ᱩᱛᱱᱟᱹᱣ ᱫᱚ ᱪᱮᱫ? ᱟᱨ ᱪᱮᱫ ᱞᱮᱠᱟ ᱦᱩᱭᱩᱜ-ᱟ ᱩᱛᱱᱟᱹᱣ?
ᱜᱷᱟᱹᱨᱚᱸᱡᱽ ᱨᱮᱭᱟᱜ ᱩᱛᱱᱟᱹᱣ, ᱟᱹᱛᱩ ᱨᱮᱭᱟᱜ ᱩᱛᱱᱟᱹᱣ, ᱥᱟᱶᱛᱟ ᱨᱮᱱᱟᱜ ᱩᱛᱱᱟᱹᱣ ᱟᱨ ᱫᱮᱥ ᱫᱤᱥᱚᱢ ᱨᱮᱭᱟᱜ ᱩᱛᱱᱟᱹᱣ !!!
ᱢᱤᱫ ᱜᱷᱟᱨᱚᱸᱡᱽ ᱨᱮᱭᱟᱜ ᱩᱛᱱᱟᱹᱣ ᱞᱟᱹᱜᱤᱫ ᱛᱮᱫᱚ, ᱜᱷᱟᱨᱚᱸᱡᱽ ᱨᱮ ᱢᱤᱫ ᱦᱚᱲ ᱜᱮᱭ ᱟᱨᱡᱟᱣ ᱮᱫ-ᱟ ᱟᱨ ᱮᱴᱟᱜ ᱦᱚᱲ ᱫᱚ ᱟᱡ ᱯᱟᱹᱪᱷᱞᱟᱹ ᱨᱮ ᱛᱤ~ ᱨᱮ ᱛᱤ ᱫᱚᱦᱚ ᱠᱟᱛᱮ ᱠᱚ ᱫᱩᱲᱩᱵ ᱮᱱᱟ, ᱮᱱᱠᱷᱟᱱ, ᱚᱱᱟ ᱜᱷᱟᱨᱚᱸᱡᱽ ᱨᱮᱱᱟᱜ ᱫᱚ ᱛᱤᱥ ᱦᱚᱸ ᱩᱛᱱᱟᱹᱣ ᱫᱚ ᱵᱟᱝ ᱦᱩᱭᱩᱜ-ᱟ ᱾ ᱚᱱᱟ ᱜᱷᱟᱨᱚᱸᱡᱽ ᱨᱮᱱᱟᱜ ᱱᱟᱯᱟᱭ ᱪᱚᱲᱟᱣ, ᱩᱛᱱᱟᱹᱣ ᱞᱟᱹᱜᱤᱫ ᱛᱮ ᱠᱷᱟᱱ ᱚᱱᱟ ᱚᱲᱟᱜ ᱨᱮ ᱥᱟᱱᱟᱢ ᱦᱚᱲ ᱟᱯᱟᱱ ᱟᱹᱯᱤᱱ ᱠᱟᱹᱢᱤ ᱦᱩᱭ ᱟᱠᱚ ᱜᱮᱭᱟ ᱾ ᱫᱤᱱ ᱵᱮᱲᱟ ᱫᱚ ᱟᱯᱟᱱ ᱟᱹᱯᱤᱱ ᱠᱟᱹᱢᱤ ᱨᱮᱢ ᱥᱮᱱ ᱯᱷᱟᱨᱟᱠ ᱟᱠᱟᱱᱟ ᱾ ᱡᱟᱦᱟᱸᱭ ᱫᱚ ᱡᱟᱦᱟᱸᱱᱟᱜ ᱠᱟᱹᱢᱤ ᱥᱟᱱᱟᱢ ᱠᱟᱱᱟ ᱾ ᱟᱨ ᱟᱹᱭᱩᱵ ᱫᱚ ᱟᱯᱟᱱ ᱟᱹᱯᱤᱱ ᱠᱟᱹᱢᱤ ᱠᱷᱚᱱᱮᱢ ᱨᱩᱣᱟᱹᱲ ᱮᱱᱟ, ᱥᱟᱱᱟᱢ ᱵᱚᱭᱦᱟ ᱢᱤᱫᱴᱟᱹᱝ ᱥᱟᱹᱲᱤᱢ ᱞᱟᱛᱟᱨ ᱨᱮ, ᱢᱤᱫᱴᱟᱹᱝ ᱵᱟᱹᱠᱷᱩᱞ ᱨᱮ, ᱢᱤᱫᱴᱟᱹᱝ ᱜᱷᱟᱨᱚᱸᱡᱽ ᱨᱮ ᱾ ᱱᱚᱶᱟ ᱜᱮ ᱢᱤᱫᱴᱟᱹᱝ ᱥᱟᱹᱲᱤᱢ ᱞᱟᱛᱟᱨ ᱫᱚᱠᱚ ᱢᱮᱱᱟ ᱾
ᱪᱮᱫᱟᱜ ᱥᱮ ᱟᱭᱳ ᱵᱟᱵᱟ ᱠᱤᱱ ᱠᱟᱹᱢᱤ ᱠᱟᱱᱟ ᱢᱮᱱᱛᱮ ᱦᱚᱯᱚᱱ ᱟᱞᱚ ᱠᱚ ᱠᱟᱹᱢᱤ ᱢᱟ, ᱱᱚᱶᱟ ᱫᱚ ᱚᱠᱟ ᱜᱷᱟᱨᱚᱸᱡᱽ ᱨᱮᱱᱟᱜ ᱨᱤᱛ ᱦᱚᱸ ᱵᱟᱝ ᱠᱟᱱᱟ ᱾ ᱡᱩᱫᱤ ᱟᱢᱟᱜ ᱜᱷᱟᱨᱚᱸᱡᱽ ᱯᱩᱭᱞᱩ ᱠᱷᱚᱱ, ᱞᱟᱦᱟ ᱠᱷᱚᱱ ᱟᱹᱰᱤ ᱜᱮ ᱠᱤᱥᱟᱹᱬᱟ ᱾ ᱚᱱᱟ ᱜᱷᱟᱨᱚᱸᱡᱽ ᱨᱤᱱ ᱞᱟᱦᱟ ᱛᱮ ᱛᱟᱦᱮᱸ ᱞᱮᱱ ᱦᱟᱯᱲᱟᱢ ᱠᱚᱠᱚ ᱠᱤᱥᱟᱹᱬ ᱚᱴᱚ ᱟᱠᱟᱫ-ᱟ, ᱡᱟᱦᱟᱸ ᱠᱷᱟᱹᱛᱤᱨ ᱦᱚᱯᱚᱱ ᱠᱚᱫᱚ ᱠᱟᱹᱢᱤ ᱜᱮ ᱵᱟᱝ ᱦᱩᱭ ᱟᱠᱚᱣᱟ ᱾ ᱚᱱᱟ ᱚᱲᱟᱜ ᱨᱤᱱ ᱦᱚᱯᱚᱱ ᱵᱟᱠᱚ ᱠᱟᱹᱢᱤ ᱨᱮᱦᱚᱸ ᱟᱹᱰᱤ ᱚᱢᱚᱲ ᱠᱚ ᱡᱚᱢ ᱟᱹᱥᱩᱞ ᱫᱟᱲᱮᱭᱟᱜ-ᱟ ᱾ ᱚᱱᱟᱛᱮ ᱚᱱᱟ ᱚᱲᱟᱜ ᱨᱤᱱ ᱦᱚᱯᱚᱱ ᱠᱚᱫᱚ ᱛᱤᱥ ᱦᱚᱸ ᱪᱮᱫ ᱦᱚᱸ ᱵᱟᱠᱚ ᱠᱟᱹᱢᱤ ᱚᱪᱚ ᱟᱠᱚᱣᱟ ᱟᱠᱚ ᱨᱤᱱ ᱟᱭᱳ ᱵᱟᱵᱟ ᱾ ᱱᱚᱝᱠᱟ ᱦᱩᱭᱩᱜ ᱜᱷᱟᱹᱨᱚᱸᱡᱽ ᱫᱚ ᱵᱟᱹᱭ ᱵᱟᱹᱭ ᱛᱮ ᱨᱟᱹᱯᱩᱫᱚᱜ ᱥᱮᱫ ᱥᱮᱱᱚᱜ ᱜᱮᱭᱟ ᱾
ᱪᱮᱫᱟᱜ ᱥᱮ ᱚᱱᱟ ᱚᱲᱟᱜ ᱨᱮᱱᱟᱜ ᱨᱤᱛ ᱠᱷᱟᱹᱛᱤᱨ ᱥᱟᱱᱟᱢ ᱦᱚᱯᱚᱱ ᱠᱚ ᱠᱩᱲᱦᱤ ᱠᱚ ᱯᱟᱞᱴᱟᱣᱜ-ᱟ ᱾ ᱫᱩᱲᱩᱵ ᱠᱟᱛᱮ ᱠᱚ ᱡᱚᱢᱟ, ᱵᱚᱸ ᱵᱚᱸ ᱠᱚ ᱫᱟᱬᱟᱭᱟ ᱾ ᱢᱚᱱᱮ ᱵᱷᱤᱲ ᱵᱟᱹᱱᱩᱜ ᱠᱷᱟᱹᱛᱤᱨ ᱵᱟᱦᱨᱮ ᱠᱷᱚᱱ ᱦᱟᱱᱟ ᱱᱷᱟᱶᱟ ᱠᱟᱛᱷᱟ ᱠᱚ ᱟᱸᱡᱚᱢ ᱟᱹᱜᱩᱭᱟ ᱟᱨ ᱚᱲᱟᱜ ᱨᱮ ᱠᱟᱹᱢᱤ ᱛᱟᱠᱚ ᱵᱟᱹᱱᱩᱜ ᱠᱷᱟᱹᱛᱤᱨ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱠᱚ ᱥᱤᱨᱡᱟᱹᱣᱟ ᱾ ᱫᱩᱲᱩᱵ ᱠᱟᱛᱮ ᱡᱚᱢ ᱞᱮᱠᱷᱟᱱ ᱫᱚᱨᱭᱟ ᱵᱟᱹᱞᱤ ᱦᱚᱸ ᱪᱟᱵᱟᱜ ᱞᱮᱠᱟ, ᱛᱟᱭᱚᱢ ᱫᱚ ᱚᱱᱟ ᱚᱲᱟᱜ ᱨᱮ ᱚᱥᱟᱱᱛᱤ ᱜᱮ ᱥᱤᱨᱡᱟᱹᱣᱜ-ᱟ ᱟᱨ ᱜᱷᱟᱨᱚᱸᱡᱽ ᱨᱟᱹᱯᱩᱫᱚᱜ-ᱟ ᱾ ᱢᱤᱫ ᱦᱚᱲ ᱢᱟᱹᱱᱢᱤ ᱨᱩᱯ ᱨᱮ ᱡᱟᱱᱟᱢ ᱠᱟᱛᱮ ᱢᱟᱹᱱᱢᱤ ᱡᱤᱭᱚᱱ ᱠᱷᱟᱴᱚ ᱡᱤᱭᱚᱱ ᱨᱮ ᱪᱮᱫ ᱦᱚᱸ ᱵᱟᱭ ᱠᱟᱹᱢᱤ ᱫᱟᱲᱮ ᱟᱠᱟᱣᱟᱫ ᱠᱷᱟᱹᱛᱤᱨ, ᱟᱡ ᱡᱟᱦᱟᱸ ᱟᱺᱜᱤᱵᱷᱟᱨ ᱟᱹᱜᱩ ᱠᱟᱛᱮᱭ ᱦᱮᱡ ᱞᱮᱱᱟ, ᱚᱱᱟ ᱫᱚ ᱵᱟᱝ ᱯᱩᱨᱟᱹᱣ ᱠᱟᱛᱮ ᱜᱮᱭ ᱨᱩᱣᱟᱹᱲ ᱥᱮᱱ ᱮᱱᱟ ᱾
ᱚᱱᱟ ᱛᱮᱜᱮ ᱥᱤᱨᱡᱚᱱ ᱨᱮᱭᱟᱜ ᱨᱤᱛ ᱜᱮ ᱱᱚᱶᱟ ᱠᱟᱱᱟ — ᱢᱤᱫ ᱜᱷᱟᱨᱚᱸᱡᱽ ᱨᱮ ᱦᱚᱯᱚᱱ ᱡᱩᱫᱤᱭ ᱦᱟᱨᱟ ᱮᱱᱟ, ᱟᱡ ᱦᱚᱸ ᱟᱡᱟᱜ ᱩᱭᱦᱟᱹᱨ ᱞᱮᱠᱟᱛᱮ ᱠᱟᱹᱢᱤ ᱥᱟᱱᱟ ᱮᱭᱟ, ᱟᱡᱟᱜ ᱠᱩᱥᱤ ᱞᱮᱠᱟᱛᱮ ᱠᱟᱹᱢᱤ ᱥᱟᱱᱟ ᱮᱭᱟ ᱾ ᱡᱟᱦᱟᱸ ᱛᱤᱱᱟᱹᱜ ᱜᱮ ᱟᱭᱳ ᱵᱟᱵᱟ ᱠᱤᱱ ᱠᱩᱨᱩᱢᱩᱴᱩ ᱮᱫ, ᱥᱚᱝ ᱯᱩᱨᱩᱱ ᱢᱮᱱᱟᱜ ᱠᱤᱱ, ᱮᱱ ᱦᱚᱸ ᱦᱚᱯᱚᱱ ᱟᱡᱟᱜ ᱠᱩᱥᱤ ᱞᱮᱠᱟᱛᱮ ᱠᱟᱹᱢᱤ ᱨᱮᱱᱟᱜ ᱫᱚ ᱯᱩᱨᱟᱹᱯᱩᱨᱤ ᱦᱚᱠ ᱟᱨ ᱟᱹᱭᱫᱟᱹᱨ ᱢᱮᱱᱟᱜ ᱜᱮ ᱛᱟᱭᱟ ᱾ ᱚᱱᱟ ᱞᱟᱹᱜᱤᱫ ᱫᱚ ᱚᱠᱚᱭ ᱦᱚᱸ ᱵᱟᱝ ᱜᱮᱢ ᱟᱠᱚᱴ ᱫᱟᱲᱮ ᱟᱭᱟ ᱾ ᱟᱡᱟᱜ ᱡᱟᱸᱜᱟ ᱛᱮ ᱛᱤᱸᱜᱩᱱ, ᱟᱡᱟᱜ ᱯᱷᱟᱹᱠᱬᱟᱹᱜ ᱛᱮ ᱩᱰᱟᱹᱣ ᱟᱹᱪᱩᱨᱚᱜ, ᱟᱡᱟᱜ ᱠᱟᱹᱢᱤ ᱦᱚᱛᱮᱛᱮ ᱜᱷᱟᱨᱚᱸᱡᱽ ᱨᱮᱱᱟᱜ ᱱᱟᱥᱮ ᱵᱷᱟᱹᱞᱟᱹᱭ ᱦᱩᱭᱩᱜ, ᱱᱚᱶᱟ ᱫᱚ ᱟᱡᱟᱜ, ᱢᱤᱫ ᱦᱚᱯᱚᱱᱟᱜ ᱡᱟᱱᱟᱢ ᱚᱫᱷᱤᱠᱟᱨ ᱠᱟᱱᱟ ᱾ ᱟᱨ ᱚᱱᱟ ᱚᱫᱷᱤᱠᱟᱨ ᱠᱷᱚᱱ ᱫᱚ ᱚᱠᱚᱭ ᱦᱚᱸ ᱵᱟᱝ ᱠᱚ ᱥᱟᱦᱟ ᱫᱟᱲᱮ ᱟᱭᱟ ᱾
ᱟᱨ ᱦᱚᱸ ᱡᱟᱦᱟᱸ ᱜᱷᱟᱨᱚᱸᱡᱽ ᱨᱮ ᱚᱲᱟᱜ ᱫᱩᱣᱟᱹᱨ ᱛᱮ ᱱᱟᱪᱟᱨ ᱜᱮᱭᱟᱢ, ᱡᱚᱢᱟᱜ ᱧᱩᱣᱟᱜ ᱵᱟᱹᱱᱩᱜ ᱛᱟᱢᱟ, ᱟᱢᱟᱜ ᱱᱟᱪᱟᱨ ᱠᱷᱟᱹᱛᱤᱨ ᱟᱢ ᱪᱮᱛᱟᱱ ᱱᱟᱦᱟᱪᱟᱨ ᱵᱟᱹᱲᱛᱤᱜ ᱠᱟᱱᱟ ᱾ ᱚᱱᱠᱟᱱ ᱜᱷᱟᱨᱚᱸᱡᱽ ᱨᱮᱢᱟ ᱦᱚᱯᱚᱱ ᱠᱚ ᱠᱟᱹᱢᱤ ᱨᱮ ᱟᱬᱜᱚᱱ ᱟᱨ ᱦᱚᱸ ᱟᱹᱰᱤ ᱞᱟᱹᱠᱛᱤ ᱯᱟᱲᱟᱣ ᱟᱠᱚᱣᱟ ᱾ ᱚᱱᱟ ᱜᱷᱟᱨᱚᱸᱡᱽ ᱧᱮᱞ ᱛᱮ ᱦᱚᱯᱚᱱᱟᱜ ᱢᱚᱱᱮ ᱡᱤᱣᱤ ᱦᱚᱸᱭ ᱨᱟᱜᱟ, ᱟᱨ ᱪᱮᱫ ᱞᱮᱠᱟᱛᱮ ᱟᱠᱚᱣᱟᱜ ᱚᱲᱟᱜ ᱫᱩᱣᱟᱹᱨ ᱩᱛᱱᱟᱹᱣ ᱨᱟᱠᱟᱵ-ᱟ, ᱪᱮᱫ ᱞᱟᱹᱜᱤᱫ ᱫᱚ ᱟᱡ ᱱᱟᱥᱮᱭ ᱠᱟᱹᱢᱤ ᱫᱟᱲᱮᱭᱟᱜ-ᱟ, ᱱᱚᱶᱟ ᱞᱟᱹᱜᱤᱫ ᱛᱮᱢᱟ ᱦᱚᱯᱚᱱ ᱟᱨ ᱦᱚᱸᱭ ᱟᱹᱴᱩᱯᱟᱹᱴᱩᱜ-ᱟ ᱾ ᱩᱱᱤ ᱦᱚᱯᱚᱱ ᱵᱟᱦᱨᱮ ᱥᱮᱱᱚᱜ ᱥᱟᱱᱟ ᱮᱭᱟ, ᱢᱤᱫ ᱵᱟᱨ ᱟᱨᱡᱟᱣ ᱟᱹᱜᱩ ᱥᱟᱱᱟ ᱮᱭᱟ, ᱟᱨ ᱟᱡᱟᱜ ᱚᱲᱟᱜ ᱫᱩᱣᱟᱹᱨ ᱠᱮᱴᱮᱡ ᱥᱟᱱᱟ ᱮᱭᱟ ᱾ ᱟᱢᱤᱡ ᱦᱚᱯᱚᱱ ᱟᱨᱡᱟᱣ ᱞᱟᱹᱜᱤᱫ ᱵᱟᱦᱨᱮᱭ ᱥᱮᱱᱚᱜ ᱠᱟᱱᱟ ᱢᱮᱱᱛᱮ, ᱟᱢᱟᱜ ᱚᱲᱟᱜ ᱨᱮ ᱵᱟᱭ ᱛᱟᱦᱮᱸᱱ ᱠᱟᱱᱟ ᱥᱮ ᱟᱢ ᱥᱟᱶ ᱢᱤᱫ ᱥᱟᱹᱲᱤᱢ ᱨᱮ ᱵᱟᱭ ᱛᱟᱦᱮᱸᱱ ᱠᱟᱱᱟ, ᱟᱢ ᱠᱷᱚᱱᱮ ᱵᱷᱮᱜᱟᱨᱚᱜ ᱠᱟᱱᱟ ᱱᱚᱝᱠᱟᱱ ᱠᱟᱛᱷᱟ ᱜᱮᱛᱚ ᱵᱟᱝ ᱠᱟᱱᱟ ᱾
ᱢᱟᱹᱱᱢᱤ ᱡᱚᱱᱚᱢ ᱨᱮᱱᱟᱜ ᱨᱤᱛ ᱜᱮ ᱱᱚᱶᱟ ᱠᱟᱱᱟ, ᱟᱡᱟᱜ ᱠᱩᱥᱤ ᱠᱟᱹᱢᱤ, ᱟᱡᱟᱜ ᱟᱺᱜᱤᱵᱷᱟᱨ ᱯᱩᱨᱟᱹᱣ ᱾ ᱟᱨ ᱚᱱᱟ ᱨᱮᱫᱚ ᱟᱭᱳ ᱵᱟᱵᱟ ᱦᱚᱸ ᱦᱚᱯᱚᱱ ᱵᱟᱢ ᱟᱠᱚᱴ ᱫᱟᱲᱮ ᱟᱭᱟ ᱾ ᱟᱢᱟᱜ ᱵᱮᱲᱟ ᱨᱮ ᱟᱢ ᱡᱟᱦᱟᱸ ᱵᱟᱢ ᱠᱟᱹᱢᱤ ᱟᱠᱟᱫ-ᱟ, ᱦᱚᱯᱚᱱ ᱟᱡᱟᱜ ᱵᱮᱲᱟᱨᱮ ᱚᱱᱟ ᱡᱩᱫᱤ ᱠᱟᱹᱢᱤ ᱥᱟᱱᱟᱭᱮ ᱠᱟᱱᱟ, ᱮᱱᱠᱷᱟᱱ ᱠᱟᱹᱢᱤ ᱚᱪᱚᱣᱟᱭ ᱢᱮ ᱾ ᱪᱮᱫᱟᱜ ᱥᱮ ᱟᱭᱳ ᱵᱟᱵᱟ ᱟᱜ ᱵᱟᱝ ᱯᱩᱨᱟᱹᱣ ᱠᱩᱠᱢᱩ ᱫᱚ ᱦᱚᱯᱚᱱ ᱜᱮᱠᱚ ᱯᱩᱨᱟᱹᱣᱟ ᱾ ᱪᱮᱫᱟᱜ ᱥᱮ ᱟᱭᱳ ᱵᱟᱵᱟ ᱡᱩᱫᱤ ᱟᱹᱠᱤᱱ ᱵᱮᱲᱟ ᱨᱮᱭᱟᱜ ᱠᱟᱹᱢᱤ ᱩᱱ ᱨᱮᱜᱮ ᱠᱤᱱ ᱯᱩᱨᱟᱹᱣ ᱠᱮᱭᱟ, ᱦᱚᱯᱚᱱ ᱫᱚ ᱚᱱᱟ ᱠᱟᱹᱢᱤ ᱨᱮ ᱟᱬᱜᱚᱱ ᱞᱟᱹᱜᱤᱫ ᱞᱟᱹᱠᱛᱤ ᱜᱮ ᱵᱟᱝ ᱯᱟᱲᱟᱣ ᱟᱭᱟ ᱾
ᱚᱱᱟ ᱠᱟᱹᱢᱤ ᱦᱚᱯᱚᱱ ᱮ ᱠᱟᱹᱢᱤ ᱠᱟᱱᱟ ᱢᱮᱱᱛᱮ ᱦᱚᱯᱚᱱ ᱫᱚ ᱟᱭᱳ ᱵᱟᱵᱟ ᱠᱷᱚᱱ ᱮ ᱵᱷᱮᱜᱟᱨᱚᱜ ᱠᱟᱱᱟ, ᱱᱚᱝᱠᱟᱱ ᱠᱩᱠᱞᱤ ᱨᱟᱠᱟᱵ ᱫᱚ ᱵᱮᱨᱛᱷᱟ ᱜᱮᱭᱟ ᱾ ᱫᱤᱱ ᱵᱮᱲᱟ ᱟᱯᱟᱱ ᱟᱹᱯᱤᱱ ᱠᱟᱹᱢᱤ ᱠᱟᱛᱮ ᱧᱤᱫᱟᱹ ᱵᱮᱲᱟ ᱢᱤᱫ ᱵᱟᱹᱠᱷᱩᱞ ᱨᱮ, ᱢᱤᱫ ᱥᱟᱹᱲᱤᱢ ᱨᱮᱵᱚ ᱦᱮᱡ ᱡᱟᱣᱨᱟᱜ-ᱟ ᱾ ᱢᱤᱫ ᱥᱟᱹᱲᱤᱢ ᱞᱟᱛᱟᱨ ᱨᱮᱵᱚ ᱡᱚᱢ ᱧᱩᱭᱟ ᱟᱨ ᱵᱚ ᱫᱩᱠ ᱥᱩᱠᱚᱜ-ᱟ, ᱯᱟᱨᱟᱵᱽ ᱯᱩᱱᱟᱹᱭᱚᱜ-ᱟ ᱚᱱᱟ ᱥᱟᱶᱛᱮ ᱵᱚ ᱡᱟᱹᱯᱤᱡ ᱡᱤᱨᱟᱹᱣᱜ-ᱟ ᱜᱟᱯᱟ ᱟᱵᱚᱣᱟᱜ ᱜᱷᱟᱨᱚᱸᱡᱽ ᱪᱚᱲᱟᱣ ᱞᱟᱹᱜᱤᱫ, ᱩᱛᱱᱟᱹᱣ ᱞᱟᱹᱜᱤᱫ ᱟᱯᱟᱱ ᱟᱹᱯᱤᱱ ᱟᱺᱜᱤᱵᱷᱟᱨ ᱯᱩᱨᱟᱹᱣ ᱞᱟᱹᱜᱤᱫ ᱟᱯᱟᱱ ᱟᱹᱯᱤᱱ ᱠᱟᱹᱢᱤᱨᱮ ᱥᱮᱱᱚᱜ ᱛᱟᱺᱜᱤ ᱨᱮ ᱾
ᱱᱚᱝᱠᱟ ᱛᱮᱜᱮ ᱜᱷᱟᱨᱚᱸᱡᱽ ᱫᱚ ᱩᱛᱱᱟᱹᱣᱜ-ᱟ, ᱱᱚᱝᱠᱟ ᱛᱮᱜᱮ ᱟᱹᱛᱩ ᱫᱚ ᱩᱛᱱᱟᱹᱣᱜ-ᱟ, ᱱᱚᱝᱠᱟ ᱛᱮᱜᱮ ᱥᱟᱶᱛᱟ ᱦᱚᱸ ᱩᱛᱱᱟᱹᱣᱜ-ᱟ ᱟᱨ ᱢᱩᱪᱟᱹᱫ ᱨᱮ ᱫᱮᱥ ᱫᱤᱥᱚᱢ ᱦᱚᱸ ᱱᱚᱝᱠᱟ ᱛᱮᱜᱮ ᱩᱛᱱᱟᱹᱣ ᱨᱟᱠᱟᱵᱚᱜ-ᱟ ᱾ ᱱᱚᱶᱟ ᱜᱮ ᱥᱤᱨᱡᱚᱱ ᱨᱮᱭᱟᱜ ᱨᱤᱛ ᱟᱨ ᱢᱟᱹᱱᱢᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱾
***
