ᱚᱞ ᱜᱮᱛᱚ ᱟᱢᱟᱜ ᱢᱮᱫ ᱢᱟᱨᱥᱟᱞ ᱟᱨᱥᱟᱞ ᱟᱦᱞᱟᱭ ᱥᱮᱯᱮᱧ ᱟᱢᱟ,
ᱚᱞ ᱜᱮᱛᱚ ᱥᱟᱶᱛᱟ ᱨᱮᱭᱟᱜ ᱠᱮᱴᱮᱡ ᱵᱟᱨᱟᱦᱤ
ᱡᱟᱦᱟᱸ ᱫᱚ ᱟᱵᱚᱭ ᱛᱚᱞ ᱫᱚᱦᱚ ᱟᱠᱟᱫ ᱵᱚᱱᱟ ᱾
ᱡᱩᱢᱤᱫ ᱟᱨ ᱡᱩᱜᱩᱫ ᱨᱮᱭᱟᱜ ᱫᱟᱲᱮᱭ ᱠᱮᱴᱮᱡ ᱟᱵᱚᱱᱟ
ᱢᱤᱫᱴᱟᱹᱝ ᱚᱞ, ᱢᱤᱫᱴᱟᱹᱝ ᱨᱚᱲ, ᱢᱤᱫᱴᱟᱹᱝ ᱯᱟᱹᱨᱥᱤ
ᱢᱤᱫᱴᱟᱹᱝ ᱱᱟᱯᱟᱭ ᱨᱤᱞᱟᱹᱢᱟᱞᱟ
ᱦᱚᱨ ᱰᱟᱦᱟᱨ ᱮ ᱪᱤᱭᱟᱹ ᱟᱵᱚᱱᱟ ᱾
ᱡᱟᱦᱟᱸᱨᱮ ᱵᱷᱮᱯᱮᱜᱮᱫ ᱨᱮᱭᱟᱜ ᱤᱛᱟᱹ
ᱵᱟᱝ ᱯᱚᱴᱠᱚᱡᱚᱜᱼᱟ ᱾
ᱦᱤᱯᱤᱥᱟᱹᱣ ᱨᱮᱭᱟᱜ ᱥᱩᱭᱟᱹ ᱥᱮᱸᱜᱮᱞ
ᱵᱟᱝ ᱡᱩᱸᱰᱤᱜᱼᱟ ᱾
ᱠᱮᱴᱮᱡ ᱵᱟᱨᱟᱦᱤ ᱨᱮᱭᱟᱜ ᱛᱚᱯᱚᱞ ᱫᱟᱲᱮ ᱛᱮ
ᱢᱤᱫᱚᱜ ᱟᱵᱚᱱ ᱜᱚᱴᱟ ᱯᱟᱲᱟ
ᱵᱟᱝ ᱵᱚᱱ ᱨᱟᱲᱟᱭᱟ ᱵᱟᱨᱟᱦᱤ ᱨᱮᱱᱟᱜ ᱯᱮᱴᱮᱨ
ᱤᱱᱟᱹ ᱫᱚ ᱵᱟᱝ ᱵᱷᱳᱭᱞᱳ ᱜᱚᱫᱚᱜᱼᱟ
ᱟᱨ ᱡᱩᱢᱤᱫᱽ ᱨᱮᱱᱟᱝ ᱛᱚᱞ ᱦᱚᱸ ᱵᱟᱝ ᱨᱟᱲᱟ ᱜᱚᱫᱚᱜᱼᱟ ᱾
ᱢᱤᱫᱴᱟᱹᱝ ᱟᱲᱟᱝ ᱛᱮᱵᱚ ᱨᱚᱲᱟ ᱨᱟᱲᱟᱝ ᱨᱟᱲᱟᱝ
ᱵᱟᱝ ᱵᱚᱱ ᱦᱟᱹᱴᱤᱧ ᱵᱷᱮᱜᱟᱨᱚᱜᱼᱟ
ᱡᱟᱛᱟᱨ ᱠᱷᱟᱛᱟᱨ ᱵᱟᱝ ᱵᱚᱱ
ᱪᱷᱤᱛᱤᱭᱟᱹᱣ ᱜᱚᱫᱚᱜᱼᱟ ᱾
ᱪᱤᱠᱤ ᱵᱚᱱ ᱟᱯᱱᱟᱨᱟ ᱚᱱᱟ ᱦᱚᱸ ᱢᱤᱫᱴᱟᱹᱝ ᱜᱮ
ᱩᱯᱨᱩᱢ ᱵᱚᱱ ᱴᱷᱤᱠᱟᱹᱭᱟ ᱫᱷᱟᱹᱨᱛᱤ ᱴᱟᱞᱟ
ᱛᱤᱼᱛᱤᱭᱟᱹᱜ ᱠᱟᱛᱮ ᱵᱚᱱ ᱛᱟᱲᱟᱢᱟ
ᱡᱤᱣᱤ ᱛᱮᱵᱚᱱ ᱵᱩᱯᱩᱡᱷᱟᱹᱣᱜᱼᱟ
ᱠᱚᱯᱚᱭᱚᱜ ᱟᱨ ᱠᱩᱞᱤ ᱠᱩᱯᱩᱞᱤ ᱛᱮ
ᱰᱟᱦᱟᱨ ᱵᱚᱱ ᱥᱩᱜᱩᱲ ᱤᱫᱤᱭᱟ
ᱠᱮᱴᱮᱡ ᱵᱟᱨᱟᱦᱤ ᱛᱮ ᱛᱚᱯᱚᱞ ᱠᱟᱛᱮ
ᱱᱟᱶᱟ ᱢᱟᱨᱥᱟᱞ ᱵᱚᱱ ᱟᱹᱜᱩᱭᱟ ᱾
***
