ᱮᱵᱷᱮᱱ ᱟᱠᱟᱱ ᱟᱹᱠᱤᱞ ᱡᱟᱜᱟᱣ ᱞᱟᱹᱜᱤᱫ ᱛᱮ
ᱫᱤᱞ ᱫᱟᱲᱮ ᱟᱹᱠᱤᱞ ᱵᱟᱹᱛᱤ ᱢᱟᱨᱥᱟᱞ ᱞᱟᱹᱜᱤᱫ ᱛᱮ
ᱠᱩᱠᱢᱩ ᱡᱟᱦᱟᱸ ᱡᱟᱱᱟᱢᱮᱱ ᱥᱟᱹᱨᱤ ᱥᱚᱫᱚᱨᱚᱜ
ᱥᱟᱹᱨᱤ ᱢᱟ ᱥᱚᱫᱚᱨᱚᱜ ᱛᱮ ᱵᱟᱭ ᱵᱚᱛᱚᱨᱚᱜ ᱾
ᱥᱚᱠᱚᱲ ᱵᱚᱠᱚᱲ ᱞᱤᱸᱜᱤᱱ ᱜᱟᱰᱟ
ᱵᱷᱤᱱᱟᱹ ᱜᱮ ᱠᱷᱟᱫᱽ ᱠᱷᱟᱫᱚᱜ
ᱜᱮᱭᱟᱱ ᱜᱟᱰᱟ ᱫᱚᱨᱮᱭᱟ ᱨᱮᱫᱚ
ᱥᱟᱱᱟᱢ ᱠᱚ ᱜᱮᱵᱚ ᱢᱮᱥᱟᱜ ᱾
ᱜᱮᱭᱟᱱ ᱟᱡᱟᱫᱽ ᱚᱢᱚᱨ ᱜᱮᱭᱟ
ᱢᱚᱱᱮ ᱥᱚᱫᱚᱨ ᱛᱮ
ᱛᱚᱞᱚᱜ-ᱟ ᱵᱚᱦᱚᱜ ᱚᱸᱰᱮ
ᱵᱤᱱ ᱵᱚᱛᱚᱨ ᱛᱮ ᱾
ᱢᱚᱱᱮ ᱵᱷᱩᱞᱟᱹᱣ ᱡᱷᱤᱞᱟᱹ ᱡᱷᱤᱞᱤ
ᱥᱩᱞᱜᱟᱹᱣ ᱮ ᱵᱟᱰᱟᱭ
ᱦᱤᱡᱩᱜ ᱥᱮᱱᱚᱜ ᱦᱚᱨ ᱛᱮ
ᱦᱩᱫᱤᱥ ᱮ ᱵᱟᱰᱟᱭ ᱾
ᱯᱟᱹᱛᱭᱟᱹᱣ ᱨᱮᱜᱮ ᱵᱩᱡᱷᱟᱹᱣ ᱫᱚ
ᱟᱹᱭᱠᱟᱹᱣ ᱛᱮᱜᱮ ᱜᱮᱭᱟᱱ
ᱫᱟᱲᱮ ᱵᱷᱩᱨ ᱜᱮ ᱫᱟᱲᱮ ᱫᱚ
ᱟᱯᱱᱟᱨ ᱛᱮᱜᱮᱢ ᱢᱟᱨᱟᱝ ᱾
ᱥᱤᱥᱤᱡᱚᱱᱤᱡᱟᱜ ᱥᱤᱨᱡᱟᱹᱣ ᱛᱮ
ᱫᱷᱟᱹᱨᱛᱤ ᱵᱩᱥᱟᱹᱲᱮᱱ
ᱢᱟᱹᱱᱢᱤ ᱥᱚᱢᱟᱡᱽ ᱥᱮᱨᱣᱟ ᱛᱮ
ᱫᱤᱥᱚᱢ ᱦᱟᱹᱴᱤᱧ ᱮᱱ ᱾
ᱥᱚᱨᱚᱜᱽ ᱨᱮᱢᱟ ᱡᱤᱣᱤ ᱵᱟᱥᱟ ᱟᱠᱟᱱ
ᱥᱟᱥᱮᱛ ᱱᱚᱨᱚᱠ ᱨᱮᱭᱟᱜ
ᱵᱤᱪᱟᱹᱨ ᱟᱪᱟᱨᱮ ᱢᱚᱱᱮ ᱡᱤᱣᱤ
ᱟᱜᱟᱢ ᱩᱭᱦᱟᱹᱨᱮᱫ ᱟᱭ ᱾
***
