ᱟᱹᱰᱤ ᱥᱮᱨᱢᱟ ᱢᱟᱬᱟᱝ ᱨᱮᱱᱟᱝ ᱠᱟᱛᱷᱟ ᱾ ᱜᱟᱝ ᱱᱟᱹᱭ ᱫᱷᱟᱨᱮ ᱨᱮ ᱰᱟᱺᱜᱽᱨᱤ ᱠᱟᱰᱟ ᱥᱟᱶᱛᱮ ᱪᱮᱬᱮ ᱪᱤᱯᱨᱩᱡ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱦᱟᱴ ᱯᱟᱛᱟ ᱦᱩᱭᱩᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱦᱟᱺᱰᱮ ᱱᱷᱟᱺᱰᱮ ᱠᱷᱚᱱᱟᱜ ᱟᱹᱰᱤ ᱜᱟᱱ ᱵᱮᱯᱟᱨᱤ ᱵᱚᱭᱦᱟ ᱠᱚᱠᱚ ᱦᱮᱡ ᱞᱮᱱ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱦᱟᱴ ᱯᱟᱛᱟ ᱧᱮᱞ ᱞᱟᱹᱜᱤᱫ ᱟᱹᱰᱤ ᱥᱟᱺᱜᱤᱧ ᱥᱟᱺᱜᱤᱧ ᱠᱷᱚᱱᱟᱜ ᱦᱚᱲ ᱠᱚ ᱞᱩᱜᱩ ᱵᱩᱨᱩ ᱯᱩᱦᱩ ᱞᱮᱠᱟ ᱦᱚᱲ ᱠᱚ ᱨᱮᱞᱟᱣ ᱦᱤᱡᱩᱜ ᱠᱟᱱ ᱛᱟᱦᱮᱸᱫᱚᱜ ᱾ ᱢᱤᱫᱴᱟᱹᱝ ᱪᱮᱬᱮ ᱵᱮᱯᱟᱨᱤᱡ ᱵᱟᱨᱭᱟ ᱠᱷᱟᱱᱪᱟᱨ ᱨᱮ ᱵᱟᱨᱭᱟ ᱢᱤᱨᱩ ᱟᱹᱠᱷᱨᱤᱧ ᱞᱟᱹᱜᱤᱫ ᱮ ᱟᱹᱜᱩ ᱞᱮᱫ ᱠᱤᱱᱟ ᱾ ᱵᱟᱨᱭᱟ ᱢᱤᱨᱩ ᱞᱟᱹᱜᱤᱫ ᱵᱷᱮᱜᱟᱨ ᱵᱷᱮᱜᱟᱨ ᱫᱟᱢ ᱮ ᱫᱚᱦᱚ ᱞᱟᱜᱼᱟ ᱾ ᱢᱤᱫᱴᱟᱹᱝ ᱢᱤᱨᱩ ᱞᱟᱹᱜᱤᱫ ᱫᱚ ᱢᱚᱬᱮ ᱴᱟᱠᱟ ᱟᱨ ᱢᱤᱫᱴᱟᱹᱝ ᱢᱤᱨᱩ ᱞᱟᱹᱜᱤᱫ ᱫᱚ ᱜᱮᱞ ᱴᱟᱠᱟ ᱫᱟᱢ ᱮ ᱫᱚᱦᱚ ᱞᱟᱜᱼᱟ ᱾ ᱜᱚᱨᱦᱟᱠ ᱡᱟᱦᱟᱸᱭ ᱠᱚ ᱦᱤᱡᱩᱜ ᱠᱟᱱ ᱛᱟᱦᱮᱸᱫᱚᱜ, ᱵᱟᱨᱭᱟ ᱢᱤᱨᱩ ᱨᱮᱱᱟᱜ ᱫᱟᱢ ᱵᱷᱮᱜᱟᱨ ᱵᱷᱮᱜᱟᱨ ᱫᱟᱢ ᱟᱸᱡᱚᱢ ᱠᱟᱛᱮ ᱠᱚ ᱨᱩᱣᱟᱹᱲ ᱠᱟᱱ ᱛᱟᱦᱮᱸᱫᱚᱜ ᱾
ᱤᱱᱟᱹ ᱦᱤᱞᱚᱜ ᱦᱟᱴ ᱯᱟᱛᱟᱨᱮ ᱥᱩᱨ ᱟᱹᱛᱩ ᱨᱤᱱᱤᱡ ᱢᱩᱠᱷᱤᱭᱟᱹ ᱡᱚᱭ ᱥᱚᱝᱠᱚᱨ ᱮ ᱥᱮᱴᱮᱨ ᱞᱮᱱ ᱛᱟᱦᱮᱸ ᱠᱟᱱᱟᱭ ᱾ ᱡᱚᱭ ᱥᱚᱝᱠᱚᱨ ᱵᱮᱯᱟᱨᱤ ᱥᱩᱨ ᱛᱮ ᱪᱟᱞᱟᱣ ᱠᱟᱛᱮ ᱢᱤᱨᱩ ᱵᱟᱨᱭᱟ ᱨᱮᱱᱟᱝ ᱵᱷᱮᱜᱟᱨ ᱵᱷᱮᱜᱟᱨ ᱫᱟᱢ ᱨᱮᱱᱟᱜ ᱚᱡᱮ ᱠᱩᱞᱤ ᱞᱮᱫᱮ ᱛᱟᱦᱮᱸ ᱠᱟᱱᱟᱭ ᱾ ᱵᱮᱯᱟᱨᱤ ᱢᱮᱱ ᱠᱮᱫᱼᱟᱭ, ᱡᱟᱦᱟᱸᱭ ᱢᱤᱨᱩ ᱞᱟᱹᱜᱤᱫ ᱤᱧ ᱜᱮᱞ ᱴᱟᱠᱟᱧ ᱤᱫᱤᱭᱟ ᱩᱱᱤ ᱢᱤᱨᱩ ᱫᱚ ᱢᱟᱨᱟᱝ ᱵᱩᱨᱩ ᱢᱮᱱᱛᱮ ᱯᱩᱥᱴᱟᱹᱣ ᱥᱟᱹᱦᱤᱸᱡ ᱮ ᱨᱚᱲ ᱫᱟᱲᱮᱭᱟᱜᱼᱟ ᱾ ᱟᱨ ᱡᱟᱦᱟᱸᱭ ᱢᱤᱨᱩ ᱞᱟᱹᱜᱤᱫ ᱤᱧ ᱢᱚᱬᱮ ᱴᱟᱠᱟᱹᱧ ᱤᱫᱤᱭᱟ ᱩᱱᱤ ᱫᱚ ᱟᱹᱰᱤ ᱛᱷᱤᱨᱛᱷᱟᱨ ᱠᱚᱜᱼᱟᱭ ᱾ ᱢᱮᱱᱠᱷᱟᱱ ᱥᱤᱠᱷᱱᱟᱹᱛ ᱮᱢᱟᱭ ᱠᱷᱟᱱ ᱫᱚ ᱩᱱᱤ ᱢᱤᱨᱩ ᱦᱚᱸ ᱡᱚᱛᱚ ᱠᱟᱛᱷᱟ ᱜᱮ ᱨᱚᱲ ᱫᱟᱲᱮᱭᱟᱜᱼᱟᱭ ᱾
ᱡᱚᱭ ᱥᱚᱝᱠᱚᱨ ᱵᱮᱯᱟᱨᱤᱭᱟᱜ ᱯᱟᱶᱬᱟ ᱮᱢ ᱠᱟᱛᱮ ᱵᱟᱨᱭᱟ ᱠᱷᱟᱱᱪᱟᱨ ᱥᱟᱵ ᱠᱟᱛᱮ ᱚᱲᱟᱜ ᱥᱮᱫ ᱮ ᱢᱩᱦᱟᱸᱬ ᱮᱱᱟᱭ ᱾ ᱤᱱᱟᱹ ᱦᱤᱞᱚᱜ ᱧᱤᱸᱫᱟᱹ ᱡᱚᱭ ᱥᱚᱝᱠᱚᱨ ᱨᱚᱲ ᱪᱮᱫ ᱟᱠᱟᱫ ᱢᱤᱨᱩ ᱫᱚ ᱟᱡᱟᱜ ᱜᱤᱛᱤᱡ ᱚᱲᱟᱜ ᱡᱷᱚᱨᱠᱟ ᱥᱩᱨ ᱨᱮ ᱫᱚᱦᱚ ᱞᱮᱫᱮᱭᱟᱭ ᱾ ᱥᱮᱛᱟᱜ ᱯᱟᱭᱟᱨ ᱨᱮ ᱢᱤᱨᱩ, “ᱮ ᱢᱟᱨᱟᱝ ᱵᱩᱨᱩ ᱱᱟᱯᱟᱭ ᱨᱮᱜᱮ ᱞᱮ ᱛᱟᱦᱮᱸᱱ ᱢᱟ” ᱢᱮᱱᱛᱮ ᱦᱚᱦᱚ ᱠᱮᱫᱼᱟᱭ ᱾ ᱡᱚᱭ ᱥᱚᱝᱠᱚᱨ ᱢᱤᱨᱩᱣᱟᱜ ᱱᱚᱝᱠᱟ ᱦᱚᱦᱚ ᱟᱸᱡᱚᱢ ᱛᱮ ᱟᱹᱰᱤ ᱜᱮ ᱠᱩᱥᱤ ᱮᱱᱟᱭ ᱾ ᱚᱱᱟ ᱨᱟᱹᱥᱠᱟᱹ ᱛᱮ ᱩᱱᱤ ᱢᱤᱨᱩ ᱡᱚ ᱟᱨ ᱛᱤᱠᱤ ᱪᱷᱚᱞᱟ ᱡᱚᱢ ᱮ ᱮᱢ ᱟᱫᱮᱭᱟ ᱾ ᱫᱚᱥᱟᱨ ᱦᱤᱞᱚᱜ ᱧᱤᱫᱟᱹ ᱫᱚ ᱡᱚᱭ ᱥᱚᱝᱠᱚᱨ ᱵᱟᱝ ᱨᱚᱲᱤᱡ ᱢᱤᱨᱩ ᱢᱤᱫ ᱫᱷᱟᱣ ᱟᱡ ᱜᱤᱛᱤᱡᱚᱜ ᱡᱷᱚᱨᱠᱟ ᱥᱩᱨ ᱨᱮ ᱫᱚᱦᱚ ᱠᱮᱫᱮᱭᱟᱭ ᱾ ᱥᱮᱛᱟᱜ ᱥᱮᱛᱟᱜ ᱦᱩᱭᱩᱜ ᱛᱮᱜᱮ ᱢᱤᱨᱩᱭ ᱦᱚᱦᱚ ᱠᱮᱫᱼᱟᱭᱼ ᱵᱟᱹᱵᱩ ᱚᱠᱚᱭ ᱢᱮᱱᱟᱜ ᱯᱮᱭᱟ, ᱟᱭᱳ ᱠᱚ ᱚᱠᱚᱭ ᱢᱮᱱᱟᱜ ᱯᱮᱭᱟ, ᱢᱤᱫ ᱪᱩᱯᱩᱫ ᱠᱚᱭ ᱫᱚ ᱮᱢᱟᱹᱧ ᱯᱮ ᱾ ᱫᱮ ᱜᱳ ᱫᱮ, ᱫᱮ ᱜᱳ ᱫᱮ ᱠᱚᱭ ᱫᱚ ᱮᱢ ᱚᱴᱚ ᱟᱹᱧ ᱯᱮ ᱾ ᱡᱚᱭ ᱥᱚᱝᱠᱚᱨ ᱱᱚᱶᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱜᱮ ᱨᱟᱹᱜᱤ ᱮᱱᱟᱭ ᱟᱨ ᱮ ᱢᱟᱨᱟᱝ ᱵᱩᱨᱩ ᱮ ᱢᱟᱨᱟᱝ ᱵᱩᱨᱩ ᱱᱟᱯᱟᱭ ᱨᱮᱜᱮ ᱞᱮ ᱛᱟᱦᱮᱸᱱ ᱢᱟ ᱢᱮᱱᱛᱮ ᱨᱚᱲ ᱚᱪᱚ ᱠᱮᱫᱮᱭᱟᱭ ᱤᱠᱷᱟᱹᱱ ᱢᱤᱨᱩ ᱫᱚ ᱚᱱᱟ ᱵᱟᱝ ᱨᱚᱲ ᱠᱟᱛᱮ ᱱᱚᱝᱠᱟ ᱜᱮ ᱨᱚᱲ ᱠᱮᱫᱼᱟᱭᱼ ᱵᱟᱹᱵᱩ ᱚᱠᱚᱭ ᱢᱮᱱᱟᱜ ᱯᱮᱭᱟ, ᱟᱭᱳ ᱚᱠᱚᱭ ᱢᱮᱱᱟᱜ ᱯᱮᱭᱟ ᱢᱤᱫ ᱪᱩᱯᱩᱫ ᱠᱚᱭ ᱫᱚ ᱚᱢᱟᱹᱧ ᱯᱮ ᱾
ᱡᱚᱭ ᱥᱚᱝᱠᱚᱨ ᱱᱩᱭ ᱢᱤᱨᱩᱣᱟᱜ ᱦᱚᱦᱚ ᱟᱸᱡᱚᱢ ᱠᱟᱛᱮ ᱨᱟᱹᱜᱤ ᱜᱮ ᱵᱩᱡᱷᱟᱹᱣ ᱠᱮᱫᱼᱟᱭ ᱟᱨ ᱟᱹᱰᱤ ᱞᱚᱜᱚᱱ ᱜᱮ ᱪᱟᱠᱚᱨ ᱜᱤᱫᱽᱨᱟᱹ ᱦᱚᱦᱚ ᱠᱟᱛᱮ ᱢᱮᱛᱟᱭ ᱠᱟᱱᱟᱭᱼ ᱫᱩ ᱱᱩᱭ ᱢᱤᱨᱩ ᱤᱫᱤ ᱮᱢᱮ ᱟᱨ ᱥᱤᱛᱩᱝ ᱨᱮ ᱫᱚᱦᱚ ᱮᱢᱮ ᱟᱨ ᱡᱚᱢ ᱧᱩ ᱦᱚᱸ ᱟᱞᱚᱢ ᱮᱢᱟᱭᱟ ᱾ ᱡᱟᱦᱟᱸ ᱛᱤᱱ ᱨᱮ ᱢᱟᱨᱟᱝ ᱵᱩᱨᱩ ᱢᱮᱱᱛᱮ ᱦᱚᱦᱚᱭᱟᱭ ᱛᱚᱵᱮ ᱮᱱᱟᱝ ᱚᱲᱟᱜ ᱛᱮᱫᱚ ᱟᱹᱜᱩᱭᱮᱢᱮ ᱾ ᱱᱚᱣᱟ ᱚᱠᱛᱚ ᱨᱮ ᱨᱚᱲ ᱮᱫ ᱢᱤᱨᱩ ᱢᱮᱱ ᱠᱮᱫᱼᱟᱭᱼ ᱱᱚᱝᱠᱟ ᱫᱚ ᱟᱞᱚ ᱯᱮ ᱠᱚᱥᱴᱚ ᱮᱭᱟ ᱤᱧᱤᱡ ᱵᱚᱭᱦᱟ ᱫᱚ ᱾ ᱱᱩᱭ ᱫᱚ ᱜᱤᱫᱽᱨᱟᱹ ᱠᱷᱚᱱᱟᱜ ᱜᱮ ᱠᱟᱛᱷᱟ ᱵᱟᱭ ᱢᱟᱱᱟᱣ ᱨᱮᱦᱚᱸ ᱜᱮ ᱵᱩᱡᱷᱟᱹᱣ ᱞᱮᱠᱷᱟᱱ ᱫᱚ ᱠᱟᱛᱷᱟᱭ ᱢᱟᱱᱟᱣ ᱜᱮᱭᱟ ᱾ ᱟᱹᱞᱤᱧ ᱫᱚ ᱢᱤᱫᱴᱟᱹᱝ ᱟᱹᱰᱤ ᱢᱟᱨᱟᱝ ᱢᱩᱠᱷᱤᱭᱟᱹ ᱚᱲᱟᱜ ᱨᱮᱠᱚ ᱫᱚᱦᱚ ᱞᱮᱫ ᱞᱤᱧᱟ ᱾ ᱤᱧᱤᱡ ᱱᱩᱭ ᱦᱩᱰᱤᱧ ᱵᱚᱭᱦᱟ ᱢᱩᱠᱷᱭᱟᱹ ᱟᱜ ᱠᱟᱛᱷᱟ ᱜᱮ ᱵᱟᱝᱜᱮ ᱟᱸᱡᱚᱢ ᱛᱟᱦᱮᱸᱫᱚᱜ ᱾ ᱚᱱᱟ ᱤᱫᱤᱛᱮ ᱢᱩᱠᱷᱤᱭᱟᱹ ᱜᱚᱢᱠᱮ ᱟᱡᱟᱜ ᱜᱤᱛᱤᱡ ᱚᱲᱟᱜ ᱠᱟᱸᱫᱷᱟ ᱡᱷᱚᱨᱠᱟ ᱥᱩᱨ ᱨᱮ ᱫᱚᱦᱚ ᱞᱤᱫᱤᱧᱟᱭ ᱟᱨ ᱟᱡ ᱫᱚ ᱚᱲᱟᱜ ᱵᱟᱦᱨᱮ ᱨᱟᱪᱟ ᱯᱟᱦᱴᱟ ᱫᱩᱣᱟᱹᱨ ᱥᱩᱨ ᱨᱮ ᱫᱚᱦᱚ ᱞᱮᱫᱮᱭᱟᱭ ᱾ ᱱᱤᱱᱟᱹᱜ ᱜᱮ ᱵᱚᱭᱦᱟ ᱵᱷᱤᱛᱨᱤ ᱨᱮᱱᱟᱜ ᱯᱷᱚᱨᱚᱠ ᱫᱚ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱠᱚ ᱧᱮᱞ ᱠᱟᱛᱮ ᱢᱩᱠᱷᱤᱭᱟᱹ ᱫᱚ ᱟᱹᱞᱤᱧ ᱪᱮᱛᱟᱱ ᱨᱮ ᱨᱟᱹᱜᱤ ᱮᱱᱟᱭ ᱟᱨ ᱵᱮᱯᱟᱨᱤ ᱴᱷᱮᱱᱮ ᱟᱹᱠᱷᱨᱤᱧ ᱠᱮᱫ ᱞᱤᱧᱟ ᱾ ᱤᱧᱤᱡ ᱦᱩᱰᱤᱧ ᱵᱚᱭᱦᱟ ᱫᱚ ᱟᱹᱰᱤ ᱡᱩᱨ ᱜᱤᱧ ᱫᱩᱞᱟᱹᱲ ᱮᱭᱟ ᱟᱨ ᱵᱮᱥ ᱤᱧ ᱧᱟᱢᱮᱭᱟ ᱾ ᱟᱹᱵᱤᱱ ᱠᱟᱹᱴᱤᱡ ᱫᱟᱭᱟᱜ ᱵᱤᱱ ᱡᱩᱫᱤ ᱩᱱᱤ ᱦᱩᱰᱤᱧ ᱵᱚᱭᱦᱟ ᱛᱤᱧ ᱤᱧᱟᱜ ᱠᱷᱟᱧᱪᱟᱨ ᱨᱮ ᱛᱟᱦᱮᱸᱱᱟᱭ ᱤᱧ ᱡᱩᱨᱩᱲ ᱛᱮ ᱡᱚᱛᱚ ᱠᱟᱛᱷᱟᱧ ᱥᱤᱠᱷᱟᱹᱣ ᱯᱟᱲᱦᱟᱣ ᱮᱭᱟ ᱾
ᱱᱚᱣᱟ ᱠᱟᱛᱷᱟ ᱠᱚ ᱟᱹᱡᱚᱢ ᱠᱟᱛᱮ ᱡᱚᱭ ᱥᱚᱝᱠᱚᱨ ᱵᱟᱱᱟᱨ ᱢᱤᱨᱩ ᱛᱟᱦᱮᱸᱱ ᱞᱟᱹᱜᱤᱫ ᱢᱤᱫᱴᱟᱹᱝ ᱢᱟᱨᱟᱝ ᱩᱛᱟᱹᱨᱟᱜ ᱠᱷᱟᱱᱪᱟᱨ ᱮ ᱡᱚᱜᱟᱲ ᱠᱮᱫᱼᱟ ᱾ ᱵᱟᱹᱭ ᱵᱟᱹᱭ ᱛᱮ ᱛᱷᱤᱨ ᱛᱷᱟᱨᱮ ᱛᱟᱦᱮᱸᱱ ᱠᱟᱱ ᱢᱤᱨᱩ ᱦᱚᱸ ᱡᱚᱛᱚ ᱠᱟᱛᱷᱟ ᱨᱚᱲᱮ ᱮᱦᱚᱵ ᱠᱮᱫᱼᱟ ᱾ ᱡᱚᱭ ᱥᱚᱝᱠᱚᱨ ᱡᱟᱦᱟᱸ ᱠᱟᱛᱷᱟᱭ ᱢᱮᱛᱟᱭ ᱠᱟᱱᱟ ᱚᱱᱟ ᱠᱟᱛᱷᱟ ᱜᱮ ᱵᱟᱱᱟᱨ ᱢᱤᱨᱩ ᱠᱤᱱ ᱢᱟᱱᱟᱣ ᱠᱮᱫᱼᱟ ᱾ ᱡᱚᱭ ᱥᱚᱝᱠᱚᱨ ᱱᱚᱣᱟ ᱧᱮᱞᱛᱮ ᱵᱟᱱᱟᱨ ᱢᱤᱨᱩ ᱟᱹᱰᱤ ᱵᱮᱥ ᱮ ᱧᱟᱢ ᱠᱮᱫ ᱠᱤᱱᱟ ᱟᱨ ᱥᱤᱵᱤᱞ ᱥᱤᱵᱤᱞ ᱡᱚᱢ ᱮ ᱮᱢᱟᱫ ᱠᱤᱱᱟ ᱾ ᱵᱟᱱᱟᱨ ᱵᱚᱭᱦᱟ ᱟᱹᱠᱤᱱ ᱢᱤᱫ ᱴᱷᱮᱱ ᱛᱟᱦᱮᱸ ᱠᱟᱛᱮ ᱠᱩᱥᱤ ᱛᱮ ᱫᱤᱱ ᱠᱤᱱ ᱠᱷᱟᱸᱰᱟᱣ ᱠᱮᱫᱼᱟ ᱾
ᱱᱚᱣᱟ ᱠᱟᱹᱦᱱᱤ ᱠᱷᱚᱱᱟᱜ ᱵᱟᱰᱟᱭᱚᱜ ᱠᱟᱱᱟ ᱡᱟᱦᱟᱸ ᱞᱮᱠᱟᱱ ᱡᱟᱭᱜᱟ ᱨᱮᱢ ᱛᱟᱦᱮᱸᱱᱟ ᱚᱱᱠᱟᱱᱟᱜ ᱠᱟᱛᱷᱟ ᱜᱮᱢ ᱥᱮᱪᱮᱫᱚᱜᱼᱟ ᱟᱨ ᱠᱟᱛᱷᱟᱢ ᱢᱟᱱᱟᱣ ᱞᱮᱠᱷᱟᱱ ᱫᱩᱞᱟᱹᱲ ᱮᱢ ᱧᱟᱢᱟ ᱾
***
