ᱥᱤᱠᱷᱱᱟᱹᱛ ᱫᱚᱭ ᱟᱹᱜᱩᱭᱟ ᱵᱳᱫᱷ, ᱟᱨ ᱮ ᱟᱹᱜᱩᱭᱟ ᱪᱮᱛᱱᱟᱣ ᱾ ᱟᱹᱜᱩᱭᱟᱭ ᱡᱟᱹᱛᱤ ᱪᱮᱛᱟᱱ ᱥᱟᱶᱛᱟ ᱪᱮᱛᱟᱱ ᱫᱩᱞᱟᱹᱲ ᱾ ᱢᱤᱫᱴᱟᱝ ᱡᱟᱹᱛᱤ ᱨᱮᱱᱟᱜ ᱥᱮᱱᱮᱨ ᱫᱚ ᱥᱤᱠᱷᱱᱟᱹᱛ ᱾ ᱱᱟᱜᱟᱢ ᱨᱮᱵᱚᱱ ᱧᱮᱞᱟ ᱚᱥᱤᱠᱷᱱᱟᱹᱛ ᱡᱟᱛᱤ ᱫᱚ ᱛᱤᱥ ᱨᱮᱦᱚᱸ ᱵᱟᱭ ᱦᱟᱨᱟ ᱫᱟᱲᱮ ᱠᱟᱣᱫᱟ ᱾ ᱚᱞᱚᱜ ᱵᱟᱝᱛᱮ ᱥᱤᱠᱷᱱᱟᱹᱛ ᱵᱟᱝᱛᱮ, ᱵᱤᱥᱮᱥ ᱠᱟᱭᱛᱮ ᱡᱟᱦᱟᱸ ᱡᱟᱛᱤᱨᱮ ᱛᱤᱨᱞᱟᱹ ᱥᱤᱠᱷᱱᱟᱹᱛ ᱵᱟᱹᱱᱩᱜᱼᱟ, ᱚᱱᱟ ᱡᱟᱛᱤ ᱫᱚ ᱛᱤᱥ ᱦᱚᱸ ᱵᱟᱝ ᱠᱮᱴᱮᱡ ᱟᱠᱟᱱᱟ ᱾ ᱪᱮᱫᱟᱜ ᱥᱮ ᱛᱤᱨᱞᱟᱹ ᱜᱮ ᱢᱤᱫᱴᱟᱝ ᱦᱟᱯᱮᱱ ᱵᱮᱵᱮᱱᱟᱣ ᱤᱡ ᱾ ᱡᱟᱦᱟᱸ ᱡᱟᱛᱤ ᱨᱮᱱ ᱛᱤᱨᱞᱟᱹ ᱡᱟᱸᱦᱟ ᱛᱤᱱᱟᱹᱜ ᱠᱚ ᱥᱤᱠᱷᱱᱟᱹᱛ ᱚᱜᱼᱟ, ᱚᱱᱟ ᱡᱟᱛᱤ ᱨᱮᱱᱟᱜ ᱯᱤᱲᱦᱤ ᱩᱱᱟᱹᱜ ᱠᱮᱴᱮᱡᱚᱜᱼᱟ ᱾ ᱚᱱᱟ ᱫᱚ ᱡᱟᱹᱛᱤᱭᱟᱹᱨᱤ ᱥᱮᱫ ᱛᱮ, ᱥᱟᱶᱛᱟ ᱟᱹᱨᱤ ᱥᱮᱫ ᱛᱮ, ᱠᱟᱣᱰᱤ ᱟᱹᱨᱤ ᱥᱮᱫᱛᱮ, ᱥᱟᱱᱟᱢ ᱥᱮᱫ ᱛᱮ ᱾
ᱱᱤᱛᱚᱜ ᱡᱩᱜᱽ ᱥᱟᱞᱟᱜ ᱛᱟᱞ ᱢᱤᱞᱟᱹᱣ ᱢᱤᱞᱟᱹᱣ ᱟᱵᱚ ᱡᱟᱛᱤ ᱥᱟᱶᱛᱟ ᱨᱮᱦᱚᱸ ᱚᱞᱚᱜ ᱯᱟᱲᱦᱟᱣ ᱦᱟᱢᱮᱴ ᱠᱟᱛᱮ ᱪᱮᱛᱟᱱ ᱥᱮᱫ ᱵᱚᱱ ᱞᱟᱦᱟ ᱟᱠᱟᱱ ᱨᱮᱦᱚᱸ “ᱢᱟᱥ ᱚᱞᱚᱜ” ᱥᱮ ᱥᱟᱶᱛᱟ ᱥᱩᱫᱷᱟᱹ ᱡᱷᱚᱛᱚ ᱦᱚᱲᱟᱜ ᱚᱞ ᱫᱚ ᱵᱟᱝ ᱵᱚᱱ ᱯᱩᱨᱟᱹᱣ ᱫᱟᱲᱮ ᱠᱟᱣᱫᱟ ᱾ ᱞᱮᱠᱷᱟ ᱥᱩᱢᱩᱝ ᱦᱚᱲ ᱜᱮ ᱚᱞᱚᱜ ᱥᱮᱬᱟ ᱠᱟᱛᱮ, ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱚᱞᱚᱜ ᱫᱚ ᱢᱤᱫᱴᱟᱝ ᱥᱤᱢᱟᱹ ᱨᱮᱜᱮ ᱵᱚᱱ ᱵᱩᱸᱫᱤ ᱟᱠᱟᱫᱟ ᱾
ᱟᱵᱚ ᱥᱟᱶᱛᱟ ᱨᱮ ᱠᱩᱲᱤ ᱦᱚᱯᱚᱱ ᱥᱤᱠᱷᱱᱟᱹᱛ ᱫᱚ ᱟᱹᱰᱤ ᱫᱟᱭᱟ ᱜᱮ ᱾ ᱱᱤᱛᱚᱜ, ᱱᱤᱛ ᱦᱟᱵᱤᱡ ᱦᱚᱸ ᱥᱟᱱᱛᱟᱲ ᱛᱤᱨᱞᱟᱹ ᱠᱚᱣᱟᱜ ᱚᱞᱚᱜ ᱫᱚ Optional, ᱚᱛᱷᱚᱪᱚ ᱥᱟᱶᱛᱟ ᱪᱮᱛᱟᱱ ᱛᱷᱚᱠᱨᱮ ᱤᱫᱤ ᱞᱟ.ᱜᱤᱫ ᱛᱤᱨᱞᱟᱹ ᱥᱤᱠᱷᱱᱟᱹᱛ ᱨᱮᱱᱟᱜ ᱠᱟᱛᱷᱟ ᱠᱚᱜᱮ ᱡᱩᱜᱮ ᱡᱩᱜᱮ ᱢᱟᱦᱟ ᱢᱟᱱᱣᱟ ᱠᱚᱠᱚ ᱞᱟᱹᱭ ᱟᱜᱩ ᱟᱠᱟᱫᱟ ᱾ ᱢᱮᱱᱠᱷᱟᱱ ᱛᱮᱦᱮᱧ, ᱥᱮ ᱡᱟᱸᱦᱟ ᱦᱤᱞᱚᱜ ᱜᱮ ᱥᱟᱱᱛᱟᱲ ᱛᱤᱨᱞᱟᱹ ᱚᱞᱚᱜ ᱠᱚ ᱟᱪᱩ ᱟᱠᱟᱫ ᱠᱚᱣᱟ, ᱩᱱᱨᱮᱜᱮ ᱛᱤᱨᱞᱟ. ᱥᱮᱪᱮᱫ ᱨᱮᱱᱟᱜ ᱡᱚᱥ ᱫᱚ, ᱥᱮᱪᱮᱫ ᱠᱟᱛᱮ, ᱜᱮᱭᱟᱱ ᱵᱩᱨᱫᱷᱤ ᱫᱤᱥᱟᱹ ᱦᱟᱢᱮᱴ ᱠᱟᱛᱮ, ᱱᱤᱡᱮ ᱟᱥᱩᱞᱚᱜ ᱫᱚ ᱵᱟᱝ, ᱵᱚᱨᱚᱢ ᱱᱟᱯᱟᱭ ᱡᱟᱶᱟᱭ ᱧᱟᱢ ᱞᱟᱜᱤᱫ ᱜᱮ ᱛᱤᱨᱞᱟᱹ ᱫᱚᱠᱚ ᱥᱤᱠᱷᱱᱟᱹᱛ ᱠᱟᱠᱚᱣᱟ ᱾ ᱡᱚᱛᱷᱟᱛ ᱥᱤᱠᱷᱱᱟᱹᱛ ᱥᱮ ᱞᱟᱯᱷᱟᱝ ᱥᱤᱠᱷᱱᱟᱹᱛ ᱥᱟᱱᱛᱟᱲ ᱛᱤᱨᱞᱟᱹ ᱠᱚᱣᱟᱜ ᱡᱟᱹᱥᱛᱤ ᱵᱟᱹᱱᱩᱜ ᱛᱮ ᱠᱟᱹᱢᱤ ᱟᱹᱥᱩᱞ ᱴᱚᱴᱷᱟ ᱠᱚᱨᱮ ᱥᱮ ᱪᱟᱹᱠᱨᱤ ᱱᱳᱠᱨᱤ ᱠᱚᱨᱮ ᱦᱚᱸ ᱥᱟᱱᱛᱟᱲ ᱛᱤᱨᱞᱟᱹ ᱠᱚᱫᱚ ᱠᱚ ᱮᱛᱟᱝ ᱜᱮᱭᱟ ᱾
ᱟᱛᱳ ᱫᱤᱥᱚᱢ ᱨᱮ ᱠᱩᱲᱤ ᱦᱚᱯᱚᱱ ᱥᱤᱠᱷᱱᱟᱹᱛ ᱨᱮᱱᱟᱜ ᱡᱟᱸᱜᱮ ᱫᱚ ᱨᱮᱜᱮᱸᱡ ᱱᱟᱪᱟᱨ ᱥᱟᱶᱛᱮ ᱚᱪᱮᱛᱱᱟᱣ ᱾ ᱠᱚᱲᱟ ᱦᱚᱯᱚᱱ ᱥᱟᱞᱟᱜ ᱠᱚᱲᱤ ᱦᱚᱯᱚᱱ ᱠᱚᱦᱚᱸ ᱟᱹᱛᱷᱟᱹᱢ ᱚᱞᱚᱜ ᱫᱚᱠᱚ ᱪᱟᱞᱟᱜ ᱠᱟᱱᱟ, ᱛᱚᱵᱮ ᱚᱱᱟ ᱫᱚ ᱵᱤᱨᱫᱟᱹᱜᱟᱲ ᱪᱟᱞᱟᱣ ᱜᱮ, ᱡᱚᱛᱷᱟᱛ ᱥᱤᱠᱷᱱᱟᱹᱛ ᱦᱟᱢᱮᱴ ᱫᱚ ᱵᱟᱝᱼᱟ ᱾ ᱡᱟᱹᱥᱛᱤ ᱠᱩᱲᱤ ᱦᱚᱯᱚᱱ ᱜᱮ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱥᱟᱝ ᱥᱟᱝ ᱛᱮᱠᱚ ᱚᱞᱚᱜᱼᱟ ᱾ ᱚᱱᱟ ᱦᱤᱥᱟᱹᱵᱽ ᱛᱮ ᱠᱚᱲᱟ ᱦᱚᱯᱚᱱ ᱠᱷᱚᱱ ᱠᱩᱲᱤ ᱦᱚᱯᱚᱱ ᱫᱚ ᱥᱮᱪᱮᱫ ᱨᱮᱱᱟᱜ ᱚᱠᱛᱚ ᱫᱚ ᱠᱚᱢ ᱜᱮᱠᱚ ᱧᱟᱢᱟ ᱾ ᱟᱨᱦᱚᱸ ᱟᱭᱳ ᱵᱟᱵᱟ ᱥᱮᱛᱟᱜ ᱠᱷᱚᱱ ᱱᱟᱞᱦᱟ ᱛᱩᱢᱟᱹᱞ ᱠᱤᱱ ᱳᱰᱳᱝ ᱚᱜ ᱠᱷᱟᱱ, ᱜᱷᱟᱨᱚᱸᱡᱽ ᱨᱮᱱ ᱢᱟᱨᱟᱝ ᱠᱩᱲᱤ ᱜᱤᱫᱽᱨᱟᱹ ᱴᱷᱮᱱ ᱜᱮ ᱚᱲᱟᱜ ᱥᱟᱱᱟᱢ ᱠᱤᱱ ᱟᱞᱟᱭ ᱵᱟᱹᱜᱤ ᱚᱴᱚ ᱟᱭᱟ ᱾ ᱩᱱᱨᱮ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱫᱚ ᱚᱲᱟᱜ ᱥᱚᱝᱥᱟᱨ ᱥᱟᱢᱴᱟᱣ ᱟᱨ ᱟᱡ ᱠᱷᱚᱱ ᱦᱩᱰᱤᱧ ᱵᱟᱹᱵᱩ ᱢᱟᱹᱭ ᱛᱟᱠᱚ ᱧᱮᱞ ᱥᱟᱢᱴᱟᱣ ᱜᱮ ᱢᱟᱨᱟᱝ ᱠᱟᱹᱢᱤ ᱦᱳᱭᱳᱜ ᱛᱟᱭᱟ ᱾ ᱡᱩᱫᱤ ᱤᱥᱠᱩᱞ ᱚᱞᱚᱜ ᱨᱮᱱᱟᱜ ᱯᱚᱨᱤᱥᱚᱝᱠᱷᱟᱱ ᱵᱚᱱ ᱧᱮᱞᱟ ᱛᱚᱵᱮ ᱵᱚᱱ ᱧᱮᱞ ᱧᱟᱢᱟ, ᱢᱤᱫᱴᱟᱝ ᱟᱛᱳᱨᱮ ᱫᱤᱠᱩ ᱟᱨ ᱥᱟᱱᱛᱟᱲ ᱠᱩᱲᱤ ᱜᱤᱫᱽᱨᱟᱹ ᱥᱚᱢᱟᱱ ᱥᱚᱢᱟᱱ ᱠᱚ ᱛᱟᱸᱦᱮᱱ ᱠᱷᱟᱱ ᱥᱟᱱᱛᱟᱲ ᱠᱷᱚᱱ ᱫᱤᱠᱩ ᱜᱮ ᱡᱟᱥᱛᱤ ᱠᱟᱭᱛᱮ ᱚᱞᱚᱜ ᱫᱚᱠᱚ ᱪᱟᱞᱟᱜᱼᱟ ᱾ ᱚᱱᱟ ᱥᱟᱝ ᱛᱮ ᱡᱟᱱᱟᱢ ᱯᱟᱨᱥᱤ ᱛᱮ ᱵᱟᱝ ᱥᱮᱪᱮᱫ ᱟᱨ ᱩᱫᱽᱜᱟᱹᱣ ᱟᱱ ᱦᱚᱲ ᱨᱮᱱ ᱚᱵᱷᱟᱵᱽ ᱦᱚᱸ ᱛᱤᱨᱞᱟᱹ ᱚᱥᱤᱠᱷᱱᱟᱹᱛ ᱨᱮᱱᱟᱜ ᱚᱡᱮ ᱫᱚ ᱾ ᱟᱵᱚ ᱥᱟᱱᱛᱟᱲ ᱫᱚ ᱠᱟᱹᱣᱰᱤ ᱟᱹᱨᱤ ᱥᱮᱫ ᱛᱮ ᱱᱤᱛ ᱦᱚᱸ ᱵᱚᱱ ᱞᱤᱪᱟᱹᱲ ᱜᱮᱭᱟ ᱾ ᱚᱱᱟ ᱛᱮ ᱡᱟᱸᱦᱟ ᱜᱮ ᱠᱩᱲᱟᱹᱣ ᱟᱱᱴᱟᱣ ᱵᱩᱱᱤᱭᱟᱹᱫᱤ ᱥᱤᱠᱷᱱᱟᱹᱛ ᱦᱟᱢᱮᱴ ᱠᱟᱛᱮ ᱞᱟᱯᱷᱟᱝ ᱥᱤᱠᱷᱱᱟᱹᱛ ᱫᱚ ᱥᱟᱱᱛᱟᱲ ᱛᱤᱨᱞᱟᱹ ᱠᱚᱫᱚ ᱟᱫᱚ ᱚᱦᱚ ᱠᱚ ᱦᱟᱢᱮᱴ ᱠᱮᱭᱟ ᱾ ᱵᱮᱜᱚᱨ ᱚᱱᱟ ᱩᱱ ᱡᱩᱫᱤ ᱵᱟᱯᱞᱟ ᱠᱷᱟᱹᱛᱤᱨ ᱯᱮᱲᱟ ᱠᱚᱠᱚ ᱞᱟᱜᱟᱣ ᱮᱱ, ᱛᱚᱵᱮ ᱠᱷᱟᱱ ᱫᱚ ᱚᱸᱰᱮ ᱜᱮ ᱯᱟᱲᱦᱟᱣ ᱫᱚ ᱢᱩᱪᱟᱹᱫ ᱮᱱ ᱛᱟᱭᱟ ᱾
ᱱᱤᱛ ᱦᱟᱹᱵᱤᱡ ᱦᱚᱸ ᱥᱟᱱᱛᱟᱲ ᱯᱟᱹᱴᱷᱩᱟᱹ ᱠᱚᱫᱚ ᱚᱠᱟ ᱚᱠᱟ ᱚᱠᱛᱚ ᱫᱚ First Generation learner ᱢᱩᱨᱩᱠ ᱮᱜᱟᱸᱛ ᱟᱯᱟᱛ ᱫᱚ ᱟᱠᱚ ᱨᱮᱱ ᱜᱤᱫᱟᱹᱨ ᱫᱚ ᱪᱮᱫ ᱥᱚᱦᱚᱫ ᱜᱮ ᱵᱟᱠᱚ ᱮᱢ ᱫᱟᱲᱮ ᱟᱠᱚᱣᱟ ᱾ ᱪᱮᱫ ᱚᱞᱚᱜ ᱥᱮᱪᱮᱫ ᱨᱮ, ᱪᱮᱫ ‘ᱠᱮᱨᱤᱭᱟᱨ’ ᱛᱮᱭᱟᱨ ᱨᱮ ᱾ ᱵᱤᱨᱫᱟᱹᱜᱟᱲ ᱨᱮ ᱜᱤᱫᱟᱹᱨ ᱵᱷᱩᱨᱛᱤ ᱠᱟᱛᱮ ᱜᱮ ᱥᱟᱱᱟᱢ ᱠᱟᱹᱢᱤ ᱢᱩᱪᱟᱹᱫ ᱮᱱ ᱛᱟᱠᱚᱣᱟ ᱾ ᱪᱮᱫ ᱞᱮᱠᱟᱭ ᱚᱞᱚᱜ ᱠᱟᱱᱟ, ᱪᱮᱫ ᱠᱚᱭ ᱚᱞᱚᱜ ᱠᱟᱱᱟ, ᱛᱤᱱᱟᱹᱜ ᱮ ᱪᱮᱫ ᱠᱮᱫᱟ – ᱚᱱᱟ ᱛᱚᱞᱟᱥ ᱫᱚ ᱛᱤᱥ ᱦᱚᱸ ᱵᱟᱠᱚ ᱫᱚᱦᱚᱭᱟ ᱾ ᱠᱟᱴᱤᱡ ᱠᱮᱴᱮᱡ ᱚᱲᱟᱜ ᱦᱚᱲ ᱫᱚ ᱟᱠᱚᱣᱟᱜ ᱟᱰᱤ ᱦᱟᱨᱠᱮᱛ ᱥᱟᱥᱮᱛ ᱥᱟᱦᱟᱣ ᱠᱟᱛᱮ ᱨᱚᱡᱽᱜᱟᱨ ᱨᱮᱱᱟᱜ ᱠᱟᱣᱰᱤ ᱟᱛᱮ Extra ᱯᱟᱲᱦᱟᱣ ᱞᱟᱜᱤᱫ ‘ᱠᱳᱪᱤᱝ’ ᱨᱮᱠᱚ ᱮᱢᱟᱠᱚᱣᱟ ᱾ ᱚᱱᱟ ᱛᱮᱜᱮ ᱜᱤᱫᱽᱨᱟᱹ ᱟᱜ ᱚᱞᱚᱜ ᱨᱮ ᱟᱰᱤ ᱩᱛᱟᱹᱨ Care ᱟᱨ ᱢᱮᱫ ᱞᱩᱛᱩᱨ ᱮᱢ ᱦᱳᱭᱮᱱᱟ ᱢᱮᱱᱛᱮ ᱠᱚ ᱯᱟᱹᱛᱭᱟᱹᱣ ᱠᱮᱫᱟ ᱮᱸᱜᱟᱛ ᱟᱯᱟᱛ ᱾ ᱠᱩᱲᱤ ᱜᱤᱫxᱨᱟᱹ ᱨᱮᱱ ᱮᱸᱜᱟᱛ ᱟᱯᱟᱛ ᱢᱟ ᱚᱠᱛᱚ ᱨᱮ ᱚᱞᱚᱜ ᱯᱟᱲᱦᱟᱣ ᱵᱤᱱᱛᱤ ᱠᱷᱚᱱ ᱠᱟ.ᱢᱤ ᱠᱚᱜᱮ ᱠᱚ ᱵᱤᱱᱛᱤ ᱟᱠᱚᱭᱟ ᱾
ᱱᱟᱦᱟᱜ ‘ᱥᱤᱠᱠᱷᱟ ᱚᱫᱷᱤᱠᱟᱨ ᱟᱭᱤᱱ’ ᱦᱚᱛᱮᱛᱮ ᱤᱥᱠᱩᱞ ᱥᱮᱪᱮᱫ ᱨᱮ ᱯᱟᱥ ᱯᱷᱮᱞ ᱵᱟᱝ ᱛᱟᱸᱦᱮ ᱦᱚᱸ ᱥᱟᱱᱛᱟᱲ ᱠᱩᱲᱤ ᱜᱤᱫᱟᱹᱨ ᱫᱚᱠᱚ Suffer ᱚᱜ ᱠᱟᱱᱟ ᱾ ᱪᱮᱫᱟᱜ ᱥᱮ ᱵᱤᱨᱫᱟᱹᱜᱟᱲ ᱢᱟᱪᱮᱛ ᱠᱚᱫᱚ ᱜᱤᱫᱽᱨᱟᱹ ᱥᱮᱪᱮᱫ ᱦᱟᱨᱟ ᱠᱟᱠᱚ ᱠᱷᱚᱱ, ᱦᱟᱺᱭᱯᱷᱟᱺᱭ ‘ᱥᱤᱞᱮᱵᱟᱥ’ ᱢᱩᱪᱟᱹᱫ ᱠᱟᱛᱮ ᱯᱟᱥ ᱠᱟᱠᱚ ᱨᱮᱱᱟᱜ ᱜᱮ ᱡᱟᱥᱛᱤ ᱠᱚ ᱠᱩᱨᱩᱢᱩᱴᱩᱭᱟ ᱾ ᱚᱱᱟᱛᱮ ᱜᱤᱫᱟᱹᱨᱟᱜ ᱟᱠᱷᱚᱨ ᱩᱯᱩᱨᱩᱢ ᱦᱳᱭᱮᱱ ᱟᱨ ᱵᱟᱝ ᱦᱳᱭᱮᱱ!ᱟᱨᱦᱚᱸ ᱥᱟᱱᱛᱟᱲ ᱛᱤᱨᱞᱟᱹ ᱯᱟᱹᱴᱷᱣᱟᱹ ᱫᱤᱠᱩ ᱠᱚᱣᱟᱜ ᱚᱞᱚᱜ ᱯᱟᱨᱥᱤ ᱵᱟᱭ ᱵᱩᱡᱽ ᱫᱟᱲᱮᱭᱟᱜ ᱠᱷᱟᱱ, ᱫᱤᱠᱩ ᱢᱟᱪᱮᱛ ᱟᱜ ᱩᱱᱟᱹᱜ ᱫᱟᱭᱟ ᱟᱨ ᱫᱚᱨᱚᱫᱽ ᱦᱚᱸ ᱵᱟᱝ ᱛᱟᱸᱦᱮᱱᱟ ᱱᱟᱯᱟᱭ ᱚᱠᱚᱡ ᱮ ᱪᱮᱫ ᱟᱭᱟ ᱾ ᱚᱱᱟ ᱨᱮ ᱫᱟᱭ ᱦᱚᱸ ᱵᱟᱱᱩᱜ ᱛᱟᱭᱟ ᱾ ᱟᱫᱚ ᱚᱱᱟ ᱠᱷᱟᱛᱤᱨ ᱚᱠᱟ ᱚᱠᱛᱚ ᱠᱚᱨᱮ ᱫᱚ ᱟᱠᱷᱚᱨ ᱜᱮᱭᱟᱱ ᱵᱟᱝ ᱦᱳᱭ ᱠᱟᱛᱮ ᱜᱮ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱮ ᱞᱮᱵᱮᱫᱟ ᱢᱤᱫ ᱥᱟᱱᱛᱟᱲ ᱯᱟᱹᱴᱷᱣᱟᱹ ᱾ ᱟᱯᱱᱟᱨᱟᱜ ᱢᱮᱫ ᱫᱤᱠᱷᱩᱛ ᱱᱚᱝᱠᱟᱱ ᱪᱤᱛᱟᱹᱨ ᱦᱚᱸ ᱧᱮᱞ ᱟᱠᱟᱱᱟ, ᱜᱤᱫᱟᱹᱨ ‘ᱥᱮᱠᱮᱱᱰᱟᱨᱤ’ ᱵᱤᱱᱤᱰ ᱯᱟᱥ ᱠᱟᱛᱮ ᱦᱚᱸ ‘ᱨᱤᱰᱤᱝ’ ᱯᱟᱲᱦᱟᱣ ᱵᱟᱭ ᱫᱟᱲᱮᱭᱟᱜᱼᱟ ᱾ ᱧᱩᱛᱩᱢ ᱥᱟᱠᱷᱚᱨ ᱛᱮᱫ ᱮ ᱪᱮᱫ ᱠᱟᱜᱼᱟ ᱠᱷᱚᱲᱮᱵᱚᱲᱮ ᱾ ᱚᱱᱠᱟ ᱚᱱᱠᱟ ᱛᱮᱜᱮ ᱩᱱᱤᱭᱟᱜ ᱚᱞᱚᱜ ᱫᱚ ᱢᱩᱪᱟᱹᱫᱚᱜ ᱛᱟᱭᱟ ᱢᱤᱫ ᱫᱤᱱ ᱾ ᱢᱤᱫ ᱫᱤᱱ ᱟᱡ ᱦᱚᱸ ᱢᱤᱫ ᱯᱟᱹᱴᱷᱣᱟᱹ ᱜᱤᱫᱟᱹᱨ ᱨᱮᱱ ᱮᱸᱜᱟᱛ ᱮ ᱦᱳᱭᱳᱜᱼᱟ ᱾ ᱢᱮᱱᱠᱷᱟᱱ ᱩᱱ ᱩᱱᱤ ᱱᱟᱣᱟ ᱯᱟᱹᱴᱷᱣᱟᱹ ᱜᱤᱫᱽᱨᱟᱹ ᱦᱚᱸ ᱮᱸᱜᱟᱛ ᱛᱮᱫᱟᱜ ᱚᱱᱠᱟᱱ ᱚᱞᱚᱜ ᱠᱷᱟᱛᱤᱨ First Generation Learner ᱞᱮᱠᱟᱜᱮᱭ ᱛᱟᱸᱦᱮᱱᱟ ᱾ ᱱᱚᱝᱠᱟ ᱱᱚᱝᱠᱟ ᱛᱮ ᱢᱤᱫ ᱛᱤᱨᱞᱟᱹ ᱯᱟᱹᱴᱷᱣᱟᱹ ᱚᱲᱟᱜ ᱟᱨ ᱵᱟᱦᱮᱨ – ᱚᱠᱟ ᱥᱮᱫ ᱛᱮᱦᱚᱸ ᱥᱮᱪᱮᱫ ᱥᱤᱠᱷᱱᱟᱹᱛ ᱨᱮ ᱪᱮᱫ ᱜᱚᱲᱚ ᱜᱮ ᱵᱟᱭ ᱧᱟᱢᱟ ᱾
ᱚᱱᱟ ᱠᱚ ᱵᱩᱨᱩ ᱵᱟᱨᱟᱠ ᱮᱴᱠᱮᱴᱚᱬᱮ ᱯᱟᱨᱚᱢ ᱠᱟᱛᱮ ᱡᱩᱫᱤ ᱢᱤᱫ ᱛᱤᱨᱞᱟᱹ ᱯᱟᱹᱴᱷᱣᱟᱹ ᱟᱡ ᱫᱟᱲᱮ ᱛᱮ ᱚᱞᱚᱜ ᱮ ᱥᱮᱪᱮᱫ ᱠᱮᱫᱟ ᱩᱱ ᱫᱚ ᱟᱨᱦᱚᱸ ᱞᱟᱯᱷᱟᱝ ᱥᱮᱪᱮᱫ ᱨᱮᱱᱟᱜ ᱠᱩᱠᱢᱩ ᱥᱮ ᱟᱯᱟᱥᱩᱞ ᱨᱮᱱᱟᱜ ᱦᱚᱨ ᱫᱚ ᱮᱸᱜᱟᱛ ᱟᱯᱟᱛ, ᱯᱮᱲᱟ ᱯᱟᱺᱲᱦᱟᱹ ᱥᱮ ᱥᱳᱨ ᱥᱳᱯᱳᱨ ᱦᱚᱲ ᱫᱚ ᱵᱟᱠᱚ ᱩᱫᱩᱜ ᱟᱭᱟ ᱾ ᱵᱚᱨᱚᱢ ᱱᱟᱯᱟᱭ ᱡᱟᱶᱟᱭ ᱯᱟᱸᱡᱟ ᱜᱮᱠᱚ ᱫᱷᱩᱨᱟᱹᱜᱼᱟ ᱾ ᱪᱮᱫᱟᱜ ᱥᱮ ᱠᱩᱲᱤ ᱦᱚᱯᱚᱱ ᱫᱚ ᱦᱚᱲ ᱚᱲᱟᱜ ᱮ ᱪᱟᱞᱟᱜᱼᱟ, ᱦᱚᱲ ᱵᱷᱳᱜᱟᱵᱷᱳᱜᱽ ᱞᱟᱜᱤᱫ ᱩᱱᱟᱹᱜ ᱫᱚ ᱮᱱᱛᱮ ᱚᱠᱚᱭᱮ ᱦᱚᱨᱚᱵᱚᱨᱚᱜᱼᱟ ᱾ ᱚᱱᱟ ᱠᱷᱟᱛᱤᱨ ᱦᱚᱸ ᱠᱩᱲᱤ ᱜᱤᱫᱽᱨᱟᱹ ᱵᱟᱯᱩᱲᱤᱡ ᱟᱜ ᱞᱟᱯᱷᱟᱝ ᱥᱮᱪᱮᱫ ᱫᱚ ᱩᱫᱽᱜᱟᱹᱣ ᱵᱟᱝ ᱛᱮ ᱞᱟᱯᱷᱟᱝ ᱵᱟᱝ ᱡᱚᱴᱮᱫ ᱠᱟᱛᱮ ᱜᱮ ᱜᱚᱡ ᱢᱩᱰᱨᱩᱡᱚᱜᱼᱟ ᱾
ᱠᱩᱲᱤ ᱜᱤᱫᱽᱨᱟᱹ ᱟᱜ ᱞᱟᱯᱷᱟᱝ ᱥᱮᱪᱮᱫ ᱨᱮᱱᱟᱜ ᱟᱨ ᱢᱤᱫᱴᱟᱝ ᱢᱟᱨᱟᱝ ᱮᱴᱠᱮᱞᱚᱸᱲᱮ ᱫᱚ ᱟᱹᱛᱷᱟᱹᱲᱤ ᱯᱟᱛᱟ ᱪᱷᱟᱛᱟ ᱫᱟᱬᱟᱱ ᱾ ᱠᱩᱲᱤ ᱜᱤᱫᱽᱨᱟᱹ ᱱᱟᱥᱮᱱᱟᱜ ᱮ ᱥᱮᱪᱮᱫ ᱞᱮᱱᱠᱷᱟᱱ ᱜᱮ ᱟᱹᱛᱷᱟᱹᱲᱤ ᱫᱟᱬᱟᱱ ᱵᱤᱨᱩᱫᱷ ᱟᱭᱳ ᱵᱟᱵᱟ ᱪᱮᱫ ᱨᱚᱲ ᱨᱮᱱᱟᱜ ᱥᱟᱦᱚᱥ ᱵᱟᱠᱚ ᱧᱟᱢᱟ ᱾ᱠᱟᱛᱷᱟᱡ ᱜᱤᱫᱟᱹᱨ ᱫᱚ ᱟᱰᱤ ᱩᱛᱟᱹᱨ ᱮ ᱚᱞᱚᱜ ᱠᱟᱱᱟ ᱾ ᱚᱞᱚᱜ ᱠᱷᱟᱛᱤᱨ ᱜᱮ ᱯᱟᱞᱮᱱ ᱟᱭᱨᱮ ᱵᱟᱭᱨᱮ ᱫᱚᱭ ᱫᱟᱬᱟᱱ ᱠᱟᱱᱟ ᱾ ᱢᱮᱱᱠᱷᱟᱱ ᱚᱱᱠᱟ ᱫᱟᱬᱟ ᱫᱟᱬᱟ ᱛᱮᱜᱮ ᱚᱞᱚᱜ ᱵᱟᱜᱤ ᱠᱟᱛᱮ ᱮᱱᱮᱡ ᱥᱮᱨᱮᱧ ᱨᱮᱜᱮ ᱡᱟᱥᱛᱤ ᱢᱚᱱᱮ ᱫᱚᱭ ᱫᱟᱹᱲᱟ ᱩᱱᱤ ᱯᱟᱹᱴᱷᱣᱟᱹ ᱜᱤᱫᱽᱨᱟᱹ ᱟᱜ ᱾ᱢᱮᱱᱠᱷᱟᱱ ᱫᱤᱠᱩ ᱯᱟᱹᱴᱷᱣᱟᱹ ᱜᱤᱫᱽᱨᱟᱹ ᱫᱚ ᱱᱚᱝᱠᱟ ᱠᱟᱛᱮ ᱫᱚ ᱛᱤᱥ ᱦᱚᱸ ᱚᱞᱚᱜ ᱫᱚ ᱵᱟᱠᱚ ᱰᱷᱤᱞᱟᱹᱣᱟ ᱾ ᱥᱟᱱᱛᱟᱲ ᱯᱟᱹᱴᱷᱣᱟᱹ ᱜᱤᱫᱟᱹᱨ ᱠᱷᱟᱱ ᱯᱩᱛᱷᱤ ᱯᱚᱛᱚᱵ ᱨᱮᱱᱟᱜ ᱟᱠᱷᱚᱨ ᱠᱚ ᱠᱷᱚᱱ ᱡᱟᱥᱛᱤ ᱠᱷᱚᱵᱚᱨᱮ ᱫᱚᱦᱚᱭᱟ ᱪᱟᱸᱫᱳ ᱠᱮ ᱪᱟᱸᱫᱳ ᱯᱤᱪᱷᱤ ᱚᱠᱟ ᱠᱚᱨᱮ ‘ᱚᱨᱠᱮᱥᱴᱨᱟ’ ᱮᱱᱮᱡ ᱥᱮᱨᱮᱧ ᱠᱚ ᱥᱟᱯᱲᱟᱜ ᱠᱟᱱᱟ ᱾ ᱜᱟᱛᱮ ᱜᱟᱯᱟᱛᱮ ᱟᱛᱮ ᱚᱱᱛᱮ ᱜᱮᱭ ᱫᱟᱹᱲ ᱟᱪᱩᱨᱚᱜᱼᱟ ᱢᱟᱦᱟ ᱛᱟᱭᱚᱢ ᱢᱟᱦᱟ ᱚᱞᱚᱜ ᱯᱟᱲᱦᱟᱣ ᱠᱚ ᱫᱮᱭᱟ ᱠᱟᱛᱮ ᱾ ᱥᱟᱨᱤ ᱠᱟᱛᱷᱟ ᱞᱟᱹᱭ ᱛᱮᱫᱚ ᱚᱲᱟᱜ ᱦᱚᱲ ᱥᱮ ᱮᱸᱜᱟᱛ ᱟᱯᱟᱛ ᱠᱚᱦᱚᱸ ᱱᱚᱣᱟ ᱤᱫᱤ ᱠᱟᱛᱮ ᱱᱟᱥᱮᱱᱟᱜ ᱦᱚᱸ ᱵᱟᱠᱚ ᱥᱚᱱᱛᱚᱨ ᱜᱮᱭᱟ, ᱥᱮ ᱴᱮᱠᱟᱣ ᱫᱟᱨᱟᱢ ᱨᱮᱱᱟᱜ ᱵᱟᱠᱚ ᱦᱩᱫᱤᱥᱟ ᱾ ᱦᱟᱦᱟᱲᱟ ᱨᱮᱱᱟᱜ ᱠᱟᱛᱷᱟ ᱱᱟᱦᱟᱜ ᱚᱠᱛᱚ ᱨᱮ ᱯᱩᱪᱷᱤᱢ ᱵᱟᱝᱞᱟ ᱨᱮᱱᱟᱜ ᱥᱚᱢᱤᱠᱠᱠᱷᱟ ᱨᱮ ᱧᱮᱞ ᱟᱠᱟᱱᱟ ‘ᱥᱮᱠᱮᱱᱰᱟᱨᱤ’ ᱵᱤᱱᱤᱰ ᱨᱮ ᱟᱰᱤ ᱩᱛᱟᱹᱨ ᱯᱷᱮᱞ ᱨᱮᱱᱟᱜ ᱚᱡᱮ ᱫᱚ ᱮᱱᱮᱡ ᱥᱮᱨᱮᱧ ᱚᱨᱠᱮᱥᱴᱨᱟ ᱾ ᱱᱚᱣᱟ ᱵᱚᱠᱚᱞᱵᱚᱰᱮ ᱫᱟᱜ ᱨᱮ ᱯᱟᱹᱴᱷᱣᱟᱹ ᱠᱚ ᱟᱛᱩᱜ ᱨᱮᱱᱟᱜ ᱫᱟᱭ ᱫᱚ ᱩᱱᱠᱩ ᱜᱟᱶᱛᱟ ᱠᱚ ᱦᱟᱛᱟᱣ ᱦᱳᱭᱳᱜ ᱛᱟᱠᱚᱣᱟ ᱵᱟᱝ ᱪᱮᱛᱟ – ᱡᱟᱦᱟᱸᱭ ᱠᱚ ᱱᱚᱣᱟ ᱠᱚ ᱠᱚ ᱥᱟᱯᱲᱟᱣ ᱮᱫᱟ ᱾ ᱫᱟᱭ ᱦᱟᱛᱟᱣ ᱦᱳᱭᱳᱭ ᱛᱟᱠᱚᱣᱟ ᱥᱟᱶᱛᱟ ᱨᱮᱱᱟᱜ ᱥᱤᱠᱷᱱᱟᱹᱛ ᱪᱟᱨᱪᱟᱣ ᱨᱮ ᱡᱟᱸᱜᱮ ᱠᱚ ᱛᱮᱭᱟᱨᱮᱫ ᱛᱮ ᱾
ᱱᱟᱦᱟᱜ ᱛᱤᱨᱞᱟᱹ ᱚᱥᱤᱠᱷᱱᱟᱹᱛ ᱨᱮᱱᱟᱜ ᱟᱨ ᱢᱤᱫᱴᱟᱝ ᱢᱟᱨᱟᱝ ᱚᱡᱮ ᱫᱚ ᱠᱟᱱᱟ ‘ᱥᱢᱟᱨᱴ ᱯᱳᱱ’ ᱾ ᱟᱰᱤ ᱥᱚᱞᱦᱮ ᱛᱮ ᱚᱱᱟ ᱠᱚ ᱛᱤ ᱥᱳᱨ ᱨᱮ ᱧᱟᱢᱚᱜ ᱠᱟᱱ ᱠᱷᱟᱛᱤᱨ ‘ᱥᱳᱥᱟᱞ ᱢᱤᱰᱤᱭᱟ’ ᱨᱮᱜᱮ ᱚᱠᱛᱚ ᱠᱚ ᱠᱷᱮᱢᱟᱣ ᱮᱫᱟ ᱟᱰᱤ ᱡᱳᱨ ᱾ ᱨᱤᱞ ᱵᱮᱱᱟᱣ ᱠᱷᱚᱱ ᱮᱦᱚᱵ ᱠᱟᱛᱮ ᱡᱤᱭᱚᱱ ᱨᱮᱱᱟᱜ ᱥᱟᱱᱟᱢ ᱜᱷᱟᱲᱤ ᱨᱮᱱᱟᱜ ᱳᱠᱳ ᱫᱟᱱᱟᱝ ᱚᱠᱛᱚ ᱠᱚᱦᱚᱸ Live ᱠᱟᱛᱮ ᱦᱚᱲ ᱩᱫᱩᱜ ᱟᱠᱚ ᱨᱮᱱᱟᱜ ᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱾ ᱱᱤᱡᱮᱨᱟᱜ ᱥᱟᱡᱽ ᱵᱟᱡᱽ ᱩᱫᱩᱜ ᱨᱮᱱᱟᱜ ‘ᱠᱚᱢᱯᱤᱴᱤᱥᱟᱱ’ ᱾ ᱛᱤᱱᱟᱹᱜ ‘ᱞᱟᱭᱤᱠ’ ‘ᱠᱚᱢᱮᱱᱴ’ ᱯᱟᱲᱟᱣ ᱮᱱᱟ ᱚᱱᱟ ᱨᱮᱱᱟᱜ ‘ᱠᱚᱢᱯᱤᱴᱤᱥᱟᱱ’ ᱾ ‘ᱯᱷᱮᱱ’ ‘ᱯᱷᱳᱞᱳᱣᱟᱨ’ ᱵᱟᱲᱦᱟᱣ ᱨᱮᱱᱟᱜ ‘ᱠᱚᱢᱯᱤᱴᱤᱥᱟᱱ’ – ᱚᱱᱠᱟ ᱚᱱᱠᱟ ᱛᱮᱜᱮ ᱢᱟᱦᱟ ᱢᱟᱦᱟ ᱛᱮ ᱩᱱᱠᱩ ᱫᱚ ᱚᱱᱟ ᱡᱚᱱᱛᱚᱨ ᱵᱷᱤᱛᱟᱹᱨ ᱨᱮᱠᱚ ᱵᱚᱞᱚ ᱟᱫ ᱜᱚᱫᱚᱜ ᱠᱟᱱᱟ ᱾
ᱥᱟᱹᱨᱤ ᱜᱮ ᱱᱟᱦᱟᱜ ᱪᱮᱫ ᱠᱚᱲᱟ ᱪᱮᱫ ᱠᱩᱲᱤ ᱥᱤᱠᱷᱱᱟᱹᱛ ᱥᱮᱫ ᱛᱮ ᱢᱤᱫᱴᱟᱝ ᱧᱩᱛᱟᱹᱛ ᱠᱷᱚᱸᱜᱚᱨ ᱥᱮᱫ ᱠᱚ ᱢᱚᱦᱰᱟᱜ ᱠᱟᱱᱟ ᱾ ᱯᱩᱪᱷᱤᱢ ᱵᱟᱝᱞᱟ ᱥᱚᱨᱠᱟᱨᱟᱜ ᱠᱟᱛᱷᱟ ᱜᱮᱧ ᱞᱟᱹᱭᱟ, ᱱᱤᱛᱚᱜ ᱥᱚᱨᱠᱟᱨᱟᱜ ᱦᱤᱱᱟᱹᱱᱤᱭᱟᱹ ‘ᱯᱨᱚᱠᱚᱞᱯᱚ’ ᱞᱟᱹᱜᱤᱫ, ᱡᱟ ᱩᱰᱟᱹᱝ ᱥᱟᱱᱛᱟᱲ ᱛᱤᱨᱞᱟᱹ ᱠᱚ ᱚᱞᱚᱜ ᱟᱠᱷᱲᱟ ᱥᱮᱫ ᱠᱚ ᱢᱚᱦᱰᱟ ᱟᱠᱟᱱᱟ, ᱩᱱᱠᱩ ᱢᱩᱫᱽᱨᱮ ‘ᱰᱨᱚᱯ ᱟᱣᱩᱴ’ ᱵᱟᱝ ᱧᱮᱞᱚᱜ ᱠᱟᱱᱟ ᱾ ᱚᱱᱟ ᱢᱮᱱᱛᱮ ᱡᱩᱫᱤ ᱵᱚᱱ ᱢᱚᱱᱮᱭᱟ ᱥᱟᱱᱛᱟᱲ ᱛᱤᱨᱞᱟᱹ ᱟᱜ ᱥᱮᱪᱮᱫ ‘ᱜᱨᱟᱯᱷ’ ᱫᱚ ᱪᱮᱛᱟᱱ ᱥᱮᱫ ᱛᱚᱵᱮ ᱵᱷᱩᱞ ᱵᱚᱱ ᱢᱚᱱᱮᱭᱮᱫᱟ ᱾ ᱮᱱᱟᱝ ᱪᱮᱫ ᱞᱮᱠᱟ ᱥᱤᱠᱷᱱᱟᱹᱛ ᱥᱮᱫ ᱛᱮ ᱠᱩᱲᱤ ᱦᱚᱯᱚᱱ ᱠᱚᱠᱚ ᱚᱱᱦᱮᱲᱟ ᱞᱮᱱᱟ, ᱱᱮᱛᱟᱨ ᱦᱚᱸ ᱚᱱᱠᱟᱜᱮ ᱾ ᱮᱱᱟᱝ ᱫᱚ ᱥᱳᱡᱷᱮ ᱥᱚᱫᱚᱨ, ᱱᱤᱛᱚᱜ ᱫᱚ ᱳᱠᱳ ᱫᱟᱱᱟᱝ ᱾ᱚᱱᱟᱛᱮ ᱜᱮ ᱱᱤᱛ ᱦᱟᱵᱤᱡ ᱦᱚᱸ ᱟᱵᱚ ᱥᱟᱶᱛᱟ ᱫᱚ ᱛᱟᱭᱚᱢ ᱨᱮᱜᱮ ᱾
ᱫᱷᱟᱨᱛᱤ ᱨᱮ ᱞᱟᱦᱟᱱᱛᱤ ᱨᱮᱱᱟᱜ ᱡᱟᱸᱦᱟ ᱦᱚᱭ ᱦᱤᱸᱥᱤᱫ ᱮᱦᱚᱵ ᱟᱠᱟᱱᱟ, ᱚᱱᱟ ᱫᱚ ᱚᱠᱟ ᱚᱠᱛᱚ ᱫᱚ ᱥᱮᱸᱜᱮᱞ ᱦᱚᱭ ᱫᱟᱜ ᱞᱮᱠᱟ ᱢᱟᱰᱨᱟᱣ ᱟᱱᱟᱜ ᱜᱮᱭᱟ ᱾ ᱟᱵᱚ ᱠᱚ ᱴᱷᱮᱱ ᱫᱚ ᱯᱟᱞᱮᱱ ᱚᱱᱟ ᱫᱚ ᱥᱮᱸᱜᱮᱞ ᱫᱟᱜ ᱞᱮᱠᱟ ᱜᱮ ᱾ ᱟᱨ ᱚᱱᱟ ᱛᱮᱜᱮ ᱯᱟᱞᱮᱱ ᱚᱢᱚᱱ ᱠᱟᱛᱮ ᱵᱩᱥᱟᱹᱲ ᱢᱟᱲᱟᱝ ᱨᱮᱜᱮ ᱜᱚᱥᱚ ᱧᱩᱨᱦᱟᱹᱜ ᱠᱟᱱᱟ ᱥᱟᱱᱛᱟᱲ ᱡᱟᱛᱤ ᱨᱮᱱᱟᱜ ᱡᱚ ᱵᱮᱞᱮ ᱫᱚ ᱾ ᱚᱱᱟ ᱠᱚᱫᱚ ᱟᱵᱚ ᱛᱮᱜᱮ ᱧᱮᱞ ᱥᱩᱫᱷᱨᱟᱹᱣ ᱦᱳᱭᱳᱜ ᱛᱟᱵᱚᱱᱟ ᱾ ᱟᱛᱳ ᱠᱮ ᱟᱛᱳ ᱢᱟᱡᱷᱤ ᱠᱚᱢᱟ ᱫᱟᱭᱵᱷᱟᱨ ᱫᱚ ᱦᱟᱛᱟᱣ ᱜᱮ ᱦᱳᱭᱳᱜ ᱛᱟᱠᱚᱣᱟ ᱾ ᱚᱱᱟ ᱥᱟᱝ ᱛᱮ ᱜᱟᱶᱛᱟ ᱠᱚᱦᱚᱸ ᱫᱟᱭᱤᱛ ᱦᱟᱛᱟᱣ ᱦᱳᱭᱳᱜ ᱛᱟᱠᱚᱭᱟ, ᱟᱛᱳ ᱠᱚᱨᱮ ᱚᱞ ᱯᱟᱲᱦᱟᱣ ᱪᱟᱨᱪᱟᱜ ᱢᱟ ᱾ ᱠᱩᱲᱤ ᱜᱤᱫᱽᱨᱟᱹ ᱥᱮᱪᱮᱫ ᱠᱚ ᱨᱮᱱᱟᱜ ᱩᱫᱽᱜᱟᱹᱣ ᱟᱠᱷᱲᱟ ᱛᱮᱭᱟᱨ ᱦᱳᱭᱳᱜᱼᱟ ᱾ ᱩᱫᱽᱜᱟᱹᱣ ᱠᱚ ᱦᱳᱭᱳᱜᱼᱟ ᱾ ‘ᱠᱮᱨᱤᱭᱟᱨ ᱠᱟᱶᱩᱱᱥᱮᱞᱤᱝ’ ᱨᱮᱱᱟᱜ ᱟᱠᱷᱲᱟ ᱠᱚ ᱥᱟᱯᱲᱟᱣ ᱦᱳᱭᱳᱜᱼᱟ ᱥᱮᱨᱢᱟ ᱠᱮ ᱥᱮᱨᱢᱟ ᱾ ᱟᱨ ᱥᱮᱪᱮᱫ ᱟᱠᱚ ᱦᱳᱭᱳᱜᱼᱟ ᱥᱟᱶᱛᱟ ᱟᱹᱨᱤ ᱥᱤᱠᱷᱱᱟᱹᱛ ᱾ ᱛᱤᱨᱞᱟᱹ ᱠᱚ ᱱᱤᱡᱮᱨᱟᱜ ᱵᱷᱟᱜᱮ ᱵᱟᱲᱤᱡ ᱠᱚ ᱧᱮᱞ ᱥᱟᱢᱴᱟᱣ ᱫᱟᱲᱮ ᱭᱟᱜ ᱢᱟ ᱾ ᱟᱨ ᱦᱟᱯᱮᱱ ᱯᱳᱯᱚᱝᱲᱟ ᱞᱟᱜᱤᱫ ᱠᱚ ᱥᱟᱧᱪᱟᱣ ᱫᱚᱦᱚ ᱫᱟᱲᱮᱭᱟᱜ ᱢᱟ ᱾ ᱟᱨ ᱩᱱ ᱠᱷᱟᱱ ᱜᱮ ᱟᱵᱚᱱᱟᱜ ᱡᱟᱛᱤ ᱥᱟᱶᱛᱟ ᱫᱚ ᱠᱮᱴᱮᱡᱚᱜ ᱜᱮᱭᱟ ᱾
***
