ᱨᱟᱵᱟᱝ ᱫᱤᱱ ᱯᱟᱨᱚᱢ ᱮᱱᱟ
ᱥᱤᱛᱩᱝ ᱫᱤᱱ ᱥᱮᱴᱮᱨ ᱮᱱᱟ
ᱫᱷᱟᱹᱨᱛᱤ ᱡᱟᱠᱟᱛ ᱫᱤᱥᱚᱢ ᱥᱟᱨᱟ
ᱢᱟᱲᱟᱭ ᱢᱟᱲᱟᱭ ᱥᱤᱛᱩᱝ ᱠᱟᱱᱟ ᱾
ᱥᱮᱨᱢᱟ ᱡᱟᱹᱲᱤ ᱦᱚᱸ ᱥᱟᱺᱜᱤᱧ ᱮᱱᱟ
ᱠᱩᱸᱭ ᱫᱟᱜ ᱦᱚᱸ ᱜᱟᱺᱦᱤᱨ ᱮᱱᱟ
ᱜᱟᱰᱟ ᱢᱩᱰᱩ ᱵᱟᱹᱫᱽ ᱯᱩᱠᱷᱨᱤ
ᱟᱸᱡᱮᱫ ᱪᱟᱵᱟ ᱮᱱᱟ ᱾
ᱥᱤᱛᱩᱝ ᱡᱟᱞᱟ ᱟᱠᱟᱭ ᱨᱟᱸᱫᱟᱭ
ᱫᱟᱜ ᱛᱮᱛᱟᱝ ᱟᱴᱟᱵ ᱡᱟᱲᱟᱵ
ᱪᱮᱬᱮ ᱪᱤᱯᱨᱩᱜ ᱡᱤᱵᱽ ᱡᱤᱭᱟᱹᱞᱤ
ᱦᱟᱞᱟᱠ ᱦᱟᱨᱠᱮᱛ ᱨᱮ ᱾
ᱢᱟᱹᱱᱢᱤ ᱦᱚᱯᱚᱱ ᱥᱤᱛᱩᱝ ᱡᱟᱞᱟ
ᱫᱷᱟᱹᱨᱛᱤ ᱥᱟᱨᱟ ᱜᱮ ᱮᱞᱟᱝ ᱟᱹᱭᱠᱟᱹᱣᱜ
ᱡᱤᱵᱽ ᱡᱟᱱᱣᱟ ᱦᱚᱱ ᱢᱟᱱᱚᱣᱟ
ᱟᱹᱣᱟᱹᱯᱟᱯᱟ ᱠᱚ ᱟᱹᱭᱠᱟᱹᱣ ᱾
ᱚᱲᱟᱜ ᱠᱷᱚᱱᱮᱢ ᱚᱰᱚᱠᱚᱜ ᱨᱮ
ᱡᱟᱦᱟᱸ ᱥᱮᱫ ᱮᱢ ᱪᱟᱞᱟᱜ ᱠᱟᱱ ᱨᱮ
ᱚᱛ ᱞᱚᱞᱚ ᱥᱮᱨᱢᱟ ᱥᱤᱛᱩᱝ
ᱟᱹᱰᱤ ᱡᱚᱞᱚᱱ ᱨᱮ ᱾
ᱡᱟᱦᱟᱸ ᱠᱷᱚᱱᱮᱢ ᱦᱤᱡᱩᱜ ᱠᱟᱱ ᱨᱮ
ᱡᱤᱨᱟᱹᱣ ᱠᱟᱛᱷᱟᱢ ᱩᱭᱦᱟᱹᱨ ᱡᱚᱝ ᱨᱮ
ᱦᱚᱲᱢᱚ ᱡᱤᱣᱤ ᱩᱫᱽᱜᱟᱹᱨ ᱡᱟᱞᱟ
ᱥᱩᱠ ᱜᱮ ᱵᱟᱝ ᱮᱢ ᱟᱹᱭᱠᱟᱹᱣ ᱾
ᱴᱟᱹᱞᱤ ᱠᱷᱟᱯᱟᱨ ᱯᱟᱠᱟ ᱚᱲᱟᱜ
ᱥᱮᱸᱜᱮᱞ ᱮᱞᱟᱝ ᱫᱷᱩᱨᱩᱯ ᱟᱹᱭᱠᱟᱹᱣᱜ
ᱦᱟᱥᱟ ᱚᱲᱟᱜ ᱵᱩᱥᱩᱵ ᱫᱟᱞᱚᱵ
ᱩᱭᱦᱟᱹᱨ ᱦᱤᱡᱩᱜ ᱠᱟᱱ ᱾
ᱵᱟᱥᱠᱮ ᱫᱟᱠᱟ ᱵᱩᱞᱩᱝ ᱢᱮᱥᱟ
ᱟᱲᱟᱜ ᱠᱚᱨᱦᱟ ᱢᱟᱹᱨᱤᱪ ᱢᱮᱥᱟ
ᱡᱚᱢ ᱡᱚᱝ ᱨᱮ ᱥᱩᱠᱮ ᱟᱹᱜᱩᱭ
ᱱᱚᱣᱟ ᱥᱤᱛᱩᱝ ᱨᱮ ᱾
***
