ᱡᱟᱦᱟᱸ ᱡᱤᱱᱤᱥ ᱥᱟᱹᱨᱤᱭᱟ, ᱚᱱᱟ ᱫᱚ ᱥᱟᱹᱨᱤ ᱜᱮᱭᱟ ᱾ ᱥᱤᱧ ᱪᱟᱸᱫᱚᱣᱟᱜ ᱢᱟᱨᱥᱟᱞ ᱪᱮᱫ ᱛᱮᱦᱚᱸ ᱵᱟᱝ ᱫᱟᱯᱟᱞᱚᱜ ᱞᱮᱠᱟ, ᱥᱟᱹᱨᱤ ᱦᱩᱱᱟᱹᱨ ᱦᱚᱸ ᱵᱟᱝ ᱜᱮ ᱩᱠᱩᱱᱟ ᱾
ᱱᱚᱝᱠᱟ ᱜᱮ ᱥᱟᱱᱛᱟᱲ ᱥᱟᱶᱛᱟ ᱨᱤᱱᱤᱡ ᱢᱤᱫ ᱦᱚᱯᱚᱱ, ᱵᱟᱹᱵᱩ ᱨᱟᱢᱡᱤᱛ ᱴᱩᱰᱩ, ᱡᱟᱦᱟᱸᱭ ᱫᱚ ᱟᱵᱚᱣᱟᱜ ᱡᱟᱹᱛᱤ ᱥᱟᱶᱛᱟ ᱞᱟᱹᱜᱤᱫ, ᱟᱵᱚᱣᱟᱜ ᱪᱤᱠᱤ, ᱯᱟᱹᱨᱥᱤ ᱞᱟᱹᱜᱤᱫ ᱢᱤᱫ ᱢᱟᱨᱥᱟᱞ ᱜᱮᱭ ᱥᱟᱡᱟᱣ ᱟᱠᱟᱱᱟ ᱾ ᱩᱱᱤ ᱫᱚ ᱟᱵᱚᱣᱟᱜ ᱥᱟᱶᱛᱟ ᱞᱟᱹᱜᱤᱫ ᱢᱤᱫ God Gift ᱜᱮ ᱢᱮᱱᱛᱮ ᱢᱟᱱᱟᱣ ᱮ ᱵᱟᱝ ᱵᱟᱹᱲᱤᱡᱚᱜ-ᱟ ᱟᱨ ᱱᱚᱣᱟ ᱠᱟᱛᱷᱟ ᱦᱚᱸ ᱚᱠᱚᱭ ᱴᱷᱮᱱ ᱦᱚᱸ ᱵᱟᱝ ᱩᱠᱩ ᱟᱠᱟᱱᱟ ᱾ ᱚᱱᱮ, ᱠᱟᱛᱷᱟ ᱨᱮ ᱠᱚ ᱢᱮᱱᱟ – ᱡᱟᱦᱟᱸ ᱡᱟᱦᱟᱸ ᱵᱮᱲᱟ ᱨᱮ ᱢᱤᱫ ᱡᱟᱹᱛᱤ ᱥᱮ ᱥᱟᱶᱛᱟ ᱨᱮᱱᱟᱜ ᱡᱩᱞᱩᱜ ᱵᱟᱹᱛᱤ ᱫᱷᱩᱞᱩᱢᱩᱞᱩᱜ-ᱟ, ᱚᱱᱠᱟᱱ ᱚᱠᱛᱚ ᱨᱮ ᱚᱱᱟ ᱵᱟᱹᱛᱤ, ᱟᱸᱡᱽᱞᱮ ᱛᱤ ᱛᱮ ᱨᱟᱠᱷᱟ ᱫᱚᱦᱚᱭ ᱞᱟᱹᱜᱤᱫ ᱪᱟᱸᱫᱚ ᱵᱚᱸᱜᱟ ᱟᱡᱟᱜ ᱢᱤᱫ ᱛᱷᱩᱢ ᱮ ᱠᱩᱞᱟ ᱚᱱᱟ ᱥᱟᱶᱛᱟ ᱛᱮ ᱡᱟᱦᱟᱸᱭ ᱵᱟᱝ ᱡᱟᱦᱟᱸᱭ ᱨᱩᱯ ᱨᱮ ᱾
ᱳᱰᱤᱥᱟ ᱯᱚᱱᱚᱛ, ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱱᱟᱜ ᱜᱚᱵᱤᱸᱫᱽᱯᱩᱨ ᱟᱹᱛᱩ ᱨᱮ ᱑᱙᱙᱖ ᱥᱟᱹᱦᱤᱛ ᱨᱮ ᱡᱟᱱᱟᱢ ᱟᱠᱟᱱ ᱨᱟᱢᱡᱤᱛ ᱴᱩᱰᱩ ᱾ ᱡᱟᱦᱟᱸᱭ ᱫᱚ ᱯᱩᱭᱞᱩ ᱮᱱᱰᱨᱚᱭᱮᱰ ᱯᱷᱳᱱ ᱟᱡᱟᱜ ᱛᱤ ᱨᱮ ᱦᱮᱡ ᱞᱮᱱ ᱵᱮᱲᱟᱨᱮ, ᱚᱱᱟ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱚᱞ ᱪᱤᱠᱤ ᱛᱮ ᱚᱞ ᱵᱟᱝ ᱜᱟᱱᱚᱜ ᱠᱟᱱ ᱧᱮᱞ ᱠᱟᱛᱮ, ᱩᱱ ᱠᱷᱚᱱ ᱜᱮ ᱪᱮᱫ ᱞᱮᱠᱟᱛᱮ ᱚᱞ ᱜᱟᱱᱚᱜ-ᱟ, ᱚᱱᱟ ᱞᱟᱹᱜᱤᱫ ᱠᱩᱨᱩᱢᱩᱴᱩ ᱠᱟᱛᱮ ᱚᱞ ᱪᱤᱠᱤ ᱯᱷᱳᱸᱴ ᱮ ᱵᱮᱱᱟᱣ ᱡᱩᱛ ᱞᱮᱫ-ᱟ ᱾
ᱱᱤᱡᱚᱨᱟᱜ ᱡᱟᱹᱛᱤ, ᱥᱟᱶᱛᱟ ᱟᱨ ᱪᱤᱠᱤ, ᱯᱟᱹᱨᱥᱤ ᱪᱮᱛᱟᱱ ᱨᱮ ᱜᱟᱺᱦᱤᱨ ᱫᱩᱞᱟᱹᱲ ᱠᱷᱟᱹᱛᱤᱨ ᱜᱮ, ᱚᱱᱟ ᱠᱚ ᱨᱮᱱᱟᱜ ᱩᱛᱱᱟᱹᱣ, ᱪᱷᱟᱨᱟᱣ, ᱯᱟᱥᱱᱟᱣ ᱠᱩᱨᱩᱢᱩᱴᱩ ᱨᱮ ᱰᱤᱡᱤᱴᱟᱞ ᱯᱞᱟᱴᱯᱷᱚᱨᱢ ᱠᱚ ᱡᱮᱞᱮᱠᱟ — “ᱚᱞ ᱪᱤᱠᱤ ᱴᱮᱠ, ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ, ᱜᱽᱞᱚᱵᱟᱞ ᱵᱷᱚᱭᱮᱥ ᱥᱟᱱᱛᱟᱲᱤ ᱛᱮ, ᱵᱤᱨᱢᱟᱹᱞᱤ ᱤ-ᱯᱟᱛᱷᱟᱢ, O Foundation ᱟᱨ ᱦᱚᱸ ᱱᱚᱝᱠᱟ ᱜᱮ ᱟᱭᱢᱟ ᱴᱷᱟᱶ ᱨᱮᱦᱚᱸ ᱟᱹᱰᱤ ᱜᱟᱱ ᱠᱟᱹᱢᱤᱦᱚᱨᱟ ᱟᱡᱟᱜ ᱟᱹᱜᱩᱣᱟᱹᱱ ᱛᱮ ᱞᱟᱦᱟ ᱟᱠᱟᱱᱟ ᱾ ᱡᱟᱦᱟᱸ ᱠᱩᱨᱩᱢᱩᱴᱩ ᱠᱷᱟᱹᱛᱤᱨ ᱛᱮ ᱛᱮᱦᱮᱧ ᱥᱟᱱᱛᱟᱲ ᱥᱟᱶᱛᱟ ᱟᱨ ᱪᱤᱠᱤ, ᱯᱟᱹᱨᱥᱤ ᱡᱮᱜᱮᱛ ᱡᱟᱠᱟᱛ ᱢᱮᱞᱟᱝᱠᱤ ᱫᱷᱟᱹᱵᱤᱡ ᱡᱷᱟᱠ-ᱡᱷᱟᱠ ᱡᱷᱟᱞᱠᱟᱣ ᱥᱮᱴᱮᱨ ᱟᱠᱟᱱᱟ ᱾ ᱮᱛᱚᱦᱚᱵ ᱨᱮᱹᱧ ᱢᱮᱱ ᱠᱮᱫ ᱞᱮᱠᱟ, ᱛᱮᱦᱮᱧ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱫᱷᱩᱞᱩᱢᱩᱞᱩ ᱡᱩᱞᱩᱜ ᱢᱟᱨᱥᱟᱞ ᱵᱟᱹᱛᱤ ᱫᱚ ᱨᱟᱢᱡᱤᱛ ᱴᱩᱰᱩ ᱵᱟᱹᱵᱩ ᱟᱨ ᱚᱥᱣᱤᱱᱤ ᱵᱚᱧᱡᱚᱱ ᱢᱩᱨᱢᱩ ᱵᱟᱹᱵᱩ ᱞᱮᱠᱟᱱ ᱟᱸᱡᱽᱞᱮ ᱛᱤ ᱛᱮ ᱨᱟᱠᱷᱟ ᱨᱩᱣᱟᱹᱲ ᱟᱠᱟᱱᱟ ᱾ ᱱᱚᱝᱠᱟᱱ ᱠᱩᱨᱩᱢᱩᱴᱩ ᱠᱷᱟᱹᱛᱤᱨ ᱜᱮ ᱥᱟᱱᱛᱟᱲ ᱡᱟᱹᱛᱤ, ᱯᱟᱹᱨᱥᱤ ᱨᱤᱱ ᱦᱚᱲ ᱦᱚᱸ ᱱᱚᱣᱟ ᱫᱷᱟᱹᱨᱛᱤ ᱨᱮ ᱢᱮᱱᱟᱜ ᱵᱚᱱᱟ ᱢᱮᱱᱛᱮ ᱛᱮᱦᱮᱧ ᱡᱮᱜᱮᱛ ᱨᱮ ᱢᱤᱫ ᱢᱟᱹᱱ ᱩᱯᱨᱩᱢ ᱵᱚ ᱟᱢᱮᱴ ᱟᱠᱟᱫ-ᱟ ᱾
ᱵᱟᱹᱵᱩ ᱨᱟᱢᱡᱤᱛ ᱴᱩᱰᱩ ᱫᱚ ᱠᱩᱲᱤ ᱦᱚᱯᱚᱱ ᱥᱮ ᱟᱭᱳ ᱦᱚᱲ ᱠᱚᱣᱟᱜ ᱡᱚᱛᱚ ᱴᱚᱴᱷᱟ ᱨᱮ ᱞᱟᱯᱷᱟᱝ ᱞᱟᱦᱟᱜ ᱫᱚ ᱟᱹᱰᱤ ᱟᱸᱥ ᱢᱮᱱᱟᱜ ᱛᱟᱭᱟ ᱾ ᱥᱟᱱᱛᱟᱲᱤ ᱠᱩᱲᱤ ᱚᱱᱚᱞᱤᱭᱟᱹ ᱜᱷᱟᱨᱚᱸᱡᱽ ᱨᱮᱱᱟᱜ ᱤ-ᱯᱟᱛᱷᱟᱢ ‘ᱟᱭᱳ ᱟᱲᱟᱝ’ ᱨᱮᱱᱟᱜ ᱣᱮᱵᱽᱥᱟᱭᱤᱴ ᱰᱤᱡᱟᱭᱤᱱ ᱨᱮᱦᱚᱸ ᱟᱡᱟᱜ ᱠᱩᱨᱩᱢᱩᱴᱩ ᱟᱹᱰᱤ ᱫᱟᱢᱟᱱ ᱜᱮᱭᱟ ᱾ ᱛᱮᱦᱮᱧ ᱨᱟᱢᱡᱤᱛ ᱴᱩᱰᱩ ᱵᱟᱹᱵᱩᱣᱟᱜ ᱠᱩᱨᱩᱢᱩᱴᱩ ᱛᱮ ᱥᱟᱱᱛᱟᱲ ᱥᱟᱶᱛᱟ ᱨᱤᱱ ᱠᱩᱲᱤ ᱦᱚᱯᱚᱱ ᱥᱮ ᱟᱭᱳ ᱦᱚᱲ ᱠᱚ ᱦᱚᱸ ᱥᱟᱶᱦᱮᱫ ᱰᱟᱦᱟᱨ ᱨᱮ ᱢᱤᱫ ᱯᱟᱹᱣᱲᱤ ᱢᱟᱬᱟᱝ ᱛᱮ ᱞᱟᱦᱟᱜ ᱨᱮ ᱱᱟᱥᱮ ᱠᱚ ᱟᱞᱜᱟ ᱟᱠᱟᱱ ᱜᱮᱭᱟ ᱾
***
