᱟᱜ ᱦᱚᱲᱢᱚ ᱫᱮᱭᱟ ᱨᱮ ᱞᱟᱫᱮ ᱠᱟᱛᱮ ᱢᱤᱫ ᱯᱟᱨᱟᱝᱜᱚᱛ ᱴᱷᱟᱶᱮ ᱤᱫᱤ ᱠᱚᱣᱟ ᱾ ᱟᱨ ᱛᱤᱱ ᱵᱷᱩᱨ ᱩᱱᱠᱩ ᱦᱚᱯᱚᱱ ᱵᱟᱠᱚ ᱥᱮᱬᱟᱜ-ᱟ, ᱩᱱ ᱵᱷᱩᱨ ᱩᱱᱠᱩ ᱦᱚᱯᱚᱱ ᱫᱚ ᱟᱡᱟᱜ ᱦᱚᱲᱢᱚ ᱨᱮᱜᱮ ᱞᱟᱫᱮ ᱠᱟᱛᱮᱭ ᱫᱚᱦᱚ ᱠᱟᱠᱚᱣᱟ ᱾ ᱟᱨ ᱤᱱᱟᱹ ᱚᱠᱛᱚ ᱨᱮ ᱩᱱᱠᱩ ᱦᱚᱯᱚᱱ ᱫᱚ ᱟᱠᱚᱣᱟᱜ ᱨᱮᱸᱜᱮᱡ ᱢᱮᱴᱟᱣ ᱞᱟᱹᱜᱤᱫ ᱟᱠᱚᱭᱤᱡ ᱮᱸᱜᱟᱛᱟᱜ ᱦᱚᱲᱢᱚ ᱜᱮ ᱡᱚᱢ ᱡᱚᱢ ᱠᱟᱛᱮ ᱮᱸᱜᱟᱛᱟᱜ ᱦᱚᱲᱢᱚ ᱫᱚ ᱠᱚ ᱠᱷᱚᱠᱮᱭᱟ ᱪᱟᱵᱟᱭᱟ ᱟᱨ ᱩᱱᱠᱩ ᱦᱚᱯᱚᱱ ᱫᱚ ᱮᱸᱜᱟᱛᱟᱜ ᱦᱚᱲᱢᱚ ᱥᱟᱶ ᱞᱟᱴᱷᱟ ᱠᱟᱛᱮ ᱠᱚ ᱛᱟᱦᱮᱸᱱᱟ ᱾ ᱱᱚᱝᱠᱟ ᱛᱮ ᱩᱱᱠᱩ ᱦᱚᱯᱚᱱ ᱫᱚ ᱵᱟᱧᱪᱟᱣ ᱠᱚ ᱛᱟᱦᱮᱸᱱᱟ ᱾ ᱮᱸᱜᱟ ᱠᱤᱫᱤᱧ ᱠᱟᱴᱠᱚᱢ ᱨᱤᱱ ᱦᱚᱯᱚᱱ ᱠᱚ ᱩᱱ ᱵᱷᱩᱨ ᱮᱸᱜᱟᱛ ᱴᱷᱮᱱ ᱞᱟᱴᱷᱟ ᱠᱟᱛᱮ ᱠᱚ ᱛᱟᱵᱮᱸᱱᱟ, ᱛᱤᱱ ᱵᱷᱩᱨ ᱮᱸᱜᱟ ᱠᱤᱫᱤᱧ ᱠᱟᱴᱠᱚᱢ ᱟᱜ ᱦᱚᱲᱢᱚ ᱨᱮᱱᱟᱜ ᱡᱤᱞ ᱵᱟᱝ ᱪᱟᱵᱟ ᱩᱛᱟᱹᱨᱚᱜ ᱠᱟᱱᱟ ᱾ ᱟᱨ ᱛᱤᱱ ᱵᱷᱩᱨ ᱮᱸᱜᱟ ᱵᱟᱭ ᱜᱚᱡ ᱩᱛᱟᱹᱨᱚᱜ-ᱟ ᱾

ᱛᱤᱱ ᱡᱚᱦᱚᱜ ᱮᱸᱜᱟ ᱠᱤᱫᱤᱧ ᱠᱟᱴᱠᱚᱢ ᱟᱜ ᱦᱚᱲᱢᱚ ᱨᱮᱭᱟᱜ ᱡᱤᱞ ᱪᱟᱵᱟᱜ-ᱟ ᱟᱨ ᱩᱱᱤᱭ ᱜᱚᱡ ᱩᱛᱟᱹᱨᱚᱜ-ᱟ, ᱩᱱ ᱡᱚᱦᱚᱜ ᱟᱡ ᱨᱤᱱ ᱦᱚᱯᱚᱱ ᱠᱚ ᱩᱱᱤᱭᱟᱜ ᱦᱚᱲᱢᱚ ᱠᱷᱚᱱ ᱟᱬᱜᱚ ᱠᱟᱛᱮ ᱡᱚᱢᱟᱜ ᱯᱟᱱᱛᱮ ᱠᱚ ᱪᱷᱩᱴᱟᱹᱣᱜ-ᱟ ᱾

ᱚᱱᱟᱛᱮ ᱠᱚ ᱢᱮᱱᱟ, ᱠᱤᱫᱤᱧ ᱠᱟᱴᱠᱚᱢ ᱫᱚ ᱟᱡᱟᱜ ᱯᱩᱨᱟᱹ ᱡᱤᱭᱚᱱ ᱨᱮ ᱢᱤᱫ ᱫᱷᱟᱣ ᱜᱮ ᱦᱚᱯᱚᱱ ᱫᱚᱭ ᱡᱟᱱᱟᱢ ᱠᱚᱣᱟ ᱾ ᱟᱨ ᱜᱤᱫᱽᱨᱟᱹ ᱡᱟᱱᱟᱢ ᱠᱟᱛᱮ ᱩᱱᱤ ᱫᱚᱭ ᱜᱩᱡᱩᱜ-ᱟ ᱾ ᱠᱤᱫᱤᱧ ᱠᱟᱴᱠᱚᱢ ᱮᱸᱜᱟ ᱫᱚ ᱟᱡᱟᱜ ᱠᱩᱥᱤ ᱛᱮ ᱫᱚ ᱵᱟᱭ ᱜᱩᱡᱩᱜ-ᱟ ᱾ ᱩᱱᱤ ᱫᱚ ᱟᱡ ᱨᱤᱱ ᱦᱚᱯᱚᱱ ᱠᱚ ᱦᱟᱨᱟ ᱠᱚ ᱞᱟᱹᱜᱤᱫ ᱜᱮ ᱟᱡᱟᱜ ᱡᱤᱭᱚᱱ ᱮ ᱟᱞᱟᱭᱟ ᱾ ᱱᱚᱣᱟ ᱜᱮ ᱟᱡᱟᱜ ᱮᱸᱜᱟᱛᱚᱜ ᱨᱮᱱᱟᱜ ᱢᱟᱦᱟᱱ ᱠᱟᱹᱢᱤ ᱫᱚ ᱾ ᱡᱟᱦᱟᱸ ᱵᱩᱡᱷᱟᱹᱣ ᱧᱟᱢ ᱫᱚ ᱡᱚᱛᱚ ᱦᱚᱲᱟᱜ ᱫᱟᱲᱮ ᱨᱮᱫᱚ ᱵᱟᱹᱱᱩᱜ ᱟᱱᱟ ᱾

ᱱᱩᱠᱩ ᱡᱤᱵᱽ ᱞᱟᱹᱜᱤᱫ ᱫᱚ ᱥᱤᱨᱡᱚᱱ ᱨᱮᱭᱟᱜ ᱨᱤᱛ ᱜᱮ, ᱥᱤᱨᱡᱚᱱᱤᱭᱟᱹ ᱱᱚᱝᱠᱟᱭ ᱜᱚᱲᱦᱚᱱ ᱟᱠᱟᱫ-ᱟ ᱾

ᱼᱼ ᱢᱟᱭᱱᱚ ᱴᱩᱰᱩ (ᱥᱟᱯᱞᱮᱛ ᱼ Editor)

***