ᱜᱚᱲᱚᱢ ᱠᱩᱲᱤ

ᱵᱩᱨᱩ ᱵᱩᱨᱩ ᱯᱟᱨᱚᱢ ᱠᱟᱛᱮ
ᱜᱮᱞ ᱵᱟᱨ ᱵᱩᱨᱩ ᱯᱟᱨᱚᱢ ᱠᱟᱛᱮ
ᱜᱚᱲᱚᱢ ᱠᱩᱲᱤᱭ ᱥᱮᱴᱮᱨᱮᱱ
ᱤᱧ ᱫᱚ ᱟᱹᱰᱤᱧ ᱠᱩᱥᱤᱭᱮᱱ ᱿

ᱥᱟᱢᱩᱫᱽ ᱥᱟᱢᱩᱫᱽ ᱯᱟᱨᱚᱢ ᱠᱟᱛᱮ
ᱮᱭᱟᱭ ᱥᱟᱢᱩᱫᱽ ᱯᱟᱨᱚᱢ ᱠᱟᱛᱮ
ᱜᱚᱲᱚᱢ ᱠᱩᱲᱤᱭ ᱥᱮᱴᱮᱨ ᱟᱠᱟᱱ
ᱤᱧ ᱢᱟ ᱟᱹᱰᱤᱧ ᱨᱟᱹᱥᱠᱟᱹ ᱟᱠᱟᱱ ᱿

ᱟᱛᱟᱝ ᱫᱟᱨᱟᱢ ᱜᱚᱲᱚᱢ ᱠᱩᱲᱤ
ᱤᱧ ᱫᱚ ᱢᱟᱥᱮ ᱛᱩᱲᱤ ᱜᱷᱩᱲᱤ
ᱧᱮᱯᱮᱞ ᱛᱚᱨᱟ ᱦᱟᱨᱮ ᱯᱷᱟᱨᱮ
ᱫᱩᱲᱩᱵ ᱛᱤᱸᱜᱩᱱ ᱚᱠᱟᱨᱮ ᱿

ᱤᱧ ᱢᱟ ᱜᱚᱴᱟ ᱰᱩᱸᱰᱷᱟᱹ ᱰᱩᱸᱰᱷᱤ
ᱨᱟᱪᱟ ᱢᱟᱛᱚ ᱰᱷᱚᱰᱟ ᱰᱷᱩᱰᱷᱤ
ᱵᱟᱨ ᱛᱤᱛᱮ ᱟᱛᱟᱝ ᱞᱟᱹᱜᱤᱫ
ᱛᱤ ᱛᱤᱧ ᱢᱟᱹᱧ ᱞᱟᱦᱟ ᱠᱮᱫ ᱿

ᱠᱚᱲᱟᱢ ᱠᱚᱞᱮ ᱨᱮ ᱦᱚᱵᱚᱨ ᱠᱟᱛᱮ
ᱪᱮᱨᱮᱡ ᱠᱮᱫᱮᱭᱟᱹᱧ ᱫᱩᱞᱟᱹᱲ ᱟᱛᱮ
ᱢᱩᱞᱩᱡ ᱢᱮᱥᱟᱭ ᱞᱟᱸᱫᱟ ᱟᱹᱫᱤᱧ
ᱵᱟᱞᱮ ᱞᱩᱴᱤᱭ ᱵᱤᱸᱰᱩᱡ ᱟᱹᱫᱤᱧ ᱿

ᱢᱤᱨᱩ ᱴᱷᱚᱱᱴᱟ ᱢᱩ ᱛᱟᱭ ᱢᱟ
ᱟᱭᱱᱚᱢ ᱠᱟᱡᱚᱞ ᱢᱮᱫ ᱛᱟᱭ ᱢᱟ
ᱠᱚᱭᱚᱜ ᱛᱟᱭ ᱢᱟ ᱰᱷᱩᱨᱩ ᱰᱷᱩᱨᱩ
ᱦᱚᱵᱚᱨ ᱨᱮᱢᱟ ᱠᱩᱨᱩ ᱠᱩᱨᱩ ᱿

ᱵᱟᱦᱟ ᱛᱩᱞᱟᱹᱢ ᱦᱚᱲᱢᱚ ᱛᱟᱭ
ᱥᱩᱱᱩᱢ ᱥᱟᱵᱚᱱ ᱚᱡᱚᱜᱟᱭ
ᱥᱟᱯᱷᱟ ᱥᱟᱹᱯᱷᱤ ᱛᱟᱸᱦᱮᱱ ᱥᱟᱱᱟᱭ
ᱡᱚᱛᱚᱱ ᱨᱮᱞᱮ ᱫᱚᱦᱚ ᱠᱟᱭ ᱿

ᱨᱚᱲ ᱞᱟᱸᱫᱟ ᱛᱮ ᱵᱷᱩᱞᱟᱹᱣ ᱠᱟᱢ
ᱞᱟᱸᱜᱟ ᱨᱮᱸᱜᱮᱡ ᱮᱢ ᱦᱤᱲᱤᱧ ᱛᱟᱢ
ᱜᱷᱟᱱᱮ ᱜᱷᱟᱱᱮ ᱠᱷᱚᱡᱚᱜ ᱚᱠᱟ
ᱡᱚᱢᱟᱭ ᱛᱳᱣᱟ ᱫᱟᱠᱟ ᱿

ᱵᱷᱚᱨᱟᱣ ᱠᱟᱛᱟᱭ ᱦᱩᱰᱤᱧ ᱛᱩᱸᱵᱟᱹ
ᱢᱮᱱᱟᱜ ᱛᱟᱞᱮ ᱠᱩᱸᱵᱟᱹ
ᱥᱤᱧ ᱮ ᱡᱟᱹᱯᱤᱫᱽ ᱧᱤᱫᱟᱹᱭ ᱨᱟᱰᱟᱢ
ᱠᱚᱭᱚᱜ ᱨᱮᱜᱮᱭ ᱫᱚᱦᱚ ᱠᱟᱢ ᱿

ᱫᱮᱞᱟ ᱟᱫᱚ ᱡᱷᱚᱛᱚ ᱠᱚᱜᱮ
ᱛᱟᱦᱮᱱ ᱟᱵᱚᱱ ᱥᱚᱸᱜᱮ ᱞᱚᱸᱜᱮ
ᱜᱟᱛᱮ ᱜᱟᱯᱟᱛᱮ ᱥᱟᱨᱟ ᱜᱷᱟᱹᱲᱤ
ᱢᱮᱢᱮᱱ ᱠᱟᱱᱟᱭ ᱜᱚᱲᱚᱢ ᱠᱩᱲᱤ ᱾᱾

***