ᱥᱟᱱᱛᱟᱲ ᱫᱤᱥᱚᱢ

ᱥᱟᱱᱛᱟᱲ ᱯᱚᱱᱚᱛ ᱵᱮᱱᱟᱣ ᱦᱩᱭ ᱜᱚᱫ ᱟᱠᱟᱱᱟ ᱾ ᱥᱟᱱᱛᱟᱲ ᱯᱚᱱᱚᱛ ᱠᱟᱱ ᱠᱷᱟᱹᱛᱤᱨ, ᱚᱱᱟ ᱯᱚᱱᱚᱛ ᱨᱮᱫᱚ ᱟᱹᱰᱤ ᱩᱥᱟᱹᱨᱟ ᱛᱮ ᱥᱟᱱᱛᱟᱲ ᱯᱟᱹᱨᱥᱤ ᱯᱚᱱᱚᱛ ᱟᱹᱢᱟᱹᱞᱮᱛ ᱯᱟᱹᱨᱥᱤ ᱞᱮᱠᱟᱛᱮ ᱛᱷᱟᱯᱚᱱ ᱟᱠᱟᱱᱟ ᱾ ᱚᱱᱟ ᱯᱚᱱᱚᱛ ᱨᱮ ᱞᱟᱦᱟ ᱠᱷᱚᱱ ᱡᱟᱦᱟᱸ ᱜᱮ ᱟᱥᱲᱟ, ᱵᱤᱨᱫᱟᱹᱜᱟᱲ, ᱡᱮᱜᱮᱛ ᱵᱤᱨᱫᱟᱹᱜᱟᱲ ᱮᱢᱟᱱ ᱠᱚ ᱛᱟᱦᱮᱸ ᱠᱟᱱᱟ, ᱚᱱᱟ ᱠᱚᱨᱮ ᱯᱚᱱᱚᱛ ᱥᱤᱠᱷᱱᱟᱹᱛ ᱥᱤᱞᱟᱵᱟᱥ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ, ᱚᱞ ᱪᱤᱠᱤ ᱞᱤᱯᱤ ᱛᱮ ᱚᱞᱚᱜ, ᱯᱚᱲᱦᱚᱱ ᱦᱩᱭᱩᱜ ᱠᱟᱱᱟ ᱾ ᱥᱟᱱᱟᱢ ᱟᱹᱢᱟᱹᱞᱤ ᱠᱚᱨᱮ ᱜᱮ ᱟᱹᱢᱟᱹᱞᱮᱛ ᱞᱟᱪᱷᱟ ᱠᱟᱹᱢᱤᱦᱚᱨᱟ ᱠᱚᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ, ᱚᱞ ᱪᱤᱠᱤ ᱞᱤᱯᱤ ᱛᱮ ᱦᱩᱭᱩᱜ ᱠᱟᱱᱟ ᱾

ᱢᱤᱫ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱨᱟᱦᱞᱟ ᱫᱚ ᱢᱤᱫ ᱜᱟᱞᱚᱪᱤᱭᱟᱹ ᱠᱟᱱᱟᱭ ᱾ ᱚᱸᱰᱮ ᱫᱚ ᱢᱤᱫ ᱜᱟᱞᱚᱪ ᱠᱟᱹᱢᱤᱦᱚᱨᱟ ᱪᱟᱞᱟᱜ ᱠᱟᱱᱟ ᱾ ᱨᱟᱦᱞᱟ ᱟᱜ ᱚᱠᱛᱚ ᱱᱤᱛᱚᱜ ᱫᱚ ᱜᱟᱞᱚᱪ ᱮᱢ ᱞᱟᱹᱜᱤᱫ ᱾ ᱜᱟᱞᱚᱪ ᱞᱟᱹᱜᱤᱫ ᱥᱯᱤᱠᱚᱨ ᱛᱤ ᱛᱮᱭ ᱥᱟᱵ ᱠᱮᱫ-ᱟ ᱾ ᱢᱮᱞᱟᱝᱠᱤ ᱨᱮᱱᱟᱜ ᱜᱚᱴᱟ ᱯᱟᱲᱟᱭ ᱠᱚᱭᱚᱜ ᱟᱹᱪᱩᱨ ᱠᱮᱫ-ᱟ ᱾ ᱥᱟᱱᱛᱟᱲ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱟᱱ ᱠᱷᱟᱹᱛᱤᱨ, ᱥᱟᱱᱟᱢ ᱟᱪᱮᱛᱤᱭᱟᱹ ᱠᱩᱲᱤ ᱠᱚᱲᱟ ᱠᱚ ᱡᱷᱟᱹᱞ ᱥᱟᱹᱲᱤ, ᱯᱷᱩᱴᱟᱹ ᱠᱟᱪᱟ ᱦᱚᱨᱚᱜ, ᱵᱟᱸᱫᱮ ᱠᱟᱛᱮ ᱢᱟᱹᱪᱤ ᱨᱮᱠᱚ ᱫᱩᱲᱩᱵ ᱟᱠᱟᱱᱟ ᱾ ᱩᱱᱟᱹᱜ ᱜᱤᱫᱽᱨᱟᱹ ᱟᱯᱚᱱ ᱵᱷᱮᱥ ᱨᱮ ᱧᱮᱞ ᱠᱟᱛᱮ ᱨᱟᱦᱞᱟ ᱫᱚ ᱢᱮᱫ ᱨᱮ ᱢᱮᱫ-ᱫᱟᱜ ᱯᱮᱲᱮ-ᱯᱮᱲᱮ ᱥᱟᱨᱮᱲ ᱚᱰᱚᱠ ᱮᱱ ᱛᱟᱭᱟ ᱾ ᱱᱟᱥᱮ ᱢᱩᱞᱩᱡ ᱞᱟᱸᱫᱟ ᱠᱟᱛᱮ ᱢᱮᱫ ᱨᱮᱭᱟᱜ ᱢᱮᱫ-ᱫᱟᱜ ᱢᱮᱫ ᱨᱮᱜᱮ ᱵᱟᱭ ᱨᱩᱣᱟᱹᱲ ᱠᱟᱛᱮ, ᱜᱟᱞᱚᱪ ᱮ ᱮᱛᱚᱦᱚᱵ ᱠᱮᱫ-ᱟ ᱨᱟᱦᱞᱟ —

“ᱛᱮᱦᱮᱧ ᱤᱧ ᱱᱚᱶᱟ ᱡᱤᱛᱠᱟᱹᱨ ᱠᱚ ᱢᱮᱫ ᱥᱟᱢᱟᱝ ᱨᱮ ᱱᱚᱝᱠᱟ ᱡᱷᱟᱞᱠᱟᱣᱜ ᱠᱟᱱ ᱧᱮᱞ ᱠᱟᱛᱮ ᱢᱚᱱᱮ ᱨᱮ ᱯᱟᱹᱛᱭᱟᱹᱣ ᱵᱟᱝ ᱦᱮᱡ ᱟᱹᱧ ᱠᱟᱱᱟ, ᱪᱮᱫ ᱥᱟᱹᱨᱤ ᱜᱮ ᱱᱚᱶᱟ ᱫᱚ ᱥᱟᱹᱨᱤᱭᱟᱹᱛ ᱜᱮ ᱠᱟᱱᱟ ᱛᱚ ?? ᱥᱟᱹᱨᱤ ᱜᱮ, ᱛᱮᱦᱮᱧ ᱟᱵᱚᱣᱟᱜ ᱥᱟᱱᱛᱟᱲ ᱡᱟᱹᱛᱤ ᱠᱚᱣᱟᱜ ᱠᱩᱠᱢᱩ ᱯᱩᱨᱟᱹᱣ ᱟᱠᱟᱱᱟ ᱾ ᱟᱵᱚᱣᱟᱜ ᱢᱤᱫᱴᱟᱹᱝ ᱯᱚᱱᱚᱛ ᱛᱤᱸᱜᱩ ᱠᱮᱴᱮᱡ ᱟᱠᱟᱱᱟ ᱟᱨ ᱚᱱᱟ ᱯᱚᱱᱚᱛ ᱨᱮ ᱟᱵᱚ ᱯᱟᱹᱨᱥᱤ ᱛᱮ ᱥᱟᱱᱟᱢ ᱟᱥᱲᱟ, ᱵᱤᱨᱫᱟᱹᱜᱟᱲ ᱠᱚᱨᱮ ᱚᱞ ᱯᱟᱲᱦᱟᱣ ᱦᱩᱭᱩᱜ ᱠᱟᱱᱟ ᱾ ᱛᱤᱱᱟᱹᱝ ᱢᱟᱨᱟᱝ ᱡᱤᱛᱠᱟᱹᱨ ᱟᱵᱚ ᱥᱟᱱᱟᱢ ᱥᱟᱱᱛᱟᱲ ᱡᱟᱹᱛᱤ ᱠᱚᱣᱟᱜ ᱠᱩᱠᱢᱩ ᱯᱩᱨᱟᱹᱣ ᱟᱠᱟᱱᱟ ᱾ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱠᱩᱥᱤ ᱫᱚ ᱱᱚᱶᱟ ᱠᱷᱟᱹᱛᱤᱨ ᱦᱚᱸ ᱵᱩᱡᱷᱟᱹᱣᱜ ᱠᱟᱱᱟ, ᱵᱟᱝ ᱢᱟ ᱚᱞ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱠᱩᱠᱢᱩ ᱨᱮᱱᱟᱜ ᱒᱐᱐ ᱥᱮᱨᱢᱟ ᱛᱟᱭᱚᱢ ᱦᱚᱸ ᱛᱮᱦᱮᱧ ᱟᱡᱟᱜ ᱠᱩᱠᱢᱩ ᱯᱩᱨᱟᱹᱣ ᱥᱟᱹᱛ ᱟᱠᱟᱱᱟ ᱾ ᱱᱚᱰᱮ ᱟᱡᱟᱜ ᱠᱩᱠᱢᱩ ᱥᱟᱶᱛᱮ ᱛᱤᱱᱟᱹᱝ ᱛᱤᱱᱟᱹᱝ ᱥᱟᱱᱛᱟᱲ ᱡᱟᱹᱛ ᱨᱤᱱ ᱵᱚᱭᱦᱟ ᱠᱮᱣᱟᱜ ᱠᱩᱠᱢᱩ ᱡᱩᱲᱟᱹᱭ ᱠᱟᱛᱮ ᱢᱮᱱᱟᱜ-ᱟ ᱚᱱᱟ ᱨᱮᱱᱟᱜ ᱦᱤᱥᱟᱹᱵᱽ ᱵᱟᱹᱱᱩᱜ-ᱟ ᱾ ᱜᱩᱨᱩ ᱜᱚᱢᱠᱮ ᱠᱟᱹᱢᱤᱭ ᱮᱛᱚᱦᱚᱵ ᱚᱴᱚ ᱞᱮᱫ-ᱟ, ᱡᱤᱛᱠᱟᱹᱨ ᱦᱚᱨᱮ ᱟᱛᱨᱮ ᱚᱴᱚ ᱞᱮᱫ-ᱟ ᱾ ᱚᱱᱟ ᱠᱩᱠᱢᱩ, ᱚᱱᱟ ᱟᱛᱨᱮ ᱟᱠᱟᱫ ᱠᱟᱹᱢᱤᱦᱚᱨᱟ ᱟᱵᱚ ᱨᱤᱱ ᱟᱹᱰᱤ ᱟᱹᱰᱤ ᱦᱚᱲ ᱠᱚ ᱟᱠᱚᱣᱟᱜ ᱠᱩᱠᱢᱩ ᱞᱮᱠᱟᱛᱮ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱥᱤᱧ ᱧᱤᱫᱟᱹ ᱠᱩᱨᱩᱢᱩᱴᱩ ᱠᱟᱛᱮ ᱛᱮᱦᱮᱧ ᱱᱚᱶᱟ ᱡᱤᱛᱠᱟᱹᱨ ᱟᱵᱚ ᱠᱚᱣᱟᱜ ᱢᱮᱫ ᱥᱟᱢᱟᱝ ᱨᱮ ᱡᱩᱞᱩᱜ ᱠᱟᱱ ᱥᱤᱧ ᱪᱟᱸᱫᱚᱭ ᱟᱬᱜᱚ ᱦᱮᱡ ᱟᱠᱟᱱ ᱞᱮᱠᱟ ᱾ ᱛᱮᱦᱮᱧ ᱠᱷᱚᱱ ᱟᱵᱚ ᱟᱨ ᱟᱵᱚᱣᱟᱜ ᱡᱟᱹᱛᱤ, ᱫᱷᱚᱨᱚᱢ ᱞᱟᱹᱜᱤᱫ, ᱟᱵᱚᱣᱟᱜ ᱥᱟᱶᱛᱟ, ᱥᱟᱶᱦᱮᱫ ᱞᱟᱹᱜᱤᱫ, ᱟᱵᱚᱣᱟᱜ ᱪᱤᱠᱤ, ᱯᱟᱹᱨᱥᱤ ᱞᱟᱹᱜᱤᱫ, ᱟᱨ ᱦᱟᱸᱰᱮ ᱱᱷᱟᱰᱮ ᱵᱟᱝ ᱨᱮᱦᱮᱸ-ᱨᱮᱦᱮᱸ ᱦᱩᱭ ᱟᱵᱚᱱᱟ ᱾ ᱥᱮᱵᱮᱫ ᱡᱤᱣᱤ ᱵᱟᱝ ᱠᱷᱮᱢᱟᱣ ᱦᱩᱭ ᱟᱵᱚᱱᱟ ᱾ ᱟᱵᱚᱣᱟᱜ  ᱠᱩᱠᱢᱩ,  ᱡᱤᱛᱠᱟᱹᱨ ᱨᱮ ᱟᱹᱨᱩᱯᱷᱮᱨᱟᱣ ᱟᱠᱟᱱ ᱠᱷᱟᱹᱛᱤᱨ, ᱫᱮᱞᱟ ᱹᱹᱹ ᱨᱟᱹᱥᱠᱟᱹ ᱨᱮᱱᱟᱜ ᱢᱤᱫ ᱠᱟᱠᱞᱮ ᱵᱚᱱ ᱨᱟᱲᱟᱝ ᱨᱟᱠᱟᱵᱟ ᱾

ᱥᱟᱱᱟᱢ ᱠᱚᱜᱮ ᱢᱮᱱ ᱛᱟᱵᱚ ᱯᱮ —

ᱡᱤᱛᱠᱟᱹᱨ ᱥᱟᱱᱛᱟᱲ ᱫᱤᱥᱚᱢ ᱡᱤᱛᱠᱟᱹᱨ …
ᱡᱤᱛᱠᱟᱹᱨ ᱥᱟᱱᱟᱢ ᱦᱚᱲ ᱠᱚᱣᱟᱜ ᱠᱩᱨᱩᱢᱩᱴᱩ ᱡᱤᱛᱠᱟᱹᱨ …
ᱡᱤᱛᱠᱟᱹᱨ ᱜᱩᱨᱩ ᱜᱚᱢᱠᱮ ᱡᱤᱛᱠᱟᱹᱨ …
ᱡᱤᱛᱠᱟᱹᱨ ᱥᱟᱱᱛᱟᱲ ᱫᱤᱥᱚᱢ ᱡᱤᱛᱠᱟᱹᱨ …

ᱡᱚᱛᱚ ᱦᱚᱲ ᱛᱤ ᱠᱚ ᱛᱩᱞᱮᱫ-ᱟ ᱟᱨ ᱱᱚᱶᱟ ᱡᱤᱛᱠᱟᱹᱨ ᱟᱲᱟᱝ ᱠᱚ ᱠᱟᱠᱞᱮ ᱨᱟᱠᱟᱵ ᱮᱫ-ᱟ ᱾ ᱨᱟᱦᱞᱟ ᱦᱚᱸ ᱛᱤ ᱛᱩᱞ ᱟᱛᱮ ᱡᱤᱛᱠᱟᱹᱨ ᱟᱲᱟᱝ ᱮ ᱠᱟᱠᱞᱮ ᱨᱟᱠᱟᱵ ᱮᱫ-ᱟ ᱾

ᱟᱡ ᱟᱭᱳ ᱫᱚ ᱫᱟᱠᱟ ᱚᱲᱟᱜ ᱠᱷᱚᱱ ᱮ ᱟᱸᱡᱚᱢ ᱮᱫ-ᱟ ᱾ ᱢᱚᱱᱮ ᱢᱚᱱᱮ ᱛᱮᱭ ᱢᱮᱱᱮᱫ-ᱟ, ᱱᱩᱭ ᱢᱟ … ᱢᱮᱱ ᱢᱮᱱ ᱛᱮᱭ ᱩᱭᱩᱝ ᱠᱮᱫᱮᱭᱟ, ᱧᱮᱞ ᱠᱮᱫᱮᱭᱟᱭ ᱨᱟᱦᱞᱟ ᱫᱚ ᱡᱟᱹᱯᱤᱫ ᱨᱮᱜᱮ ᱛᱤ ᱛᱩᱞ ᱟᱛᱮ ᱡᱤᱛᱠᱟᱹᱨ ᱡᱤᱛᱠᱟᱹᱨ ᱮ ᱢᱮᱱ ᱡᱚᱝ ᱠᱟᱱᱟ ᱾ ᱯᱷᱟᱨᱟᱠ ᱠᱷᱚᱱ ᱟᱡ ᱟᱭᱳ ᱱᱟᱥᱮᱭ ᱦᱚᱦᱚ ᱟᱫᱮᱭᱟ ᱾ ᱤᱠᱷᱟᱹᱱ ᱨᱟᱦᱞᱟ ᱫᱚ ᱠᱩᱠᱢᱩ ᱛᱮ ᱮᱱ ᱦᱚᱸᱭ ᱡᱤᱛᱠᱟᱹᱨ ᱡᱤᱛᱠᱟᱹᱨᱚᱜ ᱠᱟᱱ ᱜᱮᱭᱟ ᱾ ᱮᱱᱠᱷᱟᱱ ᱟᱡ ᱟᱭᱳ ᱫᱚ ᱥᱩᱨ ᱪᱟᱞᱟᱣ ᱠᱟᱛᱮᱭ ᱴᱷᱮᱞᱟᱣ ᱠᱮᱫᱮᱭᱟ ᱾ ᱟᱨ ᱨᱟᱦᱞᱟ ᱫᱚᱭ ᱪᱚᱢᱠᱟᱣ ᱵᱮᱨᱮᱫ ᱮᱱᱟ ᱡᱟᱹᱯᱤᱫ ᱠᱩᱠᱢᱩ ᱠᱷᱚᱱ ᱾

ᱤᱱᱟᱹᱜ ᱛᱮᱜᱮ ᱨᱟᱦᱞᱟ ᱠᱷᱚᱱ ᱦᱩᱰᱤᱧᱤᱡ ᱠᱩᱲᱤ ᱨᱟᱹᱦᱱᱤ ᱦᱚᱸ ᱚᱲᱟᱜ ᱛᱮᱭ ᱵᱚᱞᱚ ᱮᱱᱟ ᱾ ᱟᱫᱚ ᱟᱡ ᱟᱭᱳᱭ ᱠᱩᱞᱤ ᱮ ᱠᱟᱱᱟ, ᱪᱮᱫ ᱪᱤᱠᱟᱹ ᱮᱱᱟ ᱭᱳ, ᱫᱟᱹᱭ ᱫᱚ ᱟᱨ ᱦᱚᱸ ᱥᱮ ?

ᱟᱭᱳ – ᱪᱮᱫ ᱮᱢ ᱢᱮᱱᱟ ᱱᱩᱭᱟᱜ ᱠᱟᱛᱷᱟ, ᱤᱧ ᱫᱚ ᱧᱮᱞ ᱧᱮᱞ ᱛᱮᱹᱧ ᱟᱹᱲᱤᱥ ᱪᱟᱵᱟ ᱮᱱᱟ ᱾ ᱚᱡᱷᱟ ᱴᱷᱮᱱ ᱤᱫᱤ ᱮᱢᱟ ᱾

ᱨᱟᱹᱦᱱᱤ ᱫᱚᱭ ᱞᱟᱸᱫᱟᱭᱮᱫ-ᱟ ᱾ ᱟᱡ ᱫᱟᱹᱭ ᱨᱟᱦᱞᱟ ᱠᱚᱭᱚᱜ ᱠᱟᱛᱮ ᱾ ᱨᱟᱦᱞᱟ ᱫᱚ ᱡᱟᱹᱯᱤᱫ ᱠᱷᱚᱱ ᱟᱢᱯᱟ ᱩᱢᱯᱩᱭ ᱵᱮᱨᱮᱫ ᱟᱠᱟᱱ ᱛᱮ ᱯᱟᱨᱠᱚᱢ ᱨᱮᱭ ᱫᱩᱲᱩᱵ ᱟᱠᱟᱱᱟ ᱾ ᱟᱡ ᱟᱭᱳ ᱫᱚ ᱫᱟᱠᱟ ᱚᱲᱟᱜ ᱥᱮᱫ ᱮ ᱵᱚᱞᱚ ᱨᱩᱣᱟᱹᱲ ᱮᱱᱟ ᱾

ᱨᱟᱹᱦᱱᱤ – ᱨᱟᱦᱞᱟ ᱥᱩᱨ ᱨᱮ ᱫᱩᱲᱩᱵ ᱠᱟᱛᱮᱭ ᱠᱩᱞᱤᱭᱮ ᱠᱟᱱᱟ — ᱫᱟᱹᱭ ᱟᱨ ᱦᱚᱸ ᱚᱱᱟ ᱠᱩᱠᱢᱩ ᱜᱮ ᱥᱮ ?

ᱨᱟᱦᱞᱟ – ᱚᱛ ᱥᱮᱫ ᱠᱚᱭᱚᱜ ᱩᱨᱤᱡ ᱠᱟᱛᱮᱭ ᱛᱷᱤᱨ ᱟᱠᱟᱱᱟ ᱾

ᱨᱟᱹᱦᱱᱤ ᱫᱚ ᱨᱟᱦᱞᱟ ᱫᱟᱹᱵᱤ ᱨᱮ ᱥᱟᱵ ᱠᱟᱛᱮᱭ ᱦᱚᱦᱚ ᱟᱫᱮᱭᱟ, ᱫᱟᱹᱭ …

ᱨᱟᱦᱞᱟ ᱟᱜ ᱢᱮᱫ ᱠᱷᱚᱱ ᱢᱮᱫ-ᱫᱟᱜ ᱦᱤᱰᱤᱨ ᱦᱤᱰᱤᱨ ᱡᱚᱨᱚ ᱟᱬᱜᱚ ᱮᱱᱟ ᱾ ᱢᱮᱫ ᱫᱟᱜ ᱡᱚᱫ ᱠᱟᱛᱮ ᱚᱸᱰᱮ ᱠᱷᱚᱱ ᱵᱮᱨᱮᱫ ᱠᱟᱛᱮᱭ ᱥᱮᱱᱚᱜ ᱠᱟᱱ ᱵᱮᱲᱟᱨᱮ ᱨᱟᱹᱦᱱᱤ ᱫᱚ ᱛᱤ ᱥᱟᱵ ᱠᱟᱛᱮᱭ ᱜᱚᱦᱚᱲ ᱫᱩᱲᱩᱵ ᱠᱮᱫᱮᱭᱟ ᱾ ᱟᱨ ᱮ ᱢᱮᱛᱟᱭ ᱠᱟᱱᱟ, ᱫᱟᱹᱭ, ᱱᱚᱶᱟ ᱠᱟᱛᱷᱟ ᱠᱚᱫᱚ ᱦᱤᱲᱤᱧ ᱠᱟᱜ ᱢᱮᱥᱮ ᱾ ᱟᱢᱟᱜ ᱢᱚᱱᱮᱨᱮ ᱦᱮᱰᱮᱡᱚᱜ ᱠᱟᱱᱟ ᱥᱟᱱᱛᱟᱲ ᱫᱤᱥᱚᱢ ᱠᱟᱛᱷᱟ ᱾ ᱱᱚᱶᱟ ᱢᱟ ᱫᱟᱹᱭ ᱮᱠᱞᱟ ᱛᱮᱭᱟᱜ ᱠᱟᱛᱷᱟ ᱢᱟ ᱵᱟᱝ ᱠᱟᱱᱟ ᱾ ᱟᱵᱚ ᱨᱤᱱ ᱦᱚᱲ ᱵᱟᱝ ᱠᱚ ᱡᱩᱢᱤᱫᱚᱜ-ᱟ ᱵᱟᱰᱟᱭ ᱠᱟᱛᱷᱟ ᱜᱮ ᱾ ᱟᱹᱠᱤᱞ ᱨᱮᱱᱟᱜ ᱚᱵᱷᱟᱵᱽ, ᱥᱮᱪᱮᱫ ᱨᱮᱱᱟᱜ ᱟᱱᱟᱴ ᱾ ᱠᱟᱛᱷᱟ ᱠᱚ ᱟᱸᱡᱚᱢ ᱞᱮᱠᱷᱟᱱ, ᱡᱩᱢᱤᱫᱽ ᱠᱚ ᱫᱚᱦᱚ ᱞᱮ ᱠᱷᱟᱱ, ᱩᱛᱱᱟᱹᱣ ᱦᱚᱨ ᱨᱮᱠᱚ ᱞᱟᱦᱟ ᱞᱮᱱ ᱠᱷᱟᱱ ᱢᱟ ᱟᱵᱚᱣᱟᱜ ᱦᱚᱸ ᱢᱤᱫ ᱫᱤᱥᱚᱢ ᱛᱟᱦᱮᱸ ᱠᱚᱜ-ᱟ, ᱥᱟᱱᱛᱟᱲ ᱫᱤᱥᱚᱢ ᱾

ᱤᱠᱷᱟᱹᱱ ᱚᱠᱚᱭ ᱫᱚ ᱥᱟᱱᱛᱟᱲ ᱧᱩᱛᱩᱢ ᱛᱮ ᱩᱯᱨᱩᱢᱚᱜ ᱥᱟᱱᱟᱭᱮᱫ ᱠᱚᱛᱮ ᱾ ᱟᱵᱚ ᱢᱟ ᱡᱚᱛᱚ ᱟᱹᱫᱤᱵᱟᱹᱥᱤ ᱾ ᱟᱹᱫᱤᱵᱟᱹᱥᱤ ᱵᱷᱤᱲ ᱨᱮᱠᱚ ᱟᱹᱲᱡᱷᱟᱹᱣ ᱟᱠᱟᱫ ᱵᱚᱱᱟ ᱾

ᱚᱱᱮ … ᱤᱱᱟᱹ ᱦᱤᱞᱚᱜᱟᱜ ᱠᱟᱛᱷᱟ ᱩᱭᱦᱟᱹᱨ ᱢᱮᱥᱮ ᱫᱟᱹᱭ, ᱟᱵᱚ ᱠᱩᱞᱦᱤ ᱢᱩᱪᱟᱹᱫ ᱨᱮ ᱢᱤᱫ ᱜᱟᱞᱚᱪ ᱮᱢ ᱫᱚᱦᱚ ᱞᱮᱫ …. !!!

( ᱱᱚᱣᱟ ᱨᱮᱱᱟᱜ ᱛᱚᱸᱜᱮ ᱠᱟᱹᱦᱱᱤ ᱫᱚ ᱫᱟᱨᱟᱭ ᱠᱟᱱ ᱢᱤᱫ ᱜᱟᱢᱟᱢ ᱯᱩᱛᱷᱤ ᱨᱮᱵᱚ ᱯᱟᱲᱦᱟᱣ ᱯᱩᱨᱟᱹᱣᱟ, ᱥᱟᱱᱛᱟᱲ ᱫᱤᱥᱚᱢ ᱿)

***