ᱵᱚᱪᱷᱚᱨ ᱥᱮᱨᱢᱟ ᱯᱟᱨᱚᱢ ᱮᱱᱟ
ᱡᱟᱱᱟᱢ ᱚᱲᱟᱜ ᱠᱷᱚᱱ ᱵᱤᱫᱟᱹᱭ ᱦᱟᱛᱟᱣ ᱠᱟᱛᱮ ᱾
ᱵᱚᱪᱷᱚᱨ ᱥᱮᱨᱢᱟ ᱯᱟᱨᱚᱢ ᱮᱱᱟ
ᱱᱟᱣᱟ ᱥᱚᱝᱥᱟᱨ ᱜᱷᱟᱨᱚᱸᱡᱽ ᱵᱮᱱᱟᱣ ᱠᱟᱛᱮ ᱿
ᱮᱱ ᱦᱚᱸ ᱩᱭᱦᱟᱹᱨ ᱦᱤᱡᱩᱜᱼᱟ ᱱᱮᱛᱟᱨ ᱦᱚᱸ
ᱵᱩᱠᱟ. ᱛᱚᱯᱟ ᱴᱷᱟᱶ ᱾
ᱩᱭᱦᱟᱹᱨ ᱦᱤᱡᱩᱜᱼᱟ ᱜᱤᱫᱽᱨᱟ. ᱚᱠᱛᱚ
ᱮᱱᱮᱡ ᱡᱚᱝ ᱵᱚᱭᱦᱟ ᱥᱟᱶ ᱿
ᱠᱷᱟᱸᱰᱟᱣ ᱞᱮᱫ ᱤᱧ ᱡᱟᱦᱟᱸ ᱨᱮ
ᱦᱮᱲᱮᱢᱼᱥᱤᱵᱤᱞ ᱚᱠᱛᱚ ᱾
ᱠᱩᱞᱦᱤ- ᱫᱷᱩᱲᱤ ᱨᱮ ᱜᱟᱛᱮ ᱠᱚ ᱥᱟᱶ
ᱵᱟᱹᱦᱩ ᱡᱟᱶᱟᱭ ᱵᱮᱱᱟᱣ ᱚᱠᱛᱚ ᱿
ᱱᱟᱣᱟ ᱟᱭᱳᱼᱵᱟᱵᱟ, ᱱᱟᱣᱟ ᱥᱟᱹᱜᱟᱹᱭ,
ᱱᱟᱣᱟ ᱥᱚᱝᱥᱟᱨ ᱤᱧ ᱧᱟᱢ ᱟᱱᱟ ᱾
ᱰᱟᱺᱜᱽᱣᱟ. ᱢᱚᱱᱮ ᱟᱠᱚᱴ ᱮᱱ
ᱤᱧᱟᱜ ᱚᱱᱛᱚᱨ ᱢᱚᱱᱮᱧ ᱮ ᱢᱟᱱᱟ ᱿
ᱜᱟᱵᱟᱣᱮᱱᱟᱹᱧ ᱱᱤᱛ ᱱᱚᱣᱟ
ᱱᱟᱣᱟ ᱛᱟᱹᱨᱤ ᱱᱟᱣᱟ ᱡᱤᱭᱚᱱ ᱨᱮ ᱾
ᱜᱷᱟᱨᱚᱸᱡᱽ, ᱚᱲᱟᱜ ᱦᱚᱲ ᱟᱨ
ᱜᱤᱫᱽᱨᱟ. ᱟᱜ ᱨᱟᱹᱥᱠᱟᱹ ᱨᱮ ᱿
ᱮᱱ ᱦᱚᱸ ᱡᱚᱠᱷᱚᱱ ᱩᱭᱦᱟᱹᱨ ᱦᱤᱡᱩᱜᱼᱟ
ᱟᱭᱳᱼᱵᱟᱵᱟ ᱡᱟᱱᱟᱢ ᱚᱲᱟᱜ ᱾
ᱤᱧᱟᱜ ᱢᱮᱫ ᱨᱮ ᱢᱮᱫ-ᱫᱟᱜ ᱥᱟᱶᱛᱮ
ᱢᱩᱞᱩᱡ ᱢᱟᱪᱷᱟ ᱞᱟᱸᱫᱟ ᱥᱟᱨᱮᱲᱚᱜ ᱿
ᱚᱠᱟ ᱚᱠᱛᱚ ᱛᱤᱱ ᱠᱚᱨᱮ ᱪᱚᱝ
ᱟᱫ ᱜᱚᱫᱚᱜ ᱟᱹᱧ ᱚᱲᱟᱜ ᱨᱮᱭᱟᱜ ᱠᱟᱛᱷᱟ ᱨᱮ ᱾
ᱧᱮᱱᱮᱞᱚᱢ ᱛᱮ ᱨᱟᱹᱥᱠᱟᱹ ᱟᱹᱭᱠᱟᱹᱣᱚᱜ
ᱤᱧᱟᱜ ᱚᱱᱛᱚᱨ ᱢᱚᱱᱮ ᱢᱮᱫ ᱨᱮ ᱿
ᱠᱤᱪᱷᱩᱜᱟᱱ ᱥᱮᱫᱟᱭᱟᱜ ᱜᱟᱞᱢᱟᱨᱟᱣ
ᱥᱮᱫᱟᱭᱟᱜ ᱩᱱᱩᱭᱦᱟᱹᱨ ᱠᱚ ᱾
ᱡᱤᱭᱟᱹᱲ ᱜᱮ ᱢᱮᱱᱟᱜᱼᱟ ᱱᱤᱛ ᱦᱚᱸ
ᱩᱱᱩᱭᱦᱟᱹᱨ ᱨᱮ ᱥᱤᱵᱤᱞ ᱥᱟᱹᱜᱟᱹᱭ ᱠᱚ ᱿
ᱵᱟᱦᱟ, ᱥᱚᱦᱨᱟᱭ, ᱢᱟᱜᱽ ᱢᱟᱥ ᱨᱮ
ᱡᱟᱣ ᱥᱮᱨᱢᱟ ᱠᱚ ᱱᱮᱣᱛᱟ ᱤᱧ ᱾
ᱮᱱ ᱦᱚᱸ ᱢᱚᱱᱮ ᱵᱟᱭ ᱯᱮᱨᱮᱡᱚᱜ
ᱡᱟᱦᱟᱸ ᱛᱤᱱᱟᱹᱜ ᱫᱤᱱ ᱜᱮ ᱛᱟᱦᱮᱱ ᱤᱧ ᱿
ᱚᱠᱛᱚ ᱠᱚ ᱧᱟᱢ ᱟᱠᱟᱫ ᱨᱮᱜᱮ
ᱫᱤᱱᱟᱹᱢ ᱢᱤᱫ ᱜᱷᱟᱹᱲᱤᱠ ᱨᱮᱦᱚᱸ ᱾
ᱤᱧᱟᱜ ᱱᱚᱣᱟ ᱡᱤᱣᱤ ᱨᱮ
ᱴᱟᱴᱣᱟᱥᱚᱜ ᱟᱸᱥ ᱢᱚᱱᱮ ᱠᱟᱱ ᱨᱮᱦᱚ ᱸ ᱿
ᱠᱷᱟᱸᱰᱟᱣ ᱥᱟᱹᱱᱟᱹᱧᱟ ᱟᱨ ᱦᱚᱸ
ᱫᱚᱦᱲᱟ ᱛᱮ ᱚᱱᱟ ᱡᱤᱭᱚᱱ ᱨᱮ ᱾
ᱡᱟᱦᱟᱸ ᱛᱤᱱᱟᱹᱜ ᱤᱧ ᱜᱟᱵᱟᱣᱚᱜ
ᱱᱚᱣᱟ ᱱᱟᱣᱟ ᱡᱤᱭᱚᱱ ᱨᱮ ᱿
ᱮᱱ ᱦᱚᱸ ᱩᱭᱦᱟᱹᱨ ᱦᱤᱡᱩᱜ ᱜᱮᱭᱟ
ᱟᱭᱳᱼᱵᱟᱵᱟ ᱡᱟᱱᱟᱢ ᱚᱲᱟᱜ ᱾
ᱡᱤᱭᱚᱱ ᱨᱮᱱᱟᱜ ᱥᱟᱹᱨᱤ ᱠᱟᱛᱷᱟ ᱠᱟᱱᱟ
ᱡᱚᱛᱚ ᱠᱩᱲᱤ ᱦᱚᱯᱚᱱᱟᱜ ᱿
***
