ᱢᱤᱫ ᱠᱤᱥᱟᱹᱬ ᱚᱲᱟᱜ ᱨᱮ ᱢᱤᱫᱴᱟᱹᱝ ᱯᱩᱥᱤ ᱟᱨ ᱢᱤᱫ ᱥᱮᱛᱟ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱟᱫᱚ ᱯᱩᱥᱤ ᱢᱟ ᱚᱲᱟᱜ ᱠᱷᱚᱱᱟᱜ ᱚᱠᱟ ᱛᱮᱦᱚᱸ ᱵᱟᱠᱚ ᱥᱮᱱᱚᱜᱼᱟ ᱾ ᱟᱨ ᱥᱮᱛᱟ ᱢᱟ ᱠᱤᱥᱟᱹᱬ ᱦᱟᱲᱟᱢ ᱚᱠᱟ ᱥᱮᱫ ᱮ ᱥᱮᱱᱚᱜᱼᱟ ᱚᱱᱛᱮ ᱜᱮ ᱟᱡ ᱦᱚᱸᱭ ᱯᱟᱸᱡᱟ ᱠᱟᱭᱟ ᱾ ᱦᱟᱴ ᱵᱟᱴ, ᱫᱚᱠᱟᱱ, ᱢᱟᱨᱠᱮᱴ, ᱵᱟᱹᱫᱽ, ᱵᱟᱹᱭᱦᱟᱹᱲ, ᱜᱚᱴᱟ, ᱚᱠᱟ ᱥᱮᱫ ᱜᱮ ᱠᱤᱥᱟᱹᱬ ᱦᱟᱲᱟᱢ ᱮ ᱪᱟᱞᱟᱜᱼᱟ ᱚᱱᱛᱮ ᱜᱮ ᱩᱱᱤ ᱥᱮᱛᱟ ᱦᱚᱸ ᱠᱤᱥᱟᱹᱬ ᱦᱟᱲᱟᱢ ᱮ ᱯᱟᱸᱡᱟ ᱠᱟᱭᱟ ᱾
ᱟᱫᱚ ᱚᱱᱠᱟ ᱜᱮ ᱢᱤᱫ ᱫᱤᱱ ᱦᱚᱸ ᱠᱤᱥᱟᱹᱬ ᱦᱟᱲᱟᱢᱮ ᱢᱮᱱᱮᱫᱼᱟ, ᱦᱟᱯᱮ ᱥᱮ ᱵᱟᱹᱫᱽ ᱥᱮᱫ ᱠᱟᱹᱴᱤᱡ ᱤᱧ ᱫᱟᱬᱟ ᱟᱹᱜᱩ ᱞᱮᱜᱮ ᱾ ᱟᱫᱚ ᱩᱱᱤ ᱥᱮᱛᱟ ᱦᱚᱸᱭ ᱯᱟᱸᱡᱟ ᱠᱮᱫᱮᱭᱟ ᱩᱱᱤ ᱠᱤᱥᱟᱹᱬ ᱦᱟᱲᱟᱢ ᱾ ᱟᱫᱚ ᱜᱚᱴᱟ ᱦᱩᱲᱩ ᱵᱟᱹᱫᱽ ᱫᱟᱬᱟ ᱫᱟᱬᱟᱛᱮ ᱧᱮᱞ ᱯᱩᱨᱟᱹᱣ ᱵᱟᱲᱟ ᱠᱟᱛᱮ ᱚᱲᱟᱜ ᱛᱮ ᱠᱤᱱ ᱨᱩᱣᱟᱹᱲ ᱦᱮᱡ ᱮᱱᱟ ᱾
ᱟᱫᱚ ᱩᱱᱤ ᱯᱩᱥᱤ ᱫᱚ ᱥᱮᱛᱟᱭ ᱠᱩᱞᱤ ᱜᱚᱫ ᱠᱮᱫᱮᱭᱟ, ᱪᱮᱞᱮ ᱥᱮᱛᱟ, ᱪᱮᱫ ᱞᱮᱠᱟ ᱦᱳᱲᱳ ᱠᱚᱫᱚ ᱦᱩᱭ ᱟᱠᱟᱱ ᱛᱟᱵᱚᱱᱟ ᱾ ᱤᱱᱟᱹ ᱠᱷᱟᱱ ᱜᱮ ᱩᱱᱤ ᱥᱮᱛᱟᱭ ᱢᱮᱱ ᱜᱚᱫ ᱠᱮᱫᱼᱟ, ᱦᱚᱸ ᱤᱧ ᱡᱚᱢ ᱟᱨ ᱠᱤᱥᱟᱹᱬ ᱡᱚᱢ ᱫᱚ ᱦᱩᱭᱩᱜ ᱛᱟᱹᱞᱤᱧᱟ ᱾ ᱟᱫᱚ ᱩᱱᱤ ᱯᱤᱥᱤᱭ ᱢᱮᱱᱟ, ᱪᱮᱫ ᱤᱧ ᱫᱚ ᱟᱫᱚ ᱵᱟᱹᱵᱤᱱ ᱮᱢᱟᱹᱧ ᱛᱮ ᱾ ᱟᱫᱚ ᱥᱮᱛᱟᱭ ᱢᱮᱱᱮᱫᱼᱟ, ᱟᱢ ᱫᱚ ᱪᱮᱫ ᱮᱢ ᱠᱟᱹᱢᱤ ᱠᱟᱱᱟ ? ᱚᱲᱟᱜ ᱨᱮᱜᱮᱢ ᱵᱚᱞᱚ ᱠᱚᱜ ᱠᱟᱱᱟ ᱟᱢ ᱢᱟ ᱟᱨ ᱤᱧ ᱫᱚ ᱵᱟᱹᱫᱽ ᱵᱟᱹᱭᱦᱟᱹᱲ ᱠᱚ ᱫᱟᱬᱟ ᱠᱟᱛᱮ ᱪᱟᱥ ᱵᱟᱥ ᱠᱚ ᱡᱚᱛᱚᱧ ᱧᱮᱞ ᱟᱹᱜᱩ ᱮᱫᱼᱟ ᱾
ᱟᱫᱚ ᱯᱩᱥᱤᱭ ᱢᱮᱱᱮᱫᱼᱟ, ᱟᱪᱷᱟ ᱪᱮᱫ ᱦᱟᱯᱮ ᱥᱮ ᱚᱠᱚᱭ ᱚᱠᱟ ᱞᱮᱠᱟ ᱞᱟᱝ ᱡᱚᱢ ᱟᱱᱟᱜ ᱾ ᱟᱫᱚ ᱩᱱᱤ ᱠᱤᱥᱟᱹᱬ ᱦᱟᱲᱟᱢ ᱫᱚ ᱠᱤᱥᱟᱹᱬ ᱵᱩᱰᱷᱤ ᱫᱟᱠᱟ ᱩᱛᱩ ᱠᱚᱭ ᱤᱥᱤᱱ ᱠᱮᱫ ᱠᱷᱟᱱ ᱩᱱᱤ ᱦᱟᱲᱟᱢ ᱫᱚ ᱫᱟᱠᱟ ᱡᱚᱢ ᱞᱟᱹᱜᱤᱫ ᱞᱚᱴᱟ ᱫᱟᱜ ᱠᱚ ᱟᱹᱜᱩ ᱟᱫᱮᱭᱟ ᱾
ᱟᱫᱚ ᱠᱤᱥᱟᱹᱬ ᱦᱟᱲᱟᱢ ᱟᱹᱨᱩᱵ ᱵᱟᱲᱟᱜ ᱛᱮᱜᱮ ᱩᱱᱤ ᱯᱩᱥᱤ ᱫᱚ ᱠᱤᱥᱟᱹᱬ ᱦᱟᱲᱟᱢᱟᱜ ᱜᱟᱸᱰᱚ ᱥᱩᱨ ᱨᱮᱭ ᱫᱩᱲᱩᱵ ᱵᱚᱨᱟᱛ ᱟᱠᱟᱱᱟ ᱾ ᱟᱫᱚ ᱠᱤᱥᱟᱹᱬ ᱦᱟᱲᱟᱢ ᱟᱹᱨᱩᱵ ᱫᱩᱲᱩᱵ ᱠᱟᱛᱮ ᱫᱟᱠᱟ ᱠᱚ ᱟᱹᱜᱩ ᱟᱭ ᱛᱮᱜᱮ ᱩᱱᱤ ᱯᱩᱥᱤ ᱫᱚ ᱢᱤᱭᱩᱝ ᱢᱤᱭᱩᱝ ᱮ ᱨᱟᱜ ᱜᱚᱫ ᱠᱮᱫ ᱠᱷᱟᱱ ᱜᱮ ᱩᱱᱤ ᱠᱤᱥᱟᱹᱬ ᱦᱟᱲᱟᱢ ᱢᱟᱬᱟᱝ ᱨᱮᱜᱮ ᱢᱤᱫ ᱰᱩᱸᱵᱩᱜ ᱫᱟᱠᱟ ᱩᱱᱤ ᱯᱩᱥᱤᱭ ᱮᱢ ᱯᱟᱹᱦᱤᱞ ᱟᱫᱮᱭᱟ ᱾ ᱟᱨ ᱩᱱᱤ ᱥᱮᱛᱟ ᱢᱟ ᱫᱩᱣᱟᱹᱨ ᱜᱟᱱᱟᱰᱮ ᱵᱟᱦᱨᱮ ᱨᱮᱭ ᱯᱤᱴᱤ ᱟᱠᱟᱱᱟ ᱾ ᱟᱫᱚ ᱤᱱᱟᱹᱜ ᱠᱷᱟᱱ ᱜᱮ ᱩᱱᱤ ᱯᱩᱥᱤ ᱢᱟ ᱰᱩᱸᱵᱩᱜ ᱫᱟᱠᱟᱭ ᱡᱚᱢᱮᱫᱼᱟ ᱟᱨ ᱩᱱᱤ ᱥᱮᱛᱟᱭ ᱠᱚᱭᱚᱜ ᱮ ᱠᱟᱱᱟ ᱾
ᱟᱨ ᱢᱩᱞᱩᱡ ᱞᱟᱸᱫᱟ ᱠᱟᱛᱮ ᱥᱮᱛᱟᱭ ᱢᱮᱛᱟᱭ ᱠᱟᱱᱟ, ᱪᱮᱞᱮ ᱥᱮᱛᱟ, ᱤᱧ ᱢᱟ ᱵᱟᱹᱵᱤᱱ ᱮᱢᱟᱹᱧ ᱞᱟᱹᱜᱤᱱ ᱫᱚ ᱟᱢ ᱢᱟᱢ ᱞᱟᱹᱭ ᱞᱮᱫ ᱛᱟᱦᱮᱸᱫ ᱾ ᱢᱟ ᱧᱮᱞ ᱢᱮ ᱚᱠᱚᱭ ᱢᱟᱬᱟᱝ ᱞᱟᱝ ᱡᱚᱢᱮᱫᱼᱟ ᱟᱢ ᱥᱮ ᱤᱧ ᱾ ᱤᱱᱟᱹ ᱠᱷᱟᱱ ᱜᱮ ᱥᱮᱛᱟ ᱢᱟᱭ ᱨᱟᱹᱜᱤ ᱮᱱᱟ ᱾ ᱢᱮᱱᱮᱫ ᱟᱭ ᱟᱢ ᱯᱩᱥᱤ ᱛᱤᱱᱨᱮ ᱵᱟᱦᱨᱮ ᱵᱟᱢ ᱚᱰᱚᱠᱚᱜ ᱛᱮ ᱩᱱ ᱡᱚᱦᱚᱜ ᱱᱷᱟᱜ ᱞᱟᱝ ᱮᱢᱟᱦᱟᱢ ᱠᱟᱱᱟ ᱾ ᱟᱫᱚ ᱥᱟᱹᱨᱤ ᱜᱮ ᱩᱱᱤ ᱥᱮᱛᱟ ᱢᱟ ᱡᱚᱢ ᱥᱟᱨᱮᱡ ᱛᱟᱞᱟ ᱰᱩᱸᱵᱩᱜ ᱰᱟᱠᱟ ᱟᱨ ᱢᱤᱫ ᱴᱟᱹᱴᱤᱭᱟᱹ ᱜᱟᱱ ᱫᱟᱜ ᱠᱚ ᱜᱮᱠᱚ ᱫᱩᱞ ᱟᱫᱮᱭᱟ ᱾ ᱤᱱᱟᱹ ᱜᱮᱭ ᱪᱟᱴᱚᱜ ᱵᱟᱲᱟ ᱟᱱᱟ ᱟᱨ ᱢᱚᱱᱮᱨᱮ ᱟᱹᱰᱤ ᱟᱹᱲᱤᱥ ᱮ ᱵᱩᱡᱷᱟᱹᱣ ᱠᱮᱫᱼᱟ ᱯᱩᱥᱤᱭᱟᱜ ᱠᱟᱛᱷᱟ ᱚᱝᱥᱟᱨ ᱛᱮ ᱾ ᱟᱫᱚ ᱢᱤᱫ ᱫᱤᱱ ᱫᱚ ᱯᱩᱥᱤ ᱵᱟᱦᱨᱮ ᱨᱮᱭ ᱧᱟᱢ ᱠᱮᱫᱮ ᱠᱷᱟᱱ ᱢᱟᱹᱨ ᱛᱚ ᱫᱚᱢᱮᱭ ᱞᱟᱜᱟ ᱠᱮᱫᱮᱭᱟ ᱠᱷᱩᱵ ᱡᱷᱟᱹᱞ ᱾
ᱟᱫᱚ ᱢᱤᱫᱴᱷᱮᱱ ᱫᱚ ᱢᱤᱫ ᱟᱹᱛᱩ ᱨᱤᱱ ᱦᱚᱲ ᱫᱚ ᱢᱟᱜᱽ ᱠᱚ ᱵᱚᱸᱜᱟᱜ ᱠᱟᱱᱟ ᱾ ᱟᱨ ᱥᱚᱲᱮ ᱠᱚ ᱤᱥᱤᱱ ᱵᱟᱲᱟ ᱠᱟᱛᱮ ᱠᱚ ᱦᱟᱹᱴᱤᱧ ᱵᱟᱲᱟᱭᱮᱫᱼᱟ ᱾ ᱟᱫᱚ ᱤᱱᱟᱹ ᱠᱷᱟᱱ ᱩᱱᱤ ᱯᱩᱥᱤ ᱫᱚ ᱩᱱᱠᱩᱭ ᱧᱮᱞ ᱧᱟᱢ ᱠᱮᱫ ᱠᱚ ᱠᱷᱟᱱ ᱟᱫᱚ ᱥᱮᱛᱟᱭ ᱢᱮᱛᱟ ᱟᱭ ᱠᱟᱱᱟ, ᱦᱟᱯᱮ ᱞᱟᱜᱟ ᱠᱷᱟᱱᱮᱢ ᱞᱟᱜᱟ ᱤᱧᱟ, ᱢᱮᱱᱠᱷᱟᱱ ᱤᱧᱟᱜ ᱢᱤᱫᱴᱟᱹᱝ ᱠᱟᱛᱷᱟ ᱟᱸᱡᱚᱢ ᱞᱮᱢ ᱾ ᱤᱱᱟᱹ ᱠᱷᱟᱱ ᱩᱱᱤ ᱥᱮᱛᱟᱭ ᱢᱮᱱᱮᱫᱼᱟ, ᱪᱮᱫ ᱠᱟᱛᱷᱟ ᱞᱚᱜᱚᱱ ᱞᱟᱹᱭ ᱢᱮ ᱾ ᱟᱫᱚ ᱯᱩᱥᱤᱭ ᱢᱮᱱᱮᱫᱼᱟ, ᱫᱟᱠᱟᱢ ᱡᱚᱢᱟ ᱛᱚ, ᱤᱧ ᱫᱟᱠᱟᱧ ᱡᱚᱢ ᱚᱪᱚ ᱢᱮᱭᱟ ᱤᱧᱟᱜ ᱠᱟᱛᱷᱟ ᱛᱮ ᱡᱩᱫᱤᱢ ᱥᱮᱱᱚᱜ ᱠᱷᱟᱱ ᱾ ᱟᱫᱚ ᱩᱱᱤ ᱥᱮᱛᱟᱭ ᱢᱮᱱᱮᱫᱼᱟ ᱪᱮᱫ ᱠᱟᱛᱷᱟ ᱞᱚᱜᱚᱱ ᱞᱟᱹᱭ ᱢᱮ ᱾ ᱩᱱᱤ ᱯᱩᱥᱤᱭ ᱢᱮᱱ ᱜᱚᱫ ᱠᱮᱫᱼᱟ, ᱦᱟᱹᱱᱠᱩ ᱦᱟᱸᱰᱮ ᱩᱱᱠᱩ ᱦᱚᱲ ᱢᱟᱜᱽ ᱥᱚᱲᱮ ᱠᱚ ᱦᱟᱹᱴᱤᱧ ᱵᱟᱲᱟᱭᱮᱫᱼᱟ ᱟᱹᱣᱨᱤ ᱠᱚ ᱡᱚᱢᱟ ᱾ ᱟᱫᱚ ᱤᱧ ᱫᱚ ᱱᱷᱟᱜ ᱢᱟᱬᱟᱝ ᱢᱟᱬᱟᱝ ᱛᱮᱧ ᱫᱟᱹᱲ ᱠᱟᱜᱼᱟ, ᱟᱨ ᱟᱢ ᱫᱚ ᱤᱧᱟᱜ ᱛᱟᱭᱚᱢ ᱛᱟᱭᱚᱢ ᱛᱮ ᱞᱟᱜᱟ ᱤᱫᱤ ᱤᱧ ᱢᱮ ᱾ ᱟᱨ ᱫᱚᱢᱮ ᱫᱚ ᱱᱷᱟᱜ ᱟᱞᱚᱢ ᱜᱮᱨᱤᱧᱟ, ᱠᱷᱟᱹᱞᱤ ᱱᱟᱥᱮ ᱱᱟᱥᱮ ᱜᱮ ᱪᱟᱭᱞᱚᱢ ᱨᱮ ᱜᱮᱨ ᱤᱫᱤᱧ ᱢᱮ ᱱᱷᱟᱜ ᱾ ᱟᱫᱚ ᱚᱱᱟ ᱥᱚᱲᱮ ᱫᱟᱠᱟ ᱠᱚ ᱦᱟᱹᱴᱤᱧ ᱵᱟᱲᱟᱭᱮᱫ ᱫᱚ ᱚᱱᱟ ᱛᱟᱞᱟ ᱛᱮ ᱞᱟᱝ ᱫᱟᱹᱲᱟ, ᱟᱨ ᱫᱟᱠᱟ ᱠᱚ ᱞᱟᱝ ᱞᱮᱵᱮᱫ ᱤᱫᱤᱭᱟ ᱾ ᱟᱫᱚ ᱤᱱᱟᱹ ᱠᱷᱟᱱ ᱩᱱᱠᱩ ᱦᱚᱲ ᱵᱟᱠᱚ ᱡᱚᱢᱟ ᱟᱹᱲᱤᱥ ᱛᱮᱠᱚ ᱵᱟᱹᱜᱤᱭᱟᱜᱼᱟ ᱾ ᱟᱫᱚ ᱟᱢ ᱫᱚ ᱫᱚᱦᱲᱟ ᱨᱩᱣᱟᱹᱲ ᱠᱟᱛᱮ ᱚᱱᱟ ᱢᱟᱜᱽ ᱥᱚᱲᱮ ᱫᱟᱠᱟ ᱡᱚᱢ ᱡᱚᱝ ᱢᱮ ᱱᱷᱟᱜ ᱾
ᱟᱫᱚ ᱩᱱᱤ ᱥᱮᱛᱟᱭ ᱢᱮᱱᱮᱫᱼᱟ, ᱥᱟᱹᱨᱤ ᱜᱮ ᱱᱚᱝᱠᱟ ᱞᱮᱠᱷᱟᱱ ᱜᱟᱱᱚᱜᱼᱟ ᱛᱚ ᱟᱨ ᱫᱟᱠᱟ ᱡᱚᱢ ᱧᱟᱢᱚᱜᱼᱟ ᱛᱚ !! ᱟᱫᱚ ᱩᱱᱤ ᱯᱩᱥᱤᱭ ᱢᱮᱱᱮᱫᱼᱟ, ᱦᱚᱸ ᱜᱟᱱᱚᱜᱼᱟ ᱾ ᱟᱨ ᱫᱟᱠᱟ ᱦᱚᱸ ᱟᱢ ᱛᱤᱱᱟᱹᱜ ᱜᱮᱢ ᱡᱚᱢ ᱫᱟᱲᱮᱭᱟᱜᱼᱟ, ᱩᱱᱟᱹᱜ ᱫᱟᱠᱟ ᱜᱮᱢ ᱡᱚᱢᱟ ᱾ ᱡᱚᱛᱚ ᱫᱟᱠᱟ ᱟᱢᱟᱜ ᱜᱮ ᱦᱩᱭᱩᱜᱼᱟ ᱾ ᱟᱫᱚ ᱚᱱᱠᱟ ᱜᱟᱯᱟᱞᱢᱟᱨᱟᱣ ᱵᱟᱲᱟ ᱠᱟᱛᱮ ᱥᱮᱛᱟ ᱦᱚᱸᱭ ᱨᱮᱵᱮᱱ ᱮᱱᱟ ᱾ ᱢᱮᱱᱮᱫ ᱟᱭ, ᱦᱚᱭ ᱛᱚᱵᱮ ᱪᱚᱞᱚ ᱫᱟᱹᱲ ᱢᱮ ᱟᱨ ᱤᱧ ᱫᱚ ᱱᱷᱟᱜ ᱠᱷᱟᱹᱞᱤ ᱠᱷᱟᱹᱞᱤ ᱱᱷᱟᱜ ᱤᱧ ᱫᱟᱜᱚᱲ ᱤᱫᱤ ᱢᱮᱭᱟ ᱾
ᱟᱫᱚ ᱚᱱᱠᱟ ᱜᱮ ᱠᱤᱱ ᱫᱟᱹᱲ ᱤᱫᱤ ᱠᱮᱫᱼᱟ ᱚᱱᱟ ᱢᱟᱜᱽ ᱥᱚᱲᱮ ᱠᱚ ᱦᱟᱹᱴᱤᱧ ᱟᱠᱟᱫᱼᱟ ᱚᱱᱟ ᱛᱟᱞᱟ ᱛᱟᱞᱟ ᱛᱮ ᱾ ᱟᱨ ᱫᱟᱠᱟ ᱠᱚ ᱠᱤᱱ ᱞᱮᱵᱮᱫ ᱯᱟᱸᱫᱚᱞ ᱤᱫᱤ ᱠᱮᱫᱼᱟ ᱾ ᱮᱱᱠᱷᱟᱱ ᱜᱮ ᱩᱱᱠᱩ ᱦᱚᱲ ᱦᱚᱸ ᱟᱹᱲᱤᱥ ᱛᱮ ᱵᱟᱠᱚ ᱡᱚᱢ ᱞᱮᱫᱼᱟ ᱾ ᱢᱮᱱᱮᱫ ᱟᱠᱚ, ᱫᱷᱟᱹᱴ ᱮᱸᱜᱟᱛᱮ, ᱡᱚᱛᱚ ᱭᱟᱠᱤᱱ ᱞᱮᱵᱮᱫ ᱤᱫᱤ ᱠᱮᱫ ᱫᱚ !! ᱪᱚᱞᱚ ᱵᱚ ᱵᱟᱵᱚ ᱡᱚᱢᱟ ᱾ ᱟᱫᱚ ᱩᱱᱠᱩ ᱦᱚᱲ ᱫᱚᱠᱚ ᱧᱤᱨ ᱮᱱᱟ ᱾ ᱫᱟᱠᱟ ᱠᱚᱠᱚ ᱵᱟᱹᱜᱤᱭᱟᱫᱼᱟ ᱟᱹᱲᱤᱥ ᱛᱮ ᱾
ᱤᱱᱟᱹ ᱛᱟᱭᱚᱢ ᱩᱱᱤ ᱯᱩᱥᱤ ᱫᱚ ᱥᱮᱛᱟᱭ ᱢᱮᱛᱟᱭ ᱠᱟᱱᱟ, ᱫᱩᱭᱟ ᱱᱤᱛᱚᱜ ᱫᱚ ᱪᱟᱞᱟᱜ ᱢᱮ ᱛᱤᱱᱟᱹᱜ ᱫᱟᱠᱟᱢ ᱡᱚᱢᱟ ᱾ ᱟᱫᱚ ᱩᱱᱤ ᱥᱮᱛᱟ ᱫᱚᱭ ᱥᱮᱱᱮᱱ ᱛᱮ ᱚᱱᱟ ᱥᱚᱲᱮ ᱫᱟᱠᱟ ᱢᱚᱱ ᱠᱩᱥᱤ ᱞᱟᱡ ᱯᱮᱨᱮᱡ ᱮ ᱡᱚᱢ ᱟᱹᱜᱩ ᱟᱱᱟ ᱾ ᱟᱨ ᱟᱹᱰᱤ ᱜᱮᱭ ᱠᱩᱥᱤ ᱮᱱᱟ ᱾
ᱟᱫᱚ ᱚᱱᱟᱛᱮ ᱥᱮᱛᱟ ᱯᱩᱥᱤ ᱫᱚ ᱵᱟᱠᱚ ᱯᱚᱴᱟᱣᱜ ᱨᱮᱦᱚᱸ ᱟᱨ ᱛᱟᱯᱟᱢ ᱨᱮᱦᱚᱸ ᱠᱚ ᱧᱟᱯᱟᱢ ᱛᱟᱨᱟ, ᱤᱠᱷᱟᱹᱱ ᱥᱟᱹᱨᱤ ᱥᱟᱹᱨᱤ ᱫᱚ ᱵᱟᱠᱚ ᱜᱮᱨ ᱩᱛᱟᱹᱨ ᱠᱚᱣᱟ ᱟᱠᱚᱣᱟᱜ ᱱᱤᱭᱚᱢ ᱠᱷᱟᱹᱛᱤᱨ ᱛᱮ ᱾
***
