ᱚᱜᱚᱲᱦᱚᱱ ᱟᱱ ᱚᱣᱟᱝ ᱨᱮ ᱫᱟᱨᱟᱦᱟᱨᱟ ᱫᱷᱟᱹᱨᱛᱤᱯᱩᱨᱤ, ᱥᱤᱨᱡᱚᱱᱤᱭᱟᱹ ᱟᱜ ᱥᱤᱨᱡᱚᱱ ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱾
ᱱᱚᱝᱠᱟᱱ ᱢᱤᱨᱛᱤᱠᱟ ᱨᱮ ᱫᱷᱚᱨᱢᱚᱣᱟᱜ ᱠᱟᱦᱮᱫ ᱞᱮᱠᱟᱛᱮ ᱢᱟᱹᱱᱢᱤ ᱠᱚᱣᱟᱜ ᱡᱟᱱᱟᱢ ᱛᱤᱱᱟᱹᱝ ᱞᱟᱥᱟᱬᱦᱮᱫ ᱜᱮᱭᱟ ᱾ ᱢᱟᱹᱱᱢᱤ ᱢᱤᱫ ᱡᱤᱵᱽ, ᱢᱤᱫ ᱥᱟᱶᱛᱟᱨᱤ ᱡᱤᱵᱽ ᱾ ᱡᱚᱛᱚ ᱠᱷᱚᱱ ᱥᱚᱨᱮᱥ ᱟᱨ ᱡᱚᱛᱚ ᱠᱷᱚᱱ ᱟᱹᱠᱤᱞᱟᱱ ᱡᱤᱵᱽ ᱾ ᱩᱱᱤ ᱡᱩᱫᱤᱭ ᱢᱚᱱᱮᱭᱟ, ᱟᱡ ᱞᱟᱹᱜᱤᱫ, ᱱᱚᱶᱟ ᱢᱚᱧᱪᱚ ᱯᱩᱨᱤ ᱨᱮ ᱪᱮᱫ ᱩᱭᱦᱟᱹᱨ, ᱪᱮᱫ ᱠᱟᱹᱢᱤ ᱚᱦᱚᱣᱟᱱ ᱜᱮ ᱵᱟᱝ-ᱟ ᱾
ᱚᱱᱟᱛᱮ ᱚᱱᱠᱟᱱ ᱫᱟᱲᱮ ᱪᱟᱞ ᱠᱟᱛᱮ ᱜᱮ ᱪᱟᱸᱫᱚ ᱵᱚᱸᱜᱟ ᱫᱚᱭ ᱠᱩᱞ ᱟᱠᱟᱫ ᱠᱚᱣᱟ ᱢᱟᱹᱱᱢᱤ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱛᱮ ᱢᱤᱫ ᱥᱚᱨᱮᱥ ᱠᱟᱹᱢᱤ ᱥᱟᱢᱴᱟᱣ ᱞᱟᱹᱜᱤᱫ ᱾ ᱢᱟᱹᱱᱢᱤ ᱫᱚ ᱡᱚᱢ ᱞᱟᱹᱜᱤᱫ ᱡᱤᱣᱤᱫᱚᱜ ᱫᱚ ᱵᱟᱝ, ᱡᱤᱣᱤᱫᱚᱜ ᱞᱟᱹᱜᱤᱫ ᱡᱚᱢ ᱞᱟᱹᱠᱛᱤ ᱾ ᱢᱟᱹᱱᱢᱤᱭᱟᱜ ᱦᱟᱛᱟᱝ ᱫᱚ ᱢᱤᱫ ᱠᱚᱲ ᱠᱟᱱᱟ, ᱢᱤᱫ ᱢᱟᱦᱟᱱ ᱢᱤᱥᱤᱱ ᱠᱟᱱᱟ ᱾ ᱤᱠᱷᱟᱹᱱ ᱱᱚᱶᱟ ᱠᱟᱛᱷᱟ ᱫᱚ ᱩᱱᱤ ᱦᱚᱲ ᱪᱮᱛᱟᱱ ᱨᱮ ᱞᱟᱫᱮ ᱢᱮᱱᱟᱜ-ᱟ, ᱟᱡ ᱟᱡᱟᱜ ᱦᱟᱛᱟᱝ ᱠᱚᱲ ᱚᱠᱟ ᱞᱮᱠᱟᱭ ᱵᱮᱵᱷᱟᱨᱟ, ᱪᱮᱫ ᱞᱮᱠᱟᱱ ᱠᱟᱹᱢᱤ ᱨᱮᱭ ᱞᱟᱜᱟᱣᱟ ᱾ ᱟᱡ ᱡᱩᱫᱤᱭ ᱢᱚᱱᱮᱭᱟ ᱚᱛ ᱥᱮᱨᱢᱟᱭ ᱢᱤᱫᱟ ᱾ ᱟᱨ ᱡᱩᱫᱤ ᱵᱟᱭ ᱜᱟᱱ ᱡᱚᱝ-ᱟ, ᱮᱱᱠᱷᱟᱱ ᱫᱷᱚᱨᱢᱚᱭ ᱜᱚᱲᱦᱚᱱ ᱟᱠᱟᱫ ᱟᱡᱟᱜ ᱦᱟᱛᱟᱝ ᱠᱚᱲ ᱫᱚ ᱵᱮᱨᱛᱷᱟ ᱜᱮ ᱦᱟᱥᱟ ᱫᱷᱩᱲᱤᱨᱮ ᱢᱟᱹᱬᱤ ᱢᱮᱥᱟᱜ-ᱟ ᱾
ᱚᱱᱟᱛᱮ ᱢᱤᱫᱴᱟᱹᱝ ᱢᱤᱥᱤᱱ ᱪᱟᱹᱞᱩᱭ ᱞᱟᱹᱜᱤᱫ ᱡᱟᱦᱟᱸ ᱞᱮᱠᱟ ᱥᱩᱱᱩᱢ ᱫᱩᱞ ᱦᱩᱭᱩᱜ-ᱟ, ᱵᱤᱡᱽᱞᱤ ᱵᱷᱤᱲᱟᱹᱣ ᱦᱩᱭᱩᱜ-ᱟ, ᱮᱱ ᱮᱱᱟᱝ ᱢᱤᱥᱤᱱ ᱪᱟᱹᱞᱩᱜ-ᱟ, ᱚᱱᱠᱟ ᱜᱮ ᱫᱷᱚᱨᱢᱚᱭ ᱜᱚᱲᱦᱚᱱ ᱟᱠᱟᱫ ᱢᱟᱹᱱᱢᱤ ᱦᱟᱛᱟᱝ ᱢᱤᱥᱤᱱ ᱦᱚᱸ ᱪᱟᱹᱞᱩᱭ ᱞᱟᱹᱜᱤᱫ ᱛᱮ ᱠᱷᱟᱱ ᱥᱮᱪᱮᱫ ᱛᱮ ᱢᱟᱡᱟᱣ ᱟᱹᱰᱤ ᱜᱮ ᱞᱟᱹᱠᱛᱤ ᱢᱮᱱᱟᱜ-ᱟ ᱾ ᱥᱮᱪᱮᱫ ᱨᱮᱱᱟᱜ ᱨᱟᱫᱽᱜᱟᱣ ᱛᱮ ᱟᱹᱠᱤᱞ ᱨᱮᱱᱟᱜ ᱟᱦᱞᱟ ᱛᱮ ᱟᱨᱥᱟᱞ ᱢᱟᱨᱥᱟᱞ ᱡᱷᱟᱞᱠᱟᱣ ᱞᱮᱱ ᱮᱱᱟᱝ ᱢᱟᱹᱱᱢᱤ ᱦᱟᱛᱟᱝ ᱠᱚᱲ ᱫᱚ ᱞᱟᱹᱠᱛᱤ ᱞᱮᱠᱟᱱ ᱠᱟᱹᱢᱤᱨᱮ ᱞᱟᱜᱟᱣ ᱜᱟᱱᱚᱜ-ᱟ ᱾
ᱥᱮᱪᱮᱫ ᱛᱮ ᱵᱟᱝ ᱨᱟᱫᱽᱜᱟᱣ ᱡᱷᱟᱞᱠᱟᱣ ᱢᱟᱹᱱᱢᱤ ᱦᱟᱛᱟᱝ ᱨᱮᱦᱚᱸ ᱟᱹᱰᱤ ᱠᱮᱴᱮᱡ ᱫᱟᱲᱮ ᱛᱟᱦᱮᱸᱱ ᱜᱮᱭᱟ ᱾ ᱡᱟᱦᱟᱸ ᱫᱚ ᱪᱟᱸᱫᱚ ᱵᱚᱸᱜᱟ ᱟᱜ ᱫᱟᱱ ᱫᱟᱲᱮ ᱠᱟᱱᱟ ᱾ ᱚᱱᱟ ᱩᱨᱩᱢ ᱧᱟᱢ ᱜᱮ ᱢᱟᱹᱱᱢᱤ ᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱠᱟᱹᱢᱤ ᱫᱚ ᱾ ᱢᱤᱫ ᱦᱚᱲ ᱪᱮᱫ ᱦᱚᱸ ᱵᱟᱭ ᱩᱭᱦᱟᱹᱨ ᱡᱚᱝ ᱠᱟᱱᱟ ᱢᱮᱱᱮᱛ ᱟᱡ ᱫᱚ ᱪᱟᱸᱫᱚ ᱵᱚᱸᱜᱟ ᱮᱢ ᱢᱤᱥᱤᱱ ᱠᱟᱹᱢᱤᱨᱮ ᱵᱟᱭ ᱵᱮᱵᱷᱟᱨ ᱮᱫ-ᱟ ᱾
ᱡᱟᱦᱟᱸ ᱠᱷᱟᱹᱛᱤᱨ ᱱᱚᱶᱟ ᱫᱟᱲᱮ ᱵᱟᱭ ᱩᱨᱩᱢ ᱧᱟᱢ ᱨᱮᱫᱚ ᱟᱡᱟᱜ ᱚᱱᱟ ᱪᱟᱸᱫᱚ ᱜᱚᱲᱦᱚᱱ ᱠᱚᱲ ᱰᱷᱤᱞᱟᱹᱣ ᱵᱟᱹᱨᱜᱤᱞ ᱢᱤᱥᱤᱱ ᱞᱮᱠᱟ ᱜᱮ ᱨᱤᱴᱷᱟᱹ ᱡᱮᱴᱮ, ᱢᱚᱥᱨᱟ ᱠᱷᱤᱭᱟᱹᱣ ᱠᱟᱛᱮ ᱦᱟᱥᱟ ᱨᱮ ᱢᱮᱥᱟ ᱢᱮᱴᱟᱣᱜ-ᱟ ᱾
ᱥᱟᱯᱲᱮᱛ (Editor)
***
