ᱨᱮᱭᱟᱲ ᱨᱟᱵᱟᱝ ᱫᱤᱱ ᱫᱚ ᱢᱟᱥᱮ
ᱟᱹᱰᱤ ᱡᱩᱨ ᱜᱮ ᱨᱟᱵᱟᱝ ᱟᱥᱮ
ᱟᱨ ᱦᱚᱸ ᱱᱚᱛᱮ ᱦᱤᱥᱤᱫ ᱦᱚᱭ
ᱨᱟᱵᱟᱝ ᱜᱮᱪᱚᱭ ᱥᱟᱨᱥᱟᱣ ᱟᱭ ᱾
ᱨᱟᱵᱟᱝ ᱫᱤᱱ ᱫᱚ ᱢᱟᱥᱮ
ᱩᱲᱩ ᱥᱩᱲᱩ ᱥᱮᱴᱮᱨ ᱟᱠᱟᱱ
ᱜᱚᱲᱚᱢ ᱟᱭᱳ ᱟᱜ ᱠᱟᱛᱷᱟ ᱠᱚᱜᱮ
ᱫᱤᱥᱟᱹ ᱦᱤᱡᱩᱜ ᱠᱟᱱ ᱾
ᱛᱟᱦᱮᱸ ᱠᱟᱱᱟᱭ ᱜᱚᱲᱚᱢ ᱟᱭᱳ
ᱩᱱᱤ ᱫᱚ ᱤᱧ ᱵᱟᱵᱟ ᱟᱭᱳ
ᱵᱚᱨᱥᱮ ᱢᱟᱛᱚᱭ ᱥᱟᱡᱟᱣᱟᱭ
ᱫᱤᱱᱟᱹᱢ ᱜᱮᱪᱚᱭ ᱡᱩᱨᱩᱜ ᱟᱭ ᱾
ᱡᱩᱨᱩᱜ ᱞᱟᱹᱜᱤᱫ ᱠᱷᱟᱹᱲᱤ ᱠᱷᱚᱪᱟ
ᱯᱟᱸᱡᱟᱭ ᱜᱚᱴᱟ ᱵᱟᱲᱜᱮ ᱠᱚᱪᱟ
ᱥᱤᱸᱜᱟᱹᱲ ᱵᱮᱲᱟᱭ ᱡᱩᱨᱩᱜ ᱞᱚᱻᱞᱚᱜ
ᱵᱚᱨᱥᱮ ᱯᱮᱨᱮᱡ ᱥᱮᱸᱜᱮᱞ ᱡᱩᱞᱩᱜ ᱾
ᱦᱩᱨᱩᱢ ᱦᱩᱨᱩᱢ ᱟᱸᱜᱽᱨᱟ ᱟᱠᱟᱱ
ᱡᱩᱨᱩᱜ ᱜᱮᱪᱚ ᱥᱟᱱᱟ ᱠᱟᱱ
ᱡᱩᱨᱩᱜ ᱞᱟᱹᱜᱤᱫ ᱡᱷᱚᱛᱚ ᱦᱚᱲ ᱜᱮ
ᱦᱤᱡᱩᱜ ᱟᱠᱚ ᱚᱸᱰᱮ ᱾
ᱢᱮᱛᱟ ᱠᱚᱣᱟᱭ ᱫᱩᱲᱩᱵ ᱯᱮᱥᱮ ᱱᱚᱰᱮ
ᱨᱮᱭᱟᱲ ᱵᱩᱡᱷᱟᱹᱣᱜ ᱟᱠᱟᱲ ᱥᱟᱠᱟᱲ
ᱚᱱᱟ ᱛᱮᱜᱮ ᱥᱮᱫᱟᱭ
ᱵᱚᱨᱥᱮ ᱫᱚᱠᱚ ᱡᱚᱜᱟᱲ ᱾
ᱡᱩᱨᱩᱜ ᱛᱩᱞᱩᱡ ᱛᱷᱩᱛᱤᱭᱟᱭ
ᱜᱚᱲᱚᱢ ᱟᱭᱳ ᱫᱚ
ᱴᱷᱮᱞᱟ ᱴᱷᱮᱞᱤ ᱜᱤᱫᱟᱹᱨ ᱯᱤᱫᱟᱹᱨ
ᱡᱷᱚᱛᱚ ᱜᱮᱠᱚ ᱟᱸᱡᱚᱢ ᱫᱚ ᱾
ᱠᱩᱞᱤ ᱮᱠᱚ ᱟᱨᱦᱚᱸ ᱢᱟᱥᱮ
ᱪᱮᱫ ᱠᱚᱫᱚᱢ ᱵᱟᱰᱟᱭ
ᱞᱟᱹᱭ ᱟᱞᱮ ᱢᱮ ᱛᱚᱵᱮ ᱛᱚ
ᱟᱞᱮ ᱦᱚᱸᱞᱮ ᱥᱮᱸᱲᱟᱭ ᱾
ᱧᱤᱫᱟᱹ ᱟᱹᱰᱤ ᱦᱩᱭᱮᱱᱟ
ᱱᱚᱰᱮ ᱜᱮᱵᱚ ᱛᱷᱩᱠᱟᱹᱢ
ᱜᱟᱯᱟ ᱟᱨᱦᱚᱸ ᱢᱮᱱᱟᱜ ᱜᱮᱭᱟ
ᱩᱱ ᱜᱮᱵᱚ ᱟᱸᱡᱚᱢ ᱾
ᱡᱮᱻᱡᱟᱨ ᱠᱚ ᱥᱮᱱᱮᱱ
ᱟᱫᱚ ᱠᱚ ᱜᱤᱛᱤᱡ ᱮᱱᱟ
ᱜᱚᱲᱚᱢ ᱟᱭᱳ ᱦᱚᱸ ᱡᱟᱹᱯᱤᱫ ᱞᱟᱹᱜᱤᱫ
ᱜᱤᱛᱤᱡ ᱦᱟᱹᱯᱤᱭᱮᱱᱟ ᱾
ᱡᱟᱱᱦᱮ ᱵᱩᱥᱩᱵ ᱟᱴᱮᱫ ᱟᱠᱟᱫ
ᱵᱤᱪᱷᱱᱟᱹ ᱛᱟᱭ ᱢᱟ
ᱩᱛᱤ ᱥᱩᱛᱤ ᱜᱮ ᱩᱨᱜᱩᱢᱟ
ᱜᱤᱛᱤᱡ ᱠᱚᱜ ᱨᱮᱢᱟ ᱾
ᱜᱚᱲᱚᱢ ᱟᱭᱳ ᱥᱟᱶᱜᱮ ᱤᱧ
ᱜᱤᱛᱤᱡ ᱢᱮᱥᱟ ᱠᱚᱜ ᱼ ᱟᱧ
ᱛᱤᱱ ᱠᱚᱨᱮ ᱪᱚᱝ ᱟᱸᱜᱟ ᱜᱚᱫᱚᱜ
ᱢᱮᱫ ᱜᱮ ᱪᱚ ᱵᱟᱝ ᱵᱮᱸᱜᱮᱫᱚᱜ ᱾
ᱨᱟᱵᱟᱝ ᱜᱮᱪᱚ ᱵᱟᱭ ᱪᱟᱵᱟᱜ ᱠᱟᱱ
ᱨᱮᱭᱟᱲ ᱛᱮ ᱢᱟᱹᱧ ᱴᱷᱩᱨᱩ ᱴᱷᱩᱨᱩᱜ ᱠᱟᱱ ᱾
ᱟᱨᱦᱚᱸ ᱢᱟᱥᱮ ᱱᱚᱶᱟ ᱨᱟᱵᱟᱝ
ᱛᱟᱦᱮᱱ ᱛᱤᱱᱟᱹᱝ ᱫᱤᱱ
ᱦᱚᱲᱢᱚ ᱨᱚᱫᱚᱜ ᱡᱟᱸᱜᱟ ᱯᱟᱲᱟᱜᱚᱜ
ᱱᱚᱶᱟ ᱨᱟᱵᱟᱝ ᱫᱤᱱ ᱾
***
