ᱟᱢ ᱜᱮ ᱦᱩᱞᱜᱟᱹᱨᱤᱭᱟᱹ

ᱚᱠᱚᱭ ᱠᱟᱛᱷᱟ ᱨᱮ
ᱚᱠᱚᱭ ᱮ ᱢᱮᱱ ᱠᱮᱫ ᱞᱮᱠᱟ
ᱥᱮᱨᱮᱧ ᱨᱮ ᱚᱱᱚᱬᱦᱮ ᱨᱮ
ᱠᱟᱛᱷᱟ ᱠᱟᱹᱛᱷᱱᱤ ᱨᱮ …

ᱚᱠᱟᱨᱮ ᱢᱮᱱᱟᱢᱟ
ᱟᱢ ᱫᱚ ᱜᱩᱨᱩ ᱜᱚᱢᱠᱮ
ᱫᱮᱥᱮ ᱟᱬᱜᱚ ᱦᱤᱡᱩᱜ ᱢᱮ
ᱫᱮᱥᱮ ᱚᱯᱮᱞ ᱨᱩᱣᱟᱹᱲᱚᱜ ᱢᱮ
ᱟᱢ ᱵᱟᱝ ᱛᱮ ᱪᱤᱠᱤ ᱯᱟᱹᱨᱥᱤ
ᱢᱮᱱᱟᱜ ᱡᱟᱸᱜᱮᱛᱟᱸᱫᱮ ᱿

ᱤᱧ ᱩᱱᱤᱧ ᱢᱮᱛᱟᱭ ᱠᱟᱱᱟ
ᱱᱟᱥᱮ ᱩᱭᱦᱟᱹᱨᱟᱭ ᱥᱟᱱᱟᱹᱧ ᱠᱟᱱᱟ
ᱜᱩᱨᱩ ᱜᱚᱢᱠᱮ ᱦᱚᱸᱛᱚ
ᱢᱟᱹᱱᱢᱤ ᱜᱮᱭ ᱛᱟᱦᱮᱸ ᱠᱟᱱᱟ
ᱟᱨ ᱟᱢ ᱦᱚᱸᱢ ᱢᱟᱹᱱᱢᱤ ᱠᱟᱱ ᱜᱮ
ᱟᱢ ᱴᱷᱮᱱ ᱦᱚᱸ ᱛᱚ ᱢᱮᱱᱟᱜ ᱜᱮ
ᱦᱚᱲᱢᱚ ᱨᱮ ᱛᱤ ᱡᱟᱸᱜᱟ
ᱵᱚᱦᱚᱜ ᱨᱮ ᱯᱮᱨᱮᱡ ᱦᱟᱛᱟᱝ ᱿

ᱡᱟᱦᱟᱸ ᱞᱟᱹᱜᱤᱫ ᱟᱢ
ᱦᱚᱦᱚ ᱟᱭ ᱠᱟᱱᱟᱢ ᱜᱩᱨᱩ ᱜᱚᱢᱠᱮ
ᱡᱟᱦᱟᱸ ᱠᱟᱹᱢᱤ ᱟᱢ
ᱛᱚᱨᱟᱣ ᱥᱟᱱᱟᱢ ᱠᱟᱱᱟ
ᱜᱩᱨᱩ ᱜᱚᱢᱠᱮ ᱛᱤ ᱛᱮ
ᱚᱱᱟ ᱠᱟᱹᱢᱤ ᱫᱚ ᱛᱚᱨᱟᱣ ᱟᱢ
ᱵᱟᱢ ᱜᱟᱱ ᱡᱚᱝ ᱠᱟᱱ ᱛᱮ ᱿

ᱢᱤᱫ ᱫᱷᱟᱣ ᱩᱭᱦᱟᱹᱨ ᱟᱹᱪᱩᱨᱚᱜ ᱢᱮ
ᱦᱚᱲᱢᱚ ᱛᱤ ᱡᱟᱸᱜᱟ ᱩᱭᱩᱝᱚᱜ ᱢᱮ
ᱜᱟᱺᱦᱤᱨ ᱛᱮ ᱱᱟᱥᱮ ᱦᱩᱰᱩᱜᱚᱜ ᱢᱮ
ᱯᱟᱞᱮ ᱪᱚ ᱟᱢᱟᱜ ᱨᱩᱯ ᱨᱮᱜᱮ
ᱜᱩᱨᱩ ᱜᱚᱢᱠᱮ ᱫᱚᱭ ᱚᱯᱮᱞ ᱟᱠᱟᱱ
ᱟᱢ ᱫᱚ ᱟᱢ ᱛᱮᱢ ᱦᱤᱲᱤᱧ ᱥᱟᱹᱨᱤ ᱟᱠᱟᱱ ᱿

ᱦᱮᱞᱟᱣ ᱢᱮ ᱦᱚᱲᱢᱚ ᱛᱤ ᱡᱟᱸᱜᱟ
ᱵᱚᱦᱚᱜ ᱨᱮ ᱟᱞᱚᱢ ᱫᱚᱦᱚᱭ ᱞᱟᱸᱜᱟ
ᱠᱟᱹᱢᱤ ᱨᱮ ᱠᱩᱨᱩᱢᱩᱴᱩᱭ ᱢᱮ
ᱥᱤᱧ ᱧᱤᱫᱟᱹ ᱢᱤᱫᱴᱟᱹᱝ ᱢᱮ
ᱠᱟᱹᱢᱤ ᱢᱮ ᱚᱱᱟ ᱠᱟᱹᱢᱤ ᱟᱢ ᱛᱮ
ᱡᱟᱦᱟᱸ ᱠᱟᱹᱢᱤ ᱞᱟᱹᱜᱤᱫ ᱮᱢ
ᱱᱮᱦᱚᱸᱨᱚᱜ ᱠᱟᱱ ᱜᱩᱨᱩ ᱠᱚ ᱴᱷᱮᱱ ᱿

ᱚᱠᱚᱭ ᱮ ᱵᱟᱰᱟᱭ
ᱯᱟᱞᱮ ᱪᱚ ᱜᱩᱨᱩ ᱜᱚᱢᱠᱮ ᱫᱚ
ᱟᱢ ᱴᱷᱮᱱ ᱜᱮ ᱞᱟᱦᱟ ᱠᱷᱚᱱ ᱟᱨ ᱦᱚᱸ
ᱥᱚᱨᱮᱥ ᱜᱩᱱ ᱟᱹᱜᱩ ᱠᱟᱛᱮᱭ ᱡᱟᱱᱟᱢ ᱟᱠᱟᱱ
ᱟᱨ ᱟᱢ ᱫᱚ ᱦᱤᱸᱥᱟ. ᱦᱤᱨᱠᱟᱹ ᱛᱮ
ᱛᱚᱯᱟ ᱠᱟᱛᱮ
ᱚᱱᱟ ᱥᱟᱱᱟᱢᱟᱜ ᱫᱟᱲᱮᱢ
ᱦᱤᱲᱤᱧ ᱥᱟᱹᱨᱤ ᱟᱠᱟᱫ ᱿

ᱵᱟᱝ ᱨᱟᱜ ᱨᱚᱫᱚᱱ ᱠᱟᱛᱮ
ᱵᱟᱝ ᱱᱮᱦᱚᱸᱨ ᱡᱚᱦᱟᱨ ᱠᱟᱛᱮ
ᱟᱢ ᱴᱷᱮᱱ ᱩᱭᱦᱟᱹᱨ ᱢᱮᱱᱟᱜ ᱠᱷᱟᱱ
ᱟᱢ ᱦᱚᱸ ᱥᱚᱱᱚᱛ ᱠᱷᱚᱱ ᱠᱚᱢ ᱫᱚ ᱵᱟᱝ
ᱪᱷᱩᱴᱟᱹᱣᱜ ᱢᱮ ᱟᱢ
ᱥᱟᱱᱟᱢ ᱟᱸᱥ ᱟᱢ ᱛᱮ ᱟᱢ
ᱯᱩᱨᱟᱹᱣ ᱞᱟᱹᱜᱤᱫ ᱛᱟᱢ ᱿

ᱚᱠᱚᱭ ᱚᱱᱚᱬᱦᱮ ᱨᱮᱭ ᱚᱞ ᱠᱮᱫ ᱞᱮᱠᱟ
ᱠᱟᱹᱦᱱᱤ ᱨᱟᱹᱦᱱᱤ ᱛᱮᱭ
ᱟᱸᱡᱚᱢᱟᱫ ᱵᱚ ᱞᱮᱠᱟ
ᱮ~ ᱛᱤᱨᱞᱟᱹ ᱦᱩᱞᱜᱟᱹᱨᱤᱭᱟᱹ
ᱯᱷᱩᱞᱚ ᱡᱷᱟᱱᱚ ᱟᱹᱵᱤᱱ
ᱚᱯᱮᱞᱚᱜ ᱵᱤᱱ ᱫᱮᱞᱟ ᱥᱮ
ᱟᱹᱵᱤᱱ ᱫᱚ ᱚᱠᱟᱭᱮᱱᱟ ᱵᱤᱱ ᱿

ᱩᱱᱤ ᱚᱱᱚᱬᱦᱤᱭᱟᱹ ᱨᱟᱹᱦᱱᱤᱭᱟᱹ ᱛᱮᱦᱮᱧ
ᱱᱚᱣᱟ ᱢᱮᱢᱮᱱ ᱥᱟᱱᱟᱹᱧ ᱠᱟᱱ ᱹᱹᱹ

ᱟᱢ ᱫᱚ ᱛᱤᱨᱞᱟᱹᱢ ᱪᱤᱠᱟᱹᱭᱮᱱᱟ
ᱩᱱᱠᱤᱱ ᱞᱮᱠᱟ ᱵᱟᱹᱱᱩᱜ ᱛᱟᱢ ᱛᱮ
ᱦᱚᱲᱢᱚ ᱨᱮ ᱛᱤ ᱡᱟᱸᱜᱟ
ᱵᱚᱦᱚᱜ ᱦᱟᱛᱟᱝ
ᱪᱤᱠᱟᱹ ᱟᱢ ᱛᱮ ᱵᱟᱢ ᱜᱟᱱ ᱡᱚᱝ
ᱯᱷᱩᱞᱚ ᱡᱷᱟᱱᱚ ᱨᱮ ᱛᱟᱢ ᱛᱮᱛᱟᱝ ᱿

ᱟᱢ ᱢᱟ ᱩᱱᱠᱤᱱ ᱠᱷᱚᱱ
ᱯᱷᱩᱨᱜᱟᱹᱞ ᱚᱛ ᱨᱮ
ᱱᱚᱜ ᱚᱭ ᱮᱢ ᱡᱟᱱᱟᱢ ᱟᱠᱟᱱ
ᱥᱟᱱᱟᱢ ᱞᱮᱠᱟᱱ ᱥᱮᱪᱮᱫ ᱥᱤᱠᱷᱱᱟᱹᱛ ᱛᱮ
ᱚᱱᱮᱢ ᱢᱟᱨᱥᱟᱞ ᱟᱠᱟᱱ
ᱚᱠᱚᱭ ᱫᱚᱭ ᱥᱮᱵᱮᱫ ᱟᱠᱟᱫ ᱢᱮᱛᱮ
ᱵᱟᱝ ᱜᱮᱢ ᱜᱟᱱ ᱡᱚᱝ ᱠᱟᱱ ᱟᱢ ᱛᱮ ᱿

ᱞᱟᱹᱠᱛᱤ ᱵᱟᱹᱱᱩᱜ ᱦᱩᱞᱥᱟᱹᱭ ᱦᱚᱨ ᱨᱮ
ᱛᱮᱦᱮᱧ ᱠᱷᱟᱸᱰᱟ ᱠᱟᱹᱯᱤ
ᱥᱟᱦᱮᱫ ᱦᱟᱛᱟᱣ ᱡᱚᱝ ᱨᱮ
ᱞᱚᱲᱟ ᱵᱟᱹᱱᱩᱜ ᱦᱟᱹᱯᱤ ᱦᱟᱹᱯᱤ
ᱪᱤᱱᱦᱟᱹᱣᱜ ᱢᱮ ᱟᱢ ᱛᱮ ᱛᱮᱦᱮᱧ
ᱯᱟᱞᱮ ᱟᱢ ᱜᱮ ᱯᱷᱩᱞᱚ ᱡᱷᱟᱱᱚ ᱿

ᱮᱱ ᱦᱚᱸ ᱵᱟᱹᱱᱩᱜ ᱢᱮ ᱟᱢ ᱫᱚ ᱪᱤᱨᱜᱟᱹᱞ
ᱥᱟᱺᱜᱤᱧ ᱨᱮ ᱪᱮᱫᱟᱜ
ᱟᱢ ᱠᱷᱚᱱ ᱯᱷᱩᱨᱜᱟᱹᱞ
ᱦᱤᱸᱥᱟᱹ ᱦᱤᱲᱤᱧ ᱢᱮ
ᱥᱩᱭᱟᱹ ᱠᱷᱚᱱ ᱥᱟᱦᱟᱜ ᱢᱮ
ᱥᱮᱪᱮᱫ ᱡᱩᱜᱽ ᱨᱮ ᱟᱞᱚᱢ ᱥᱮᱵᱮᱫᱚᱜ
ᱦᱚᱲᱟᱜ ᱛᱟᱲᱟᱢ ᱛᱮ ᱟᱞᱚᱢ ᱞᱮᱵᱮᱫᱚᱜ
ᱟᱢ ᱴᱷᱮᱱ ᱜᱮ ᱢᱮᱱᱟᱜ ᱠᱤᱱ ᱩᱱᱠᱤᱱ
ᱦᱩᱞᱜᱟᱨᱤᱭᱟᱹ ᱯᱷᱩᱞᱚ ᱡᱷᱟᱱᱚ ᱿

ᱱᱚᱱᱚᱞ ᱦᱟᱹᱛᱭᱟᱹᱨ
ᱥᱟᱵᱽ ᱢᱮ ᱦᱟᱵᱟᱜᱽ ᱢᱮ
ᱥᱚᱨ ᱥᱚᱨ ᱥᱟᱨ ᱫᱚ ᱛᱮᱨᱟᱝ ᱢᱮ
ᱛᱤᱸᱜᱩᱱ ᱢᱮ ᱞᱟᱹᱣᱲᱤᱭᱟᱹ
ᱟᱹᱭᱩᱨᱤᱭᱟᱹ ᱫᱤᱞᱫᱟᱹᱨᱤᱭᱟᱹ
ᱛᱤᱨᱞᱟᱹ ᱫᱟᱲᱮ ᱞᱟᱦᱟᱭ ᱢᱮ
ᱥᱟᱱᱟᱢ ᱵᱟᱹᱲᱤᱡ ᱥᱟᱦᱟᱭ ᱢᱮ
ᱟᱢ ᱫᱚ ᱠᱟᱱᱟᱢ ᱦᱩᱞᱥᱟᱹᱭᱤᱭᱟᱹ
ᱟᱢ ᱜᱮ ᱦᱩᱞᱜᱟᱨᱤᱭᱟᱹ ᱿

***