ᱟᱹᱧᱪᱩᱨ ᱯᱟᱹᱧᱪᱩᱨ ᱠᱤᱥᱟᱹᱬ ᱪᱟᱛᱚᱢ ᱚᱲᱟᱜ
ᱠᱩᱰᱟᱹᱢ ᱥᱟᱛᱮ ᱢᱮᱱᱟᱜ ᱴᱟᱹᱶᱜᱤ ᱯᱟᱣᱨᱟ ᱚᱲᱟᱜ ᱾
ᱛᱩᱠᱟᱹ ᱪᱮᱛᱟᱱ ᱛᱩᱠᱟᱹ ᱫᱚᱞᱟᱱ ᱵᱤᱱ ᱵᱮᱱᱟᱣ ᱠᱮᱫ
ᱛᱟᱞᱟᱢᱟᱞᱟ ᱛᱩᱠᱟᱹ ᱵᱤᱞᱤ ᱵᱤᱱ ᱵᱮᱡ ᱠᱮᱫ ᱾
ᱟᱹᱰᱤ ᱥᱚᱱᱛᱚᱨ ᱟᱛᱮ ᱡᱚᱜᱟᱣ ᱡᱚᱛᱚᱱ ᱠᱟᱛᱮ
ᱥᱟᱹᱜᱩᱱ ᱫᱤᱱ ᱢᱟᱹᱦᱤᱛ ᱨᱮᱜᱤᱧ ᱡᱟᱱᱟᱢ ᱞᱮᱱᱟ ᱾
ᱵᱷᱮᱨ ᱵᱷᱮᱨ ᱦᱚᱭ ᱛᱮ ᱦᱤᱞᱟᱹᱣᱜ ᱛᱤᱱ ᱨᱮ
ᱞᱚᱠᱟ ᱮᱱᱮᱡ ᱟᱹᱧ ᱨᱟᱢᱮ ᱰᱷᱤᱞᱣᱟᱹᱝ ᱨᱮ ᱾
ᱥᱮᱛᱟᱜ ᱛᱟᱨᱟ ᱵᱤᱱ ᱩᱰᱟᱹᱣ ᱨᱟᱠᱟᱵ
ᱥᱮᱨᱢᱟ ᱞᱟᱯᱷᱟᱝ ᱵᱤᱨ ᱵᱩᱨᱩ ᱪᱮᱛᱟᱱ ᱾
ᱵᱟᱞᱮ ᱵᱩᱥᱟᱹᱜ ᱞᱟᱹᱜᱤᱱ ᱪᱟᱨᱟ ᱯᱟᱱᱛᱮ
ᱛᱟᱹᱝᱜᱤ ᱛᱟᱬᱟᱜ ᱨᱮ ᱛᱟᱦᱮᱱ ᱤᱧ ᱱᱚᱛᱮ ᱾
ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟ ᱵᱟᱝ ᱜᱮ ᱥᱟᱦᱟᱣᱜ
ᱡᱤᱣᱤ ᱦᱚᱢᱚᱨᱟᱛᱮ ᱢᱮᱫ ᱫᱟᱜ ᱡᱚᱨᱚ ᱜᱚᱫᱚᱜ ᱾
ᱢᱟᱹᱱᱢᱤ ᱛᱟᱱᱟᱜ ᱦᱩᱱᱟᱹᱝ ᱤᱧ ᱡᱟᱱᱟᱢ ᱠᱚᱜ
ᱟᱹᱧᱪᱩᱨ ᱯᱟᱹᱧᱪᱩᱨ ᱫᱚᱞᱟᱱ ᱨᱤᱧ ᱛᱟᱦᱮᱸ ᱠᱚᱜ ᱾
ᱨᱟᱡᱽ ᱠᱩᱣᱟᱹᱨᱤ ᱡᱤᱭᱚᱱᱤᱧ ᱠᱷᱟᱱᱰᱟᱣ ᱠᱮ
ᱥᱩᱠᱷᱮᱨ ᱥᱚᱝᱥᱟᱨ ᱤᱧ ᱵᱮᱱᱟᱣ ᱠᱮ ᱾
ᱡᱟᱹᱛᱤ ᱫᱷᱚᱨᱚᱢ ᱠᱷᱚᱱ ᱱᱤᱛᱤᱧ ᱪᱩᱰᱟᱹᱨᱮᱱ
ᱜᱤᱰᱤ ᱪᱮᱞᱟᱝ ᱥᱤᱱᱟᱹᱢᱤᱧ ᱵᱟᱹᱨᱜᱤᱞᱮᱱ ᱾
ᱧᱚᱞᱦᱟᱫ ᱛᱮᱜᱮ ᱵᱤᱱ ᱯᱚᱛᱟᱣ ᱠᱤᱫᱤᱧ
ᱡᱟᱞᱟ ᱯᱩᱨᱤ ᱨᱮᱵᱤᱱ ᱧᱩᱨ ᱠᱤᱫᱤᱧ ᱾
ᱱᱩᱢᱤᱱ ᱢᱟᱨᱟᱜ ᱞᱮᱼᱞᱮᱝᱜᱮᱫ ᱫᱤᱥᱚᱢ ᱨᱮ
ᱟᱹᱰᱤ ᱵᱚᱛᱚᱨᱤᱧ ᱵᱩᱡᱷᱟᱹᱣ ᱮᱠᱞᱟ ᱛᱟᱦᱮᱱ ᱨᱮ ᱾
ᱪᱮᱸᱪᱮᱸ ᱨᱟᱜ ᱟᱸᱧᱚᱢ ᱥᱟᱶᱛᱮ ᱯᱷᱤᱨ ᱟᱹᱯᱷᱤᱨ ᱠᱟᱛᱮ
ᱥᱮᱱᱚᱜ ᱟᱛᱨᱟ ᱠᱷᱚᱱ ᱵᱤᱱ ᱨᱩᱣᱟᱹᱲ ᱦᱤᱡᱩᱜ ᱱᱚᱛᱮ ᱾
ᱞᱤᱞ ᱥᱮᱨᱢᱟ ᱩᱰᱟᱹᱣᱜ ᱡᱤᱣᱤ ᱫᱷᱟᱫᱚᱥᱚᱜᱼᱟ
ᱯᱟᱞᱮ ᱥᱮᱸᱫᱽᱨᱟ ᱠᱟᱨᱠᱟ ᱨᱮ ᱡᱤᱣᱤ ᱱᱟᱥᱚᱜᱚᱜᱼᱟ ᱾
ᱦᱟᱹᱲᱵᱩᱝ ᱦᱟᱹᱲᱵᱩᱝ ᱵᱚᱰᱟ ᱡᱟᱹᱢᱵᱽᱲᱩ ᱠᱚ
ᱵᱤᱥᱟᱹᱬ ᱠᱷᱚᱲᱚᱢ ᱪᱷᱟᱯ ᱵᱟᱵᱮᱨ ᱵᱟᱹᱭᱨᱤ ᱠᱚ ᱾
ᱛᱤᱱ ᱫᱚ ᱯᱟᱞᱮ ᱠᱚ ᱠᱷᱟᱢᱪᱟᱣ ᱚᱰᱚᱠᱤᱧᱟ
ᱡᱤᱣᱤ ᱫᱚ ᱞᱩᱠᱩᱫ ᱞᱩᱠᱩᱫ ᱫᱚᱢᱮ ᱵᱚᱛᱚᱨᱤᱧᱟ ᱾
ᱪᱟᱨᱟ ᱟᱹᱜᱩ ᱠᱟᱛᱮ ᱴᱷᱚᱱᱴᱟ ᱛᱮ ᱵᱤᱱ ᱟᱡᱚ ᱟᱹᱫᱤᱧ
ᱦᱚᱲᱢᱚ ᱱᱤᱯᱷᱚᱴ ᱟᱛᱮ ᱵᱤᱱ ᱦᱟᱨᱟ ᱵᱩᱨᱩ ᱠᱤᱫᱤᱧ ᱾
ᱞᱩᱞᱩᱵᱟᱹᱪᱷᱩ ᱠᱟᱛᱮ ᱪᱮᱨᱮᱡ ᱪᱮᱯᱮᱨᱮᱡ ᱟᱛᱮ
ᱟᱹᱰᱤ ᱡᱚᱛᱚᱱ ᱛᱮᱵᱤᱱ ᱥᱩᱛᱩᱜ ᱦᱟᱨᱟ ᱞᱤᱫᱤᱧ ᱾
ᱯᱟᱹᱞᱠᱩᱭ ᱤᱞ ᱠᱮᱴᱮᱡ ᱮᱱᱟ ᱫᱤᱞ ᱫᱚᱲᱦᱚ ᱭᱮᱱᱟ
ᱞᱟᱯᱟᱞᱩᱯᱩ ᱠᱷᱚᱱ ᱡᱩᱨᱛᱤᱧ ᱩᱰᱟᱹᱣᱮᱱᱟ ᱾
ᱩᱰᱟᱹᱭ ᱥᱮᱱᱚᱜ ᱥᱟᱹᱱᱟᱹᱧ ᱵᱩᱨᱩ ᱫᱤᱥᱚᱢ ᱯᱟᱨᱚᱢ
ᱟᱹᱛᱤᱧ ᱵᱟᱲᱟ ᱥᱟᱹᱱᱟᱹᱣ ᱜᱟᱰᱟ ᱢᱩᱸᱰᱩ ᱯᱟᱨᱚᱢ ᱾
ᱜᱟᱛᱮ ᱯᱟᱱᱛᱮ ᱞᱟᱹᱜᱤᱱ ᱢᱚᱱᱮ ᱪᱚᱦᱚᱴ ᱜᱮᱭᱟ
ᱚᱲᱟᱜ ᱫᱩᱣᱟᱹᱨ ᱞᱟᱹᱜᱤᱱ ᱦᱚᱲᱢᱚ ᱥᱟᱜᱚᱨ ᱜᱮᱭᱟ ᱾
ᱜᱟᱛᱮ ᱯᱟᱱᱛᱮ ᱟᱛᱮ ᱩᱰᱟᱹᱣ ᱵᱤᱱ ᱪᱮᱫ ᱟᱹᱫᱤᱧ
ᱯᱟᱡᱷᱟᱣ ᱜᱟᱡᱟᱲ ᱨᱮᱵᱤᱱ ᱧᱩᱨ ᱦᱚᱪᱚ ᱠᱤᱫᱤᱧ ᱾
ᱞᱩᱜᱩ ᱵᱩᱨᱩ ᱨᱮᱢᱟ ᱟᱹᱰᱤ ᱥᱟᱸᱜᱮ ᱯᱟᱨᱣᱟ
ᱵᱚᱸᱜᱟᱵᱩᱨᱩ ᱥᱟᱶᱛᱮ ᱟᱹᱰᱤ ᱠᱤᱥᱟᱹᱬ ᱢᱟᱱᱣᱟ ᱾
ᱠᱟᱭᱨᱟ ᱡᱷᱟᱨᱱᱟ ᱫᱟᱜ ᱞᱤᱸᱜᱤᱱ ᱥᱚᱠᱚᱲ ᱵᱚᱠᱚᱲ
ᱥᱤᱛᱟᱹᱱᱟᱞᱟ ᱜᱟᱰᱟ ᱫᱟᱜ ᱫᱚ ᱱᱤᱨᱟᱹᱭ ᱱᱤᱨᱚᱲ ᱾
ᱴᱟᱹᱶᱜᱤ ᱠᱷᱚᱱ ᱵᱚᱱ ᱩᱰᱟᱹᱣ ᱚᱰᱚᱠᱮᱱᱟ
ᱡᱟᱹᱛᱤ ᱵᱤᱨᱟᱹᱫᱽ ᱨᱮᱵᱚᱱ ᱧᱟᱯᱟᱢ ᱨᱩᱣᱟᱹᱲᱮᱱᱟ ᱾
ᱟᱵᱚ ᱡᱟᱹᱛᱤ ᱥᱟᱶᱛᱟ ᱠᱷᱚᱱ ᱫᱚ ᱵᱟᱵᱚᱱ ᱥᱟᱦᱟᱜ
ᱥᱩᱞᱩᱠ ᱨᱮᱵᱚᱱ ᱛᱮᱦᱮᱱ ᱵᱟᱵᱚᱱ ᱦᱟᱞᱮᱰᱷᱟᱞᱮᱜ ᱾
ᱫᱚᱥᱟᱨ ᱡᱟᱱᱟᱢ ᱪᱟᱸᱫᱚ ᱱᱤᱪᱷᱮᱧ ᱱᱮᱦᱚᱨᱟᱭᱟ
ᱟᱹᱵᱤᱱ ᱤᱫᱤᱛᱮ ᱤᱧ ᱫᱩᱧ ᱡᱟᱱᱟᱢᱚᱜ ᱜᱮᱭᱟ ᱾
ᱠᱩᱰᱩᱨ ᱠᱩᱰᱩᱨᱤᱧ ᱮᱱᱮᱡ ᱥᱮᱨᱮᱧ ᱡᱚᱝᱼᱟ
ᱟᱹᱵᱤᱱ ᱠᱚᱞᱮᱨᱮ ᱤᱧᱫᱩᱧ ᱛᱟᱦᱮᱱ ᱜᱮᱭᱟ ᱾
***
