ᱫᱩᱞᱠᱟᱹᱣ ᱞᱮᱱᱟ ᱫᱷᱟᱹᱨᱛᱤ
ᱜᱩᱦᱩᱰ ᱴᱟᱢᱟᱠ ᱥᱟᱰᱮ ᱛᱮ,
ᱪᱤᱨᱜᱟᱹᱞ ᱞᱮᱱ ᱠᱚ ᱠᱷᱮᱨᱣᱟᱲ
ᱥᱟᱹᱞ ᱥᱟᱠᱚᱣᱟ ᱥᱟᱰᱮ ᱛᱮ !
ᱦᱩᱞᱟᱹᱪᱟᱢᱠᱟ ᱞᱮᱱᱟ ᱫᱷᱟᱹᱨᱛᱤ
ᱥᱤᱫᱩ ᱠᱟᱹᱱᱦᱩ ᱧᱩᱛᱩᱢ ᱛᱮ,
ᱪᱩᱢᱩᱞ ᱪᱩᱢᱩᱞ ᱞᱮᱱᱟ ᱠᱚ ᱵᱟᱹᱭᱨᱤ
ᱠᱷᱮᱨᱣᱟᱲ ᱡᱩᱢᱤᱫᱽ ᱧᱮᱞ ᱛᱮ !
ᱥᱤᱫᱩ, ᱠᱟᱹᱱᱦᱩ, ᱪᱟᱸᱫᱽ, ᱵᱷᱟᱭᱨᱳ,
ᱯᱷᱩᱞᱚ, ᱡᱷᱟᱱᱚ, ᱦᱩᱞᱜᱟᱹᱨᱤᱭᱟᱹ ᱦᱩᱞ ᱛᱮ,
ᱛᱩᱯᱩᱫ ᱞᱮᱱ ᱠᱚ ᱠᱷᱮᱨᱣᱟᱲ ᱵᱤᱨ ᱠᱚ
ᱦᱚᱠ ᱟᱹᱭᱫᱟᱹᱨᱤ ᱠᱷᱟᱹᱛᱤᱨ ᱛᱮ !
ᱞᱤᱸᱡᱤ ᱞᱮᱱᱟ ᱢᱟᱭᱟᱢ ᱜᱟᱰᱟ,
ᱡᱟᱱᱟᱢ ᱫᱤᱥᱚᱢ ᱠᱷᱟᱹᱛᱤᱨ ᱛᱮ,
ᱟᱞᱟᱭ ᱞᱮᱱᱟ ᱡᱩᱣᱟᱹᱱ ᱡᱤᱣᱤ
ᱟᱵᱳ ᱟᱹᱫᱤᱢ ᱡᱟᱹᱛᱤ ᱠᱷᱟᱹᱛᱤᱨ ᱛᱮ !
ᱥᱟᱞᱜᱟᱣ ᱠᱚᱜ ᱢᱟ ᱦᱩᱞ ᱥᱮᱸᱜᱮᱞ,
ᱟᱹᱫᱤᱢ ᱡᱟᱹᱛᱤ ᱵᱟᱧᱪᱟᱣ ᱠᱷᱟᱹᱛᱤᱨ ᱛᱮ,
ᱩᱭᱦᱟᱹᱨ ᱛᱟᱦᱮᱱ ᱢᱟ ᱦᱩᱞ ᱢᱟᱦᱟᱸ
ᱠᱷᱮᱨᱣᱟᱲ ᱡᱩᱢᱤᱫᱽ ᱠᱷᱟᱹᱛᱤᱨ ᱛᱮ !
ᱟᱫᱚ ᱟᱨ ᱵᱤᱥᱛᱤ ᱵᱟᱝ ᱞᱟᱹᱭ ᱠᱟᱛᱮ
ᱢᱩᱪᱟᱹᱫ ᱨᱮ ᱱᱤᱱᱟᱹᱝ ᱜᱤᱧ ᱢᱮᱻᱱᱟ …
ᱵᱤᱫᱽ ᱢᱮ ᱠᱷᱩᱱᱴᱤ,
ᱮᱴᱮᱫᱽ ᱢᱮ ᱡᱷᱟᱹᱱᱴᱤ,
ᱮᱨ ᱢᱮ ᱤᱛᱟᱹ ,
ᱨᱟᱠᱷᱟᱭ ᱢᱮ
ᱱᱚᱣᱟ ᱥᱚᱱᱚᱛ
ᱥᱟᱱᱛᱟᱲ ᱡᱟᱹᱛᱤ ᱾
ᱚᱨᱚᱝ ᱢᱮ ᱥᱟᱠᱚᱣᱟ,
ᱛᱮᱨᱟᱝ ᱢᱮ ᱥᱟᱨ,
ᱢᱟᱨᱥᱟᱞ ᱢᱮ ᱡᱟᱹᱛᱤ,
ᱟᱨ ᱩᱭᱦᱟᱹᱨ ᱛᱟᱢ ᱟᱢᱟᱜ
ᱡᱟᱱᱟᱢ ᱱᱤᱛᱤ … !!!
***
