ᱥᱚᱦᱚᱨᱟᱭ ᱥᱮᱨᱮᱧ
ᱫᱟᱨᱟᱦᱟᱨᱟ ᱚᱲᱟᱜ ᱛᱟᱞᱮ
ᱪᱷᱟᱴᱠᱟᱨᱮ ᱵᱟᱦᱟ ᱫᱟᱨᱮ,
ᱥᱩᱫᱮ ᱯᱮᱨᱮᱡ ᱫᱟᱞᱟᱭ ᱫᱟᱞᱟᱭ –
ᱤᱧᱤᱧ ᱵᱟᱦᱟᱭᱟ ᱾
ᱥᱟᱨᱤ ᱥᱚᱦᱚᱨᱟᱭ ᱯᱚᱨᱚᱵᱽ ᱨᱮᱫᱚ
ᱜᱟᱛᱮ ᱠᱚᱠᱚ ᱰᱳᱰᱮᱧᱟ,
ᱥᱮᱠᱮᱡ ᱥᱮᱠᱮᱡ ᱛᱤᱨᱮ ᱪᱩᱲᱤ
ᱤᱧ ᱫᱚᱧ ᱦᱚᱨᱚᱜᱟ ᱾
ᱪᱮᱛᱟᱱ ᱠᱩᱞᱦᱤ ᱞᱟᱛᱟᱨ ᱠᱩᱞᱦᱤ
ᱮᱱᱮᱡ ᱠᱟᱛᱮᱧ ᱟᱸᱫᱳᱲᱟ,
ᱢᱚᱬᱮ ᱥᱤᱧ ᱢᱚᱬᱮ ᱧᱤᱫᱟᱹᱧ
ᱮᱱᱮᱡ ᱟᱸᱜᱟᱭᱟ ᱾
ᱫᱚᱝ ᱥᱮᱨᱮᱧ
ᱯᱟᱹᱨᱥᱤ ᱵᱟᱜᱟᱱ ᱨᱮᱢᱟ
ᱯᱟᱹᱨᱥᱤ ᱵᱟᱦᱟ ᱟᱠᱟᱱ,
ᱨᱤᱞᱟᱹᱢᱟᱞᱟ ᱡᱟᱹᱛᱤ
ᱥᱚᱵᱷᱟ ᱟᱠᱟᱱ ᱾
ᱜᱟᱞᱟᱝ ᱢᱮ ᱯᱟᱹᱨᱥᱤ
ᱵᱟᱦᱟᱭ ᱢᱮ ᱯᱟᱹᱨᱥᱤ,
ᱨᱤᱞᱟᱹᱢᱟᱞᱟ ᱡᱟᱹᱛᱤ
ᱡᱤᱭᱟᱹᱲ ᱛᱟᱢ ᱫᱚ ᱾
ᱡᱚᱛᱚᱱ ᱢᱮ ᱯᱟᱹᱨᱥᱤ
ᱞᱟᱦᱟᱭ ᱢᱮ ᱡᱟᱹᱛᱤ,
ᱳᱨᱳᱢ ᱢᱮᱭᱟ ᱠᱚ
ᱡᱮᱜᱮᱫ ᱡᱟᱹᱛᱤ ᱾
***
