ᱚᱱᱚᱞ ᱫᱚ ᱛᱩᱨᱩᱭ ᱪᱟᱱᱟᱪ ᱨᱮᱭ ᱯᱟᱲᱦᱟᱜ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱚᱞᱚᱜ ᱨᱮ ᱩᱱᱟᱹᱜ ᱫᱚ ᱵᱟᱭ ᱞᱟᱥᱮᱨ ᱜᱮᱛᱮ ᱯᱨᱟᱭᱵᱷᱮᱴ ᱢᱟᱥᱴᱟᱨ ᱴᱷᱮᱱ ᱠᱚ ᱯᱟᱲᱦᱟᱣ ᱚᱪᱚᱭᱮ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱚᱱᱚᱞ ᱛᱟᱠᱚ ᱯᱨᱟᱭᱵᱷᱮᱴ ᱨᱮᱫᱚ ᱢᱤᱫ ᱫᱷᱟᱣ ᱛᱮ ᱟᱹᱰᱤ ᱜᱟᱱ ᱜᱤᱫᱽᱨᱟᱹ ᱠᱚ ᱯᱟᱲᱦᱟᱜᱼᱟ ᱾ ᱢᱤᱫ ᱫᱤᱱ ᱯᱨᱟᱭᱵᱷᱮᱴ ᱨᱮ ᱢᱟᱥᱴᱟᱨ ᱟᱜ ᱦᱤᱡᱩᱜ ᱛᱮ ᱵᱤᱞᱚᱢ ᱧᱚᱜ ᱞᱮᱱ ᱛᱟᱭᱟ ᱾ ᱯᱨᱟᱭᱵᱷᱮᱴ ᱨᱮ ᱦᱮᱡ ᱠᱟᱛᱮᱫ ᱜᱮᱭ ᱞᱟᱹᱭ ᱟᱠᱚ ᱠᱟᱱᱟ – ᱛᱤᱦᱤᱧ ᱫᱚ ᱵᱟᱸᱠᱩᱲᱟᱧ ᱪᱟᱞᱟᱣ ᱞᱮᱱᱟ, ᱵᱮᱠᱟᱨ ᱵᱷᱟᱛᱟ ᱠᱚ ᱮᱢᱟᱞᱮ ᱞᱟᱹᱜᱤᱫ ᱚᱱᱟ ᱛᱮ ᱵᱟᱸᱠᱩᱲᱟ ᱨᱮ ᱠᱟᱜᱚᱡᱽ ᱠᱚ ᱡᱚᱢᱟᱧ ᱪᱟᱞᱟᱣ ᱞᱮᱱᱟ, ᱚᱱᱟᱛᱮ ᱛᱤᱦᱤᱧ ᱫᱚ ᱠᱟᱹᱴᱤᱡ ᱤᱧ ᱵᱤᱞᱚᱢ ᱮᱱᱟ ᱾
ᱚᱱᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮᱫ ᱜᱮ ᱚᱱᱚᱞ ᱫᱚ ᱠᱟᱹᱴᱤᱡ ᱮ ᱵᱷᱟᱹᱛ ᱧᱚᱜ ᱮᱱᱟ ᱾ ᱪᱮᱫᱟᱜ ᱥᱮ ᱢᱤᱫ ᱫᱤᱱ ᱚᱲᱟᱜ ᱨᱮ ᱜᱟᱞᱢᱟᱨᱟᱣ ᱮ ᱟᱸᱡᱚᱢ ᱞᱮᱫᱟ ᱚᱱᱚᱞ ᱟᱡ ᱢᱟᱢᱟᱜᱚ ᱚᱱᱚᱞ ᱟᱡ ᱜᱚᱭ ᱞᱟᱹᱭᱟᱭ ᱠᱟᱱ ᱛᱟᱸᱦᱮ ᱠᱟᱱᱟ ᱡᱮ – “ᱟᱢ ᱵᱟ ᱫᱚ ᱵᱷᱟᱴᱟ ᱨᱮ ᱤᱴᱟᱹ ᱞᱮᱠᱷᱟ ᱞᱟᱹᱜᱤᱫ ᱠᱚ ᱦᱚᱦᱚᱣᱟᱭ ᱠᱟᱱᱟ ᱾ ᱤᱴᱟᱹ ᱜᱮ ᱞᱮᱠᱷᱟᱭ ᱦᱩᱭᱩᱜ ᱛᱟᱭᱟ ᱟᱨ ᱦᱟᱹᱡᱽᱨᱤ ᱠᱚ ᱮᱢᱟᱭᱟ ᱾
ᱩᱱ ᱚᱱᱚᱞ ᱦᱚᱸ ᱚᱱᱟ ᱠᱟᱛᱷᱟ ᱫᱚᱭ ᱟᱸᱡᱚᱢ ᱞᱮᱫᱟ ᱟᱨ ᱵᱷᱟᱴᱟ ᱠᱟᱛᱷᱟ ᱫᱚ ᱟᱭᱟᱜ ᱵᱚᱦᱚᱜ ᱜᱮ ᱵᱚᱞᱚ ᱟᱠᱟᱱ ᱛᱟᱭ ᱛᱟᱸᱦᱮ ᱠᱟᱱᱟ ᱾ ᱯᱨᱟᱭᱵᱷᱮᱴ ᱠᱷᱚᱱ ᱚᱲᱟᱜ ᱨᱩᱣᱟᱹᱲ ᱦᱮᱡ ᱠᱟᱛᱮᱫ ᱜᱮ ᱟᱡ ᱜᱚᱜᱚᱭ ᱢᱮᱛᱟᱭ ᱠᱟᱱᱟ – ᱮᱜᱚ ᱟᱞᱮ ᱨᱮᱱ ᱯᱨᱟᱭᱵᱷᱮᱴ ᱢᱟᱥᱴᱟᱨ ᱫᱚ ᱟᱫᱚ ᱯᱨᱟᱭᱵᱷᱮᱴ ᱫᱚ ᱵᱟᱭ ᱯᱟᱲᱦᱟᱣ ᱞᱮᱭᱟ ᱾ ᱟᱡ ᱜᱚᱜᱚ
ᱫᱚᱭ ᱠᱩᱞᱤ ᱠᱮᱫᱮᱭᱟ ᱪᱮᱫᱟᱜ ᱵᱮᱴᱟ, ᱪᱮᱫ ᱮ ᱪᱮᱠᱟᱭᱟ ᱛᱟᱦᱚᱞᱮ ᱟᱯᱮ ᱨᱮᱱ ᱢᱟᱥᱴᱟᱨ ᱫᱚ ᱟᱨ ᱯᱨᱟᱭᱵᱷᱮᱴ ᱵᱟᱭ ᱯᱟᱲᱦᱟᱣ ᱯᱮᱠᱷᱟᱱ ᱴᱟᱠᱟ ᱦᱚᱸ ᱚᱠᱟ ᱨᱮᱭ ᱧᱟᱢᱟ? ᱟᱫᱚ ᱚᱱᱚᱞ ᱮ ᱢᱮᱱ ᱠᱮᱫᱟ ᱟᱞᱮ ᱨᱮᱱ ᱢᱟᱥᱴᱟᱨ ᱫᱚ ᱵᱮᱠᱟᱨ ᱵᱷᱟᱴᱟ ᱠᱚ ᱮᱢᱟᱭ ᱞᱟᱹᱜᱤᱫ ᱾ ᱚᱱᱚᱞ ᱟᱡ ᱜᱚᱜᱚ ᱫᱚᱭ ᱞᱟᱹᱭ ᱜᱚᱫ ᱠᱮᱫᱟ – ᱵᱮᱠᱟᱨ ᱵᱷᱟᱴᱟ? ᱚᱱᱚᱞ ᱮ ᱢᱮᱱ ᱠᱮᱫᱟ ᱦᱮᱸ ᱜᱚ ᱵᱮᱠᱟᱨ ᱵᱷᱟᱴᱟ, ᱢᱟᱢᱟ ᱵᱟ ᱪᱮᱫ ᱞᱮᱠᱟ ᱵᱷᱟᱴᱟ ᱠᱚ ᱮᱢ ᱟᱠᱟᱫᱮᱭᱟ ᱚᱱᱠᱟ ᱜᱮ ᱟᱞᱮ ᱨᱮᱱ ᱢᱟᱥᱴᱟᱨ ᱦᱚᱸ ᱵᱷᱟᱴᱟ ᱠᱚ ᱮᱢᱟᱭ ᱞᱟᱹᱜᱤᱫ ᱾ ᱩᱱ ᱟᱹᱱᱤᱡ ᱚᱱᱚᱞ ᱟᱡ ᱜᱚᱜᱚ ᱫᱚᱭ ᱵᱩᱡᱷ ᱛᱤᱭᱳᱜ ᱠᱮᱫᱟ ᱠᱟᱛᱷᱟ ᱫᱚ ᱵᱮᱠᱟᱨ ᱵᱷᱟᱴᱟ ᱫᱚ ᱵᱟᱝ ᱠᱟᱱᱟ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ ‘ᱵᱮᱠᱟᱨ ᱵᱷᱟᱛᱟ’ ᱾
ᱚᱱᱚᱞ ᱟᱡ ᱜᱚᱜᱚ ᱫᱚ ᱞᱟᱦᱟ ᱛᱮᱫᱚ ᱵᱮᱠᱟᱨ ᱵᱷᱟᱛᱟ ᱠᱟᱛᱷᱟ ᱤᱫᱤ ᱠᱟᱛᱮᱫ ᱯᱮᱯᱟᱨ ᱨᱮᱭ ᱯᱟᱲᱦᱟᱣ ᱟᱠᱟᱫ ᱛᱟᱸᱦᱮ ᱠᱟᱱᱟ ᱡᱮ ᱡᱟᱦᱟᱭ ᱠᱚ ᱯᱟᱲᱦᱟᱣ ᱠᱟᱛᱮᱫ ᱦᱚᱸ ᱪᱟᱹᱠᱨᱤ ᱠᱚ ᱵᱟᱝ ᱠᱚ ᱧᱟᱢ ᱟᱠᱟᱫᱟ ᱩᱱᱠᱩ ᱫᱚ ᱥᱚᱨᱠᱟᱨ ᱠᱷᱚᱱ ᱵᱮᱠᱟᱨ ᱵᱷᱟᱛᱟ ᱠᱚ ᱮᱢᱟ ᱠᱚᱣᱟ ᱾ ᱚᱱᱟᱛᱮ ᱠᱟᱛᱷᱟ ᱟᱸᱡᱚᱢ ᱥᱟᱶᱛᱮ ᱟᱡ ᱜᱚᱜᱚ ᱫᱚ ᱫᱚᱢᱮᱭ ᱞᱟᱸᱫᱟ ᱠᱮᱫᱟ ᱾ ᱞᱟᱸᱫᱟ ᱵᱷᱟᱜᱟᱣ ᱠᱟᱛᱮᱫ ᱮ ᱢᱮᱛᱟᱭ ᱠᱟᱱᱟ ᱼ ᱵᱟᱹᱵᱩ ᱤᱧ ᱵᱟᱵᱟ ᱫᱚ ᱟᱹᱰᱤ ᱫᱤᱱ ᱠᱷᱚᱱ ᱤᱴᱟᱹ ᱵᱷᱟᱴᱟ ᱨᱮ ᱤᱴᱟᱹᱭ ᱜᱚᱜ ᱟᱠᱟᱫᱟ, ᱱᱤᱛ ᱫᱚ ᱖᱕ ᱥᱮᱨᱢᱟ ᱩᱢᱮᱨ ᱦᱳᱭ ᱟᱠᱟᱱ ᱛᱟᱭᱟ ᱦᱟᱲᱟᱢ ᱟᱠᱟᱱᱟᱭ ᱾ ᱱᱮᱛᱟᱨ ᱫᱚ ᱤᱴᱟᱹ ᱫᱚ ᱵᱟᱭ ᱜᱚᱜ ᱫᱟᱲᱮᱭᱟᱜᱼᱟ ᱟᱨ ᱵᱷᱟᱴᱟ ᱨᱮᱢᱟ ᱤᱴᱟᱹ ᱞᱮᱠᱷᱟ ᱞᱟᱹᱜᱤᱫ ᱦᱚᱸ ᱦᱚᱲ ᱫᱚᱨᱠᱚᱜ ᱜᱮᱭᱟ ᱾ ᱚᱱᱟᱛᱮ ᱵᱷᱟᱴᱟ ᱨᱮ ᱤᱴᱟᱹ ᱞᱮᱠᱷᱟ ᱞᱟᱹᱜᱤᱫ ᱴᱟᱠᱟ ᱠᱚ ᱮᱢᱟᱭᱟ ᱾ ᱟᱯᱮ ᱨᱮᱱ ᱢᱟᱥᱴᱟᱨ ᱡᱟᱦᱟ ᱵᱷᱟᱛᱟ ᱠᱚ ᱮᱢᱟᱭ ᱞᱟᱹᱜᱤᱫ ᱚᱱᱟ ᱫᱚ ᱪᱟᱹᱠᱨᱤ ᱠᱚ ᱵᱟᱭ ᱧᱟᱢ ᱟᱠᱟᱫ ᱛᱮ ᱥᱚᱨᱠᱟᱨ ᱠᱷᱚᱱ ᱴᱟᱠᱟ ᱠᱚ ᱮᱢᱟᱭᱟ ᱾ ᱚᱱᱟ ᱫᱚᱵᱮᱠᱟᱨ ᱵᱷᱟᱴᱟ ᱫᱚ ᱵᱟᱝ ᱠᱟᱱᱟ, ‘ᱵᱮᱠᱟᱨ ᱵᱷᱟᱛᱟ’ ᱠᱚ ᱢᱮᱛᱟᱜ ᱠᱟᱱᱟ ᱾
***
