ᱠᱤᱥᱟᱹᱬ ᱜᱩᱛᱤ

ᱯᱟᱹᱧᱪᱤ ᱫᱷᱩᱛᱤ ᱛᱤᱨᱮ ᱵᱟᱱᱟᱢ –
ᱠᱤᱥᱟᱹᱬ ᱜᱩᱛᱤ ᱴᱤᱵᱟ,
ᱫᱷᱚᱨᱚᱢ ᱟᱨ ᱠᱚᱨᱚᱢ ᱛᱟᱭ ᱫᱚ –
ᱥᱮᱨᱢᱟ ᱨᱮᱱ ᱪᱟ.ᱫᱚ – ᱤᱯᱤᱞ ᱞᱮᱠᱟ ᱿
ᱥᱮᱛᱟᱜ ᱠᱷᱚᱱ ᱥᱟᱨᱟ ᱜᱷᱟᱹᱲᱤ –
ᱨᱟᱹᱥᱠᱟᱹ ᱥᱟᱞᱟᱜ ᱜᱮ ᱠᱟᱹᱢᱤ
ᱦᱟᱨᱠᱮᱛ ᱥᱟᱥᱮᱛ ᱢᱮᱱᱟᱜ ᱨᱮᱦᱚᱸ –
ᱠᱟᱹᱢᱤ ᱫᱚ ᱵᱟᱭ ᱵᱟᱹᱜᱤ ᱿
ᱦᱤᱸᱥᱠᱟᱹ ᱦᱩᱞᱩᱝ ᱵᱟᱹᱱᱩᱜ ᱛᱟᱭᱟ
ᱢᱚᱱᱮ ᱛᱟᱞᱟ ᱨᱮ,
ᱢᱚᱱᱮ ᱨᱟᱹᱥᱠᱟᱹᱭ ᱥᱚᱫᱚᱨᱟ
ᱛᱤᱨᱭᱚ ᱵᱟᱱᱟᱢ ᱛᱮ ᱿

ᱢᱚᱱᱮ ᱫᱤᱞ ᱛᱟᱭ ᱥᱮᱨᱢᱟ ᱞᱮᱠᱟ,
ᱫᱩᱞᱟᱹᱲ ᱛᱟᱭ ᱫᱚ ᱵᱟᱦᱟ ᱮᱵᱷᱮᱱ –
ᱦᱤᱥᱤᱫ ᱦᱚᱭ ᱞᱮᱠᱟ ᱿
ᱫᱩᱞᱟᱹᱲ ᱨᱮᱱᱟᱜ ᱡᱚ ᱵᱟᱦᱟ
ᱟᱭᱟᱜ ᱠᱚᱲᱟᱢ ᱛᱟᱞᱟᱨᱮ,
ᱰᱳᱯᱳᱜ ᱵᱟᱦᱟᱭ ᱥᱟᱱᱟ
ᱡᱟᱜ ᱡᱚᱴᱮᱫ ᱛᱮ ᱿
ᱵᱟᱹᱫᱽ ᱵᱟᱹᱭᱦᱟᱹᱲ ᱮ ᱦᱟᱹᱨᱭᱟᱹᱲᱟ
ᱨᱟᱹᱥᱠᱟᱹ ᱠᱟᱹᱢᱤ ᱹᱛᱮ,
ᱫᱟᱨᱮ ᱱᱟᱹᱲᱤ ᱯᱮᱨᱮᱡᱚᱜ ᱡᱚ ᱵᱟᱦᱟ ᱛᱮ ᱿

ᱵᱮᱲᱟ ᱴᱷᱮᱱ ᱮ ᱥᱮᱬᱟ ᱟᱠᱟᱫ –
ᱟᱡᱟᱜ ᱫᱟᱲᱮ ᱛᱮ ᱠᱟᱹᱢᱤ ᱿
ᱦᱚᱭ ᱴᱷᱮᱱ ᱮ ᱥᱮᱬᱟ ᱟᱠᱟᱫ –
ᱛᱟᱲᱟᱢ ᱟᱡ ᱠᱩᱥᱤ ᱿
ᱵᱟᱦᱟ ᱞᱮᱠᱟᱭ ᱞᱟᱸᱫᱟᱭᱟ –
ᱦᱮᱰᱮᱡ ᱳᱰᱳᱠᱚᱜ ᱯᱷᱩᱨᱜᱟᱹᱞ ,
ᱛᱮᱨᱚᱢ ᱞᱮᱠᱟᱭ ᱠᱟᱹᱢᱤᱭᱟ –
ᱠᱤᱥᱟᱹᱬᱟᱜ ᱢᱚᱱᱮᱭ ᱥᱩᱠᱟᱹᱞ ᱿

ᱜᱩᱛᱤ ᱫᱚ ᱟᱭᱳ ᱨᱮᱱ ᱱᱤᱠᱷᱤᱛ ᱥᱚᱱᱟ,
ᱠᱮᱴᱮᱡ ᱠᱟᱛᱮᱭ ᱠᱟᱹᱢᱤᱭᱟ ᱿
ᱠᱮᱴᱮᱡ ᱦᱟᱥᱟᱭ ᱜᱮᱡᱮᱨᱟ,
ᱡᱟᱹᱯᱤᱫ ᱡᱟᱝ ᱮ ᱮᱵᱷᱮᱱᱟ ᱿
ᱨᱩᱠᱷᱟᱹ ᱦᱟᱥᱟ ᱦᱟᱨ ᱢᱟᱱᱟᱣ ᱟᱭ –
ᱟᱭᱟᱜ ᱠᱟᱹᱢᱤ ᱧᱮᱞ ᱛᱮ ᱿

ᱜᱩᱛᱤ ᱥᱤᱭᱟᱭ ᱵᱟᱹᱫᱽ ᱵᱟᱹᱭᱦᱟᱹᱲ –
ᱜᱚᱰᱟ ᱜᱷᱩᱴᱩ ᱠᱚᱨᱮ,
ᱚᱲᱟᱜ ᱠᱷᱟᱹᱨᱟᱹᱭ ᱯᱮᱨᱮᱡᱚᱜᱼᱟ –
ᱫᱷᱚᱱ ᱫᱩᱨᱤᱵᱽ ᱛᱮ ᱿
ᱜᱩᱛᱤ ᱫᱚᱭ ᱨᱚᱦᱚᱭ –
ᱜᱩᱛᱤ ᱫᱚᱭ ᱟᱨᱡᱟᱣ,
ᱥᱤᱨᱤᱡᱚᱱ ᱜᱩᱛᱤᱭᱟᱜ ᱛᱤᱛᱮ,
ᱫᱷᱟᱹᱨᱛᱤ ᱟᱭᱳᱭ ᱨᱩᱯᱚᱵᱚᱛᱤᱜ –
ᱜᱩᱛᱤ ᱟᱜ ᱠᱟᱹᱢᱤ ᱜᱩᱱ ᱜᱮ ᱿

***