ᱡᱷᱮᱸᱴ ᱵᱚᱸᱜᱟ ᱦᱩᱲᱩ ᱛᱚᱞᱟᱭ ᱫᱤᱱ ᱾ ᱡᱚᱛᱚ ᱦᱚᱲ ᱜᱮ ᱠᱷᱮᱛ ᱠᱚᱠᱚ ᱥᱤᱭᱮᱫ ᱛᱟᱠᱚᱣᱟ ᱾ ᱚᱱᱟᱛᱮ ᱪᱟᱨᱮᱪᱜᱚᱲᱟ ᱨᱮᱱ ᱨᱟᱢ ᱧᱩᱛᱩᱢᱟᱱ ᱢᱤᱫ ᱪᱟᱹᱥᱤ ᱦᱚᱲ ᱫᱚ ᱥᱮᱛᱟᱜ ᱥᱮᱛᱟᱜ ᱜᱮ ᱱᱟᱦᱮᱞ ᱰᱟᱝᱨᱤ ᱠᱚ ᱤᱫᱤ ᱠᱟᱛᱮᱫ ᱟᱠᱳ ᱵᱟᱹᱫᱽ ᱛᱮ ᱥᱤᱭᱚᱜ ᱮ ᱤᱫᱤ ᱟᱠᱟᱫᱟ ᱾ ᱟᱡ ᱵᱟᱹᱦᱩ ᱥᱟᱨᱚ ᱫᱚ ᱚᱲᱟᱜ ᱨᱮ ᱥᱮᱛᱟᱜ ᱠᱟᱹᱢᱤ ᱠᱚ ᱠᱟᱹᱢᱤ ᱵᱟᱲᱟ ᱠᱟᱛᱮᱫ ᱫᱟᱠᱟ ᱫᱟᱜ ᱢᱟᱺᱰᱤ ᱠᱚᱭ ᱤᱥᱤᱱᱟ ᱟᱨ ᱠᱷᱮᱛ ᱛᱮᱭ ᱤᱫᱤᱭᱟᱭᱟ ᱾
ᱱᱟᱦᱮᱞ ᱥᱤ ᱥᱤ ᱛᱮ ᱟᱹᱰᱤ ᱜᱮ ᱵᱟᱹᱥᱭᱟᱹᱢ ᱜᱚᱫ ᱟᱠᱟᱱᱟ ᱟᱨ ᱥᱤᱛᱩᱝ ᱦᱚᱸ ᱟᱹᱰᱤ ᱡᱳᱨ ᱥᱤᱛᱩᱝ ᱟᱠᱟᱱᱟ ᱾ ᱥᱤ ᱥᱤ ᱛᱮ ᱟᱹᱰᱤ ᱜᱮ ᱨᱮᱸᱜᱮᱡ ᱟᱠᱟᱫᱮᱭᱟ ᱟᱨ ᱫᱟᱜ ᱦᱚᱸ ᱟᱹᱰᱤ ᱡᱳᱨ ᱛᱮᱛᱟᱝ ᱟᱠᱟᱫᱮᱭᱟ ᱾ ᱟᱡ ᱥᱩᱨ ᱥᱩᱯᱩᱨ ᱡᱟᱦᱟᱸᱭ ᱠᱚ ᱱᱟᱦᱮᱞ ᱠᱚ ᱥᱤᱭᱮᱫ ᱛᱟᱸᱦᱮ ᱠᱟᱱᱟ ᱩᱱᱠᱩ ᱫᱚ ᱫᱟᱠᱟ ᱫᱟᱜ ᱢᱟᱺᱰᱤ ᱠᱚᱠᱚ ᱟᱹᱜᱩᱣᱟᱫ ᱠᱚᱛᱮ ᱠᱚ ᱡᱚᱢᱮᱫᱟ ᱾ ᱢᱮᱱᱠᱷᱟᱱ ᱥᱟᱨᱚ ᱫᱚ ᱱᱤᱛ ᱦᱚᱸ ᱵᱟᱭ ᱦᱮᱡ ᱞᱮᱱᱟ ᱾ ᱨᱟᱢ ᱫᱚ ᱱᱟᱦᱮᱞ ᱮ ᱥᱤᱭᱮᱫᱟ ᱟᱨ ᱮ ᱠᱚᱭᱚᱜ ᱮᱫᱟ ᱮᱨᱟᱛ ᱛᱮᱫ ᱟᱜ ᱦᱤᱡᱩᱜ ᱦᱚᱨ ᱥᱮᱫ ᱜᱮ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱥᱟᱨᱚ ᱫᱚ ᱤᱛᱟᱹ ᱦᱩᱲᱩ ᱴᱷᱮᱠᱟ ᱨᱮ ᱫᱤᱯᱤᱞ ᱠᱟᱛᱮᱫ ᱟᱨ ᱵᱟᱹᱴᱤ ᱨᱮ ᱫᱟᱜ ᱢᱟᱺᱰᱤ ᱥᱮᱯᱮᱧ ᱠᱟᱛᱮᱫ ᱟᱲᱮ ᱟᱲᱮ ᱛᱮ ᱞᱮᱜᱮᱢ ᱞᱮᱜᱮᱢ ᱮ ᱛᱟᱲᱟᱢ ᱟᱠᱟᱫᱟ ᱾
ᱨᱟᱢ ᱫᱚ ᱟᱡ ᱵᱟᱹᱦᱩ ᱥᱟᱺᱜᱤᱧ ᱨᱮᱜᱮᱭ ᱧᱮᱞ ᱧᱟᱢ ᱟᱠᱟᱫᱮᱭᱟ ᱾ ᱟᱫᱚ ᱥᱟᱺᱜᱤᱧ ᱠᱷᱚᱱ ᱜᱮᱭ ᱢᱮᱛᱟᱭ ᱠᱟᱱᱟ ᱪᱮᱫ ᱮᱢ ᱪᱮᱠᱟᱭᱮᱫ ᱛᱟᱸᱦᱮ ᱠᱟᱱᱟ ᱱᱤᱛ ᱟᱹᱱᱤᱡ ᱮᱢ ᱦᱤᱡᱩᱜ ᱠᱟᱱᱟ? ᱤᱧ ᱛᱤᱱᱟᱹᱜ ᱨᱮᱸᱜᱮᱡ ᱟᱠᱟᱫᱤᱧᱟ, ᱨᱮᱸᱜᱮᱡ ᱛᱮᱧ ᱠᱷᱮᱭᱟᱢ ᱩᱛᱟᱹᱨᱮᱱᱟ ᱮᱱᱛᱮ ᱨᱮᱦᱚᱸ ᱵᱟᱢ ᱦᱤᱡᱩᱜ ᱠᱟᱱᱟ ᱾ ᱟᱡ ᱡᱟᱶᱟᱭ ᱥᱟᱺᱜᱤᱧ ᱠᱷᱚᱱ ᱪᱮᱫ ᱮ ᱢᱮᱛᱟᱫᱮᱭᱟ ᱥᱟᱨᱚ ᱫᱚ ᱩᱱᱟᱹᱜ ᱵᱷᱟᱜᱮ ᱞᱮᱠᱟ ᱫᱚ ᱵᱟᱭ ᱟᱸᱡᱚᱢ ᱞᱮᱫᱟ ᱾ ᱟᱫᱚ ᱡᱳᱨ ᱛᱮᱭ ᱢᱮᱱ ᱜᱚᱫ ᱠᱮᱫᱟ – ᱪᱮᱫ…… ᱮᱨᱟᱢ…ᱹᱹ? ᱨᱟᱢ ᱫᱚ ᱟᱡ ᱵᱟᱹᱦᱩ ᱟᱜ ᱢᱚᱪᱟ ᱨᱮ ᱟᱭᱟᱜ ᱧᱩᱛᱩᱢ ᱟᱸᱡᱚᱢ ᱠᱟᱛᱮᱫ ᱨᱟᱹᱜᱤ ᱡᱟᱞᱟ ᱱᱟᱦᱮᱞ ᱥᱤ ᱵᱟᱹᱜᱤ ᱠᱟᱛᱮᱫ ᱰᱟᱝᱨᱤ ᱟᱹᱪᱩᱨ ᱞᱟᱹᱜᱤᱫ ᱡᱟᱦᱟ ᱴᱷᱮᱸᱜᱟᱭ ᱥᱟᱵ ᱟᱠᱟᱫ ᱛᱟᱸᱦᱮ ᱠᱟᱱᱟ ᱚᱱᱟ ᱥᱟᱵ
ᱠᱟᱛᱮᱫ ᱜᱮ ᱟᱡ ᱵᱟᱹᱦᱩ ᱥᱮᱱᱮ ᱪᱟᱞᱟᱜ ᱠᱟᱱᱟ ᱟᱨ ᱮ ᱢᱮᱱ ᱤᱫᱤᱭᱮᱫᱟ ᱵᱟᱢ ᱦᱮᱡ ᱦᱚᱫ ᱫᱟᱲᱮᱭᱟᱜ ᱠᱟᱱᱟ? ᱮᱱᱟᱝ ᱠᱷᱚᱱ ᱛᱤᱱᱟᱹᱜ ᱨᱮᱸᱜᱮᱡ ᱟᱠᱟᱫᱤᱧᱟ ᱾ ᱥᱟᱨᱚ ᱫᱚ ᱟᱨ ᱦᱚᱸ ᱡᱳᱨ ᱟᱲᱟᱝ ᱛᱮᱭ ᱢᱮᱱ ᱠᱮᱫᱟ – ᱪᱮᱫ…… ᱮᱨᱟᱢ…ᱹᱹ? ᱨᱟᱢ ᱩᱱ ᱫᱚ ᱫᱟᱹᱲ ᱟᱛᱮᱫ ᱜᱮ ᱟᱡ ᱵᱟᱹᱦᱩ ᱥᱮᱱᱮ ᱧᱤᱨ ᱦᱤᱡᱩᱜ ᱠᱟᱱᱟ ᱾ ᱥᱟᱨᱚ ᱫᱚ ᱟᱡ ᱡᱟᱶᱟᱭ ᱟᱜ ᱛᱤ ᱨᱮ ᱴᱷᱮᱸᱜᱟ ᱧᱮᱞ ᱛᱮ ᱵᱚᱛᱚᱨ ᱛᱮ ᱤᱛᱟᱹ ᱦᱩᱲᱩ ᱴᱷᱮᱠᱟ, ᱫᱟᱠᱟ ᱫᱟᱜ ᱢᱟᱺᱰᱤ ᱵᱟᱹᱴᱤ ᱥᱟᱱᱟᱢ ᱜᱤᱰᱤ ᱠᱟᱛᱮᱫ ᱮ ᱧᱤᱨ ᱫᱟᱹᱲ ᱠᱮᱫᱟ ᱾
ᱨᱟᱢ ᱫᱚ ᱟᱹᱰᱤ ᱡᱳᱨ ᱫᱟᱜ ᱛᱮᱛᱟᱝ ᱟᱨ ᱨᱮᱸᱜᱮᱡ ᱞᱮᱫᱮ ᱛᱮ ᱟᱡ ᱵᱟᱹᱦᱩ ᱵᱟᱹᱴᱤ ᱠᱚ ᱜᱤᱰᱤ ᱠᱟᱛᱮᱫ ᱫᱟᱹᱲ ᱮ ᱧᱮᱞ ᱠᱮᱫᱮ ᱛᱮ ᱢᱚᱱᱮ ᱞᱮᱫᱟᱭ ᱡᱟᱦᱟ ᱞᱮᱠᱟ ᱠᱟᱛᱮᱫ ᱜᱮ ᱚᱱᱟ ᱵᱟᱹᱴᱤ ᱴᱷᱮᱱᱮ ᱥᱮᱴᱮᱨᱚᱜᱼᱟ ᱟᱨ ᱦᱤᱨᱤᱡ ᱯᱟᱹᱥᱤᱨ ᱡᱟᱦᱟ ᱜᱮᱭ ᱧᱟᱢ ᱠᱟᱹᱴᱤᱡ ᱨᱮᱦᱚᱸ ᱧᱩ ᱠᱟᱛᱮᱫ ᱡᱤᱣᱤᱭ ᱢᱟᱨᱛᱚᱠ ᱛᱟᱭᱟ ᱾ ᱢᱮᱱᱠᱷᱟᱱ ᱥᱤᱛᱩᱝ ᱛᱮ, ᱨᱮᱸᱜᱮᱡ ᱛᱮ, ᱛᱷᱟᱠᱟᱣ ᱛᱮ ᱦᱚᱲᱢᱚ ᱨᱮ ᱫᱟᱲᱮ ᱠᱚᱦᱚᱸ ᱪᱟᱵᱟ ᱞᱮᱱ ᱛᱟᱭᱟ ᱾ ᱟᱡ ᱵᱟᱹᱦᱩ ᱡᱟᱦᱟᱸ ᱨᱮ ᱫᱟᱜ ᱢᱟᱺᱰᱤ ᱵᱟᱹᱴᱤ ᱠᱚ ᱜᱤᱰᱤ ᱠᱟᱛᱮᱫ ᱮ ᱫᱟᱹᱲ ᱟᱠᱟᱫᱟ ᱚᱱᱟ ᱥᱩᱨ ᱪᱟᱞᱟᱜ ᱪᱟᱞᱟᱜ ᱛᱮᱜᱮᱭ ᱥᱚᱸᱵᱚᱫ ᱵᱷᱤᱸᱫᱟᱹᱲ ᱮᱱᱟ ᱾ ᱟᱹᱛᱩ ᱟᱠᱟᱱ ᱫᱟᱜ ᱢᱟᱺᱰᱤ ᱡᱮᱸᱵᱮᱫ ᱨᱮᱱᱟᱜ ᱫᱚᱭ ᱨᱤᱠᱟᱹ ᱞᱮᱫ ᱜᱮᱭᱟ ᱢᱮᱱᱠᱷᱟᱱ ᱚᱱᱟ ᱨᱮᱱᱟᱜ ᱫᱟᱲᱮ ᱦᱚᱸ ᱵᱟᱝ ᱦᱳᱭ ᱞᱮᱱ ᱛᱟᱭᱟ ᱾ ᱚᱸᱰᱮ ᱜᱮ ᱪᱷᱟᱴᱯᱟᱴᱟᱣ ᱠᱟᱛᱮᱫ ᱮ ᱫᱟᱜ ᱫᱚᱲᱚᱢ ᱩᱛᱟᱹᱨᱮᱱᱟ ᱾
***
