ᱡᱟᱦᱮᱨ ᱜᱟᱲᱨᱮ ᱦᱚᱨᱚᱜ ᱵᱟᱸᱫᱮ

ᱯᱷᱟᱹᱜᱩᱱ ᱵᱚᱸᱜᱟ ᱵᱚᱞᱚᱱᱟ ᱾ ᱫᱟᱨᱮ ᱨᱮ ᱱᱟᱶᱟ ᱥᱟᱠᱟᱢ ᱥᱟᱜᱮᱱᱚᱜᱼᱟ ᱾ ᱜᱚᱴᱟ ᱫᱷᱟᱹᱨᱛᱤ ᱦᱟᱹᱨᱭᱟᱹᱲ, ᱵᱟᱞᱮ, ᱥᱟᱜᱮᱱ ᱥᱟᱠᱟᱢ ᱞᱮᱜᱮᱡ ᱞᱮᱜᱮᱡ ᱱᱟᱥᱮ ᱦᱤᱥᱤᱫ ᱦᱚᱭ ᱛᱮ ᱦᱤᱞᱟᱹᱣᱜᱼᱟ, ᱞᱟᱸᱫᱟ ᱢᱮᱥᱟ ᱜᱟᱹᱣᱤᱡᱮᱫ ᱞᱮᱠᱟ ᱧᱮᱞᱚᱜᱼᱟ ᱾

ᱯᱷᱟᱹᱜᱩᱱ ᱵᱚᱸᱜᱟ ᱨᱮᱫᱚ ᱦᱚᱭ ᱦᱤᱥᱤᱫ ᱟᱹᱰᱤ ᱱᱤᱨᱚᱲ ᱛᱟᱦᱮᱸᱱᱟ ᱾ ᱮᱱᱮ ᱜᱮ ᱨᱟᱵᱟᱝ ᱯᱟᱨᱚᱢ ᱜᱚᱫ ᱠᱚᱜᱼᱟ ᱾ ᱱᱮᱜᱼᱮ ᱜᱮ ᱵᱟᱹᱭ ᱵᱟᱹᱭ ᱛᱮ ᱥᱤᱛᱩᱝ ᱞᱚᱞᱚ ᱵᱚᱞᱚ ᱦᱤᱡᱩᱜᱼᱟ ᱾ ᱱᱟᱥᱮ ᱨᱟᱵᱟᱝ ᱱᱟᱥᱮ ᱞᱚᱞᱚ ᱦᱚᱭ ᱦᱤᱥᱤᱫ ᱫᱚ ᱢᱟᱱᱣᱟ ᱡᱟᱱᱣᱟ ᱠᱚᱣᱟᱜ ᱢᱚᱱᱮᱭ ᱦᱩᱞᱟᱹᱥ ᱜᱚᱫᱟ, ᱡᱤᱭᱟᱹᱲ ᱜᱚᱫᱟᱭ ᱾ ᱚᱱᱟ ᱛᱮ ᱯᱷᱟᱹᱜᱩᱱ ᱟᱨ ᱪᱟᱹᱛ ᱵᱚᱸᱜᱟ ᱠᱤᱱ ᱫᱚ ‘ᱱᱤᱨᱚᱱ ᱨᱤᱛᱩ’ ᱢᱮᱱᱛᱮ ᱵᱚᱱ ᱢᱮᱛᱟᱜᱼᱟ ᱾

ᱯᱷᱟᱹᱜᱩᱱ ᱵᱚᱸᱜᱟ ᱢᱩᱞᱩᱜ ᱠᱟᱛᱮ ᱢᱚᱬᱮ ᱢᱟᱦᱟᱸ ᱠᱷᱚᱱ ᱜᱮ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱢᱤᱫ ᱟᱹᱰᱤ ᱜᱮ ᱢᱟᱨᱟᱝ ᱵᱚᱸᱜᱟ ᱵᱳᱨᱳ ᱟᱨᱵᱟᱝ ᱡᱚᱛᱚ ᱠᱷᱚᱱ ᱢᱟᱨᱟᱝ ᱥᱚᱱᱚᱛ ᱥᱚᱨᱮᱥ ᱵᱚᱸᱜᱟ ᱵᱳᱨᱳ ᱯᱟᱨᱟᱵᱽ ᱦᱩᱭᱩᱜ ᱛᱟᱵᱚᱱᱟ ᱾ ᱱᱚᱶᱟ ᱵᱚᱸᱜᱟ ᱨᱮᱜᱮ ᱵᱟᱦᱟ ᱵᱚᱸᱜᱟ ᱵᱚ ᱵᱚᱸᱜᱟ ᱵᱳᱨᱳᱜ ᱠᱟᱱᱟ ᱾

ᱱᱚᱶᱟ ᱚᱠᱛᱚ ᱨᱮᱫᱚ ᱚᱲᱟᱜ ᱨᱮ ᱵᱟᱹᱫᱽ, ᱵᱟᱹᱭᱦᱟᱹᱲ ᱨᱮ ᱠᱟᱹᱢᱤ ᱠᱚᱦᱚᱸ ᱩᱱᱟᱹᱜ ᱵᱟᱝ ᱛᱟᱦᱮᱸᱱ ᱛᱟᱵᱚᱱᱟ ᱾ ᱟᱨ ᱥᱟᱱᱟᱢ ᱦᱚᱲ ᱜᱮ ᱡᱚᱢᱟᱜ ᱧᱩᱣᱟᱜ ᱛᱮ ᱯᱮᱨᱮᱡ ᱯᱩᱨᱩᱱ ᱵᱚ ᱛᱟᱦᱮᱸᱱᱟ ᱾ ᱢᱟᱱᱣᱟ, ᱡᱟᱱᱣᱟ ᱥᱟᱶᱛᱮ ᱡᱤᱵᱽ ᱡᱤᱭᱟᱹᱞᱤ, ᱡᱤᱱᱛᱤ ᱯᱤᱯᱲᱤ ᱠᱚᱦᱚᱸ ᱫᱟᱨᱮ ᱨᱮ ᱱᱟᱶᱟ ᱥᱟᱠᱟᱢ, ᱱᱟᱶᱟ ᱵᱟᱦᱟ ᱡᱷᱩᱲ ᱨᱮ ᱡᱚᱢᱟᱜ ᱧᱩᱣᱟᱜ ᱛᱮ ᱥᱚᱝ ᱯᱩᱨᱩᱱ ᱦᱮᱥᱮᱡ ᱥᱮᱠᱮᱡ ᱨᱟᱹᱥᱠᱟᱹ ᱨᱚᱢᱚᱡᱽ ᱛᱮ ᱡᱤᱭᱚᱱ ᱠᱚ ᱠᱷᱮᱢᱟᱣᱟ ᱾
ᱱᱚᱶᱟ ᱚᱠᱛᱚ ᱨᱮ ᱵᱟᱦᱟ ᱵᱚᱸᱜᱟ ᱫᱚ ᱥᱟᱹᱨᱤ ᱜᱮ ᱡᱟᱦᱮᱨ ᱜᱟᱲ ᱫᱚ ᱥᱚᱨᱚᱜᱽ ᱯᱩᱨᱤ ᱞᱮᱠᱟ ᱟᱹᱭᱠᱟᱹᱣᱜᱼᱟ ᱾

ᱡᱟᱦᱮᱨ ᱜᱟᱲ ᱨᱮᱫᱚ ᱡᱟᱦᱮᱨ ᱟᱭᱳ, ᱢᱟᱨᱟᱝ ᱵᱳᱨᱳ, ᱞᱤᱴᱟᱹ ᱜᱚᱥᱟᱸᱭ, ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱟᱨ ᱟᱰᱮᱯᱟᱥᱮ ᱥᱟᱱᱟᱢ ᱥᱤᱢᱟᱹᱥᱟᱲᱮ ᱵᱚᱸᱜᱟ ᱵᱳᱨᱳ ᱠᱚᱠᱚ ᱨᱟᱠᱟᱵ ᱛᱷᱟᱯᱚᱱ ᱠᱚᱜᱼᱟ ᱾

ᱡᱟᱦᱮᱨ ᱜᱟᱲ ᱫᱚ ᱵᱚᱸᱜᱟ ᱵᱳᱨᱳ ᱠᱚᱣᱟᱜ ᱛᱟᱦᱮᱸᱱ ᱛᱷᱟᱱ ᱠᱷᱟᱹᱛᱤᱨ ᱜᱮ ᱚᱸᱰᱮ ᱫᱚ ᱟᱹᱛᱷᱟᱹᱣᱲᱤ ᱚᱠᱛᱚᱨᱮ, ᱡᱟᱦᱟᱸᱭ ᱜᱮ ᱡᱟᱦᱟᱸ ᱞᱮᱠᱟ ᱵᱚᱞᱚᱱ ᱫᱚ ᱵᱟᱨᱚᱱ ᱜᱮᱭᱟ ᱾ ᱡᱟᱦᱮᱨ ᱜᱟᱲ ᱪᱟᱹᱴᱠᱤ ᱦᱚᱨᱚᱜ ᱠᱟᱛᱮ ᱵᱟᱝ ᱵᱚᱱ ᱵᱚᱞᱚᱱᱟ ᱾ ᱡᱟᱦᱮᱨ ᱜᱟᱲ ᱦᱟᱨᱛᱟ ᱨᱮᱱᱟᱜ ᱡᱟᱦᱟᱸᱸᱟᱜ ᱡᱟᱭ ᱦᱚᱨᱚᱜ ᱠᱟᱛᱮ ᱵᱟᱵᱚ ᱵᱚᱞᱚᱱᱟ ᱾ ᱵᱟᱝ ᱜᱟᱱᱚᱜ ᱚᱠᱛᱚ ᱥᱟᱢᱟᱝ ᱟᱠᱟᱫ ᱠᱩᱲᱤ ᱜᱤᱫᱽᱨᱟᱹ, ᱠᱩᱲᱤ ᱦᱚᱯᱚᱱ ᱠᱚᱦᱚᱸ ᱡᱟᱦᱮᱨ ᱜᱟᱲ ᱵᱚᱞᱚᱱ ᱫᱚ ᱦᱩᱸᱭᱟᱹ ᱵᱟᱨᱚᱱ ᱜᱮᱭᱟ ᱾

ᱥᱮᱫᱟᱭ ᱫᱚ ᱵᱚᱸᱜᱟ ᱵᱳᱨᱳ ᱨᱮᱭᱟᱜ ᱨᱟᱭᱨᱤᱛ ᱱᱚᱝᱠᱟ ᱛᱟᱦᱮᱸ ᱠᱟᱱᱟ – ᱡᱟᱦᱮᱨ ᱨᱮ ᱵᱚᱸᱜᱟ ᱵᱳᱨᱳᱜ ᱚᱠᱛᱚ ᱨᱮᱫᱚ ᱞᱩᱜᱽᱲᱤ ᱞᱟᱯᱚ ᱫᱚ ᱯᱩᱸᱰ ᱟᱜ ᱜᱮᱠᱚ ᱦᱚᱨᱚᱜᱚᱜ ᱠᱟᱱ ᱛᱟᱦᱮᱸᱱ ᱾ ᱯᱩᱸᱰ ᱥᱟᱹᱲᱤ ᱟᱨᱟᱜ ᱯᱟᱹᱨᱞᱟᱹᱠ / ᱦᱟᱹᱨᱭᱟᱹᱲ ᱯᱟᱹᱨᱞᱟᱹᱠ ᱦᱩᱭᱩᱜ ᱟᱨ ᱯᱷᱩᱴᱟᱹ ᱥᱟᱹᱲᱤ / ᱡᱷᱟᱹᱞ ᱥᱟᱹᱲᱤ ᱟᱨ ᱯᱷᱩᱴᱟᱹ ᱠᱟᱪᱟ ᱦᱚᱸ ᱯᱩᱸᱰ ᱨᱮᱭᱟᱜ ᱜᱮᱠᱚ ᱵᱮᱵᱷᱟᱨᱮᱫ ᱛᱟᱦᱮᱸᱫ ᱾

ᱱᱤᱛᱚᱜ ᱚᱠᱛᱚ ᱱᱚᱝᱠᱟ ᱥᱮᱴᱮᱨ ᱟᱠᱟᱱᱟ, ᱡᱷᱟᱹᱞ ᱥᱟᱹᱲᱤ, ᱯᱷᱩᱴᱟᱹ ᱠᱟᱪᱟ ᱨᱮᱱᱟᱜ ᱰᱤᱡᱟᱭᱤᱱ ᱦᱚᱨᱮᱠ ᱨᱚᱠᱚᱢ ᱟᱠᱟᱱᱟ ᱾ ᱱᱚᱶᱟ ᱞᱩᱜᱽᱲᱤ ᱠᱚ ᱨᱮᱱᱟᱜ ᱨᱚᱝ ᱵᱟᱨᱚ ᱵᱚᱨᱚᱱ ᱵᱟᱡᱟᱨ ᱨᱮ ᱧᱟᱢᱚᱜ ᱟᱠᱟᱱᱟ ᱾ ᱯᱩᱸᱰᱟᱜ ᱨᱚᱝ ᱫᱚ ᱱᱟᱦᱟᱜ ᱢᱟᱨᱮ ᱜᱮ ᱧᱮᱞᱚᱜ ᱠᱟᱱᱟ ᱾ ᱱᱟᱦᱟᱜ ᱢᱟ ᱥᱟᱥᱟᱝ ᱨᱚᱝ, ᱜᱩᱞᱟᱹᱯᱤ ᱨᱚᱝ, ᱦᱟᱹᱨᱭᱟᱹᱲ ᱨᱚᱝ ᱟᱨ ᱦᱚᱸ ᱦᱮᱸᱫᱮ ᱨᱚᱝ ᱞᱮᱠᱟᱱ ᱞᱮᱠᱟᱱ ᱢᱮᱫ ᱡᱷᱟᱹᱞᱥᱟᱹ ᱜᱚᱫᱚᱜ ᱨᱚᱝ ᱾

ᱟᱫᱚ ᱡᱟᱦᱟᱸ ᱛᱤᱱᱟᱹᱜ ᱨᱚᱝ ᱞᱩᱜᱽᱲᱤ ᱜᱮ ᱵᱟᱡᱟᱨ ᱨᱮ ᱚᱰᱚᱠᱚᱜ, ᱡᱟᱦᱟᱸ ᱨᱚᱝ ᱛᱮᱜᱮ ᱵᱟᱸᱫᱮᱜ ᱨᱮ ᱪᱚᱨᱚᱠ ᱵᱚ ᱧᱮᱞᱚᱜ ᱠᱟᱱᱟ ᱾
ᱤᱠᱷᱟᱹᱱ ᱱᱟᱦᱟᱜ ᱡᱟᱦᱟᱸ ᱞᱮᱠᱟ ᱵᱟᱦᱟ ᱵᱚᱸᱜᱟ ᱠᱚᱨᱮ ᱡᱟᱦᱮᱨ ᱜᱟᱲ ᱨᱮ ᱠᱩᱲᱤ ᱠᱚᱲᱟ ᱠᱚᱠᱚ ᱧᱮᱞᱚᱜ ᱠᱟᱱᱟ ᱦᱮᱸᱫᱮ ᱨᱚᱝ ᱡᱷᱟᱹᱞ ᱥᱟᱹᱲᱤ, ᱯᱷᱩᱴᱟᱹ ᱠᱟᱪᱟ, ᱥᱟᱹᱨᱤ ᱛᱮ ᱢᱮᱱ ᱞᱮᱠᱷᱟᱱ ᱵᱚᱸᱜᱟ ᱵᱳᱨᱳ ᱠᱚ ᱥᱟᱶ ᱱᱚᱶᱟ ᱨᱚᱝ ᱞᱩᱜᱽᱲᱤ ᱵᱟᱸᱫᱮ ᱠᱟᱛᱮ ᱜᱚᱰ ᱡᱚᱦᱟᱨᱚᱜ ᱟᱨ ᱵᱚᱸᱜᱟ ᱵᱳᱨᱳ ᱠᱚ ᱥᱟᱶ ᱮᱱᱮᱡ ᱥᱮᱨᱮᱧ ᱫᱚ ᱯᱟᱞᱮ ᱵᱟᱝ ᱵᱚ ᱥᱚᱵᱷᱟᱜ ᱠᱟᱱᱟ ᱾ ᱡᱟᱦᱮᱨ ᱵᱷᱤᱛᱟᱹᱨ ᱵᱚᱞᱚᱱ ᱟᱨ ᱮᱱᱮᱡ ᱥᱮᱨᱮᱧ ᱨᱮᱫᱚ ᱯᱩᱸᱰ ᱨᱚᱝ ᱞᱩᱜᱽᱲᱤ ᱜᱮ ᱥᱟᱱᱟᱢ ᱠᱚ ᱦᱚᱨᱚᱜ ᱵᱟᱸᱫᱮ ᱞᱮᱠᱷᱟᱱ ᱵᱚᱸᱜᱟ ᱵᱳᱨᱳ ᱠᱚ ᱥᱟᱶ ᱟᱵᱚᱣᱟᱜ ᱥᱚᱱᱚᱛ ᱩᱯᱨᱩᱢ ᱟᱨ ᱥᱟᱹᱜᱟᱹᱭ ᱟᱨ ᱦᱚᱸ ᱵᱟᱹᱲᱛᱤ ᱥᱟᱹᱜᱩᱱᱚᱜ ᱞᱮᱠᱟ ᱟᱹᱭᱠᱟᱹᱣᱜᱼᱟ ᱾

***

About the author

Avatar

ᱢᱟᱭᱱᱚ ᱴᱩᱰᱩ

ᱢᱟᱭᱱᱚ ᱴᱩᱰᱩ ᱫᱚ ᱢᱤᱫ ᱥᱟᱱᱛᱟᱲᱤ ᱯᱟᱹᱨᱥᱤ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱱᱤᱛᱚᱜ ᱫᱷᱟᱹᱵᱤᱡ ᱛᱮ ᱢᱚᱬᱮ ᱜᱚᱴᱟᱝ ᱯᱚᱛᱚᱵ ᱮ ᱯᱟᱨᱥᱟᱞ ᱟᱠᱟᱫᱼᱟ ᱾ ᱟᱡᱟᱜ ᱢᱤᱫ ᱚᱱᱚᱬᱦᱮ ᱯᱩᱛᱷᱤ 'ᱢᱟᱨᱥᱟᱞ ᱰᱟᱦᱟᱨ' ᱞᱟᱹᱜᱤᱫ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱭᱩᱵᱟ ᱯᱩᱨᱚᱥᱠᱟᱨ ᱛᱮ ᱒᱐᱑᱗ ᱥᱟᱦᱤᱛ ᱨᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾

View all posts

Leave a Reply

Your email address will not be published. Required fields are marked *