ᱴᱟᱠᱟ ᱟᱨᱡᱟᱣ ᱫᱟᱨᱮ

ᱯᱮ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ, ᱩᱱᱠᱩ ᱛᱟᱦᱮᱱ ᱞᱟᱹᱜᱤᱱ ᱚᱲᱟᱜ ᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱢᱤᱫ ᱫᱤᱱ ᱫᱚ ᱡᱚᱛᱚ ᱵᱚᱭᱦᱟ ᱚᱲᱟᱜ ᱵᱮᱱᱟᱣ ᱞᱟᱹᱜᱤᱱ ᱡᱟᱜᱟ ᱯᱟᱱᱛᱮ ᱠᱚ ᱚᱰᱚᱠ ᱮᱱᱟ ᱾ ᱥᱤᱛᱩᱝ ᱫᱤᱱ ᱛᱟᱦᱮᱸ ᱠᱟᱱᱟ, ᱟᱦᱟᱞ ᱟᱦᱟᱞ ᱥᱤᱛᱩᱝ ᱨᱮ ᱵᱟᱹᱫᱽ ᱟᱲᱮ ᱛᱮ ᱛᱟᱲᱟᱢ ᱛᱟᱲᱟᱢ ᱛᱮ ᱢᱤᱫ ᱰᱟᱹᱦᱤ ᱠᱚ ᱧᱟᱢ ᱠᱮᱫᱼᱟ ᱾ ᱚᱱᱟ ᱰᱟᱹᱦᱤ ᱨᱮ ᱩᱞ ᱫᱟᱨᱮ ᱛᱟᱦᱮᱸ ᱠᱟᱱᱟ, ᱚᱱᱟ ᱫᱟᱨᱮ ᱵᱩᱴᱟᱹ ᱨᱮᱭᱟᱜ ᱜᱚᱢᱦᱮᱲ ᱩᱢᱩᱞ ᱨᱮᱠᱚ ᱫᱩᱲᱩᱵ ᱡᱤᱨᱟᱹᱣ ᱮᱱᱟ ᱾

ᱩᱞ ᱫᱟᱨᱮ ᱠᱷᱚᱱ ᱩᱞ ᱵᱤᱞᱤ ᱛᱤᱭᱩᱜ ᱠᱟᱛᱮᱱ ᱦᱮᱲᱮᱢ ᱦᱮᱲᱮᱢ ᱩᱞ ᱵᱤᱞᱤ ᱠᱚ ᱡᱚᱢ ᱠᱮᱫᱼᱟ ᱾ ᱢᱟᱨᱟᱝ ᱵᱚᱭᱦᱟᱭ ᱢᱮᱱ ᱠᱮᱫᱼᱟ, ᱤᱧ ᱫᱚ ᱱᱚᱶᱟ ᱡᱟᱜᱟᱹᱧ ᱠᱩᱥᱤᱭᱟᱫᱼᱟ, ᱪᱮᱫᱟᱜ ᱥᱮ ᱱᱚᱸᱰᱮ ᱩᱞ ᱫᱟᱨᱮ ᱢᱮᱱᱟᱜᱼᱟ ᱟᱨ ᱩᱞ ᱫᱟᱨᱮ ᱫᱚ ᱟᱹᱰᱤ ᱱᱟᱯᱟᱭᱟ ᱾ ᱡᱮᱢᱚᱱ ᱵᱮᱨᱮᱞ ᱩᱞ ᱨᱮᱭᱟᱜ ᱟᱪᱟᱨ ᱦᱚᱸ ᱵᱮᱱᱟᱣᱜᱼᱟ, ᱨᱤᱫ ᱜᱩᱸᱰᱟᱹ ᱠᱟᱛᱮ ᱪᱟᱹᱴᱱᱤ ᱦᱚᱸ ᱵᱮᱱᱟᱣᱜᱼᱟ ᱟᱨ ᱵᱮᱨᱮᱞ ᱩᱞ ᱨᱚᱦᱚᱲ ᱠᱟᱛᱮ ᱛᱟᱭᱚᱢ ᱛᱮ ᱩᱛᱩ ᱢᱟᱦᱨᱚᱜᱽ ᱚᱠᱛᱚ ᱩᱛᱩ ᱠᱟᱛᱮ ᱠᱤ ᱵᱟᱝ ᱡᱟᱦᱟᱱᱟᱜ ᱩᱛᱩ ᱠᱚ ᱪᱚᱴᱠᱟᱨᱚᱜ ᱞᱟᱹᱜᱤᱱ ᱢᱮᱥᱟ ᱜᱟᱱᱚᱜᱼᱟ ᱾ ᱟᱨ ᱵᱤᱞᱤ ᱠᱟᱛᱮ ᱦᱚᱸ ᱡᱚᱢ ᱜᱟᱱᱚᱜᱼᱟ ᱾ ᱢᱟᱨᱟᱝ ᱵᱚᱭᱦᱟ ᱫᱚ ᱟᱹᱰᱤ ᱨᱟᱹᱥᱠᱟᱹᱭ ᱵᱩᱡᱷᱟᱹᱣ ᱠᱮᱫᱼᱟ ᱟᱫᱚ ᱚᱸᱰᱮ ᱜᱮ ᱚᱲᱟᱜ ᱵᱮᱱᱟᱣ ᱠᱟᱛᱮ ᱛᱟᱦᱮᱸ ᱮᱱᱟᱭ ᱾

ᱵᱟᱨ ᱵᱚᱭᱦᱟ ᱫᱚ ᱛᱟᱲᱟᱢ ᱛᱟᱲᱟᱢ ᱛᱮ ᱢᱟᱲᱟᱝ ᱥᱮᱫ ᱠᱤᱱ ᱞᱟᱦᱟ ᱤᱫᱤ ᱭᱮᱱᱟ ᱾ ᱟᱫᱚ ᱦᱚᱨ ᱨᱮ ᱠᱟᱭᱨᱟ ᱫᱟᱨᱮ ᱠᱤᱱ ᱧᱟᱢ ᱠᱮᱫᱼᱟ, ᱩᱱ ᱚᱠᱛᱚ ᱜᱚᱴᱟ ᱥᱮᱨᱢᱟᱭ ᱨᱤᱢᱤᱞ ᱮᱥᱮᱫ ᱠᱮᱫᱼᱟ ᱟᱨ ᱡᱷᱤᱯᱤᱨ ᱡᱷᱤᱯᱤᱨ ᱫᱟᱜ ᱡᱟᱹᱲᱤᱭ ᱮᱦᱚᱵ ᱠᱮᱫᱼᱟ ᱾ ᱠᱷᱟᱱ ᱜᱮ ᱵᱟᱱᱟᱨ ᱵᱚᱭᱦᱟ ᱚᱱᱟ ᱠᱟᱭᱨᱟ ᱥᱟᱠᱟᱢ ᱜᱮᱫ ᱟᱹᱜᱩ ᱠᱟᱛᱮ ᱚᱱᱟ ᱥᱟᱠᱟᱢ ᱛᱮᱠᱤᱱ ᱩᱢᱩᱞᱮᱱᱟ ᱟᱨ ᱫᱟᱜ ᱡᱟᱹᱲᱤ ᱠᱷᱚᱱ ᱠᱤᱱ ᱵᱟᱧᱪᱟᱣ ᱮᱱᱟ, ᱤᱱᱟᱹᱜ ᱛᱮᱜᱮ ᱫᱟᱜ ᱡᱟᱹᱲᱤ ᱦᱚᱸ ᱪᱟᱵᱟᱭᱮᱱᱟ ᱾ ᱤᱱᱟᱹ ᱛᱟᱭᱚᱢ ᱛᱟᱞᱟ ᱵᱚᱭᱦᱟ ᱫᱚ ᱫᱟᱠᱟ ᱨᱮᱸᱜᱮᱡ ᱠᱮᱫᱮᱭᱟ, ᱦᱩᱰᱤᱧ ᱵᱚᱭᱦᱟ ᱦᱚᱸᱭ ᱢᱮᱱ ᱠᱮᱫᱼᱟ ᱤᱧ ᱦᱚᱸ ᱟᱹᱰᱤ ᱡᱩᱨ ᱫᱟᱠᱟ ᱨᱮᱸᱜᱮᱡ ᱤᱧ ᱠᱟᱱᱟ, ᱠᱷᱟᱱ ᱜᱮ ᱵᱟᱱᱟᱨ ᱵᱚᱭᱦᱟ ᱠᱟᱭᱨᱟ ᱥᱟᱠᱟᱢ ᱜᱮᱫ ᱠᱮᱪᱟᱜ ᱠᱟᱛᱮ ᱠᱤᱱ ᱟᱹᱜᱩ ᱠᱮᱫᱼᱟ ᱾ ᱚᱱᱟ ᱥᱟᱠᱟᱢ ᱨᱮ ᱫᱟᱠᱟ ᱦᱟᱹᱴᱤᱧ ᱠᱟᱛᱮ ᱠᱤᱱ ᱡᱚᱢ ᱠᱮᱫᱼᱟ, ᱚᱱᱟ ᱛᱟᱭᱚᱢ ᱠᱟᱭᱨᱟ ᱵᱤᱞᱤ ᱦᱚᱸ ᱜᱚᱫ ᱠᱟᱛᱮ ᱠᱤᱱ ᱡᱚᱢ ᱠᱮᱫᱼᱟ ᱾ ᱛᱟᱞᱟ ᱵᱚᱭᱦᱟᱭ ᱢᱮᱱ ᱠᱮᱫᱼᱟ ᱤᱧ ᱫᱚ ᱱᱚᱸᱰᱮ ᱜᱮ ᱚᱲᱟᱜ ᱤᱧ ᱵᱮᱱᱟᱣᱟ ᱾ ᱠᱟᱭᱨᱟ ᱫᱟᱨᱮ ᱫᱚ ᱟᱹᱰᱤ ᱱᱟᱯᱟᱭᱟ, ᱠᱟᱭᱨᱟ ᱵᱤᱞᱤ ᱠᱟᱛᱮ ᱡᱚᱢ ᱜᱟᱱᱚᱜᱼᱟ ᱵᱮᱨᱮᱞ ᱠᱟᱭᱨᱟ ᱥᱟᱶᱛᱮ ᱵᱟᱦᱟ ᱟᱨ ᱢᱟᱡᱽ ᱩᱛᱩ ᱦᱚᱸ ᱜᱟᱱᱚᱜᱼᱟ, ᱟᱨ ᱟᱹᱠᱷᱨᱤᱧ ᱠᱟᱛᱮ ᱴᱟᱠᱟ ᱯᱩᱭᱥᱟᱹ ᱦᱚᱸ ᱟᱨᱡᱟᱣ ᱜᱟᱱᱚᱜᱼᱟ ᱾ ᱠᱟᱭᱨᱟ ᱥᱟᱠᱟᱢ ᱦᱚᱸ ᱟᱹᱰᱤ ᱞᱮᱠᱟᱱ ᱠᱟᱹᱢᱤ ᱨᱮ ᱞᱟᱜᱟᱛᱚᱜᱼᱟ ᱾ ᱚᱱᱟᱛᱮ ᱛᱟᱞᱟ ᱵᱚᱭᱦᱟ ᱦᱚᱸ ᱨᱟᱹᱥᱠᱟᱹ ᱛᱮ ᱚᱸᱰᱮ ᱜᱮ ᱚᱲᱟᱜ ᱮ ᱵᱮᱱᱟᱣ ᱠᱮᱫᱼᱟ ᱾

ᱦᱩᱰᱤᱧ ᱵᱚᱭᱦᱟ ᱫᱚ ᱛᱟᱲᱟᱢ ᱛᱟᱲᱟᱢ ᱛᱮ ᱟᱨ ᱦᱚᱸ ᱢᱟᱲᱟᱝ ᱥᱮᱫ ᱮ ᱞᱟᱦᱟ ᱤᱫᱤᱭᱮᱱᱟ, ᱦᱚᱨ ᱨᱮ ᱢᱤᱫ ᱱᱟᱹᱨᱭᱟᱹᱞ ᱫᱟᱨᱮ ᱧᱟᱢ ᱠᱮᱫᱼᱟᱭ ᱫᱟᱨᱮ ᱫᱚ ᱱᱟᱱᱦᱟ ᱜᱮᱭᱟ ᱟᱨ ᱟᱹᱰᱤ ᱩᱥᱩᱞ ᱫᱟᱨᱮ ᱟᱠᱟᱱᱟ ᱟᱫᱚᱭ ᱢᱮᱱ ᱠᱮᱫᱼᱟ ᱟᱹᱰᱤ ᱡᱩᱨ ᱫᱟᱜ ᱛᱮᱛᱟᱝ ᱤᱧ ᱠᱟᱱᱟ, ᱩᱱ ᱚᱠᱛᱚ ᱢᱤᱫᱴᱟᱹᱝ ᱱᱟᱹᱨᱭᱟᱹᱞ ᱵᱷᱩᱰ ᱢᱮᱱᱛᱮ ᱧᱩᱨᱮᱱᱟ, ᱟᱫᱚ ᱡᱷᱚᱞᱟ ᱠᱷᱚᱱ ᱪᱷᱩᱨᱤ ᱚᱰᱚᱠ ᱠᱮᱫᱼᱟᱭ ᱟᱨ ᱱᱟᱹᱨᱭᱟᱹᱞ ᱩᱨ ᱥᱟᱯᱷᱟ ᱠᱟᱛᱮᱭ ᱵᱷᱩᱜᱟᱹᱜ ᱠᱮᱫᱼᱟ ᱟᱨ ᱨᱮᱭᱟᱲ ᱨᱮᱭᱟᱲ ᱦᱮᱲᱮᱢ ᱫᱟᱜ ᱮ ᱧᱩ ᱠᱮᱫ ᱠᱷᱟᱱ ᱦᱚᱲᱢᱚ ᱡᱤᱣᱤ ᱠᱚ ᱟᱹᱫᱤ ᱡᱤᱭᱟᱹᱲ ᱮ ᱵᱩᱡᱷᱟᱹᱣ ᱠᱮᱫᱼᱟ ᱟᱨ ᱫᱟᱨᱮ ᱩᱢᱩᱞ ᱨᱮ ᱫᱩᱲᱩᱵ ᱡᱤᱨᱟᱹᱣᱮᱱᱟᱭ ᱾ ᱟᱨ ᱮ ᱩᱭᱦᱟᱹᱨᱮᱫᱼᱟ ᱼ ᱩᱞ ᱫᱟᱨᱮ ᱟᱹᱰᱤ ᱱᱟᱯᱟᱭᱟ, ᱩᱞ ᱡᱚ ᱦᱚᱸ ᱟᱹᱰᱤ ᱱᱟᱯᱟᱭᱟ ᱾ ᱠᱟᱭᱨᱟ ᱫᱟᱨᱮ ᱦᱚᱸ ᱟᱹᱰᱤ ᱞᱟᱹᱠᱛᱤ ᱟᱱᱟᱜ ᱫᱟᱨᱮ ᱠᱟᱱᱟ ᱟᱨ ᱠᱟᱭᱨᱟ ᱡᱚ ᱨᱮᱱᱟᱜ ᱜᱩᱱ ᱦᱚᱸ ᱟᱹᱰᱤ ᱱᱟᱯᱟᱭᱟ ᱾ ᱱᱤᱢ ᱫᱟᱨᱮ ᱦᱚᱸ ᱟᱹᱰᱤ ᱱᱟᱯᱟᱭᱟ ᱫᱟᱹᱛᱟᱹᱱᱤ ᱦᱚᱸ ᱜᱟᱱᱚᱜᱼᱟ, ᱵᱟᱞᱮ ᱱᱤᱢ ᱥᱟᱠᱟᱢ ᱟᱨ ᱵᱟᱦᱟ ᱡᱚᱢ ᱞᱮᱠᱷᱟᱱ ᱦᱚᱲᱢᱚ ᱨᱮ ᱟᱡᱟᱨ ᱵᱮᱢᱟᱨ ᱵᱟᱝ ᱦᱩᱭᱩᱜᱼᱟ ᱚᱱᱟ ᱥᱟᱶᱛᱮ ᱱᱤᱢ ᱡᱚ ᱛᱮᱦᱚᱸ ᱥᱩᱱᱩᱢ ᱵᱮᱱᱟᱣᱜᱼᱟ ᱟᱨ ᱴᱟᱠᱟ ᱯᱩᱭᱥᱟᱹ ᱦᱚᱸᱧ ᱟᱨᱡᱟᱣ ᱫᱟᱲᱮᱭᱟᱜᱼᱟ ᱾ ᱟᱨ ᱡᱩᱫᱤ ᱤᱧ ᱴᱷᱮᱱ ᱨᱚᱵᱚᱲ ᱫᱟᱨᱮ ᱛᱟᱦᱮᱸ ᱠᱚᱜ ᱠᱷᱟᱱ ᱟᱹᱰᱤ ᱜᱟᱱ ᱨᱚᱵᱚᱲ ᱡᱤᱱᱤᱥ ᱵᱮᱱᱟᱣ ᱠᱟᱛᱮ ᱴᱟᱠᱟᱧ ᱟᱨᱡᱟᱣ ᱠᱮᱭᱟ ᱦᱩᱱᱟᱹᱝ ᱾ ᱟᱨ ᱦᱚᱸ ᱟᱹᱰᱤ ᱜᱟᱱ ᱱᱟᱯᱟᱭ ᱱᱟᱯᱟᱭ ᱫᱟᱨᱮ ᱢᱮᱱᱟᱜᱼᱟ, ᱱᱟᱹᱨᱭᱟᱹᱞ ᱫᱟᱨᱮ ᱨᱮᱱᱟᱝ ᱠᱟᱛᱷᱟ ᱜᱮ ᱢᱟᱥᱮ ᱩᱭᱦᱟᱹᱨ ᱢᱮ, ᱱᱟᱹᱨᱭᱟᱹᱞ ᱪᱮᱛᱟᱱ ᱨᱮ ᱡᱟᱦᱟᱸ ᱩᱵ ᱛᱟᱦᱮᱸᱱᱟ ᱚᱱᱟ ᱩᱨ ᱚᱪᱚᱜ ᱠᱟᱛᱮᱱ ᱟᱹᱰᱤ ᱜᱟᱱ ᱡᱤᱱᱤᱥ ᱵᱮᱱᱟᱣᱜᱼᱟ ᱡᱮᱢᱚᱱ ᱵᱟᱵᱮᱨ, ᱫᱚᱜᱽᱦᱟ, ᱵᱟᱨᱟᱦᱤ, ᱯᱟᱹᱴᱭᱟᱹ ᱮᱢᱟᱱ ᱵᱮᱱᱟᱣ ᱠᱟᱛᱮ ᱱᱚᱶᱟ ᱛᱮᱦᱚᱸ ᱴᱟᱠᱟ ᱯᱩᱭᱥᱟᱹᱧ ᱟᱨᱡᱟᱣ ᱫᱟᱲᱮᱭᱟᱜᱼᱟ ᱾ ᱱᱟᱹᱨᱭᱟᱹᱞ ᱫᱟᱜ ᱧᱩ ᱠᱟᱛᱮ ᱟᱨ ᱱᱟᱹᱨᱭᱟᱹᱞ ᱡᱚᱢ ᱠᱟᱛᱮ ᱨᱮᱸᱜᱮᱡ ᱛᱮᱛᱟᱝ ᱤᱧ ᱢᱟᱨᱛᱚᱠ ᱫᱟᱲᱮᱭᱟᱜᱼᱟ ᱱᱚᱶᱟ ᱠᱚ ᱥᱟᱶᱛᱮ ᱱᱟᱹᱨᱭᱟᱹᱞ ᱥᱩᱱᱩᱢ ᱠᱚ ᱞᱮᱱ ᱚᱰᱚᱠ ᱠᱟᱛᱮᱧ ᱟᱹᱠᱷᱨᱤᱧᱟ ᱾ ᱱᱚᱣᱟ ᱠᱚ ᱟᱹᱠᱷᱨᱤᱧ ᱠᱟᱛᱮ ᱟᱹᱰᱤ ᱜᱟᱱ ᱴᱟᱠᱟ ᱠᱟᱹᱣᱰᱤ ᱠᱩᱧ ᱟᱨᱡᱟᱣ ᱠᱮᱭᱟ ᱾ ᱱᱚᱶᱟ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮ ᱦᱩᱰᱤᱧ ᱵᱚᱭᱦᱟ ᱫᱚ ᱱᱚᱸᱰᱮ ᱜᱮ ᱚᱲᱟᱜ ᱮ ᱵᱮᱱᱟᱣ ᱠᱮᱫᱼᱟ ᱟᱨ ᱟᱹᱰᱤ ᱨᱟᱹᱥᱠᱟᱹ ᱨᱮ ᱛᱟᱦᱮᱸ ᱮᱱᱟᱭ ᱾

ᱱᱚᱶᱟ ᱠᱟᱹᱦᱱᱤ ᱛᱮ ᱱᱚᱶᱟ ᱥᱮᱪᱮᱫ ᱧᱟᱢᱚᱜ ᱠᱟᱱᱟ ᱡᱮ ᱨᱮᱸᱜᱮᱡ ᱛᱮᱛᱟᱝ ᱫᱚ ᱵᱟᱝ ᱦᱟᱨᱠᱮᱛᱼᱟ, ᱡᱩᱫᱤ ᱢᱚᱱᱮ ᱠᱮᱴᱮᱡ ᱠᱟᱛᱮ ᱟᱹᱥᱩᱞᱚᱜ ᱞᱟᱹᱜᱤᱱ ᱱᱟᱯᱟᱭ ᱦᱚᱨ ᱰᱟᱦᱟᱨ ᱮᱢ ᱯᱟᱱᱛᱮ ᱧᱟᱢ ᱞᱮᱠᱷᱟᱱ ᱱᱚᱶᱟ ᱡᱤᱭᱚᱱ ᱫᱚ ᱟᱹᱰᱤ ᱨᱟᱹᱥᱠᱟᱹ ᱟᱨ ᱢᱚᱡᱽ ᱛᱮᱜᱮ ᱠᱷᱟᱸᱰᱟᱣᱜᱼᱟ ᱾

***