ᱵᱚᱛᱚᱨ

ᱦᱟᱱᱟ ᱥᱤᱛᱟᱹᱨ ᱠᱷᱚᱱ ᱱᱚᱶᱟ ᱥᱤᱛᱟᱹᱨ
ᱠᱟᱢᱥᱟᱣ ᱪᱟᱞᱟᱜ ᱥᱤᱯᱟᱹᱦᱤ ᱥᱟᱜᱟᱲ
ᱮᱢᱵᱩᱞᱮᱱᱥ ᱨᱮᱱᱟᱜ ᱜᱮᱨᱟᱝ, ᱥᱩᱭᱩᱲ
ᱛᱟᱱᱟᱵᱷᱤᱱᱟᱹᱭ ᱜᱮᱡᱮᱨ ᱪᱟᱵᱟᱭ
ᱥᱤᱸᱜᱟᱹᱲ ᱢᱮᱞᱟ ᱯᱤᱸᱰᱟ ᱾
ᱪᱷᱟᱴᱠᱟ ᱡᱷᱟᱹᱱᱴᱤ ᱨᱮ ᱴᱩᱰᱟᱹᱝ ᱨᱟᱠᱟᱵ
ᱯᱳᱯᱳᱸᱰ ᱦᱚᱛᱚᱫ ᱱᱟᱹᱲᱤ ᱾
ᱤᱠᱷᱟᱹᱱ ᱠᱩᱰᱟᱹᱢ ᱨᱮᱱᱟᱜ ᱦᱟᱴ ᱵᱟᱦᱟ
ᱛᱷᱳᱯᱮᱨᱮ ᱚᱠᱚᱭ ᱪᱚᱭ ᱟᱨᱮᱡᱟᱜ ᱠᱩᱭᱟᱹ
ᱦᱤᱸᱫᱤᱡ !
ᱫᱟᱠᱷᱤᱱ ᱦᱚᱭᱚᱨ ᱛᱮᱭ ᱞᱮᱧ ᱵᱚᱞᱚᱱᱟ
ᱵᱤᱥᱟᱰᱮ, ᱵᱤᱛᱷᱤᱨ- ᱦᱮᱸᱪᱚ ᱛᱤᱱ ᱠᱚᱨᱮ!
ᱛᱩᱠᱩᱱ ᱢᱚᱱᱮᱭ ᱡᱚᱠᱷᱟᱭᱮ, ᱚᱱᱵᱤᱥᱟᱹᱥᱟᱭ
ᱦᱚᱭ ᱡᱤᱣᱤ ᱾
ᱟᱨ ᱛᱤᱱᱟᱹᱜ! ᱛᱤᱱᱟᱹᱜ ᱢᱟᱦᱟ
ᱪᱟᱯᱳ ᱪᱟᱯᱳ ᱛᱟᱲᱟᱢ
ᱵᱚᱛᱚᱨ ᱥᱟᱛᱞᱟᱜ
ᱞᱩᱠᱩᱫ ᱞᱩᱠᱩᱫ ᱾
ᱮᱱᱦᱚᱸ ᱜᱷᱟᱱᱮ ᱡᱟᱹᱲᱤ ᱫᱟᱜ ᱫᱚ
ᱨᱚᱜ ᱥᱟᱱᱟᱭᱮ
ᱛᱤᱱᱟᱹᱜ ᱵᱟᱦᱟ ᱠᱟᱱᱛᱷᱟ
ᱛᱮᱦᱮ ᱛᱮᱦᱮ ᱦᱟᱹᱲᱭᱟᱹᱨ ᱵᱚᱥᱢᱚᱛᱟ ᱨᱮ ᱾
ᱢᱤᱫ ᱟᱛᱚᱢ ᱡᱷᱟᱨ ᱡᱷᱟᱨ ᱫᱟᱜ
ᱦᱩᱞᱟᱹ ᱪᱚᱢᱠᱟᱣ ᱦᱩᱫᱽ ᱦᱩᱫᱽ ᱦᱚᱭᱨᱮ
ᱡᱟᱱᱤ ᱜᱟᱞᱟᱝᱚᱜ ᱚᱠᱟᱨᱮ
ᱞᱟᱜᱽᱬᱮ ᱨᱟᱹᱲ ᱾
ᱟᱹᱰᱤ ᱧᱟᱞᱦᱟᱫ
ᱦᱮᱞᱠᱟᱣ ᱟᱹᱛᱩ ᱦᱤᱡᱩᱜ
ᱫᱟᱠᱟ ᱦᱮᱰᱮᱡ ᱥᱚᱸᱫᱷᱟᱲ ᱥᱚ-
ᱟᱹᱰᱤ ᱧᱟᱞᱦᱟᱫ !