ᱢᱚᱱᱮ ᱨᱮ ᱟᱹᱲᱤᱥ ᱟᱞᱚᱢ ᱫᱚᱦᱚᱭ
ᱥᱟᱱᱟᱢ ᱠᱟᱹᱢᱤ ᱨᱮ ᱛᱟᱭᱚᱢ ᱢᱮᱭᱟᱭ
ᱟᱢ ᱛᱮᱜᱮ ᱟᱢ ᱪᱮᱸᱜᱷᱟᱜ ᱢᱮᱥᱮ
ᱟᱞᱚᱢ ᱢᱮᱱᱟ ᱱᱤᱛᱚᱜ ᱫᱚ ᱵᱟᱝ ᱦᱟᱯᱮᱥᱮ ᱾
ᱟᱢᱟᱜ ᱠᱩᱨᱩᱢᱩᱴᱩ ᱛᱮᱜᱮ
ᱟᱢᱮᱢ ᱞᱟᱦᱟᱜ ᱼᱟ
ᱟᱹᱲᱤᱥ ᱢᱚᱱᱮ ᱦᱚᱲᱢᱚᱭ ᱚᱞᱚᱥ
ᱥᱟᱦᱟ ᱦᱩᱭᱩᱜᱼᱟ ᱾
ᱜᱤᱫᱽᱨᱟᱹ ᱦᱚᱲᱮ ᱟᱹᱲᱤᱥᱚᱜᱼᱟ
ᱚᱞᱚᱜ ᱥᱮᱬᱟᱭ ᱨᱮ
ᱵᱟᱭ ᱵᱟᱰᱟᱭᱟ ᱪᱮᱫᱼ ᱮ ᱪᱤᱠᱟᱹᱭ
ᱦᱟᱯᱮᱱ ᱦᱤᱞᱚᱜ ᱨᱮ ᱾
ᱨᱟᱹᱥᱠᱟᱹ ᱡᱩᱫᱤ ᱥᱟᱨᱥᱟᱣ ᱟᱭᱟ
ᱟᱡᱟᱜ ᱢᱚᱱᱮ ᱨᱮ
ᱟᱹᱲᱤᱥ ᱠᱚᱫᱚᱭ ᱥᱟᱦᱟ ᱥᱟᱹᱜᱤᱧ
ᱟᱡᱟᱜ ᱡᱤᱭᱚᱱ ᱨᱮ ᱾
ᱡᱩᱣᱟᱹᱱ ᱦᱚᱲᱮ ᱵᱩᱡᱷᱟᱹᱣ ᱟᱹᱲᱤᱥ
ᱱᱟᱞᱦᱟ ᱛᱩᱢᱟᱹᱞ ᱞᱟᱹᱜᱤᱫ
ᱠᱟᱡᱮᱭ ᱩᱱᱤ ᱨᱮᱸᱜᱮᱡ ᱛᱮᱛᱟᱝ
ᱛᱟᱦᱮᱱ ᱡᱟᱞᱟᱫ ᱡᱟᱯᱟᱫ ᱾
ᱡᱩᱣᱟᱹᱱ ᱢᱚᱱᱮ ᱟᱹᱲᱤᱥ ᱠᱚᱫᱚ
ᱥᱟᱦᱟ ᱥᱟᱹᱜᱤᱧ ᱢᱮᱥᱮ
ᱱᱤᱛᱚᱜ ᱱᱚᱰᱮ ᱫᱷᱤᱱᱟᱹᱝ ᱦᱟᱸᱰᱮ
ᱵᱩᱡᱽ ᱜᱮ ᱵᱟᱹᱱᱩᱜ ᱢᱟᱥᱮ ᱾
ᱪᱮᱫ ᱮᱢ ᱪᱤᱠᱟᱹᱭ ᱪᱮᱫ ᱫᱚ ᱵᱟᱝ
ᱩᱭᱦᱟᱹᱨ ᱛᱮᱜᱮᱢ ᱥᱟᱨᱟ ᱫᱤᱱ
ᱛᱤᱱ ᱠᱚᱨᱮ ᱪᱚ ᱯᱟᱨᱚᱢ ᱪᱟᱞᱟᱜ
ᱛᱮᱦᱮᱸᱧ ᱨᱮᱱᱟᱜ ᱫᱤᱱ ᱾
ᱟᱢ ᱪᱮᱛᱟᱱ ᱞᱟᱫᱮ ᱢᱮᱱᱟᱜ
ᱥᱚᱝᱥᱟᱨ ᱨᱮᱱᱟᱜ ᱟᱺᱜᱤᱵᱷᱟᱨ
ᱦᱚᱲᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ
ᱢᱚᱱᱮ ᱟᱞᱚᱢ ᱵᱮᱡᱟᱨ ᱾
ᱟᱢᱟᱜ ᱠᱟᱹᱢᱤ ᱟᱢ ᱛᱮᱜᱮ
ᱞᱟᱦᱟ ᱦᱩᱭᱩᱜ ᱛᱟᱢᱟ
ᱢᱚᱱᱮ ᱨᱤᱠᱤᱲ ᱫᱚᱦᱚᱭ ᱢᱮ
ᱟᱹᱲᱤᱥ ᱪᱤᱠᱟᱹᱭ ᱞᱮᱴᱮᱡ ᱠᱮᱢᱟ
ᱦᱚᱲᱢᱚ ᱫᱟᱲᱮ ᱠᱷᱟᱴᱟᱣ
ᱫᱷᱚᱱ ᱚᱲᱟᱜ ᱛᱟᱢᱮ ᱯᱮᱨᱮᱡᱽ
ᱚᱠᱚᱭ ᱦᱚᱸᱵᱟᱭ ᱢᱮᱛᱟᱢ ᱟᱫᱚ
ᱟᱢ ᱫᱚ ᱠᱟᱱᱟᱢ ᱨᱮᱸᱜᱮᱡ ᱾
ᱠᱩᱨᱩᱢᱩᱴᱩ ᱪᱷᱩᱴᱟᱹᱣᱜ ᱢᱮᱥᱮ
ᱟᱞᱚᱢ ᱛᱟᱦᱮᱱ ᱛᱷᱤᱨ
ᱟᱡ ᱟᱡ ᱛᱮ ᱛᱤᱱ ᱠᱚᱨᱮ ᱪᱚ
ᱟᱹᱲᱤᱥ ᱛᱟᱢᱮ ᱧᱤᱨ ᱾
ᱟᱢ ᱫᱚ ᱠᱟᱱᱟᱢ ᱥᱚᱨᱮᱥ ᱢᱟᱹᱱᱢᱤ
ᱢᱚᱱᱮ ᱟᱞᱚᱢ ᱠᱟᱺᱦᱤᱥ
ᱟᱢᱟᱜ ᱩᱭᱦᱟᱹᱨ ᱛᱮᱜᱮᱢ ᱞᱟᱦᱟᱜ
ᱡᱩᱫᱤᱢ ᱥᱟᱦᱟᱭ ᱟᱹᱲᱤᱥ ᱾
***
